1Cor 6 | MED | STEP | Enim nga ruk ting ila wamp ti ndi, ᵾngᵾn ti kᵾn, ik ti pem ndam, Got nga wamp mbᵾ kᵾn, nimba kun mundᵾmba uⱡ ei kelpa, mᵾi kona wamp moⱡᵾng mou ila pangga, kᵾmp ting uⱡ ei, kapⱡa ei?

1 Corinthians 6

1 Enim nga ruk ting ila wamp ti ndi, ᵾngᵾn ti kᵾn, ik ti pem ndam, Got nga wamp mbᵾ kᵾn, nimba kun mundᵾmba uⱡ ei kelpa, mᵾi kona wamp moⱡᵾng mou ila pangga, kᵾmp ting uⱡ ei, kapⱡa ei? 2 Got nga wamp mormin mbᵾ ndi, kapⱡa mᵾi kona wamp mbᵾ, kᵾmp ting mint. Uⱡ ei enim pili napᵾtmin ei? Wote mᵾi kona mel mbᵾ, kᵾmp tᵾk kandᵾk pᵾtmin ndam, wote uⱡ kel mbᵾ nga enim ndi, kapⱡa kᵾmp ti nᵾting ku ei? 3 Tᵾn ndi, anggelo mbᵾ, wote kᵾmp timin. Uⱡ ei, enim pili napᵾtmin ei? Ei nga, mᵾi kona ila uⱡ mbᵾ kᵾmp tᵾk pil-ing uⱡ ei, mbun etpa petᵾm mel nant? 4 Ni kᵾn, ik ei pilik kᵾn, kump tᵾmba uⱡ ei nga, mat ⱡawa pem ndam, Got nga mbi paka rui narᵾrᵾm wamp ti ndi, kᵾmp tᵾpa nimba, tᵾpa kun mundangga nᵾk mek ping ye! 5 Kang wamp ye! Enim pipil ti mon pᵾnt ei ka ei? Na pᵾnt ei, int enim mormin ruk ting ila wu tenda ti ndi, pilpa kungᵾndi kai tepa moⱡpa, uⱡ ⱡawa pem mbᵾ kapⱡa nimba, kᵾmp tᵾpa kun mundᵾmba ei nga mint, nᵾmp pilip mor. 6 Wote, uⱡ ei iting ei kelik, ᵾngᵾn ti ndi, ᵾngᵾn ti ⱡawa enim nimba, mbo wamp mbᵾ ndi, nᵾk kᵾmp tᵾk, kun mundeing nᵾk pᵾtmin.

7 Enim nga ruk ting ila wamp ᵾngᵾn ti ndi, ᵾngᵾn ti kᵾn, kᵾmp tᵾmba enim. Uⱡ ei ndi, ora ndupa, enim mana puk pora nduk mormin. Wamp nam ti ndi, enim kᵾn ⱡawa em ndam, pilpa kelpa itangga nᵾk, kandᵾk kui itᵾi! Wote, wamp nam ti, nim nga mel ti, kᵾndᵾp nomba tᵾm ndam, itangga nᵾk, kandᵾk kui itᵾi! 8 Wote, en enim nga ruk ting ila wamp ti ndi, ti kᵾn ⱡawa mat etmin ndam, wote wamp ti, kᵾndᵾp nomba mel mbᵾ tᵾtmin. Wote, en enim nga ᵾngᵾnᵾl mbᵾ kᵾn etmin ku!

9 Enim kupa pᵾtmin ni, uⱡ kit mbᵾ, ki ngumba moⱡum wamp ei, Got nga wamp tᵾpa mumuk rui uⱡ ei, kapⱡa ti natᵾmba. Enim ndi, en enim tᵾk wᵾlᵾ mundi nᵾmᵾndᵾi! Enim pᵾtmin ni, wapra rormin wamp, wote got kol ropa mbᵾ nga mbi paka rormin wamp na, wu amp ruk wapra rormin wamp na, wu ndi, wu wapra rui uⱡ, muna kik mik uⱡ na, mel mok rui nᵾri uⱡ na, nu ronduⱡ nok kupᵾr rui uⱡ, wote wamp ti nimba kit mundi uⱡ na, kindᵾp nui uⱡ mbᵾ nga ki ngorum, run wamp mbᵾ, Got nga wamp tᵾpa mumuk rui uⱡ ei, kapⱡa ti nᵾting. 11 Enim wamp mat unt uⱡ mbᵾ ki nguk morung. Wote akup uⱡ kit mbᵾ, ⱡumᵾi rok mundᵾk eng noⱡnga mormin. Got nga wamp wingti kupa kᵾⱡ, Nuim Jisas Kraist nga mbi ila, tᵾn nga Got nga Muⱡnga ei ndi, enim Got kᵾn etpa kun kai mundrum.

