Eph 4 | BOJ | STEP | E Pol. E Tamo Koba Yesus aqa wau ojeqnum deqa e tonto talq endi unum. Qotei na niŋgi a dauryqa osiq metŋgej deqa e na nuŋgo are tigeltetŋgitqa niŋgi kumbra a tulaŋ areareteqnu qaji di dauryosib walweloqniye.

Ephesians 4

Kristen tamo naŋgi Kristus aqa jejamu qujai

1 E Pol. E Tamo Koba Yesus aqa wau ojeqnum deqa e tonto talq endi unum. Qotei na niŋgi a dauryqa osiq metŋgej deqa e na nuŋgo are tigeltetŋgitqa niŋgi kumbra a tulaŋ areareteqnu qaji di dauryosib walweloqniye. 2 Osib niŋgi Kristen tamo uŋgasari naŋgo sorgomq di geregere sosibqa naŋgi lawo kumbra enjroqniye. Naŋgi niŋgi une bei eŋgibqa niŋgi kamba olo naŋgi qa urur minjiŋ oqaiq. Niŋgi olo naŋgi qalaqalainjroqnsib gulube naŋgi na niŋgi eŋgeqnub qaji di qoboiyetnjroqniye. 3 Osib niŋgi nuŋgo Kristen was kalil naŋgi koba na are qujaitosib lawo na sqajqa siŋgilaoqniye. Kumbra di agi Qotei aqa Mondor na iga osorgeqnu. 4 Iga kalil tamo qujaionum. Deqa iga Kristus aqa jejamu qujai. Iga kalil Mondor qujai ejunum. Deqa Qotei na niŋgi iŋgi qujai qa tariŋqa osiq metŋgej. Iŋgi qujai di agi laŋ qaji iŋgi bole bole a na mondoŋ iga egwas qaji. 5 Tamo Koba qujai dego unu agi Kristus. Iga a qa qujai gago areqalo siŋgilateqnum. Iga kalil yanso qujai em. 6 Qotei qujai unu. A gago kalil qa Abu. A na qujai tamo uŋgasari kalil naŋgi taqatnjroqnsiqa naŋgo ambleq di waueqnu.

7 Kristus a na iga iŋgi tulaŋ kobaquja egej. Iŋgi agiende. Aqa wau na Qotei a iga kalil qa are tulaŋ boleiyosiq iga eleŋej. 8 Agi Qotei aqa anjam bei nami endegsib neŋgreŋyeb unu,

“Qotei a tonto tamo kalil naŋgi eleŋosiqa joqsiq laŋ goge oqej.
Oqsiq dia tamo uŋgasari naŋgi iŋgi bole bole enjrej.”
9 O was qu, Kristus a laŋ goge oqej anjam di aqa utru agiende. A mati oqosai. A mati moio qureq aiej. 10 Aisiq dena olo tulaŋ goge oqsiq laŋ qure kalil buŋyekritosiq torei oqej. A degyej. Di kiyaqa? A na iŋgi iŋgi kalil ekritosim keretqajqa deqa. 11 Deqa a segi qujai na iga wau segi segi egeqnu. Wau agiende. Tamo qudei naŋgi a na qariŋnjreqnaqa naŋgi aqa anjam maroqnsib laqnub. Tamo qudei naŋgi a na wau enjreqnaqa naŋgi aqa medabu oqnsib aqa anjam babteqnub. Tamo qudei naŋgi a na wau enjreqnaqa naŋgi Kristus aqa anjam bole palontosib laqnub. Tamo qudei naŋgi a na wau enjreqnaqa naŋgi na Kristen tamo uŋgasari naŋgi taqatnjroqnsib Qotei aqa anjam plaltosib minjreqnub. 12 Iga Qotei aqa segi tamo uŋgasari unum deqa Kristus a na iga aqaryaigimqa iga aqa wau geregere ojqajqa deqa are qalsiq wau segi segi egeqnu. Kristus aqa segi tamo uŋgasari naŋgi aqa jejamu qujai unub deqa iga naŋgi qa wauetnjroqnqom. Yimqa gago wau dena naŋgi siŋgila oqnsib so bole sqab. 13 Kristus aqa wau di gilsi gilsim bunuqna iga Kristen tamo uŋgasari kalil iga a qa gago areqalo siŋgilaboletosim koba na are qujaitosim sqom. Sosim bati deqa iga kalil Qotei aqa Ŋiri qa bole qalieqom. Kumbra dena iga tulaŋ boleoqnsim siŋgilaoqnsim Kristus aqa segi kumbra bole keretosim dauryqom. 14 Deqa iga olo aŋgro kiñilala bul sqasai. Tamo qudei naŋgi gisaŋ kumbra ti maqu kumbra ti tulaŋ qalieosib yeqnub. Deqa naŋgi gisaŋ anjam koba marsib laqnub. Jagwa na yuwal tigelteqnaqa oqe aieqnu dego kere anjam dena tamo qudei naŋgo areqalo niñaqyetnjreqnu. Ariya iga aŋgro kiñilala bul sqasai deqa anjam dena gago areqalo niñaqyetgwasai. 15 Deqa iga naŋgo anjam di quetnjrqasai. Iga qalaqalaiyo kumbra dauryoqnsim anjam bole segi maroqnqom. Osim dena iga kalil boleoqnsim siŋgilaoqnsim gago Gate Koba Kristus beteryesqom. 16 Iga kalil Kristus aqa jejamu qujai deqa iga qudei aqa baŋ bul. Iga qudei aqa siŋga bul. Iga qudei aqa ŋamdamu bul. Deqa a na aqa segi baŋ ti siŋga ti ŋamdamu ti jejamu ti kalil turtoqnsiqa qujaitejunu. Deqa iga kalil Kristus beteryoqnsim aqa wau geregere ojoqnsim aqa qalaqalaiyo kumbra dauryoqnqom. Kumbra dena iga boleoqnsim siŋgilaoqnqom.

