2Sa 5 | CopSahBible2 | STEP | ⲁⲩⲉⲓ ⲇⲉ ⲛϭⲓ ⲛⲉⲫⲩⲗⲏ ⲧⲏⲣⲟⲩ ⲙⲡ ⲓ︤ⲏ︦ⲗ︥ ⲉⲣⲁⲧϥ ⲛⲇⲁⲩⲉⲓⲇ ⲉⲭⲉⲃⲣⲱⲛ ⲉⲩϫⲱ ⲙⲙⲟⲥ ϫⲉ ⲉⲓⲥ ϩⲏⲏⲧⲉ ⲁⲛⲟⲛ ϩⲉⲛⲉⲃⲟⲗ ϩⲛ ⲛⲉⲕⲕⲉⲉⲥ ⲙⲛ ⲛⲉⲕⲥⲁⲣⲝ

2 Samuel 5

1 ⲁⲩⲉⲓ ⲇⲉ ⲛϭⲓ ⲛⲉⲫⲩⲗⲏ ⲧⲏⲣⲟⲩ ⲙⲡⲓ︤ⲏ︦ⲗ︥ ⲉⲣⲁⲧϥ ⲛⲇⲁⲩⲉⲓⲇ ⲉⲭⲉⲃⲣⲱⲛ ⲉⲩϫⲱ ⲙⲙⲟⲥ ϫⲉ ⲉⲓⲥ ϩⲏⲏⲧⲉ ⲁⲛⲟⲛ ϩⲉⲛⲉⲃⲟⲗ ϩⲛ ⲛⲉⲕⲕⲉⲉⲥ ⲙⲛ ⲛⲉⲕⲥⲁⲣⲝ 2 ⲁⲩⲱ ⲥⲁⲃ ⲙⲛ ϣⲙⲛⲧ ⲙⲡⲟⲟⲩ ⲛϩⲟⲟⲩ ⲉⲣⲉⲥⲁⲟⲩⲗ ⲟ ⲛⲣⲣⲟ ⲉϩⲣⲁⲓ ⲉϫⲱⲛ ⲛⲧⲟⲕ ⲛⲉⲕϫⲓⲙⲟⲉⲓⲧ ϩⲏⲧϥ ⲙⲡⲓ︤ⲏ︦ⲗ︥ ⲉϩⲟⲩⲛ ⲉⲃⲟⲗ ⲁⲩⲱ ⲡϫⲟⲉⲓⲥ ⲁϥϫⲟⲟⲥ ⲛⲁⲕ ϫⲉ ⲛⲧⲟⲕ ⲡⲉⲧⲛⲁⲙⲟⲟⲛⲉ ⲙⲡⲁⲗⲁⲟⲥ ⲡⲓ︤ⲏ︦ⲗ︥ ⲁⲩⲱ ⲛⲧⲟⲕ ⲡⲉⲧⲛⲁⲣⲁⲣⲭⲱⲛ ⲉϫⲙ ⲡⲓ︤ⲏ︦ⲗ︥ 3 ⲁⲩⲱ ⲁⲩⲉⲓ ⲛϭⲓ ⲛⲉⲡⲣⲉⲥⲃⲩⲧⲉⲣⲟⲥ ⲧⲏⲣⲟⲩ ⲙⲡⲓ︤ⲏ︦ⲗ︥ ⲉⲣⲁⲧϥ ⲙⲡⲣⲣⲟ ⲉⲭⲉⲃⲣⲱⲛ ⲁⲡⲣⲣⲟ ⲇⲉ ⲥⲙⲓⲛⲉ ⲛⲙⲙⲁⲩ ⲛⲟⲩⲇⲓⲁⲑⲏⲕⲏ ϩⲛ ⲭⲉⲃⲣⲱⲛ ⲙⲡⲙⲧⲟ ⲉⲃⲟⲗ ⲙⲡϫⲟⲉⲓⲥ ⲁⲩⲱ ⲁⲩⲧⲱϩⲥ ⲛⲇⲁⲩⲉⲓⲇ ⲛⲣⲣⲟ ⲉϫⲙ ⲡⲓ︤ⲏ︦ⲗ︥ ⲧⲏⲣϥ 4 ⲉⲩϣⲏⲣⲉ ϣⲏⲙ ⲡⲉ ⲇⲁⲩⲉⲓⲇ ⲉϥϩⲛ ⲙⲁⲁⲃⲉ ⲛⲣⲟⲙⲡⲉ ϩⲙ ⲡⲧⲣⲉϥⲣⲣⲣⲟ 5 ⲉⲁϥⲣ ⲥⲁϣϥⲉ ⲛⲣⲟⲙⲡⲉ ⲙⲛ ⲥⲟⲟⲩ ⲛⲉⲃⲟⲧ ⲉϥⲟ ⲛⲣⲣⲟ ϩⲛ ⲭⲉⲃⲣⲱⲛ ⲉϫⲉⲛ ⲓⲟⲩⲇⲁ ⲁⲩⲱ ⲙⲁⲁⲃ ϣⲟⲙⲧⲉ ⲛⲣⲟⲙⲡⲉ ⲉⲁϥⲁⲁⲩ ⲉϥⲟ ⲛⲣⲣⲟ ⲉϫⲙ ⲡⲓ︤ⲏ︦ⲗ︥ ⲧⲏⲣϥ ⲙⲛ ⲓⲟⲩⲇⲁ ϩⲛ ⲑⲓ︤ⲗ︦ⲏ︦ⲙ︥ 6 ⲁⲩⲱ ⲡⲣⲣⲟ ⲇⲁⲩⲉⲓⲇ ⲁϥⲃⲱⲕ ⲙⲛ ⲛⲣⲱⲙⲉ ⲉⲧⲛⲙⲙⲁϥ ⲉϩⲣⲁⲓ ⲉⲑⲓ︤ⲗ︦ⲏ︦ⲙ︥ ⲉⲣⲁⲧϥ ⲙⲡⲓⲉⲃⲟⲩⲥⲁⲓⲟⲥ ⲡⲉⲧⲟⲩⲏϩ ϩⲙ ⲡⲕⲁϩ ⲁⲩⲱ ⲁⲩϫⲟⲟⲥ ⲉϩⲟⲩⲛ ϩⲛ ⲇⲁⲇ ϫⲉ ⲛⲛⲉⲕⲉϣⲉⲓ ⲉϩⲟⲩⲛ ⲉⲡⲉⲓⲙⲁ ⲉⲃⲟⲗ ϫⲉ ⲁ ⲟⲩⲁ ϩⲉ ⲉⲃⲟⲗ ⲛϭⲓ ⲛⲃⲗⲗⲉⲩ ⲁⲩⲱ ⲛϭⲁⲗⲉⲉⲩ ⲉⲩϫⲱ ⲙⲙⲟⲥ ϫⲉ ⲛⲛⲉϣ ⲇⲁⲇ ⲉⲓ ⲉϩⲟⲩⲛ ⲉⲡⲉⲓⲙⲁ 7 ⲁⲩⲱ ⲁ ⲇⲁⲇ ϫⲓ ⲙⲡⲕⲱⲧⲉ ⲧⲏⲣϥ ⲛⲥⲓⲱⲛ ⲧⲁⲓ ⲧⲉ ⲧⲡⲟⲗⲓⲥ ⲛⲇⲁⲇ 8 ⲁⲩⲱ ⲡⲉϫⲉ ⲇⲁⲇ ⲙⲡⲉϩⲟⲟⲩ ⲉⲧⲙⲙⲁⲩ ϫⲉ ⲟⲩⲟⲛ ⲛⲓⲙ ⲉⲧⲛⲁⲣⲱϩⲧ ⲛⲟⲩⲉⲓⲉⲃⲟⲩⲥⲁⲓⲟⲥ ⲙⲁⲣⲉϥϫⲣⲟ ⲉⲣⲟϥ ϩⲙ ⲙⲁⲅⲁⲇ ⲁⲩⲱ ⲛⲕⲉϭⲁⲗⲉⲉⲩ ⲙⲛ ⲛⲃⲗⲗⲉⲉⲩ ⲙⲛ ⲛⲉⲧⲙⲟⲥⲧⲉ ⲛⲧⲉⲯⲩⲭⲏ ⲛⲇⲁⲩⲉⲓⲇ ⲉⲧⲃⲉ ⲡⲁⲓ ⲥⲉⲛⲁϫⲟⲟⲥ ϫⲉ ⲛⲃⲗⲗⲉⲉⲩ ⲙⲛ ⲛⲉϭⲁⲗⲉⲉⲩ ⲛⲛⲉⲩⲉⲓ ⲉϩⲟⲩⲛ ⲉⲡⲏⲓ ⲙⲡϫⲟⲉⲓⲥ 9 ⲁⲩⲱ ⲇⲁⲩⲉⲓⲇ ⲁϥϩⲙⲟⲟⲥ ϩⲛ ⲧⲡⲉⲣⲓⲟⲭⲏ ⲁϥⲙⲟⲩⲧⲉ ⲉⲣⲟⲥ ϫⲉ ⲧⲡⲟⲗⲓⲥ ⲛⲇⲁⲩⲉⲓⲇ ⲁⲩⲱ ⲁϥⲕⲟⲧⲥ ⲛⲟⲩⲡⲟⲗⲓⲥ ⲉⲥⲕⲱⲧⲉ ϫⲓⲛ ϫⲱϥ ⲙⲡⲕⲁϩ ⲉⲧⲙⲙⲁⲩ ⲙⲛ ⲡⲉϥⲕⲉⲏⲓ 10 ⲇⲁⲩⲉⲓⲇ ⲇⲉ ⲁϥⲙⲟⲟϣⲉ ⲉⲧⲡⲉ ⲙⲙⲏⲛⲉ ⲉϥⲛⲏⲩ ⲛⲁⲓⲁⲓ ⲁⲩⲱ ⲡϫⲟⲉⲓⲥ ⲡⲡⲁⲛⲧⲟⲕⲣⲁⲧⲱⲣ ⲛⲉϥⲛⲙⲙⲁϥ ⲡⲉ 11 ⲭⲓⲣⲁⲙ ⲇⲉ ⲡⲣⲣⲟ ⲛⲧⲩⲣⲟⲥ ⲁϥϫⲟⲟⲩ ⲛϩⲉⲛⲃⲁⲓϣⲓⲛⲉ ⲉⲣⲁⲧϥ ⲛⲇⲁⲩⲉⲓⲇ ⲙⲛ ϩⲉⲛⲕⲉϣⲉ ⲛⲕⲉⲇⲣⲟⲥ ⲁⲩⲱ ϩⲛⲣⲉϥⲉⲣⲉⲓⲟⲡⲉ ⲉⲛϣⲉ ⲁⲩⲱ ϩⲛⲣⲉϥⲣⲉⲓⲟⲡⲉ ⲉⲛⲉⲱⲛⲉ ⲛⲛⲉϫⲏ ⲁⲩⲕⲱⲧ ⲛⲟⲩⲏⲓ ⲛⲇⲁⲩⲉⲓⲇ 12 ⲁⲩⲱ ⲇⲁⲇ ⲁϥⲉⲓⲙⲉ ϫⲉ ⲁ ⲡϫⲟⲉⲓⲥ ⲥⲃⲧⲱⲧϥ ⲛⲣⲣⲟ ⲉϫⲙ ⲡⲓ︤ⲏ︦ⲗ︥ ⲁⲩⲱ ⲧⲉϥⲙⲛⲧⲣⲣⲟ ⲁⲥϫⲓⲥⲉ ⲉⲧⲃⲉ ⲡⲉϥⲗⲁⲟⲥ ⲡⲓ︤ⲏ︦ⲗ︥ 13 ⲇⲁⲩⲉⲓⲇ ⲇⲉ ⲁϥϫⲓ ⲛⲁϥ ⲛϩⲉⲛⲕⲉϩⲓⲟⲙⲉ ⲙⲛ ϩⲉⲛⲡⲁⲗⲗⲁⲕⲏ ⲉⲃⲟⲗ ϩⲛ ⲑⲓ︤ⲗ︦ⲏ︦ⲙ︥ ⲙⲛⲛⲥⲁ ⲉⲧⲣⲉϥⲉⲓ ⲉⲃⲟⲗ ϩⲛ ⲭⲉⲃⲣⲱⲛ ⲁⲩⲱ ⲁⲩϣⲱⲡⲉ ⲟⲛ ⲛⲇⲁⲩⲉⲓⲇ ⲛϭⲓ ϩⲉⲛϣⲏⲣⲉ ⲙⲛ ϩⲉⲛϣⲉⲉⲣⲉ 14 ⲁⲩⲱ ⲛⲁⲓ ⲛⲉ ⲛⲉⲣⲁⲛ ⲛⲧⲁⲩϫⲡⲟⲟⲩ ⲛⲁϥ ϩⲛ ⲑⲓ︤ⲗ︦ⲏ︦ⲙ︥ ⲥⲁⲙⲟⲩⲥ ⲙⲛ ⲥⲱⲁⲃ ⲁⲩⲱ ⲛⲁⲑⲁⲛ ⲙⲛ ⲥⲟⲗⲟⲙⲱⲛ 15 ⲉⲗⲓⲁⲃ ⲁⲩⲱ ⲉⲗⲓⲥⲟⲩⲥ ⲛⲁⲫⲉⲕ ⲙⲛ ⲓⲁⲫⲉⲓⲉ 16 ⲉⲗⲓⲥⲁⲙⲁ ⲁⲩⲱ ⲉⲡⲓⲇⲁⲉ ⲥⲁⲙⲁⲉ ⲁⲩⲱ ⲉⲗⲓⲫⲁⲇ ⲓⲉⲥⲥⲓⲃⲁⲑ ⲙⲛ ⲛⲁⲑⲁⲑ ⲉⲗⲓⲙⲁⲁⲛ ⲁⲩⲱ ⲓⲉⲃⲁⲣⲑ ⲉⲏⲥⲟⲩⲥ ⲁⲩⲱ ⲉⲗⲫⲁⲗⲁⲇ ⲛⲁⲕⲉⲇ ⲙⲛ ⲛⲁⲫⲉⲗ ⲓⲁⲛⲁ ⲙⲛ ⲑⲁⲗⲁⲓⲁ ⲥⲁⲙⲉⲥ ⲙⲛ ⲃⲁⲗⲓⲃⲁⲑ ⲙⲛ ⲉⲗⲓⲫⲁⲗⲁⲑ 17 ⲁⲩⲥⲱⲧⲙ ⲇⲉ ⲛϭⲓ ⲛⲁⲗⲗⲟⲫⲩⲗⲟⲥ ϫⲉ ⲁⲩⲧⲱϩⲥ ⲛⲇⲁⲩⲉⲓⲇ ⲉⲧⲣⲉϥⲣⲣⲣⲟ ⲉϫⲙ ⲡⲓ︤ⲏ︦ⲗ︥ ⲁⲩⲱ ⲁⲩⲉⲓ ⲉϩⲣⲁⲓ ⲛϭⲓ ⲛⲁⲗⲗⲟⲫⲩⲗⲟⲥ ⲧⲏⲣⲟⲩ ⲉⲧⲣⲉⲩⲕⲱⲧⲉ ⲛⲥⲁ ⲇⲁⲩⲉⲓⲇ ⲇⲁⲇ ⲇⲉ ⲁϥⲥⲱⲧⲙ ⲁϥⲓ ⲉϩⲣⲁⲓ ⲉⲧⲡⲉⲣⲓⲟⲭⲏ 18 ⲛⲁⲗⲗⲟⲫⲩⲗⲟⲥ ϩⲱⲟⲩ ⲁⲩⲉⲓ ⲁⲩⲧⲁⲁⲩ ⲉϩⲣⲁⲓ ⲉⲡⲓⲁ ⲛⲛⲉϩⲣⲁⲫⲁⲉⲓⲛ 19 ⲇ︤ⲁ︦ⲇ︥ ⲇⲉ ⲁϥϫⲛⲉⲡϫⲟⲉⲓⲥ ⲉϥϫⲱ ⲙⲙⲟⲥ ϫⲉ ⲉⲛⲉⲕⲟⲩⲱϣ ⲉⲧⲣⲁⲃⲱⲕ ⲉⲣⲱⲟⲩ ⲛⲛⲁⲗⲗⲟⲫⲩⲗⲟⲥ ⲁⲩⲱ ⲉⲛⲉⲕⲛⲁⲧⲁⲁⲩ ⲉϩⲣⲁⲓ ⲉⲧⲟⲟⲧ ⲡⲉϫⲉⲡϫⲟⲉⲓⲥ ⲛⲁϥ ϫⲉ ⲃⲱⲕ ⲉϩⲣⲁⲓ ⲉⲣⲟⲟⲩ ϫⲉ ϩⲛ ⲟⲩϯ ϯⲛⲁϯ ⲛⲛⲁⲗⲗⲟⲫⲩⲗⲟⲥ ⲉϩⲣⲁⲓ ⲉⲛⲉⲕϭⲓϫ 20 ⲁⲩⲱ ⲇ︤ⲁ︦ⲇ︥ ⲁϥⲓ ⲉⲃⲟⲗ ⲙⲡⲉⲧⲡⲉ ⲛⲛⲉⲧⲏⲛⲏ ⲁϥϭⲟϫϭⲉϫ ⲛⲛⲁⲗⲗⲟⲫⲩⲗⲟⲥ ⲙⲡⲙⲁ ⲉⲧⲙⲙⲁⲩ ⲡⲉϫⲉⲇⲁⲩⲉⲓⲇ ϫⲉ ⲁⲡϫⲟⲉⲓⲥ ϭⲟϫϭⲉϫ ⲛⲛⲁⲗⲗⲟⲫⲩⲗⲟⲥ ⲙⲡⲁⲙⲧⲟ ⲉⲃⲟⲗ ⲛⲑⲉ ⲛϩⲉⲛⲙⲟⲟⲩ ⲉϣⲁⲩϣⲁⲁⲧⲟⲩ ⲉⲧⲃⲉ ⲡⲁⲓ ⲁⲩⲙⲟⲩⲧⲉ ⲉⲡⲣⲁⲛ ⲙⲡⲙⲁ ⲉⲧⲙⲙⲁⲩ ϫⲉ ⲡⲉⲧⲡⲏ ⲛⲛⲉⲧⲏⲛⲏ 21 ⲁⲩⲱ ⲁⲩⲕⲱ ⲙⲡⲙⲁ ⲉⲧⲙⲙⲁⲩ ⲛⲛⲉⲩⲛⲟⲩⲧⲉ ⲁⲩϫⲓⲧⲟⲩ ⲇⲉ ⲛϭⲓ ⲇⲁⲇ ⲙⲛ ⲛⲣⲱⲙⲉ ⲉⲧⲛⲙⲙⲁϥ 22 ⲁⲩⲟⲩⲱϩ ⲉⲧⲟⲟⲧⲟⲩ ⲛϭⲓ ⲛⲁⲗⲗⲟⲫⲩⲗⲟⲥ ⲉⲉⲓ ⲉϩⲣⲁⲓ ⲁⲩⲱ ⲁⲩⲧⲁⲁⲩ ⲉⲉⲓ ⲉϩⲣⲁⲓ ⲉⲡⲓⲁ ⲛⲛⲉⲧⲓⲧⲁⲛⲟⲥ 23 ⲇ︤ⲁ︦ⲇ︥ ⲇⲉ ⲁϥϫⲛⲉⲡϫⲟⲉⲓⲥ ⲉϥϫⲱ ⲙⲙⲟⲥ ϫⲉ ⲉⲛⲉⲕⲟⲩⲱϣ ⲉⲧⲣⲁⲃⲱⲕ ⲉⲣⲱⲟⲩ ⲛⲛⲁⲗⲗⲟⲫⲩⲗⲟⲥ ⲁⲩⲱ ⲉⲛⲉⲕⲛⲁⲧⲁⲁⲩ ⲉϩⲣⲁⲓ ⲉⲧⲟⲟⲧ ⲡⲉϫⲉⲡϫⲟⲉⲓⲥ ⲛⲁϥ ϫⲉ ⲙⲡⲣⲃⲱⲕ ⲉϩⲣⲁⲓ ⲉⲙⲟⲟϣⲉ ⲉϩⲟⲩⲛ ⲉⲣⲟⲟⲩ ⲡⲟϣⲥⲕ ⲉⲃⲟⲗ ⲙⲙⲟⲟⲩ ⲁⲩⲱ ⲛⲅⲁϩⲉⲣⲁⲧⲕ ⲉⲣⲟⲟⲩ ⲙⲡⲙⲧⲟ ⲉⲃⲟⲗ ⲙⲡⲉⲕⲗⲁⲩⲑⲙⲱⲛ 24 ⲁⲩⲱ ⲉⲕϣⲁⲛⲥⲱⲧⲙ ⲉⲡⲉϩⲣⲟⲟⲩ ⲙⲡⲕⲓⲙ ⲙⲡⲙⲁ ⲛϣⲏⲛ ⲛⲧⲉ ⲡⲉⲕⲗⲁⲩⲑⲙⲱⲛ ⲧⲟⲧⲉ ⲉⲕⲉⲃⲱⲕ ⲉⲣⲟⲟⲩ ϫⲉ ϩⲙ ⲡⲉϩⲟⲟⲩ ⲉⲧⲙⲙⲁⲩ ⲡϫⲟⲉⲓⲥ ⲛⲁⲉⲓ ⲉⲃⲟⲗ ϩⲓϩⲏ ⲙⲙⲟⲕ ⲛϥϭⲟϫϭⲉϫ ⲙⲡⲡⲟⲗⲉⲙⲟⲥ ⲛⲛⲁⲗⲗⲟⲫⲩⲗⲟⲥ 25 ⲁⲩⲱ ⲇ︤ⲁ︦ⲇ︥ ⲁϥⲉⲓⲣⲉ ⲕⲁⲧⲁ ⲑⲉ ⲛⲧⲁϥϩⲱⲛ ⲉⲧⲟⲟⲧϥ ⲁϥⲡⲁⲧⲁⲥⲥⲉ ⲛⲛⲁⲗⲗⲟⲫⲩⲗⲟⲥ ϫⲓⲛ ⲅⲁⲃⲁⲱⲛ ϣⲁ ⲉϩⲣⲁⲓ ⲉⲡⲕⲁϩ ⲛⲅⲁⲍⲏⲣⲁ 26