Rev 11 | BJR | STEP | Miqí qímasoofanoo moó fannoo aniréenoo nimanímaru kannapuna qíminoo qinau. Anée maaná máree óoruree Yeerusareenni mári maqana Ánutuna náaquqara amaana maqa faqa tatúfira qáinda faqa amanamásee qáfamasee ákara rúa. Mi-amaana maqánaki innaaru qímariasa Yísuna ufamau fímariasa mináindi márianara misá faqa nísaana rúmasee ákara rúa.

Revelation of John 11

Ánutuna márirana qáfamasee qu fásiqaqanda.

1 Miqí qímasoofanoo moó fannoo aniréenoo nimanímaru kannapuna qíminoo qinau. Anée maaná máree óoruree Yeerusareenni mári maqana Ánutuna náaquqara amaana maqa faqa tatúfira qáinda faqa amanamásee qáfamasee ákara rúa. Mi-amaana maqánaki innaaru qímariasa Yísuna ufamau fímariasa mináindi márianara misá faqa nísaana rúmasee ákara rúa. 2 Amaana máqa naambeéqai sía amanamándee ákara rúa miná aamína máqannaasaindi ánaamurundi máridanoo. Misá qaara fasiqa níku nísauku taikásee quqoona faqa qaara quqoona faqa náaquqara máqusa Yeerusaree máqusa anirée níkunnai rafáaqafúseefaranoo. 3 Mi-kamúqoo mi-aukuanná qinée Ánutusa qiní ufa kooroo qímaria fasiqaqanda soofaara qamunna afisíraqanda niqiqáanaqa qiní ufa maqásaa máriasaki kooroo ifáranoo. Miqandá núqu kooroo ímariaqandee qínoo máridanoo.

4 Miqandá aiqáma maqa maaqasaa karaambáiqa Yísuna óorisaaqaara qóoma miqíraqanda máridaqa. 5 Faiqí akaqáusa miqandá náruannee qímasaafanoo miqandá nóokinaa idá fannoo naru taikáidanoo dóo miqímasaifanoo miqandá náruanee qínausa kúqu taikéefaranoo. 6 Ánutufa mi-kooroo ira fasiqaqandá afeeka níminaqa Ánutuna ufa maqásaaqaraasa qímannimi marínna kamuqoo innaarúna ititásaifanoo aaku sía rúannoo. Mi-kamúqoo Ánutufa afeeka níminaqa aiqáma nammari maa-maqa maaqána afaaqasása mári nammarisa nári nídiranannai nári iriséeqa arusáifanoo fidíkaika káimmíannoo. Mi-afeekánannai nári kai irisée maqá áukarasáifanoo mandáinaina óosana óosana kambíqeenoo faiqí ánaasee nipatasáa nárinoo aupúrarana nímiannoo.

7 Mi-koorooira fasiqaqandá Ánutuna ufa maqásaa fasiqa aiqáma qímannimí taikásaifanoo maqá ámeemaanai madikasáa rakísirafa káasau aandau fannoo madikakíqari ururée dóo miqandá faqa rákuannoo. Rákidanoo miqandá kuqá narusáinaqa miqandá irí Yeerusaree máqusa qámbaana akooqóo márifaranoo. Óoqai miqóo kai mi-maqusánaki karaambáiqa aunírira saqarisaa pirímmannai áriqau. Mi-maqusána áuqu Yeerusaree márinau. Mandóosana máree marú máqusana kíkiqammusidaqa Soodooma faqa Isipa faqee qídaqa. Mi-kooroo ira fasiqaqandá irí Yeerusaree máqusa qámbaana márifaqa aiqáma firaa máqannaasa faqa káqikaa máqannaasa faqa aiqáma ánaamuru máriasa faqa aiqáma ufa qímariasa faqa miqandá irí qaaramoo fáasaana faqa moo fáasaana átisaa faqa miqandá irí qáfaifanoo níkundarara qáoo qímasaifanoo káqi máriannoo.

