1Cor 2 | BOJ | STEP | O was qu, e nami niŋgi qa bosim Qotei aqa anjam merŋgoqnem bati deqa e anjam kokba powo tamo naŋgi mareqnub qaji di niŋgi merŋgosai.

1 Corinthians 2

Pol a Korin naŋgo areqalo Yesus qa siŋgilateqnub qaji deqa anjam marej

1 O was qu, e nami niŋgi qa bosim Qotei aqa anjam merŋgoqnem bati deqa e anjam kokba powo tamo naŋgi mareqnub qaji di niŋgi merŋgosai. 2 E endegsi are qalem. E nuŋgo ambleq di sosiyqa e Yesus Kristus qa segi niŋgi merŋgoqnqai. A ŋamburbasq di moiej anjam di segi niŋgi merŋgoqnqai. E anjam bei niŋgi merŋgwasai. E degsi are qalem. 3 Ariya e nuŋgo ambleq di sosimqa e siŋgila saiqoji soqnem deqa e ulaugetosim ginda gindaŋoqnem. 4 Anjam e palontoqnem qaji di e powo tamo naŋgo kumbra na palontosai. E ijo segi powo kobaquja na palontosai. Yim dena niŋgi are bulyqajqa e deqa are qalosai. E Qotei aqa Mondor aqa siŋgila niŋgi osorŋgoqnem. 5 Di kiyaqa? Mandam qaji tamo naŋgo powo na niŋgi Kristus qa nuŋgo areqalo siŋgilato uge. Niŋgi Qotei aqa siŋgila na Kristus qa nuŋgo areqalo siŋgilatqajqa deqa osim anjam palontoqnem.

Qotei aqa Mondor na iga areqalo bole ti powo ti egeqnu

6 Bole, tamo naŋgi Qotei aqa kumbra qa tulaŋ siŋgilaeqnub qaji naŋgi iga na anjam minjreqnam quoqnsib dena naŋgi powo bole ejunub. Ariya powo di mandam qaji tamo naŋgo powo sai. Powo di mandam qaji tamo kokba padalqa gamq di unub qaji naŋgo powo sai. 7 Iga powo deqa mare mare laosaieqnum. Iga Qotei aqa segi powo qa mareqnum. Qotei a nami mandam atosaisosiqa aqa powo dena a na iga a ombla laŋ qureq di sqajqa gam gereiyetgej. Aqa powo di nami ulitesoqnej. 8 Aqa powo di mandam qaji tamo kokba naŋgi kalil poinjrosaieqnu. Naŋgi poinjrej qamu naŋgi Tamo Koba Yesus laŋ qureq di unu qaji a osib ŋamburbasq di qamosai qamu. 9 Agi Qotei aqa anjam bei nami endegsib neŋgreŋyeb unu, “Laŋ qure qa iŋgi iŋgi di tamo naŋgo ŋamdamu na unosaieqnub. Naŋgo dabkala na quosaieqnub. Deqa naŋgi iŋgi iŋgi deqa are qalosaieqnub. Ariya iŋgi iŋgi di Qotei na tamo uŋgasari a tulaŋ qalaqalaiyeqnub qaji naŋgi gereiyetnjrej unu. Deqa mondoŋ naŋgi oqsib oqab.” 10 O was qu, anjam di nami uliesonaqa Qotei na aqa Mondor aqa wau na babtosiq mergej. Mondor a iŋgi iŋgi kalil qa qalie. Qotei aqa areqalo kalil uliejunu qaji di Mondor a qalie. 11 Tamo bei a tamo bei aqa areqalo qalieqa keresai. Aqa segi mondor aqa are miligiq di unu qaji a segi aqa areqalo qalie. Dego kere tamo bei a Qotei aqa areqalo qalieqa keresai. Qotei aqa Mondor a segi Qotei aqa areqalo qalie. 12 O was qu, iga mandam qaji mondor osai. Iga Mondor Bole Qotei aqaq dena bej qaji di em. Deqa iŋgi iŋgi kalil Qotei na iga egeqnu qaji di Mondor na iga osorgeqnu deqa iga qalie. 13 Iga iŋgi iŋgi deqa anjam marsim laqnum. Iga mandam qaji tamo naŋgo powo osim dena anjam marosaieqnum. Qotei aqa Mondor na iga powo egeqnu dena iga anjam mareqnum. Qotei aqa Mondor aqa anjam di iga na tamo naŋgi Qotei aqa Mondor ti unub qaji naŋgi segi minjreqnum.

14 Ariya tamo naŋgi Qotei aqa Mondor ti sosai qaji naŋgi laŋ qa iŋgi iŋgi di oqa keresai. Di kiyaqa? Naŋgi mareqnub, “Iŋgi iŋgi di bolesai. Di nanari tamo naŋgo iŋgi.” O was qu, iŋgi iŋgi di iga Qotei aqa Mondor aqaq dena eleŋeqnum. Deqa tamo naŋgi Qotei aqa Mondor ti sosai qaji naŋgi iŋgi iŋgi deqa poinjrqa keresai. Tamo naŋgi Mondor ti unub qaji naŋgi segi iŋgi iŋgi deqa poinjrqa kere. 15 Deqa tamo naŋgi Qotei aqa Mondor ti unub qaji naŋgi laŋ qaji iŋgi iŋgi kalil geregere pegiyeqnub. Ariya tamo bei na naŋgo kumbra pegiyqa keresai. 16 Agi Qotei aqa anjam bei nami endegsib neŋgreŋyeb unu, “Tamo yai a Qotei aqa areqalo qalieqa kere? Osim a gam osoryqa kere? Tamo dego bei sosai.” Ariya was qu, iga mandam qaji tamo sai. Kristus aqa areqalo gagoq di unu deqa iga Qotei aqa areqalo qalieqa kere.