Job 30

UJobe Uqhubeka Ekhuluma

1“Kodwa manje bayangiklolodela,
amadoda angabantwana kimi,
oyise engangingabehlisa
ngibelusise izimvu zami.
2Amandla ezandla zabo ayengangisiza ngani mina,
ngoba amadlabuzane abo ayesephelile;
3sebejujukile ngokuswela langendlala,
bazula elizweni elomileyo
emangweni eyinkangala engelalutho ebusuku.
4Enkotheni khonale bakha imibhida emunyu,
ukudla kwabo kuzimpande zezihlahla.
5Baxotshwa ebantwini bakibo,
bathethiswa kungathi babengamasela.
6Kwasekumele bahlale ezihotsheni zezifula ezomileyo,
ezimbalwini emadwaleni lemilindini emhlabathini.
7Bakhonya phakathi kwezihlahla
baququbala ezixukwini.
8Base bengabantu abaphansi abangaselabizo,
sebexotshiwe elizweni.

9Kodwa manje amadodana abo asengihaya ngengoma;
sengiyisiga kubo.
10Bayangenyanya njalo bamela khatshana lami;
kabathikazi ukungikhafulela ebusweni.
11Khathesi njengoba uNkulunkulu eselithukulule idandili lami
wangitshaya ngezinhlupheko,
sebeklamasa kabasazithinti.
12Kwesokunene kwami ixuku liyangihlasela;
bathiya inyawo zami ngemijibila
bakhe imibundu yokungivimbezela.
13Badiliza indlela yami;
bayaphumelela ukungibhidliza
besithi ‘Akekho ozamsiza.’
14Bahlasela ingathi bafohlela esikhaleni esivulekileyo;
beza bethululeka phezu kwezinqwaba zamanxiwa.
15Ukwesaba okukhulu kungiphethe;
isithunzi sami sobuntu singathi siphethwe ngumoya,
ukuvikeleka kwami kunyamalala njengeyezi.

16Manje impilo yami isincipha;
insuku zokuhlupheka zingibambe nko.
17Ubusuku bugwaza amathambo ami;
lokuqaqamba kobuhlungu bami kakupheli.
18Ngamandla akhe amakhulu uNkulunkulu unjengelembu kimi;
uyangikhama ngamabheqe entanyeni yami.
19Ungivoxela edakeni,
ngicina sengiluthuli lomlotha.

20Ngikhala kuwe, Oh Nkulunkulu, kodwa kawuphenduli;
ngiyasukuma, kodwa uyangikhangela kuphela.
21Ungisukela ngesihluku;
ungihlasela ngamandla esandla sakho.
22Uyangihlwitha ngiphetshulwe ngumoya;
ngiphoseke le lale phakathi kwesiphepho.
23Ngiyazi ukuthi uzangilalisa phansi ekufeni,
endaweni emiselwe konke okuphilayo.

24Ngempela kakho ombeka isandla umuntu oswelayo
nxa ekhalela ukusizwa esebunzimeni.
25Kangibakhalelanga yini labo abahluphekileyo?
Umoya wami kawubazwelanga usizi abayanga na?
26Kodwa ngathi ngilindele ubuhle, kweza ububi;
ngathi ngilindele ukukhanya kweza ubumnyama.
27Ukudunguluka ngaphakathi kwami kakukhawuli;
insuku zokuhlupheka zingijamele.
28Ngihamba nje ngimnyama kubi, kungesikutshiswa lilanga;
ngiyasukuma enkundleni ngicele uncedo.
29Sengingumfowabo wamakhanka,
umkhula wezikhova.
30Isikhumba sami siba mnyama, siyaxathuka;
umzimba wami uyatshisa ngomkhuhlane.
31Ichacho lami selilungiselwe isililo,
lomqangala wami ulindele umkhosi wokukhala.”