Psa 60 | NdeBEN | STEP | Kumqondisi wokuhlabelela. Kulandelwa itshuni ethi, “Iluba lesiVumelwano.” Imikithamu kaDavida. Elokufundisa. Lapho alwa lo-Aramu Naharayimu lo-Aramu Zobha, njalo lapho uJowabi athi ekubuyeni kwakhe walahla phansi ama-Edomi azinkulungwane ezilitshumi lambili eSigodini seTswayi. Ususilahlile, Oh Nkulunkulu, wabhidliza izinqaba zethu; ubukade uthukuthele, manje ake usivuselele!

Psalms 60

Kumqondisi wokuhlabelela. Kulandelwa itshuni ethi, “Iluba lesiVumelwano.” Imikithamu kaDavida. Elokufundisa. Lapho alwa lo-Aramu Naharayimu lo-Aramu Zobha, njalo lapho uJowabi athi ekubuyeni kwakhe walahla phansi ama-Edomi azinkulungwane ezilitshumi lambili eSigodini seTswayi.

1 Ususilahlile, Oh Nkulunkulu, wabhidliza izinqaba zethu;
ubukade uthukuthele, manje ake usivuselele!
2 Usulizamazamisile ilizwe waliqhekeza;
namathisela iminkenke yalo ngoba selivevezela.
3 Ubabonisile abantu bakho izikhathi ezilukhuni;
usiphe iwayini elisenza sidiyazele.
4 Kodwa kulabo abakwesabayo usuphakamise uphawu
lokubahlanganisa ndawonye.

5 Sisindise, usisize ngesandla sakho sokunene,
ukuze bonke labo obathandayo bakhululwe.
6 UNkulunkulu usekhulumile esendlini yakhe engcwele:
“Ngokunqoba ngizayaba iShekhemu,
ngihlole leSigodi saseSukhothi.
7 Ngeyami iGiliyadi, loManase ngowami;
u-Efrayimi yisivikelo sekhanda lami,
uJuda uyintonga yami yobukhosi.
8 IMowabi ngumganu wami wokugezela,
phezu kuka-Edomi ngiphosela amanyathelo ami;
phezu kweFilistiya ngihalalisa umkhosi wokunqoba.”

9 Ngubani ozangisa emzini olenqaba na?
Ngubani ozangiholela e-Edomi na?
10 Kakusuwe na, Oh Nkulunkulu, wena osusilahlile,
ongasaphumi lathi ezimpini zethu?
11 Ake usisize ezitheni zethu,
ngoba usizo lomuntu luyize.
12 Nxa siloNkulunkulu sizanqoba,
njalo uzazinyathelela phansi izitha zethu.