Rev 16 | BOJ | STEP | Onaqa tamo bei Qotei aqa atra tal miligiq di soqnej qaji a na anjam bei marnaqa e aqa kakoro quem. A tulaŋ koba leleŋosiqa laŋ aŋgro 7-pela naŋgi di endegsi minjrej, “Niŋgi tabir 7-pela Qotei aqa minjiŋ na maqeleŋejunu qaji di bilentib mandamq aiem.”

Revelation of John 16

Laŋ aŋgro naŋgi tabir 7-pela Qotei aqa minjiŋ na maqeleŋej qaji di bilentonab mandamq aiej

1 Onaqa tamo bei Qotei aqa atra tal miligiq di soqnej qaji a na anjam bei marnaqa e aqa kakoro quem. A tulaŋ koba leleŋosiqa laŋ aŋgro 7-pela naŋgi di endegsi minjrej, “Niŋgi tabir 7-pela Qotei aqa minjiŋ na maqeleŋejunu qaji di bilentib mandamq aiem.”

2 Onaqa laŋ aŋgro matu a gilsiqa aqa tabir namo bilentonaqa mandamq aiej. Mandamq ainaqa tamo naŋgi wagme juwaŋ aqa toqor osib aqa sulum biŋiyoqneb qaji naŋgo jejamuq di yu siŋgila kokba tulaŋ uge bumbraŋyeleŋeb.

3 Onaqa laŋ aŋgro namba 2 a olo gilsiqa aqa tabir yuwalq di bilentej. Bilentonaqa yuwal a tamo moio qaji naŋgo leŋ bulej. Onaqa iŋgi iŋgi kalil yuwal miligiq di ŋambile so qaji naŋgi moreŋekriteb.

4 Onaqa laŋ aŋgro namba 3 a kamba gilsiqa aqa tabir bilentonaqa ya jumbum ti ya ti deq aiej. Ainaqa ya kalil leŋ na ugeej. 5 Onaqa laŋ aŋgro bei olo brantej. Laŋ aŋgro di ya kalil taqato qaji laŋ aŋgro. A na endegsi marnaq e quem, “O Qotei, ni bini unum. Ni nami soqnem. Ino kumbra kalil tulaŋ bolequja. Ino jejamuq di une bei saiqoji. Utru deqa ni na tamo naŋgo kumbra uge qa peginjrsim gulube endi naŋgoq qariŋyonum. O Qotei, ino kumbra di tulaŋ boledamu tiŋtiŋo. 6 Tamo naŋgi dena ino medabu o qaji tamo naŋgi ti ino segi tamo uŋgasari naŋgi ti moiotnjreqnab naŋgo leŋ aioqnej. Deqa ni na kamba leŋ anainjronum naŋgi uynub. Keretsim anainjronum.” 7 Onaqa atra bijal a endegsi marnaq e quem, “O Tamo Koba Qotei, siŋgila kalil inoq di unu. Ni na tamo uŋgasari naŋgo kumbra uge uge kalil qa peginjroqnsimqa naŋgi padaltnjreqnum. Ino kumbra di tulaŋ boledamu tiŋtiŋo.”

8 Onaqa laŋ aŋgro namba 4 a gilsiqa aqa tabir seŋq di bilentonaqa Qotei na odonaqa seŋ tulaŋ kaŋkaŋosiqa tamo naŋgo jejamu koitetnjrej. 9 Seŋ aqa ŋamyuo di tulaŋ kaŋkaŋosiq tamo naŋgo jejamu koitetnjrej. Deqa naŋgi Qotei aqa ñam misiliŋyoqneb. Qotei a na gulube di qariŋyej deqa naŋgi aqa ñam misiliŋyoqnsib aqa ñam soqtqa urateb. Uratosib naŋgo are bulyosai.

