Rev 5 | BOJ | STEP | Onaqa e olo ŋam atsimqa Qotei a awo jaram kobaq di awesosiqa aqa baŋ woq di buk bei ojesonaq unem. Buk di aqa baŋga olekokba. Baŋga di lubesonaq unem. Buk aqa miligiqsi qoreqsi neŋgreŋ ti sonaq unem. Buk di tamo bei na plaltosim aqa miligi unaim deqa naŋgi na aqa baŋga lubtosib kandel aqa namur na qandrato 7-pela-teb.

Revelation of John 5

Jon a buk bei unej

1 Onaqa e olo ŋam atsimqa Qotei a awo jaram kobaq di awesosiqa aqa baŋ woq di buk bei ojesonaq unem. Buk di aqa baŋga olekokba. Baŋga di lubesonaq unem. Buk aqa miligiqsi qoreqsi neŋgreŋ ti sonaq unem. Buk di tamo bei na plaltosim aqa miligi unaim deqa naŋgi na aqa baŋga lubtosib kandel aqa namur na qandrato 7-pela-teb. 2 Onaqa e olo ŋam atsimqa laŋ aŋgro siŋgila koba bei brantonaq unem. Laŋ aŋgro dena tulaŋ koba leleŋosiq marej, “Tamo yai a tamo bole deqa a na kandel aqa namur di waqtosimqa buk di plaltqa kere?” 3 Ariya tamo bei na buk di plaltosim aqa miligi unqa kere tamo dego bei sosai. Laŋ qureq dia, mandamq dia, mandam sorgomq dia tamo dego bei sosai. 4 E degsi unsim deqa e tulaŋ akamu-getem. 5 Onaqa gate koba bei na merbej, “O Jon, ni akamaim. Ni que. Laion a Juda aqa leŋq dena ŋambabej deqa a qoto siŋgilaosiq aqa jeu tamo naŋgi ñumej. A Mandor Koba Devit aqa leŋq dena ŋambabej deqa a na kandel aqa namur waqtosim buk di plaltqa kere.”

Jon a Kaja Du unej

6 Onaqa e aqa anjam di qusimqa olo ŋam atsim Kaja Du tigelesonaq unem. A qalnab moiej olo ŋambile so bulonaq unem. A Qotei aqa awo jaram ti wagme ŋambile so qaji qolqe naŋgi ti gate kokba naŋgo awo jaram kokba naŋgi ti ambleq di tigelesonaq unem. A qala 7-pela ti ŋamdamu 7-pela ti soqnej. Ŋamdamu 7-pela di agi Qotei aqa Mondor 7-pela naŋgi. Qotei na naŋgi qariŋnjrnaqa sawa sawa kalilq gileleŋeb. 7 Ariya Kaja Du a bosiqa aqa Abu Qotei agi awo jaram kobaq di awesoqnej qaji aqa baŋ woq dena buk di yaiyej. 8 Buk di yaiyonaqa wagme ŋambile so qaji qolqe naŋgi ti gate kokba 24 naŋgi ti bosib Kaja Du aqa areq di siŋga puluteb. Naŋgi kalil segi segi gombiŋ ti tabir gol na gereiyo qaji ti ojeleŋesoqneb. Tabirq dena qurem oqoqnsiqa Abu aqa ulatamuq di branteqnu. Qurem di quleq bole. Qurem di aqa utru agiende. Qotei aqa segi tamo uŋgasari naŋgo pailyo qurem bul oqoqnsiqa aqa ulatamuq di branteqnu. 9 Wagme qolqe naŋgi ti gate kokba naŋgi ti bosib Kaja Du aqa areq di siŋga pulutosibqa lou bunuj na endegsib louoqneb,

“O Kaja Du, ni buk di osimqa kandel aqa namur buk qandratejunu qaji di waqtqa kere.
Di kiyaqa? Ni lumnab moisim ino leŋ aiej dena ni na ino segi tamo uŋgasari naŋgi awainjrsimqa Qotei aqa baŋq di ateleŋem unub.
Od, tamo uŋgasari leŋ segi segi qaji, anjam maro segi segi qaji, jejamu segi segi qaji, sawa segi segi qaji naŋgi ni na awainjrsimqa Qotei aqa baŋq di ateleŋem unub.
10 Naŋgi Qotei aqa segi atra tamo sqajqa ti mandor kokba sqajqa ti deqa ni na ateleŋem unub.
Deqa naŋgi gago Qotei aqa atra tamo sosibqa a atraiyeqnub.
Naŋgi mandor kokba dego sosibqa mandam qa tamo uŋgasari naŋgi taqatnjroqnqab.”

Naŋgi Kaja Du aqa ñam soqtoqneb

11 Ariya e olo ŋam atsimqa laŋ aŋgro tulaŋ gargekoba tigelesonab unjrem. Naŋgi di tamo bei na sisiyqa keresai. Naŋgi handet milion dego kere soqneb. Naŋgi tigelosibqa Qotei aqa awo jaram ti wagme ŋambile so qaji naŋgi ti gate kokba 24 naŋgi ti agutnjresosibqa naŋgi tulaŋ koba murqumyeqnab e naŋgo kakoro quem. 12 Naŋgi endegsib leleŋoqnsib maroqneb,

“Kaja Du agi nami qalnab moiej qaji a ñam koba ti ñoro bole ti powo bole ti siŋgila koba ti oqa kere.
Deqa tamo kalil naŋgi aqa ñam soqtoqnsibqa a qa tulaŋ areboleboleinjroqnimqa a biŋiyoqnsib sqab.”
13 Onaqa iŋgi iŋgi kalil Qotei na marnaq branteleŋeb qaji naŋgi na anjam mareqnab e naŋgo kakoro quem. Iŋgi iŋgi kalil laŋ qureq di unub qaji ti mandamq di unub qaji ti mandam sorgomq di unub qaji ti yuwal miligiq di unub qaji ti naŋgi anjam mareqnab e naŋgo kakoro quem. Od, iŋgi iŋgi kalil sawa sawa kalilq di unub qaji naŋgo kakoro quem. Naŋgi endegsib mareqnab quem,

“Qotei awo jaram kobaq di awejunu qaji naŋgi Kaja Du wo bati gaigai ñam koba ti arebolebole ti siŋgila ti oqnsib sqab.
Deqa iga bati gaigai naŋgi aiyel biŋinjroqnqom.”
14 Onaqa wagme qolqe ŋambile so qaji naŋgi na maroqneb, “Anjam di bole.” Degsib mareqnabqa gate kokba naŋgi na Qotei wo Kaja Du wo naŋgo areq di siŋga pulutoqnsib biŋinjroqneb.