Heb 2 | DAD | STEP | Anĩ nigin, ada karĩ taun anĩ fatuk bagai lo tafalauf, anĩ bunem, ada to kũ tafenẽf.

Hebrews 2

Karĩ Yeleya Nigin Weder Irouya

1 Anĩ nigin, ada karĩ taun anĩ fatuk bagai lo tafalauf, anĩ bunem, ada to kũ tafenẽf. 2 Negur nẽ od tubuda tar bun engel bunem wogõ difiyẽdin are totol ado ibodon, anĩ nigin, idi od anĩ didod ken, to dõ difen anidi are, anĩ kilei mala solo darau dalen. 3 Anĩ nigin, ada isennẽya odug anĩ to karĩ tafiyẽf are, naig ta tayalalauf? Uruwa bun Odug ĩ isennẽya enei nigin wogõ yen, age fe di, idi ĩ karĩ difiyen anidim, isennẽya are momoi anĩ, ada bun yaor difen. 4 Uris, ereb urug bagai, memelik fire fire bunem ado, Negur yogon oroya bunem Awa Uur Fateul ege luwa gadõ fedin anim, Negur ĩg isennẽya od anĩ megeir fen.

Jesus Ĩ Kel Yaledaya Nẽ Uyu Irouya

5 Negur ĩ, engel, teneub mata isiyouf tau fen, wogõ taudig anĩ nẽ lo fiya tamo, to inenẽdin. 6 Anĩ ere, Negur nẽ Itotoya bun taka nem mogo eig ye iron:

“Tamo ĩ ere anĩ, õ ĩ nigin kisi wof?
Tamo naal ĩ ere anĩ, õ ĩ nigin karĩ weledig?
7 Õ ĩ sain naal engel farumedin unenen,
õ ĩ fula fiya medeĩya yana ado anĩ nẽ teter kurũ wiye ken,
8 ye farumen ereb ereb ganan gõ welen.” ^{▼▼2:8Sam 8:4-6}
Negur ĩ farumen ereb ereb ganan gõ felen, are ereb taka ĩ farumen sã anĩ taka to ibodok. Anĩ ere, gama ada ereb ereb ganan ĩ farumen ifaref anĩ to tailef. 9 Anĩ ere, Jesus Negurem ĩ sain naal engel farumedin inene ken, ĩ darau yale laa fen nigin, gama ĩ fula fiya medeĩya yana ado anĩ nẽ teter kurũ fiyen anĩ ada tailef, are Negur nẽ wau ifenẽya bunem, ĩ tamo kayau ganan nigin laa ilen.

10 Negur ereb ereb ganan, yogo nigin ado yogo bunem inon, ĩ kesu tar musei fula fiya medeĩya bun irou isiyouf nigin, tamo kel gei fiya nẽ marau Jesus, darau bunem kisi feleya bagai wõ youf nigin agef inenen, are tutuk. 11 Yogo tamo kayau fateul ifenẽdif ado, fateuledif anidi geid, ibor tekeleif. Anĩ nigin, Jesus idi turau tar fiyẽdiya nigin to mama fef. 12 Ĩ irok,

“Aya õ yanã neu turau tar bun kurõ afalaisiyouf,
tamo kayau guru difef meleid bun, aya õ selĩ abiyouf nigin seg alouf.” ^{▼▼2:12Sam 22:22}
13 Ĩ baban irok,

“Aya ĩ bun neu momoiya anouf.” ^{▼▼2:13aAsaia 8:17}
Takag, ĩ baban irok,

“Aya yeir, Negur ĩ gere tar ifanan geid.” ^{▼▼2:13bAsaia 8:18}
14 Gere tar idi bouweid ado naudeid ado nigin, ĩg bouwa ado naud ado idi gen wõ yen, are ĩ yogon laa bunem, Satan ĩ laa nẽ megeir irouf anĩ daũ falauf nigin ado, 15 idi laa nigin kumĩ de fen, sain ganan anĩ nẽ ferfer dibodok disin anidi kafĩ fiya bun tamal yalelnẽdiyouf nigin age fen. 16 Are momoi bagai, Jesus ĩ engel to isennẽdif, anĩ ere, ĩ Abraham nẽ ibor nẽ tubu tar isennẽdif. 17 Anĩ nigin, Negur ĩ, Jesus naab ganan bun yogon tura tar gen inenen, are Jesus ĩ pris mudur wau yũya, dõ fiya biya ado wõ ye fen, Negur aruna yalouf nigin ado, ĩ Negur nẽ didi yof fen, tamo kayau neid mosor yalelkenẽdiya kabĩ yalouf nigin age fen. 18 Jesus yogo bun kisi fiya wõ yen sain bun, ĩ morõ yalen, anĩ nigin, ĩ idi kisi fiya bun difaref anidi isennẽdiya kisi feleya.