Psalms 35

Kũhooya Kũhonokio kuuma kũrĩ Thũ

Thaburi ya Daudi

1 ^aWee Jehova, hũũrana na arĩa marahũũrana na niĩ;
rũa na arĩa mararũa na niĩ.
2 ^bOya ngo nene na gako kanini;
arahũka ũũke ũndeithie.
3Hiũria itimũ na mĩcengi,
ũũkĩrĩre arĩa maathingatĩte.
Ĩra ngoro yakwa atĩrĩ,
“Niĩ nĩ niĩ ũhonokio waku.”

4 ^cAndũ arĩa mendaga kũnduta muoyo
maroconorithio na maagithio gĩtĩĩo,
arĩa mathugundaga kũnyũnũha
marocookio na thuutha mamakĩte.
5Marohaana ta mahuti mombũrĩtwo nĩ rũhuho,
na mũraika wa Jehova amaingatithĩtie;
6njĩra yao ĩrogĩa nduma na ĩtendere,
nake mũraika wa Jehova ahanyũkanie nao.

7 ^dKuona atĩ nĩmahithĩire wabu wa kũndega hatarĩ gĩtũmi,
na makanyenjera irima hatarĩ gĩtũmi,
8 ^emarokorererwo nĩ mwanangĩko matehaarĩirie,
wabu ũcio manyambĩire ũromanyiita o ene,
marogwa irima rĩu manyenjeire.
9Hĩndĩ ĩyo ngoro yakwa ĩgaacanjamũka nĩ ũndũ wa Jehova,
na ĩkenagĩre ũhonokio wake.
10 ^fNĩngwanĩrĩra na ngoro yakwa yothe, njũũrie atĩrĩ,
“Nũũ ũhaana tawe, Wee Jehova?
O Wee ũhatũraga andũ arĩa athĩĩni harĩ arĩa marĩ hinya kũmakĩra,
ũkahatũra athĩĩni na abatari harĩ arĩa mamatunyaga indo.”

11 ^gNĩkuumĩrĩte aira a maheeni,
makanjũũria ũhoro wa maũndũ itooĩ.
12Wega wakwa mandĩhaga na ũũru,
magatiga ngoro yakwa ĩrĩ na ihooru.
13 ^hNo rĩrĩa o maarĩ arũaru, niĩ ndehumbire nguo ya ikũnia,
na ngĩĩnyiihia na ũndũ wa kwĩhinga kũrĩa irio.
Rĩrĩa mahooya makwa maagire macookio-rĩ,
14ndaikarire ngĩcakayaga,
o taarĩ mũrata wakwa kana mũrũ wa maitũ ndaacakayagĩra.
Ndethikĩire ndĩ na ihooru,
o taarĩ mũndũ ũracakaĩra nyina.
15 ⁱNo rĩrĩa ndahĩngirwo ngĩgwa, o moonganire hamwe mangenerere;
atharĩkĩri makĩũngana maatharĩkĩre itekũmenya.
Manjaambirie mategũtigithĩria.
16 ^jMaanyũrũragia ta andũ matooĩ Ngai,
makaahagaranĩria magego mao.
17 ^kWee Jehova-rĩ, nĩ nginya rĩ ũgũikara wĩroreire?
Hatũra muoyo wakwa kuuma harĩ wanangi wao,
ũhatũre muoyo wakwa wa goro kuuma harĩ mĩrũũthi ĩno.
18Nĩ niĩ ngũgũcookeria ngaatho kĩũngano-inĩ kĩrĩa kĩnene;
ndĩkũgoocaga ndĩ gatagatĩ ka andũ aingĩ.

19 ^lNdũkareke arĩa maathũire tũhũ
mangũũrĩre maitho, mangenerere;
kana acio maamenete hatarĩ gĩtũmi
moinanĩre maitho.
20Matiaragia ndeto cia thayũ,
no mathugundaga maũndũ ma maheeni,
ma gũũkĩrĩra andũ arĩa maikaraga na thayũ bũrũri-inĩ.
21 ^mManjathamagĩria tũnua twao makoiga atĩrĩ,
“Haiya! Haiya! Maitho maitũ nĩmeyoneire ũguo.”

22 ⁿWee Jehova, nĩwĩoneire ũguo; tiga gũkira.
Wee Mwathani-rĩ, ndũgaikare haraaya na niĩ.
23Arahũka, ũkĩra ũngitĩre!
Hũũranĩra, Wee Ngai wakwa na Mwathani wakwa.
24 ^oWee Jehova, nduĩra kũringana na ũthingu waku, Wee Ngai wakwa;
ndũkareke mangũũrĩre maitho, mangenerere.
25 ^pNdũkareke meciirie atĩrĩ, “Haiya, ũguo noguo tũrendaga gwĩkĩke!”
Kana moige atĩrĩ, “Nĩtũmũmeretie.”

26 ^qArĩa othe mangũũragĩra maitho mangenerere nĩ ũndũ wa mĩnyamaro yakwa
maroconorithio na manyiitwo nĩ kĩrigiicano;
arĩa othe metũũgagĩria igũrũ rĩakwa
maroconorithio na maagithio gĩtĩĩo.
27 ^rArĩa makenaga ndaatuĩrwo ciira na kĩhooto,
nĩmanĩrĩre na gĩkeno na gũcanjamũka;
nĩmatũũre moigaga atĩrĩ, “Jehova arotũgĩrio,
o we ũkenagĩra ũgaacĩru wa ndungata yake.”
28Rũrĩmĩ rwakwa rũrĩaragia ũhoro wa ũthingu waku,
na ngũgoocage mũthenya wothe.