Rev 12 | MHL | STEP | Aria maa sira-sira aapereka iinan-pa imenarek nain feenap, emeria oko ama mia suuwowa wuak ne ona kepur onoma-pa siiwa-ke wiar ikua. Ikiwos maa bala mokoma ten kuisow erup wiar ikomakek.

Revelation of John 12

Ifa maneka-ke emeria oko faek

1 Aria maa sira-sira aapereka iinan-pa imenarek nain feenap, emeria oko ama mia suuwowa wuak ne ona kepur onoma-pa siiwa-ke wiar ikua. Ikiwos maa bala mokoma ten kuisow erup wiar ikomakek. 2 Emeria nain muukarekam naep uroma-ke opeya mia tiitinowa maneka aawep kirirem-ikua.

3 Nain imenarep ikaeya nainiw maa sira oko-ke aapereka-pa imenarek. Maa nain feenap, ifa oka maneka, urufowa suan saarik nain maneka wenup. Ona ikiwosa ikur okaiwi-pa erup ne ikiwos suusa ten kuisow. Ikiwos unowa nain kuisow kuisow bala orowawap ikomakek. 4 Mokoma teeria arow ikua nain ona alewa-ke teeria kuisow saru-puukeya miiwa-pa ururomakek. Ne ekapep emeria nain miir onoma-pa wiar iimarep ikua, uroma yakieya-na muuka wiar enimekam naep. 5 Naap ikok emeria nain muukarek, ikoka muuka nain-ke aen kuuma opap miiw unowa kekanowa wia urufam-ikainon. Aria oko ifa nain-ke muuka nain eniminon naep ewur akena aawep Mua Maneka ona pokiya nan wiar wuamik. 6 Aawiwkin onak baurarep epa asia saa manekiw ikua nan ikiwok, epa nain iiriw Mua Maneka ona pepekimep-puomak. O mokoma arow enakiwa neeke ikaeya kakaltam-ikainon.

7 Aria naap ikok irakow maneka owow iinan-pa imenarek. Ensel Maikel ona ensel teeria unowiya ne ifa maneka nain ona ensel teeria unowiya, teeria erup naap irakemik. 8 Irakep irakep Maikel teeria-ke wia nomakiwkin ifa nain ona teeria onaiya owow iinan-pa ikowa me pepek. 9 Ifa maneka nain opap wafuriwkin miiwa orok. Ifa awoniya maneka nain unuma Satan naimik, os-ke eena miiw unowa nain wia peeskimemi wadol sira wia pikiwiya nain. Ona ensel unowiya wia wafuriwkin miiwa oromik. 10 Irakowa weesereya mukuruna maneka-ko iinan-pa wuami feenap fariwkin miimam,

“Aakisa Mua Maneka yia aawowa epa nan imenarek! Mua Maneka Saria maneka ikok maa muutitik urufiya, kekanowa nain ona wiarik! Ne Krais unum maneka ne kekanowa pun aakisa ariman arek. Moram mua samora iiriw Mua Maneka miir onoma-pa wiar iimarep ikok yiena Yeesus teeria anane maneka pina wiem-ikua nain aakisa iirariwkin miiwa orok.
11 Wi Yeesus teeria nain Sipsip Muuka aka orok nain makena-ke naemi opor makena wia maakem-miemik, naap onami Satan nomakemik. Wia ifakimowa maiwkin eliw umiyen naep mia me wiam kema suuwimik.
12 Naapeya ni teeria owow iinan-pa ikeman nain eliw kemelowen! Ne ni miiwa ne ifera-pa ikeman nain nefa komarka, ni kamenap arowen! Satan iiriw amisarek, o epa me ekinon, ona weeserow epa ewur imenarinon. Naapeya miiwa orop ni niar ikok manek akena kema bagiwiram-ikaiya.”
13 Aria ifa maneka iirarep miiwa-pa wafuriwkin oromi nain wame furewap ikiwep emeria iiriw muukarek nain samorekam naep faek. 14 Ne ifa maneka nain-ke emeria nain me samorinok naep saragum eewua nain aawep iwemik, birinep ikiwemi epa asia saa manekiw ikua neeke ikiwinok naep. Mokoma arow enakiwa neeke ikaeya Mua Maneka-ke kakaltam-ikainon. 15 Emeria nain nan ikaeya eka-ke aawinok naep ifa nain-ke ona opaimika-pa eka keeseya luuma iwak. 16 Luuma iwak-na wia, miiwa-ke emeria nain asipak. Miiwa-ke pukeya eka tepak oromi saanarem-ikua. 17 Ifa maneka nain naap urufap kema bagiwirap ikip emeria nain ona nembesir unowa wiamiya irakek. Ona nembesir teeria eena Mua Maneka opora wiar ookimik ne pun Yeesus opor makena wiar maem-ikaimik nain.