10 Onaqa laŋ aŋgro namba 5 a gilsiqa aqa tabir bilentonaqa wagme juwaŋ aqa awo jaram kobaq aiej. Ainaqa tamo naŋgi wagme juwaŋ na taqatnjresoqnej qaji naŋgi ambrukobainjrnaq soqneb. Sosib jaqatiŋ tulaŋ koba osib qala bisiriqtoqneb. 11 Naŋgo jaqatiŋ qa ti yu uge kalil naŋgo jejamuq di bumbraŋ-yeleŋeb qaji deqa ti naŋgi tulaŋ minjiŋ oqetnjrnaqa Qotei laŋ qureq di unu qaji a misiliŋyoqneb. Naŋgo kumbra uge uge yoqneb qaji di naŋgi uratosai. Deqa naŋgo are bulyosai dego.

12 Onaqa laŋ aŋgro namba 6 a gilsiqa aqa tabir bilentonaqa Yufretis ya kobaq aiej. Ainaqa ya jeŋosiq mandor kokba naŋgi seŋ oqo sawaq dena bqajqa gam brantej. 13 Onaqa e olo ŋam atsimqa mondor uge qalub unjrem. Mondor uge qalub di balum du du bul. Naŋgi amal uge aqa medabuq na, wagme juwaŋ aqa medabuq na ti, Satan aqa gisaŋ anjam maro tamo aqa medabuq na ti branteleŋeb. 14 Mondor uge qalub dena maŋwa uge uge siŋgila kokba yoqnsibqa mandor kokba sawa sawa kalil taqate-junub qaji naŋgoq giloqnsib minjreqnub, “Niŋgi na nuŋgo qaja tamo kalil koroinjrsib minjribqa tamo uŋgasari naŋgo une qa peginjrqa batiamqa naŋgi qoteleŋqab.” Naŋgi degsib minjreqnub. Qotqajqa bati di agi Qotei siŋgila koba ti unu qaji aqa bati koba.

15 Onaqa Yesus a marej, “Niŋgi quiye. E bajiŋ tamo bul niŋgi qa boqujatqai. Deqa tamo bei a ŋam sosim aqa gara tigsim sqas di a areboleboleiyqas. Di kiyaqa? A yosi laqasai. Deqa tamo uŋgasari naŋgi aqa jemai unqasai.”

16 Ariya mondor uge qalub dena mandor kokba sawa sawa kalil taqatejunub qaji naŋgi joqsibqa Armagedon sawaq dia koroinjreb. Ñam “Armagedon” di Hibru anjam. Aqa utru, “Megido mana.”

17 Onaqa laŋ aŋgro namba 7 a gilsiqa aqa tabir jagwaq di bilentej. Bilentonaqa atra tal miligiq dia tamo bei na anjam marnaqa e aqa kakoro quem. Tamo di a Qotei aqa awo jaram koba jojomq di tigelesoqnej. A tulaŋ koba leleŋosiqa marej, “Gulube kalil di koboonub.” 18 Onaqa minjal ti qatroŋ ti kola anjam ti branteb. Mimiŋ dego brantej. Mimiŋ di tulaŋ kobaquja. Mimiŋ deqaji nami brantosaioqnej. Qotei na Adam gereiyej bati deqa mimiŋ deqaji brantosai dena bosi bosiq agi bini unum. 19 Ariya mimiŋ di brantosiqa Babilon qure koba tulaŋ niñaqyosiqa potoqalubtej. Qure qure kalil dego mimiŋ dena padaleleŋeb. Babilon aqa kumbra tulaŋ ugedamu. Aqa kumbra deqa Qotei a are qalsiqa wain siŋgila koba gambaŋq di qamsiq Babilon anaiyonaq uysiq nanariej. Wain di Qotei aqa minjiŋ koba. 20 Onaqa nui kalil naŋgo so sawa uratosib jaraieleŋeb. Mana kalil dego jaraiosib koboeb. 21 Bati deqa ais oŋgol kokba awa bul aieleŋej. Ais oŋgol di tulaŋ kokba. Ais oŋgol segi segi naŋgo gulube 50 kilogram. Ais di laŋ goge dena tamo naŋgo jejamuq aisiqa naŋgi tulaŋ ugeugeinjrej. Qotei na ais di qariŋyej deqa tamo naŋgi minjiŋ oqetnjrnaqa Qotei misiliŋyoqneb.