10 Aiqáma maqásaaqaraasa miqandá kúqiranara irisée asasammásee qoomáqa suqásee námasee susú ímarifanoo aináina narí ámi narí ámidaqa miqandára maaqí qifáranoo miqandára maasá maqásaaqaraasa aupúrarana qímimariaqanda dóo kúqiqee qímasee asasifáranoo. 11 Qaaramoo fáasaana áiqaramáfinanoo Ánutufinnaindari kásimari aidoofa qumuréenoo miqandá iríki kéeqafinaqa kásiqa fíndififaqa aiqámausa miqandá níqafeeínausa níndafeeqa káaqa rufíeefaranoo. 12 Mi-tamummaqara fasiqaqandá fíndi fífaqa innaarúnaindaraa ufa moó fannoo maaqí qímasee miqandá qímannimiannoo ínneeqara dóo maí innaarúnai úruaqa qífanoo asuru fannoo miqandá namuqáa aiqámausa nífusaa mara uqéereeqeenoo innaarúnai quqáannoo. 13 Miqandá múru quqásainanoo miqóo kai maqá firaaqóo uqanna kásinoo Yeerusaree máqusaki mári maqáusa moómoo rambáirinoo áqufuannoo. Faiqí séefeena tauséenna (7,000) moómoo uqanna minakí kúqifaranoo. Moómoo uqanna núkudara foora faiqí ánaasee kúqifaranoo, moómoo káqi márifaranoo. Káqi márinausa miná qáfamaseeqa quándakiqa innaarúnai mári Ánutuna afeeka amooqifáranoo. (Qinée Yoohaneesa mi-aiqama ainainná innaarúnai máridaqa qáfaafannana.)

14 Dóo indaarúqaaqanda mandáinaina dóo aru taikéenoo, moodáa kai dauní aniráannoo.

Ukeena fuaqámmaree dínni taikásee dínni aní moodáa fuaqásee dóo dínni ani qaaraíkufa.

15 Qinée Yoohaneesa qífu pisipasamándoofaqa innaarúnai máridaqa qáfaafananoo qangiroo moó fannoo ínaaqianaafa narí ukeena fuaqánau. Fuaqásoofanoo innaarúnai mári úfafa maaqí qímasee firaa kari kooroo inau. Dóo maqee maaqóoqari maqásaa rakísira afeeka maasá karaambáiqa faqa narí ásauku mundíranaindi faqa máridanoo mifá náaru náaru miná rakísida máriannoo. 16 Mi-ufána qíma taikásoofanoo faiqí úriqararausa Ánutuna ufa írira qaari fíqu fíqu iqá márusa nóorindari maqásaa áqufufaqa Ánutuna amooqíqa qiqau.

17 Óo Karaambáiqa Ánutu aiqámausa úriqararafa firaafá anée máridana óoqai márunafa maqee márianafa. Dóo anée aneenná firaa afeeka kooroomásee maqásaaqaraasa rakísi nímaqee maríannanara maasá minára aní dúfi dúfi qímamaqaidaqa.

18 Aníara níkooqee mari máqannaasa aníara áanooqirafa qumbiqárausa máriafana aní Ánutuna áanooqira áukuana nímirafa dóo ani máridanoo. Kúqirausa fíndifu másee mandúfa nímira áukuana dóo ani máridanoo.

Aní aináinira fasiqa tamummáqarausa misá kadáapirirana ákiaqara nímira áukuana dóo animáridanoo.
Aiqáma fasiqa anaasee úriqararausa faqa káiqeesa faqa aní ufara rufíaida náaquqaida mi-maú fímarisa faqa misá kadáapirirana ámiqira ákiaqara nímira áukuana dóo animáridanoo.
Maa-maqa maaqána máriasa kurídi maríasa misá kurídira áukuana dóo animáridanoo.
19 Miqí qímasee úriqararausa Ánutuna amooqímasoofaqa qinée quándaki qáfaafananoo Ánutuna amaana maqá innaarúnai márufa kooqí atúafufaqa qáfaqiafana. Mi-amaana maqánaki Ánutuna faqa faiqí faqa moodáanakikira ufa bookísara foora áuquqoofaqa márufaqa qáfaqiafana. Mi-bookisánaki Ánutuna ufa óonisaa ákararirafa Mooseena óoqai ámufa máru bookisana qáfaqiafana. Qinée qáfaafananoo aakuasáa úqinoo innaarúnai qínoo maqá kásinoo firaa pupusamu áqufinau.