Act 14 | BOJ | STEP | Ariya Pol wo Barnabas wo naŋgi Aikoniam qureq di brantosib Juda naŋgo Qotei tal miligiq gileb. Gilnabqa tamo uŋgasari naŋgi koroesonabqa tigelosib Qotei aqa anjam palontosib minjroqneb. Minjreqnabqa tamo uŋgasari tulaŋ gargekoba Juda ti Grik ti naŋgo aiyel anjam dena are qametnjrnaqa naŋgi are bulyosib Yesus qa naŋgo areqalo siŋgilateb.

Acts 14

Barnabas wo Pol wo naŋgi Aikoniam qureq dia Qotei aqa anjam palontosib minjroqneb

1 Ariya Pol wo Barnabas wo naŋgi Aikoniam qureq di brantosib Juda naŋgo Qotei tal miligiq gileb. Gilnabqa tamo uŋgasari naŋgi koroesonabqa tigelosib Qotei aqa anjam palontosib minjroqneb. Minjreqnabqa tamo uŋgasari tulaŋ gargekoba Juda ti Grik ti naŋgo aiyel anjam dena are qametnjrnaqa naŋgi are bulyosib Yesus qa naŋgo areqalo siŋgilateb. 2 Ariya Juda tamo qudei Pol wo Barnabas wo naŋgo anjam quqwa urateb qaji naŋgi na sawa bei bei qaji tamo naŋgo are ugetetnjrnabqa naŋgi tamo uŋgasari Yesus qa naŋgo areqalo siŋgilateb qaji naŋgi qa ugeosib misiliŋyoqneb. 3 Deqa naŋgi aiyel Aikoniam qureq dia sokobaiyosib Tamo Koba Qotei a tamo uŋgasari naŋgi qa are tulaŋ boleiyeqnu anjam di minjroqneb. Naŋgi aiyel ulaosai. Tamo Koba Qotei na naŋgi aiyel siŋgila enjreqnaqa naŋgi maŋwa gargekoba yoqneb. Naŋgo kumbra dena Tamo Koba Qotei na tamo uŋgasari naŋgi osornjroqnej, naŋgo aiyel anjam di bole. 4 Ariya Aikoniam qureq dia tamo uŋgasari naŋgi Pol wo Barnabas wo naŋgo anjam quoqnsib poeleŋeb. Qudei naŋgi Juda naŋgi daurnjreb. Qudei naŋgi Pol wo Barnabas wo naŋgi daurnjreb. 5 Onaqa Grik tamo qudei ti Juda tamo qudei ti naŋgo tamo kokba ti naŋgi aiyel qa minjiŋ oqetnjrnaqa maroqneb, “Iga naŋgi aiyel meniŋ na ñumsim moiotnjrqom.”

Barnabas wo Pol wo naŋgi Likonia sawaq dia Yesus aqa anjam bole minjre minjre laqneb

6 Degsib mareqnabqa naŋgi aiyel qusibqa jaraiosib Likonia sawaq gileb. Gilsib sawa dia Listra qure ti Derbe qure ti qure qudei dego naŋgoq di brantoqneb. 7 Brantoqnsib dia Yesus aqa anjam bole naŋgi minjre minjre laqneb.

8 Ariya Listra qureq dia tamo bei ai miligiq na siŋga qandamo ŋambabej qaji soqnej. A nami walwelosaioqnej. Aqa siŋga siŋgila saiqoji. Awogaigaisoqnej. 9 Bati deqa Pol na Qotei aqa anjam palontsiq tamo uŋgasari naŋgi minjreqnaqa tamo di a quoqnej. Onaqa Pol na tamo di koqyosiqa aqa areqalo unej aqa areqalo qujai Qotei na a boletbqa kere. 10 Degsi unsiq deqa tamo di metosiq minjej, “Ni tigel.” Minjnaqa a tigeloqujatosiq walwelej.

11 Pol a kumbra di yonaqa tamo uŋgasari tulaŋ gargekoba naŋgi unsibqa naŋgo segi Likonia anjam na tulaŋ koba leleŋoqnsib maroqneb, “Niŋgi uniye. Gago qotei naŋgi tamo bulyosib gagoq bonub.” 12 Naŋgi degsib are qalsib deqa Barnabas minjeb, “Ni gago qotei Sus.” Ariya Pol a Qotei aqa anjam plaltosiq maroqnej deqa naŋgi na minjeb, “Ni gago qotei Hermes.” 13 Qure polomq dia naŋgo qotei Sus aqa atra tal soqnej. Deqa atra tamo gate a na bulmakau qudei osiq ŋam so na walatnjrsiqa Pol wo Barnabas wo naŋgi aiyel atrainjrqa marsiqa tamo uŋgasari gargekoba joqsiq naŋgi koba na qure polomq gileb.

