Matthew 26

Sêkic Jesunê biŋ

(Mar 14:1-2; Luk 22:1-2; Joaŋ 11:45-53)

1Jesu gêjac mata biŋ tonaŋ ŋai samob su, go kêsôm gêdêŋ nê ŋacseŋomi gebe 2“Amac alicgac, bêc luagêc ênaŋa acgom, ma Pasa, ma oc sêkêŋ Ŋamalacnê Latu êpi kakesotau êna.”

3Gêdêŋ tonaŋ lau dabuŋsêga to launêŋ laumata sêkac tauŋ sa sêmoa dabuŋsêga, taŋ sêsam eŋ gebe Kaiapa naŋ, nê gamêŋ, 4ma sêkic Jesunê biŋ gebe sêkôc eŋ tôŋ kelecgeŋ e sênac eŋ êndu. 5Mago sêsôm gebe “Daŋgôm êndêŋ om atom, moae tali launêŋ ŋalêlôm sa.”

Awê teŋ geŋ oso Jesu aŋga Betania

(Mar 14:3-9; Joaŋ 12:1-8)

6Jesu gêmoa Betania gêŋgôŋ ŋac tokamocbôm Simon nê andu, 7naŋ awê teŋ kêkôc ŋop kwalam-kwalam togêŋmalu, taŋ ŋaôli kapôêŋ naŋ. Eŋ kêtu gasuc gêdêŋ Jesu, taŋ geŋ gêŋ naŋ, jakêkêc kêpi eŋ môkêapac. 8Ŋacseŋomi sêlic e têtu môsi ma sêsôm gebe “Amboac ondoc sêjaiŋ gêŋ tonaŋ. 9Sêkêŋ êndêŋ lau sênam ôlimaŋ ma sêkôc ŋaawa kapôêŋ ma sêkêŋ êndêŋ lau ŋalêlôm sawa acgom.” 10Jesu gêŋô ma kêsôm gêdêŋ êsêac gebe “Amboac ondoc tec agôm awê tonec nê ŋalêlôm ŋawapac kêsa nec. Eŋ gêjam kôm ŋajam kêpi aê. 11Lau ŋalêlôm sawa oc sêŋgôŋ sêwiŋ amac ŋapaŋ, mago aê oc jaŋgôŋ jawiŋ amac ŋapaŋ atom. 12Eŋ kêsêwa gêŋmalu tonec kêpi aê ôlic gêgôm kêtu sênsuŋ aêŋa. 13Biŋŋanô, aê jasôm êndêŋ amac gebe Aŋga nom samucgeŋ ŋagamêŋ embe sênam mêtê êpi ŋawae ŋajam tonec, go sênac miŋ gêŋ, taŋ eŋ gêgôm naŋ, êwiŋ gebe taêŋ ênam eŋ.”

Juda geoc nê ŋatau lasê

(Mar 14:10-11; Luk 22:3-6)

14Go êsêac lau 12 nêŋ teŋ, taŋ sêsam eŋ gebe Juda Isariot naŋ, gêdêŋ lau dabuŋsêga gêja 15ma kêsôm gebe “Embe jaoc Jesu lasê êndêŋ amac, oc akêŋ asageŋ êndêŋ aê.” Ma êsêac sêjam ôli eŋ ŋa silber 30. 16Gêdêŋ tonaŋgeŋ eŋ gêdib gebe êtap ŋasawa ŋajam teŋ sa gebe eoc eŋ lasêŋa.

Jesu geŋ Pasa gêwiŋ nê ŋacseŋomi

(Mar 14:12-21; Luk 22:7-14, 21-23; Joaŋ 13:21-30)

17Gêdêŋ Om Polom Ŋalucŋa ŋabêc ŋamataŋa ŋacseŋomi dêdêŋ Jesu sêja ma têtu kênac gebe “Aôm gobe aêac amansaŋ ôniŋ Pasa ŋamala aŋga ondoc.” 18Ma eŋ kêsôm gebe “Asa malac andêŋ ŋac teŋ ana ma asôm êndêŋ eŋ gebe ‘Mêtêmôkê awa tonec gebe Ŋoc noc kêdabiŋ ma aê to ŋoc ŋacseŋomi abe aniŋ Pasa aŋgôŋ awiŋ aôm.’” 19Ma ŋacseŋomi sêgôm kêtôm Jesu kêsakiŋ êsêac ma sêmasaŋ Pasa.

