1Cor 4 | KYG | STEP | Lapakaemo lagaefe'mo, Apakaemo Kalaisi ali'ya'amo ne'aliya vaya'mo mai'nae. Ne'yagaiya vaya'mogi ali'ya aepa veka'apimo ya'ale'mo ne'yagaiya kava hu'a apakaemo Goti'a alino fala ki male'niya ge'ale'mo yagai'ne'a ali'a ne'apamiya vaya'mo mai'nae, hutapa lapakesamo afiyo.

1 Corinthians 4

Apa vaya'aife'mo apava gemo hu'niya gemae

1 Lapakaemo lagaefe'mo, Apakaemo Kalaisi ali'ya'amo ne'aliya vaya'mo mai'nae. Ne'yagaiya vaya'mogi ali'ya aepa veka'apimo ya'ale'mo ne'yagaiya kava hu'a apakaemo Goti'a alino fala ki male'niya ge'ale'mo yagai'ne'a ali'a ne'apamiya vaya'mo mai'nae, hutapa lapakesamo afiyo. 2 Mago vaya'ai yate'mo yagai'a ne'ataya vaya'mogimo aepa vekamo'a hu'niya gemo afite'apae'mo ali'a o'atale'a alagepa hu'a yagai'a atesaya kava'mo hane'niye. 3 Lapakae'e mago ma mopafi vaya'e'mo hutapae'mo, alagepa ali'ya'mo ne'aliye, hutapa nehisafi hosu ali'ya'mo ne'aliye, hutapa nehisafi alita fako hutapa ne'natesayana ina agufa kava'mo nehae, hu'na nagesa ne'afuve. Inagi nagai'nimo, alagepa ali'ya'mo ne'aluve, hu'na osuge, hosu ali'ya'mo ne'aluve, hu'na osuge hute'na ali'ya'nie'mo ali'na fako hu'na no'atove. 4 Nagupi mafa'nemo'mo huno'ae'mo, hosu kava'mo nehane, huno nosiya'monanafa alagepa vekamo mai'nove, hu'na afa'a osuguve. Alino fako huno natesiya vekamo Ala kava neke'mo mai'niye. 5 Mai'niya'mofe'mo Goti'a Ala kava ne'mo eminesiya afina'mo lekana pai male'niya'mofe'mo afole o'ai'niyanagi hogotetapa alita fako hutapa o'apateyo. Agaemo emineno'ae'mo hanipi'mo hu'a fala nekiya kava'e apaipa nekaliya kava'api'e'mo ha le'yategamo alino afole aino ategaiye. Ani afina'mo Goti'a muki vaya'mogimo ali'ya'apimo ali'naya yatefe'mo, alagepa ali'ya'mo ali'nae, huno hapa paitesige'apae'mo apamete apamete hu'a hetama'apimo aligae. 6 Konaga'nimogitapae, hu'na, Lapa maesuvafe'mo muki mani gemo nagai'ni'e Apolosi'efe'mo la'ava gemo hu'na avo kae male'nove. Tisa vaya'aife'mo lapakesamo ne'afitapae'mo Goti mukufi'mo avo kae male'niya gemo ataletapa aeta o'agasesayafe'mo mani agufa la'ava ge gemo hu'na avo kae male'nove. Himu'namu gemo nehutapa mago tisa vekamo agi'ale'mo alita asaga hutapa atege mago tisa vekamo agi'ale'mo alita afepi atege hisaya agufa gemo osiyo. 7 Ina la'mo lapakaefe'mo, hogote vaya'mo mai'nae, huno huteno lekana paino lapate'niye. Goti'a na agufa yatapimo alino olapami'niye. Gotitegati'mo muki ya'amo ago ali'naya'mofe'mo na kava higetapae'mo Gotitegati'mo o'ali'naesina agufa yafe'mo amuse nehae.