14 Onaqa Yesus aqa anjam maro tamo aiyel Barnabas wo Pol wo naŋgi di qusibqa are tulaŋ gulubeinjrnaqa naŋgo segi gara bumbraŋyosib gurgur ti tamo uŋgasari naŋgo ambleq aisib tulaŋ koba leleŋosib minjreb, 15 “O tamo uŋgasari, niŋgi kiyaqa kumbra endi yeqnub? Aqo aiyel mandam tamo, niŋgi ti kere. Aqo aiyel na Yesus Kristus aqa anjam bole niŋgi merŋgeqnum. Niŋgi are bulyosib qotei gisa gisaŋ endi torei uratosib Qotei ŋambile gaigai unu qaji a qa nuŋgo areqalo siŋgilatqajqa deqa aqo aiyel na Yesus Kristus aqa anjam bole niŋgi merŋgeqnum. Qotei agi a na laŋ ti mandam ti yuwal ti iŋgi iŋgi kalil ti gereiyej. 16 Bole, nami Qotei na sawa bei bei qaji tamo naŋgi uratnjreqnaqa naŋgi naŋgo segi areqalo dauryosib laqneb. 17 Bati deqa Qotei a niŋgi qa uliosaioqnej. Niŋgi a qa qalieqajqa deqa a bati gaigai niŋgi geregereiŋgoqnej. A laŋ goge dena awa eŋgeqnaqa iŋgi uyo kalil aqa bati qa melieqnaqa niŋgi bati gaigai uyoqnsib areboleboleiŋgoqnej.” 18 Onaqa tamo uŋgasari naŋgi Pol wo Barnabas wo naŋgo anjam di qusib quosaibulosib olo minjreb, “Niŋgi gago qotei.” Degsib minjroqnsib naŋgi aiyel atrainjrqajqa tulaŋ siŋgilaeqnab naŋgi na saidnjroqneb.

19 Onaqa Juda tamo qudei naŋgi Antiok dena ti Aikoniam dena ti walwelosib Listra qureq beb. Bosib dia tamo uŋgasari naŋgo are ugetetnjrnabqa naŋgi tigelosib Pol meniŋ na qaleb. Osib a giriŋyosib gilsib qure qalaq di ateb.Naŋgi are qaleb, “A moiqo.” 20 Onaqa tamo uŋgasari Yesus qa naŋgo areqalo siŋgilateb qaji naŋgi bosib Pol a mandamq di ŋeiesonaq a kaiŋyosib tigelesonabqa a tigelosiqa olo qure miligiq aiej. Nebeonaqa a na Barnabas osiq ombla na walwelosib Derbe qureq gileb.

Barnabas wo Pol wo naŋgi na tamo uŋgasari Yesus qa naŋgo areqalo siŋgilateb qaji naŋgo are siŋgilatetnjroqneb

21 Naŋgi aiyel Derbe qureq di sosib Yesus aqa anjam bole plalteqnabqa tamo uŋgasari tulaŋ gargekoba naŋgi qusib are bulyoqnsib Yesus qa naŋgo areqalo siŋgilatoqneb. Bunuqna naŋgi aiyel olo puluosib qure kalil naŋgi nami laqneb qaji deq olo giloqneb. Listra qure ti Aikoniam qure ti Antiok qure ti deq giloqneb. 22 Naŋgi aiyel degsib giloqnsibqa tamo uŋgasari Yesus dauryoqneb qaji naŋgo are siŋgilatetnjroqnsib minjroqneb, “Niŋgi Yesus qa nuŋgo areqalo siŋgilatosib soqniye. Bole, niŋgi gulube gargekoba iteleŋoqnqab. Di uŋgum. Gulube nuŋgoq boqnibqa Qotei a nuŋgo Mandor Koba sosim niŋgi taqatŋgoqnqas.” 23 Ariya qure kalil naŋgi aiyel nami laqneb qaji deq olo giloqnsibqa Kristen gate ateleŋoqneb. Osib iŋgi ti ya ti uratosib naŋgi qa pailyosib Tamo Koba Yesus agi naŋgi a qa nami naŋgo areqalo siŋgilateb qaji aqa baŋq di ateb.

Barnabas wo Pol wo naŋgi Antiok qure Siria sawaq di unu qaji deq olo aieb

24 Bunuqna Barnabas wo Pol wo naŋgi aiyel Pisidia sawa amble potosib walwelosib Pamfilia sawaq di branteb. 25 Brantosib Perga qureq aisib dia Yesus aqa anjam palontosib minjroqneb. Dena tigelosib Atalia qureq aieb. 26 Aisib dena qobuŋ gogetosib aisib Antiok qure agi nami naŋgi aiyel dena tigelosib walweleb qaji di olo branteb. Dia nami Yesus aqa tamo uŋgasari naŋgi koroosib Qotei na naŋgi aiyel aqaryainjrim siŋgila na wauoqnqajqa deqa Qotei pailyosib naŋgi aiyel qariŋnjrnab gileb. Ariya naŋgi aiyel wau di kobotosib puluosib qure deq olo aieb. 27 Aisib Yesus aqa tamo uŋgasari naŋgi koroinjrsibqa naŋgi aiyel qure qureq dia laqnsibqa Qotei na naŋgi aqaryainjreqnaqa naŋgi kumbra kalil yoqneb qaji deqa naŋgi sainjroqneb. Sainjroqnsib endegsib minjroqneb, “Qotei na sawa bei bei qaji tamo naŋgi dego gam waqtetnjreqnaqa naŋgi are bulyoqnsib Yesus qa naŋgo areqalo siŋgilateqnub.” 28 Ariya naŋgi aiyel Antiok qureq dia tamo uŋgasari Yesus dauryoqneb qaji naŋgi koba na sokobaiyesoqneb.