Tᵾn Nga Kᵾng Ei Ndi, Got Nga Mbi Paka Rundᵾmin

12 Wamp ti ndi, nimba mel, “Na nga numan ila namba uⱡ mbᵾ, kapⱡa itimp mint,” nimba. Ei kupa, ei nga uⱡ mbᵾ ndi pora, na tᵾpa rᵾpndi napundᵾmba mon! Na ndi, nᵾmp mel, “Na nga numan ila namba uⱡ mbᵾ, kapⱡa itimp mint,” nimp. Ei nga, wote uⱡ tenda ti ndi, na kindmant endangga nᵾmp, kandᵾp kont iti nᵾtimp. 13 Wote wamp ti ndi, nimba mel, “Rᵾng ei kitim ei nga. Wote kitim ei rᵾng ei nga,” nitim. Ei kupa! Ei nga wote, Got ndi mel raⱡ kunda etpa pora ndumba. Wamp nga kᵾng ei, wapra rui uⱡ mbᵾ nga nimba, mim iti nᵾtᵾtᵾm mon. Kᵾng kᵾⱡ, Nuim ei nga, wote Oⱡa Nuim ei kᵾng kᵾn nokundrum. 14 Got ndi, elim nga ronduⱡ ila, Nuim ei, wamp kul uⱡ ila, ⱡoporpa tᵾpa oⱡa mundrum. Wote, elim nga ronduⱡ ila ku, tᵾn ⱡoporpa tᵾpa oⱡa mondᵾmba. 15 Kraist nga kᵾng pᵾl kᵾⱡ, int enim wamp kᵾⱡ nga kᵾng tᵾtᵾm ni, enim pili napᵾtmᵾn ei? Na ndi, Kraist nga kᵾng pᵾl ti tᵾp, kapⱡa amp wapra kᵾng rundimp ei? Ei kapⱡa mon ei ka! 16 Wote, wu ti ndi, elim nga kᵾng ei tᵾpa, amp wapra ti kᵾn rᵾmp ndum ndam, wamp raⱡ kᵾng tenda nᵾtmin ni, enim pili napᵾtmin ei? Buk Wingti ila, Got ndi, nimba mot ndupa kᵾn, nimba mel, “Wamp raⱡ okᵾⱡ kᵾng tenda ruⱡᵾnggil,” nitim. 17 Wote, wu nam ti ndi, Nuim ei kᵾn, rᵾmp ndupa moⱡum ndam, muⱡnga ei omba tenda mba. 18 Wapra rui uⱡ mbila ruⱡ etᵾk muⱡᵾi! Wamp nam ti, uⱡ kit elpa mat etᵾm mbᵾ ndi, elim nga kᵾng ekit orunga etpa, kit mundi namᵾndrᵾm. Wote, wamp nam ti, andpa wapra rorum ni ndi, elim kᵾng kᵾⱡ pora etpa kit mondrum. 19 Enim nga kᵾng kᵾⱡ, Muⱡnga Wingti ei nga manga wingti ni, enim kᵾn pepa morum enim ngurum ei pi napᵾtmᵾn ei? Got ndi, Muⱡnga Wingti ei, int enim kᵾn kor ngurum. Ei int enim kᵾn rukᵾr orunga pepa morum. Enim ndi, en enim wamp nᵾma mat mormᵾn nᵾk pili nᵾpᵾlᵾi mon! Enim Got nga wamp mendpᵾⱡ kᵾⱡ. 20 Nambuⱡ emel, Got ndi, enim ei nga, rop ropa tᵾp mel kapⱡa ngumba itim. Ei nga, pilik kᵾn, enim nga kᵾng orunga, Got nga mbi paka rundeing mint nitim.