Polo'a ge hapaugekana agufa gemo huno hapa pai'niya gemae

8 Nahau'nimogitapae, hu'na, muki ya'mo alisuna afina'mo afole o'ai'niya'monanafa lapakaemo hogotetapa ago alitapa havai te'nae. Malage hutapa kagemi ya'apimo hane'niya yahauve vayakana hutapa alita hamale'nae. Vaehae, hu'na, lapakae'e'mo magokepi ohamale'nona'monanafa hogote kini vayakana hutapa hamale'nae. Lapakaemo hogote kini vaya'mo maisayafe'mo nahau'niye. Lapakaemo lama ge kini vaya'mo maisageta lagaemo kini vaya'mo hamaleteta lapakae'e'mo magokepi lokaeta maigune. 9 Goti'a apa vaya'amogitae'mo, henaga vaya'mo mai'nae, huno alino apave li'niye, hu'na nagesamo ne'afuve. Lagaemo agoti hu'a apatete'apae'mo vaya'ai apaulagale'mo faligae, hu'a hu'nage'a mai'naya vayakana huta ne'maune. Goti'a alino afole aino late'nigeta ma mopafi vaya'ai apaulagale'e enisole vaya'ai apaulagale'e'mo mago so'mo nehaya agufa kavakana huta mai'nonage'apae'mo aulu lahae'a nelagae. 10 Lagaemo Kalaisitefe'mo ne'maunage'apae'mo negi vaya'mo mai'nae, hu'a nehaya'monanafa lapakaemo Kalaisipi'mo mai'netapae'mo agetetapa afi'naya vaya'mo mai'nae. Lokiya no'vauna vaya'mo mai'nona'monanafa ago lokiya ne'vaiya vaya'mo mai'nae. Vaehae, nahau'nimogitapae, hu'na, Ala lapakimo nelapamiya'monanafa lagaefe'mo, ina agufa vaya'mo mai'nae, hu'a nehae. 11 Laga tege anife'mo lahauge hosu kukenamo alita vaige huta maime maime eta hemeni'e'mo ani kava huta ne'maune. Lamagige lamagige hu'a ne'maigeno'ae'mo notimo ohane'nigeta nata vaya'mo mai'none. 12 Ne'yatimo nesuna ya'mo alisunafe'mo lokiya ali'ya'mo ne'alune. Hu'a faipa hu'a nelatagetae'mo, Goti'a lapa maeno, huta nehune. Apaini hu'a nelatagetae'mo afa'a ne'maune. 13 Lagaefe'mo, hosu kava'mo nehae, hu'a nehagetae'mo falu fala gemo huta aeta atagaina huta hapa nepaune. Lagaemo atupa ya'mo alini'u'a yaga au'a ne'atalaya yakana huta mai'neta o'ani'ya yakana huta maime maime eta hemeni'e'mo ani kava huta ne'maune. 14 Lapavagage hisiyafe'mo mani avo'mo nokaova'monanafa nahau nayamopafi'mo nahau'niya mafa'ne'nimo mai'naya'mofe'mo alagepa hutapa afisayafe'mo ehetapiye, hu'na mani avo'mo nekaove. 15 Teni tauseni'a tisa vaya'mogi Kalaisipi'mo yagai'a nelapataya tisa vaya'mo mai'nisaya'mo'mo afotapimo'mo magoke'age'mo mai'niye. Nagaemo Kalaisife'mo alagepa faigoko ge'aleti'mo mafa'ne'nimo ali'na lapatete'na Kalaisi Yesupi'mo afotapimo'namo mai'nove. 16 Mai'nova'mofe'mo lapao ke he'nae'mo nehuva kava'mo nagetetapae'mo akame hutapa hiyo. 17 Lapakaemo ani kava'mo hisayafe'mo Timoti'a nahau nayamopafi'mo nahau'niya mafa'ne'nimo ali'na ate'novanageno lapakaetegamo ugiye. Agaemo Ala kava nepi'mo mai'neno'ae'mo o'ataleno alagepa ali'ya'mo ne'aliye. Agaemo Kalaisi Yesupi'mo mai'ne'na nehuva kavafe'mo nava gemo huno lapaipa lapakesamo alino he tino lapategaiye. Nagaemo mani kavafe'mo muki haopalega siosi'ale siosi'ale'mo mai'naya vaya'mo ali'na apaya ne'malove.

18 Lapakaepati'mo mago vaya'amogimo hu'apae'mo, Polo'a lagaetegamo o'megaiye, hu'a nehu'a himu'namu gemo nehaya'monanafa. 19 Ala kava ne'mo'a hau'nisiyana aise afina'mo utesige'na lapakaetegamo afa'a uguve. U'na ava'yi nehu'nae'mo himu'namu gemo nehaya ge'age'mo o'afiguva'monanafa Goti lokiya'amo apaipafi'mo afole ai'nifi, hu'na agegauve. 20 Goti'a ani vaya'ai apaipafi'mo yagaino ne'apatesiya'mo'mo ge'ageke'mo osu'a Goti lokiya'aleti'e'mo alagepa kava'mo hugae. 21 Nagaemo kayo'mo alini'na visufi nahau nayamopafi'mo nahau'ninage'na yuna naipamo alini'na visufigi na agufa kavafe'mo lapau'niye.