Niŋgi kumbra bunuj dauryosib areqalo bunujq di soqniye

17 Deqa e Tamo Koba Yesus aqa ñam na niŋgi siŋgila na endegsi merŋgwai. Niŋgi sawa bei bei qaji tamo naŋgo kumbra uge uge olo dauryosib walwelaib. Di kiyaqa? Naŋgo areqalo tulaŋ niñaqejunu deqa. 18 Naŋgo qalie ti powo ti tulaŋ ambruejunu. Naŋgi tulaŋ nanarioqnsib laqnub. Naŋgo are miligi geteŋejunu. Deqa Qotei aqa ŋambile naŋgoq di sosai. 19 Naŋgi kumbra uge uge yoqnsib ariya naŋgi deqa jemainjrosaieqnu. Naŋgi torei kumbra ugeq aiejunub. Naŋgi kumbra uge jigat yqajqa are tulaŋ prugnjreqnu.

20 E are qalonum, niŋgi Kristus aqa anjam nami quoqneb. Agi anjam plalto tamo naŋgi na Yesus aqa anjam bole plaltosib merŋgoqneb. E qalie, naŋgi na niŋgi olo sawa bei bei qaji tamo naŋgo kumbra uge olo dauryqajqa deqa merŋgosaioqneb. 22 Nami niŋgi dego so namijq di sosib walweloqneb. So namij dena niŋgi gisa gisaŋgeqnaqa niŋgi kumbra uge uge yqajqa are prugŋgoqnej. Nuŋgo kumbra dena niŋgi padalqa gamq di soqneb. Ariya bini niŋgi so namij di torei uratosib 23 areqalo bunujq di soqniye. 24 Osib dena niŋgi tamo uŋgasari bunuj soqniye. Qotei na niŋgi a bul sqa marsiq deqa nuŋgo so bunuj gereiyetŋgej. Niŋgi qalie, tamo naŋgi so bunujq di unub qaji naŋgo kumbra tulaŋ bole tiŋtiŋo. Naŋgi Qotei aqa segi kumbra boleq di unub.

25 Deqa niŋgi gisaŋ kumbra kalil uratekritosib anjam bole segi Kristen tamo uŋgasari naŋgi minjroqniye. Niŋgi kalil Kristus aqa jejamu qujai deqa niŋgi kumbra degyoqniye. 26 Niŋgi minjiŋ oqimqa ariya niŋgi geregere ŋam atiye. Niŋgi olo une ato uge. Niŋgi urur minjiŋ kobotiye. Niŋgi minjiŋ ti soqnib seŋ aiaiq. 27 Niŋgi urur minjiŋ kobotqasai di niŋgi Satan gam waqtetibqa a na niŋgi olo uneq waiŋgwas. 28 Bajiŋ tamo naŋgi olo bajiŋaib. Naŋgi naŋgo segi baŋ na wauoqnsib dena iŋgi iŋgi oqnsib tamo iŋgi qa truqueqnub qaji naŋgi aqaryainjroqnebe. 29 Niŋgi nuŋgo medabu waqtoqnsib anjam uge uge maroqnaib. Niŋgi anjam bole segi maroqnsib dena tamo naŋgi gulube ti unub qaji naŋgi olo siŋgilatnjroqniye. Yoqnim naŋgi nuŋgo anjam di quoqnib dena Qotei a naŋgi qa are tulaŋ boleiyoqnsim kumbra bole bole enjroqnqas. 30 Niŋgi na Qotei aqa Mondor Bole are gulube yaib. Mondor di Qotei aqa segi toqor. Mondor di a na niŋgi eŋgej. Deqa niŋgi qalieonub, niŋgi aqa segi tamo uŋgasari tiŋtiŋ unub. Mondoŋ Qotei na niŋgi awaiŋgosim sawa boleq di atim bati deqa niŋgi so bole gaigai sqab. Niŋgi di qalieqajqa deqa Qotei na aqa Mondor Bole niŋgi eŋgej. 31 Deqa niŋgi are uge ti minjiŋ ti ŋiriŋ ti qoto ti misiliŋ anjam ti kumbra uge uge ti kalil torei uratiye. 32 Osib nuŋgo Kristen was naŋgi kumbra bole bole enjroqnsib naŋgi qalaqalainjroqnsib naŋgo une kobotetnjroqniye. Qotei a Kristus aqa ñam na nuŋgo une kalil kobotetŋgej deqa niŋgi na kamba olo nuŋgo was naŋgo une dego kobotetnjroqniye.