20Kêtula acgom ma eŋ to nê ŋacseŋomi 12 sêsa tauŋ sic. 21Seŋ gêŋ sêmoa ma Jesu kêsôm gebe “Biŋŋanô, aê jasôm êndêŋ amac gebe Amacnêm ŋac teŋ oc eoc aê lasê.” 22Êsêacnêŋ ŋalêlôm ŋawapac ŋanô ma sêkêŋ tauŋ tageŋ-tageŋ jatêtu kênac eŋ gebe “Apômtau, oc aê me.” 23Ma eŋ gêjô êsêac aweŋ gebe “Ŋac tau, taŋ aêagêc asac polom tôŋ seleŋgeŋ kêsêp laclu su, ŋac tonaŋ tec oc eoc aê lasê.

24Ŋamalacnê Latu tau oc êsa nê lêŋ êtôm teto gêc. Tageŋ ojae ŋac tauma, naŋ eoc Ŋamalacnê Latu lasê naŋ, têna êkôc eŋ atommaŋ.” 25Ma Juda tau, taŋ gebe eoc eŋ lasê naŋ, kêsôm gebe “Mêtêmôkê, oc aê me.” Jesu kêsôm gadêŋ eŋ gebe “Taôm kôsômgac.”

Biŋ moasiŋ dabuŋŋa

(Mar 14:22-26; Luk 22:15-20; Kor 1. 11:23-25)

26Seŋ gêŋ sêmoa, go Jesu kêkôc polom mêŋgêjam daŋge ma kêpô kêkôc jakêkên gêdêŋ ŋacseŋomi ma kêsôm gebe “Akôc êwac aniŋ. Aêŋoc ôlic tonec.” 27Go kêkôc laclu mêŋgêjam daŋge ma kêkêŋ gêdêŋ êsêac ma kêsôm gebe “Samob akôc êwac anôm. 28Aêŋoc dec jamoatiŋ poacŋa tau tonec, taŋ kakêc siŋ kêtu taêsamŋa gebe êsuc sec ôkwi. 29Aê jasôm êndêŋ amac gebe Aê janôm wain ŋanô tonec êtiam atom, e êndêŋ bêc ônê, go janôm wakuc jawiŋ amac aŋga Tamocnê gamêŋ.” 30Sêsôm wê moasiŋŋa su acgom, go sêpi Lôckatêkwi sêja.

Jesu kêkêŋ puc Petere

(Mar 14:27-31; Luk 22:31-34; Joaŋ 13:36-38)

31Sêsêlêŋ sêmoa, go Jesu kêsôm gêdêŋ êsêac gebe “Êmbêc tonec amac samob awi aê siŋ gebe teto gêc gebe ‘Aê janac ŋacgejob ma domba samob sêc êliŋ- êliŋ.’ 32Mago embe jandi sa su, oc jamuŋ amac jana Galilaia.” 33Ma Petere gêjô eŋ awa gebe “Samob embe sêwi aôm siŋ, mago aê taucgeŋ oc jawi aôm siŋ atomanô.” 34Jesu kêsôm gêdêŋ eŋ gebe “Biŋŋanô, aê jasôm êndêŋ aôm gebe Êmbêc tonec talec oc êtaŋ atomgeŋ, ma aôm ônsa aê auc êtu dim têlêac.” 35Ma Petere kêsôm gêdêŋ eŋ gebe “Sênac aê êndu jawiŋ aômmaŋ, aê gabe jansa aôm auc atomanô.” Ma ŋacseŋomi samob sêsôm amboac tonaŋgeŋ.

Jesu keteŋ mec gêmoa kôm Getsemane

(Mar 14:32-42; Luk 22:30-46)

36Go Jesu kêkôc êsêac sa sêja gamêŋ teŋ, ŋaê Getsemane, ma kêsôm gêdêŋ ŋacseŋomi gebe “Aŋgôŋ tonec ma aê gabe jana ônê najateŋ mec.” 37Ma kêkôc Petere to Sebedai latuagêc sêwiŋ eŋ. Nê ŋalêlôm ôluŋ-ôluŋgeŋ ma katu kêlênim tau. 38Go kêsôm gêdêŋ êsêac lau têlêac gebe “Ŋoc katuc ôluŋôluŋgeŋ e gabe jamac. Amoa tonec ma anam jali awiŋ aê.” 39Go kêsa ŋasawa gêŋgic sauŋgeŋ e gêu tau laŋôanô jagêdêŋ nom ma keteŋ mec gebe “Tamoc, embe êtôm, go ôkôc laclu tonec su aŋga aêŋoc. Mago aêŋoc biŋ êtu tôŋ atom, aôm taôm nêm biŋ.”

40Go gêmu gêdêŋ ŋacseŋomi gêja e gêlic êsêac sêc bêc ma kêsôm gêdêŋ Petere gebe “Amboac ondoc, amac oc anam jali ockatu ŋasawa tageŋ awiŋ aê atôm atom me. 41Anam jali to ateŋ mecmaŋ gebe lêtôm êtap amac sa atom. Ŋalau ôli palê, mago ôlim tekwem gêbac.”

42Go gêja kêtiam kêtu dim luagêcŋa ma keteŋ gebe “Tamoc, embe êtôm gebe ôkôc laclu tonec su atom, naŋ janômmaŋ. Aôm taôm nêm biŋ êtu tôŋ.” 43Ma gêmu gêja kêtiam e gêlic êsêac sêc bêc gebe mateŋanô ŋawapac kêsa su.

44Tec gêwi êsêac siŋ kêtiam ma gêja jaketeŋ kêtu dim têlêac ma kêsôm biŋ tonaŋgeŋ kêtiam. 45Go gêmu gêdêŋ ŋacseŋomi gêja ma kêsôm gêdêŋ êsêac gebe “Aêc bêc to alêwaŋ taôm amoa me. Alicgac, ŋanoc tau kêdabiŋgac, oc sêkêŋ Ŋamalacnê Latu êsêp lau sec lemeŋ. 46Andi sa ma tawac. Alic acgom, ŋac-eoc-aê-lasêwaga mêŋkêdabiŋ.”

Sêkôc Jesu toŋ

(Mar 14:43-50; Luk 22:47-53; Joaŋ 18:3-12)

47Kêsôm biŋ kêkô ma êsêac 12 nêŋ teŋ, Juda, kêkôc lau pom kapôêŋ teŋ sêôc siŋ to olopoac aŋga dabuŋsêga to launêŋ laumata nêŋ sêmêŋ. 48Ŋac-eoc-eŋ-lasêwaga kêkêŋ ŋabelo teŋ gêdêŋ êsêac ma kêsôm gebe “Ŋac taŋ jalêsôp eŋ alianô naŋ, ŋac tau tonaŋ. Akôc eŋ tôŋ.” 49Go gacgeŋ kêtu gasuc gêdêŋ Jesu gêja ma kêsôm gebe “O Metêmôkê” ma kêlêsôp eŋ alianô. 50Ma Jesu kêsôm gêdêŋ eŋ gebe “Ŋacnec, gômôêŋ kêtu ageŋŋa.” Go êsêac têtu gasuc sêja e sêjac lemeŋ kêsêp Jesu ma sêkôc eŋ tôŋ. 51Ma êsêac taŋ sêwiŋ Jesu naŋ, nêŋ teŋ kêkêŋ lêma jagêbuc nê siŋ sa ma gêjac dabuŋsêganê sakiŋwaga e kêpa taŋalauŋ su. 52Ma Jesu kêsôm gêdêŋ eŋ gebe “Ônsêmuŋ nêm siŋ êsêp ŋamala êtiam, gebe samob, taŋ lemeŋ gêdêŋ siŋ naŋ, siŋ oc enseŋ êsêac su. 53Aôm gobe aê embe jateŋ Tamoc gebe êkêŋ aŋela êIêlêc toŋ kapôêŋ 12 su sep tageŋ mêŋsênam aê kêsi, oc jatôm atom me. 54Aê embe jaŋgôm amboac tonaŋ. go biŋdêm, taŋ teto gêc gebe biŋ tonec mêŋêsaŋa naŋ, oc êtu anô amboac ondoc.”

55Gêdêŋ ŋasawa tonaŋ Jesu kêsôm gêdêŋ lau tau gebe “Amac amêŋ abe akôc aê tôŋ, mago agôm amboac adêŋ kêjaŋgowaga teŋ, tec aôc siŋ to olopoac gêwiŋ. Kêtôm bêcgeŋ kadôŋ lau gêŋgôŋ lôm dabuŋ ma amac akôc aê tôŋ atom. 56Biŋ tonaŋ samob mêŋkêsa gebe propetenêŋ biŋ, taŋ teto gêc naŋ, êtu tôŋ.”

Ma ŋacseŋomi samob sêwi eŋ siŋ ma sêc su sêja.

Dabuŋwaga to laumata sêgôm Jesunê biŋ

(Mar 14:53-65; Luk 22:54-55, 63-71; Joaŋ 18:13-14, 19-24)

57Lau taŋ sêkôc Jesu tôŋ naŋ, sêwê eŋ dêdêŋ dabuŋsêga Kaiapa sêja. Aŋga tônê biŋsutau to laumata sêkac tauŋ sa sêmoa. 58Ma Petere gêjac tau susu kêdaguc e jakêsa dabuŋsêganê andu ŋamalacluŋ ma kêsô jagêŋgôŋ gêwiŋ sakiŋwaga gebe êlic biŋ tau ŋam. 59Lau dabuŋsêga to laumata samob, taŋ sêkac sa sêmoa naŋ, sêsôm biŋ sebe sêŋgôliŋ êpi Jesu gebe sênac eŋ ênduŋa. 60Lau taêsam sêgôliŋ biŋ kêpi eŋ, mago têtap ŋanô teŋ sa atom. Ŋac luagêc dêdi sa kêtu ŋamu 61ma sêsôm gebe “Ŋac tonec kêsôm gebe ‘Aê katôm gebe janseŋ Anôtônê lôm dabuŋ su ma jakwê sa êtôm bêc têlêac.’”

62Ma dabuŋsêga gêdi sa ma kêsôm gêdêŋ eŋ gebe “Aôm gobe ôjô biŋ atom me. Biŋ amboac ondoc tec sêgôliŋ kêpi aôm.” 63Mago Jesu gêjam tau tôŋgeŋ. Ma dabuŋsêga kêsôm gêdêŋ eŋ gebe “Aê jatôc lemoc êpi Anôtô mata jali gebe aôm ôwa taôm sa êndêŋ aêacmaŋ gebe Kilisi, Anôtônê Latu tau aôm me masi.” 64Jesu gêjô eŋ awa gebe “Taôm kôsômgac. Mago jasôm êndêŋ amac gebe Oc alic Ŋamalacnê Latu êŋgôŋ ŋaniniŋ Ŋatau nê anôŋa ma êŋgôŋ tao undambêŋa ŋaô êmêŋ.” 65Kêsôm e dabuŋsêga kêkac nê ŋakwê gêŋgic ma kêsôm gebe “Eŋ kêsôm biŋ alôbalôbgoc, tapô lêna lau sêsôm biŋ lasêŋa ŋagêdô êtu asageŋŋa. Biŋ alôb-alôb tau tec galoc aŋôgac. 66Ma abe amboac ondoc.” Tec êsêac sêjô eŋ awa gebe “Eŋ êmac êndugeŋ.”

67Sêsôm tonaŋ ma sêkasôp kêpi eŋ laŋôanô sêmêgôm lemeŋ ma têtuc eŋ, ma ŋagêdô têtap eŋ 68ma sêsôm gebe “Kilisi, oc lasê êndêŋ aêac. Asa taŋ gêjac aôm.”

Petere gêsa Jesu auc

(Mar 14:66-72; Luk 22:56-62; Joaŋ 18:15-18, 25-27)

69Petere gêŋgôŋ malacluŋ ma sakiŋwagao teŋ kêtu gasuc eŋ ma kêsôm gebe “Aôm tec gôwiŋ Jesu Galilaiaŋa amboac tonaŋ.” 70Mago eŋ kêpa tau gêdêŋ êsêac samob gebe “Biŋ taŋ kôsôm naŋ, aê gajam kauc.” 71Go Petere gebe êsa sacgêdôŋa êna e sakiŋwagao teŋ gêlic eŋ kêtiam ma kêsôm gêdêŋ lau, taŋ sêkô naŋ, gebe “Ŋac tonec gêwiŋ Jesu Nasaretŋa.” 72Ma Petere kêpa tau kêtiam e kêtôc lêma gêwiŋ gebe “Aê kajala ŋamalac tônê atom.” 73Sauŋgeŋ acgom, go lau, taŋ sêkô-sêkô naŋ, têtu gasuc sêja ma sêsôm gêdêŋ Petere gebe “Biŋŋanôgoc, êsêacnêŋ ŋac teŋ aôm, tec awam tau jala.” 74Go eŋ gêôc awa sa, kêpuc boa tau ma kêtôc lêma gebe “Aê kajala ŋamalac tônê atom.” Kêsôm biŋ tonaŋ gêmoa e gacgeŋ talec kêtaŋ. 75Tec taŋ gêjam biŋ, taŋ Jesu kêsôm naŋ, gebe “Talec oc êtaŋ atomgeŋ, ma aôm ônsa aê auc êtu dim têlêac.” Tec kêsa gêja kêtaŋ ŋanô.