1Th 4 | BOJ | STEP | O was qu, kumbra bole kalil Qotei a tulaŋ areareteqnu qaji di iga nami niŋgi osorŋgoqnem agi niŋgi dauryeqnub. Ariya bini iga nuŋgo are miligi siŋgilatetŋgosim Tamo Koba Yesus aqa ñam na endegsi merŋgwom. Niŋgi kumbra di olo torei siŋgilatosib yoqniye.

1 Thessalonians 4

Niŋgi sambala kumbra kalil torei uratiye

1 O was qu, kumbra bole kalil Qotei a tulaŋ areareteqnu qaji di iga nami niŋgi osorŋgoqnem agi niŋgi dauryeqnub. Ariya bini iga nuŋgo are miligi siŋgilatetŋgosim Tamo Koba Yesus aqa ñam na endegsi merŋgwom. Niŋgi kumbra di olo torei siŋgilatosib yoqniye.

2 Anjam kalil iga nami Tamo Koba Yesus aqa ñam na niŋgi merŋgoqnem qaji di niŋgi segi qalie. 3 Qotei aqa areqalo agiende. Niŋgi nuŋgo segi jejamu osib Qotei yekritosib aqa segi kumbra boleq di sosib dauryoqniye. Osib sambala kumbra kalil torei uratiye. 4 Niŋgi nuŋgo segi so geregere taqatosib areqalo uge uge nuŋgo are miligiq di unu qaji di uratekritiye. Niŋgi degyqab di niŋgi kumbra bole ti kumbra kalil Qotei a tulaŋ areareteqnu qaji de ti dauryoqnqab. 5 Yimqa nuŋgo areqalo uge uge dena niŋgi titŋgimqa sambala kumbra tamo naŋgi Qotei qaliesai qaji naŋgi yeqnub di niŋgi dego dauryo uge. 6 Niŋgi na Kristen was qu naŋgi kumbra uge bei enjraib. Osib naŋgi gisaŋnjrsib naŋgo ŋauŋ ugetnjraib. Tamo Koba Qotei a na tamo naŋgi kumbra deqaji yeqnub qaji naŋgi awai uge enjrqas. Iga nami niŋgi siŋgila na degsi merŋgoqnem. 7 Qotei a na iga kumbra jigat yqajqa deqa metgosai. Iga gago segi jejamu osim Qotei yekritosim aqa segi kumbra boleq di sosim dauryqajqa deqa metgej. 8 Deqa tamo bei a gago anjam endi gotraŋyqas di a tamo naŋgo anjam gotraŋyosai. A Qotei agi aqa Mondor Bole niŋgi eŋgeqnu qaji aqa anjam gotraŋyqo.

Niŋgi qalaqalaiyo kumbra olo torei siŋgilatosib yoqniye

9 E na niŋgi Qotei aqa tamo uŋgasari naŋgi qalaqalainjrqajqa deqa anjam bei neŋgreŋyqasai. Di kiyaqa? Qotei na qalaqalaiyo kumbra di niŋgi osorŋgekritej koboqo. 10 Agi niŋgi na Kristen tamo uŋgasari Masedonia sawaq di unub qaji naŋgi qalaqala-injreqnub. Ariya was qu, iga na nuŋgo are siŋgilatetŋgimqa niŋgi qalaqalaiyo kumbra di olo torei siŋgilatosib yoqniye. 11 Osib lawo na sosib nuŋgo segi iŋgi iŋgi taqatosib nuŋgo segi baŋ na wauoqniye. Anjam di iga nami niŋgi merŋgoqnem. 12 Niŋgi kumbra bole degsib yoqnibqa niŋgi iŋgi bei qa truquiŋgoqnqasai. Deqa qala qaji tamo naŋgi nuŋgo kumbra di unsib deqa tulaŋ areboleboleinjrqas.

Tamo Koba Yesus a olo bosim tamo moreŋo qaji ti tamo ŋambile unub qaji naŋgi ti turtnjrim naŋgi a koba na sqab

13 Ariya was qu, tamo uŋgasari nami moreŋeb qaji naŋgi mondoŋ kumbra kie turqab di niŋgi qalieqajqa deqa merŋgwom. Tamo uŋgasari Qotei qaliesai qaji naŋgi subq na tigelqa bati qa tariŋosaieqnub. Deqa naŋgo was bei a moiqas di naŋgi tulaŋ are ugeinjrqas. Ariya niŋgi degsib tulaŋ are ugeiŋgaim deqa anjam endi merŋgwom. 14 Yesus a moisiqa olo subq na tigelej anjam di iga gago areqaloq di siŋgilatejunum. Deqa iga qalieonum, mondoŋ Qotei a Yesus aqa siŋgila na Kristen tamo uŋgasari nami moreŋeb qaji naŋgi olo subq na tigeltnjrqas. Yimqa naŋgi Yesus dauryosib koba na olo mandamq aiqab.

15 Iga Tamo Koba Yesus aqa anjam niŋgi endegsi merŋgwom. Mondoŋ Tamo Koba Yesus a olo mandamq aioqnimqa iga tamo uŋgasari mandamq endia ŋambile unum qaji iga na tamo uŋgasari nami moreŋeb qaji naŋgi buŋnjrsim namo oqsim Yesus itqasai. 16 Qotei a anjam siŋgila koba marimqa laŋ aŋgro matu a leleŋoqnimqa Qotei na gul anjamqas. Yimqa Tamo Koba Yesus a laŋ qure uratosim mandamq aioqnimqa tamo nami Yesus qa naŋgo areqalo siŋgilatosib moreŋeb qaji naŋgi namo subq na tigelqab. 17 Tigelabqa bati deqa iga tamo uŋgasari mandamq endia ŋambile unum qaji iga ti naŋgi ti turosim koba na laŋbiq na oqsim Tamo Koba Yesus itqom. Osim a ti gaigai sqom. 18 Deqa niŋgi na anjam di Qotei aqa tamo uŋgasari naŋgi minjroqnsibqa dena naŋgo are siŋgilatetnjroqniye.