Psalms 43
1ⲉⲡϫⲱⲕ ⲉⲃⲟⲗ ⲛⲛϣⲏⲣⲉ ⲛⲕⲟⲣⲉ ⲡⲉⲯⲁⲗⲙⲟⲥ ⲛⲧⲙⲛⲧⲣⲙⲛϩⲏⲧ 2ⲡⲛⲟⲩⲧⲉ ⲁⲛⲥⲱⲧⲙ ϩⲛ ⲛⲉⲛⲙⲁⲁϫⲉ ⲛⲉⲛⲉⲓⲟⲧⲉ ⲁⲩⲧⲁⲙⲟⲛ ⲉⲡϩⲱⲃ ⲛⲧⲁⲕⲁⲁϥ ϩⲛ ⲛⲉⲩϩⲟⲟⲩ ϩⲛ ⲛⲉϩⲟⲟⲩ ⲛϣⲟⲣⲡ 3ⲁⲧⲉⲕϭⲓϫ ϥⲱⲧⲉ ⲉⲃⲟⲗ ⲛϩⲉⲛϩⲉⲑⲛⲟⲥ ⲁⲕⲧⲟϭⲟⲩ ⲁⲕⲑⲙⲕⲟ ⲛϩⲉⲛⲗⲁⲟⲥ ⲁⲕⲛⲟϫⲟⲩ ⲉⲃⲟⲗ 4ⲛⲧⲁⲩⲕⲗⲏⲣⲟⲛⲟⲙⲉⲓ ⲅⲁⲣ ⲁⲛ ⲙⲡⲕⲁϩ ϩⲛ ⲧⲉⲩⲥⲏϥⲉ ⲁⲩⲱ ⲙⲡⲉⲩϭⲃⲟⲓ ⲁⲛ ⲡⲉⲛⲧⲁϥⲧⲟⲩϫⲟⲟⲩ ⲁⲗⲗⲁ ⲧⲉⲕⲟⲩⲛⲁⲙ ⲧⲉ ⲙⲛ ⲡⲉⲕϭⲃⲟⲓ ⲁⲩⲱ ⲡⲟⲩⲟⲉⲓⲛ ⲙⲡⲉⲕϩⲟ ϫⲉ ⲁⲕⲟⲩⲁϣⲟⲩ 5ⲛⲧⲟⲕ ⲡⲉ ⲡⲁⲣⲣⲟ ⲁⲩⲱ ⲡⲁⲛⲟⲩⲧⲉ ⲡⲉⲧϩⲱⲛ ⲛⲛⲉⲩϫⲁⲓ ⲛⲓⲁⲕⲱⲃ 6ϩⲣⲁⲓ ⲛϩⲏⲧⲕ ⲧⲛⲛⲁⲕⲱⲛⲥ ⲛⲛⲉⲛϫⲁϫⲉ ⲁⲩⲱ ϩⲙ ⲡⲉⲕⲣⲁⲛ ⲧⲛⲛⲁⲥⲱϣϥ ⲛⲛⲉⲧⲧⲱⲟⲩⲛ ⲉϫⲱⲛ 7ⲛⲉⲓⲕⲱ ⲅⲁⲣ ⲁⲛ ⲛϩⲧⲏⲓ ⲉⲧⲁⲡⲓⲧⲉ ⲁⲩⲱ ⲛⲧⲁⲥⲏϥⲉ ⲁⲛ ⲧⲉⲧⲛⲁϫⲟⲩϫⲟⲓ 8ⲁⲕⲧⲟⲩϫⲟⲛ ⲅⲁⲣ ⲉⲃⲟⲗ ϩⲓⲧⲛ ⲛⲉⲧⲑⲗⲓⲃⲉ ⲙⲙⲟⲛ ⲁⲩⲱ ⲁⲕϯϣⲓⲡⲉ ⲛⲛⲉⲧⲙⲟⲥⲧⲉ ⲙⲙⲟⲛ 9ϩⲣⲁⲓ ϩⲙ ⲡⲉⲛⲛⲟⲩⲧⲉ ⲧⲛⲛⲁϫⲓⲧⲁⲉⲓⲟ ⲙⲡⲉϩⲟⲟⲩ ⲧⲏⲣϥ ⲁⲩⲱ ⲧⲛⲛⲁⲉⲝⲟⲙⲟⲗⲟⲅⲉⲓ ⲙⲡⲉⲕⲣⲁⲛ ϣⲁ ⲉⲛⲉϩ ⲇⲓⲁⲯⲁⲗⲙⲁ 10ⲧⲉⲛⲟⲩ ⲇⲉ ⲁⲕⲥⲁϩⲱⲛ ⲉⲃⲟⲗ ⲁⲕϯϣⲓⲡⲉ ⲛⲁⲛ ⲁⲩⲱ ⲛⲅⲛⲏⲩ ⲁⲛ ⲉⲃⲟⲗ ϩⲛ ⲛⲉⲛϭⲟⲙ 11ⲁⲕⲕⲧⲟⲛ ⲉⲡⲁϩⲟⲩ ⲡⲁⲣⲁ ⲛⲉⲛϫⲁϫⲉ ⲁⲛⲉⲧⲙⲟⲥⲧⲉ ⲙⲙⲟⲛ ⲧⲟⲣⲡⲛ ⲛⲁⲩ 12ⲁⲕⲧⲁⲁⲛ ⲛⲑⲉ ⲛⲛⲓⲉⲥⲟⲟⲩ ⲉϣⲁⲩⲟⲩⲟⲙⲟⲩ ⲁⲩⲱ ⲁⲕϫⲟⲟⲣⲛ ⲉⲃⲟⲗ ϩⲛ ⲛϩⲉⲑⲛⲟⲥ 13ⲁⲕϯ ⲙⲡⲉⲕⲗⲁⲟⲥ ⲁϫⲛ ⲁⲥⲟⲩ ⲁⲩⲱ ⲛⲉⲙⲛⲙⲏⲏϣⲉ ϩⲛ ⲛⲉⲛⲗⲟⲩⲗⲁⲓ 14ⲁⲕⲕⲱ ⲙⲙⲟⲛ ⲛⲛⲟϭⲛⲉϭ ⲛⲛⲉⲧϩⲓⲧⲟⲩⲱⲛ ⲛⲕⲱⲙϣ ⲁⲩⲱ ⲛⲥⲱⲃⲉ ⲛⲛⲉⲧⲙⲡⲉⲛⲕⲱⲧⲉ 15ⲁⲕⲕⲱ ⲙⲙⲟⲛ ⲉⲩⲡⲁⲣⲁⲃⲟⲗⲏ ⲛⲛϩⲉⲑⲛⲟⲥ ⲁⲩⲱ ⲛⲕⲓⲙ ⲛⲁⲡⲉ ⲛϩⲉⲛⲗⲁⲟⲥ 16ϫⲉ ⲡⲁϣⲓⲡⲉ ⲙⲡⲁⲙⲧⲟ ⲉⲃⲟⲗ ⲙⲡⲉϩⲟⲟⲩ ⲧⲏⲣϥ ⲁⲩⲱ ⲡϣⲓⲡⲉ ⲙⲡⲁϩⲟ ⲁϥϩⲱⲃⲥ ⲉⲃⲟⲗ ⲉϫⲱⲓ 17ⲉⲃⲟⲗ ⲙⲡⲉϩⲣⲟⲟⲩ ⲙⲡⲉⲧⲛⲟϭⲛⲉϭ ⲙⲛ ⲡⲉⲧⲡⲁⲣⲁⲗⲁⲗⲉⲓ ⲙⲡⲉⲙⲧⲟ ⲉⲃⲟⲗ ⲙⲡϫⲁϫⲉ ⲙⲛ ⲡⲉⲧⲇⲓⲱⲕⲉ 18ⲛⲁⲓ ⲧⲏⲣⲟⲩ ⲁⲩⲉⲓ ⲉϩⲣⲁⲓ ⲉϫⲱⲛ ⲙⲡⲛⲣⲡⲉⲕⲱⲃϣ ⲁⲩⲱ ⲙⲡⲛϫⲓⲛϭⲟⲛⲥ ϩⲛ ⲧⲉⲕⲇⲓⲁⲑⲏⲕⲏ 19ⲁⲩⲱ ⲙⲡⲉⲡⲉⲛϩⲏⲧ ⲥⲁϩⲱϥ ⲉⲡⲁϩⲟⲩ ⲁⲕⲣⲓⲛⲉ ⲛⲛⲉⲛϩⲓⲟⲟⲩⲉ ⲉⲃⲟⲗ ϩⲛ ⲧⲉⲕϩⲓⲏ 20ϫⲉ ⲁⲕⲑⲃⲃⲓⲟⲛ ϩⲛ ⲟⲩⲙⲁ ⲛⲙⲕⲁϩ ⲁⲩⲱ ⲁⲥϩⲟⲃⲥⲛ ⲛϭⲓ ⲑⲁⲓⲃⲉⲥ ⲙⲡⲙⲟⲩ 21ⲉϣϫⲉ ⲁⲛⲣⲡⲱⲃϣ ⲙⲡⲣⲁⲛ ⲙⲡⲉⲛⲛⲟⲩⲧⲉ ⲉϣϫⲉ ⲁⲛⲡⲉⲣϣⲛⲉⲛϭⲓϫ ⲉⲃⲟⲗ ⲉⲩⲛⲟⲩⲧⲉ ⲛϣⲙⲙⲟ 22ⲙⲏ ⲙⲡⲛⲟⲩⲧⲉ ⲁⲛ ⲡⲉⲧⲛⲁϣⲓⲛⲉ ⲛⲥⲁ ⲛⲁⲓ ⲛⲧⲟϥ ⲅⲁⲣ ⲉⲧⲥⲟⲟⲩⲛ ⲉⲛⲉⲑⲏⲡ ⲙⲡϩⲏⲧ 23ϫⲉ ⲉⲧⲃⲏⲏⲧⲕ ⲥⲉⲙⲟⲩⲟⲩⲧ ⲙⲙⲟⲛ ⲙⲡⲉϩⲟⲟⲩ ⲧⲏⲣϥ ⲁⲩⲟⲡⲛ ⲛⲑⲉ ⲛⲛⲓⲉⲥⲟⲟⲩ ⲉⲕⲟⲛⲥⲟⲩ 24ⲧⲱⲟⲩⲛ ⲡϫⲟⲉⲓⲥ ⲉⲧⲃⲉ ⲟⲩ ⲕⲛⲕⲟⲧⲕ ⲧⲱⲟⲩⲛ ⲙⲡⲣⲕⲁⲁⲛ ⲛⲥⲱⲕ ϣⲁⲃⲟⲗ 25ⲉⲧⲃⲉ ⲟⲩ ⲁⲕⲕⲧⲉⲡⲉⲕϩⲟ ⲉⲃⲟⲗ ⲁⲕⲣⲡⲱⲃϣ ⲛⲧⲉⲛⲙⲛⲧϩⲏⲕⲉ ⲙⲛ ⲧⲉⲛⲑⲗⲓⲯⲓⲥ 26ϫⲉ ⲁⲧⲉⲛⲯⲩⲭⲏ ⲑⲃⲃⲓⲟ ϣⲁ ⲡⲕⲁϩ ⲁϩⲏⲧⲛ ⲧⲱϭⲉ ⲉⲡⲉⲥⲏⲧ 27ⲧⲱⲟⲩⲛ ⲃⲟⲏⲑⲉⲓ ⲉⲣⲟⲛ ⲡϫⲟⲉⲓⲥ ⲁⲩⲱ ⲛⲅⲥⲟⲧⲛ ⲉⲧⲃⲉ ⲡⲉⲕⲣⲁⲛ
Copyright information for
CopSahBible2