Mar 5:22-43, Luk 8:41-56 | Ndebele | STEP | Njalo khangela, kwafika omunye wabaphathi besinagoge, uJayirosi ngebizo ; embona, wawa phansi enyaweni zakhe,

Mark 5:22-43

22 Njalo khangela, kwafika ^a omunye wabaphathi besinagoge, uJayirosi ngebizo ^b; embona, wawa phansi enyaweni zakhe, 23 wamncenga kakhulu, esithi: Indodakazi yami encane isiphela; ake uze ubeke izandla phezu kwayo, ukuze isindiswe, njalo izaphila ^c. 24 Wasehamba laye; ixuku elikhulu laselimlandela, lamminyezela.

25 Njalo owesifazana othile owayelomopho wegazi okweminyaka elitshumi lambili, 26 ehluphekile kakhulu kubelaphi abanengi, echithile konke ayelakho, engasizakalanga, kodwa kulokhu kumqinela, 27 esezwile ngoJesu, weza exukwini ngemuva, wathinta isembatho sakhe; 28 ngoba wathi: Aluba ngithinta izembatho zakhe nje, ngizasindiswa. 29 Futhi wahle woma umthombo wegazi lakhe, wasesizwa emzimbeni ukuthi usilile esifweni ^d. 30 Njalo uJesu wahle wazi phakathi kwakhe ukuthi amandla aphumile kuye, watshibilika esexukwini, wathi: Ngubani othinte izembatho zami ^e? 31 Abafundi bakhe basebesithi kuye: Uyabona ixuku likuminyezela, kodwa uthi: Ngubani ongithintileyo? 32 Wasethalaza ukuthi ambone owenze lokhu. 33 Kodwa owesifazana esesaba ethuthumela, ekwazi okwenzekileyo kuye, weza wawa phambi kwakhe, wamtshela iqiniso lonke. 34 Wasesithi kuye: Ndodakazi, ukholo lwakho lukusindisile; hamba ngokuthula, siliswa esifweni sakho ^f.

35 Esakhuluma, kwafika abanye bomphathi wesinagoge ^g, bathi: Indodakazi yakho isifile; usamkhathazelani uMfundisi ^h? 36 Kwahle kwathi uJesu esizwa ilizwi elikhulunywayo wathi kumphathi wesinagoge ⁱ: Ungesabi, kholwa kuphela ^j. 37 Futhi kavumelanga muntu ukuthi amlandele, ngaphandle kukaPetro loJakobe ^k loJohane umfowabo kaJakobe ^l. 38 Wafika-ke endlini yomphathi wesinagoge ^m, wabona isiphithiphithi, labakhalayo labalilayo kakhulu, 39 esengenile wathi kubo: Liphithizelelani, likhala? Umntwana kafanga, kodwa ulele. 40 Basebemhleka usulu. Kodwa yena, esebakhuphile bonke, wathatha uyise womntwana omncane lonina lalabo ababelaye, wangena lapho okwakulele khona umntwana omncane ⁿ. 41 Wabamba isandla somntwana omncane, wathi kuye: "Thalitha, kumi" ^o; okuyikuthi ngokuphendulelwa: Wena ntombazana encane, ngithi kuwe, vuka ^p. 42 Njalo yahle yavuka intombazana encane, yahamba, ngoba yayileminyaka elitshumi lambili; basebesanganiseka ngokusanganiseka okukhulu ^q. 43 Wasebalayisisa kakhulu ukuthi lokhu kungaziwa muntu; wathi kayinikwe ukudla ^r.

Luke 8:41-56

41 Njalo khangela, kwafika indoda, uJayirosi ngebizo, yona ingumphathi wesinagoge, yasisiwa phansi enyaweni zikaJesu yamncenga ukuthi angene endlini yayo ^s; 42 ngoba yayilendodakazi eyodwa ezelweyo eyayingaba leminyaka elitshumi lambili ^t, njalo yona yayisisifa. Kwathi esahamba amaxuku amcindezela. 43 Lowesifazana owayelomopho wegazi okweminyaka elitshumi lambili, echithe konke okwempilo yakhe kubelaphi engelakusiliswa langubani ^u, 44 wasondela ngemva kwakhe, wathinta umphetho wesembatho sakhe ^v; njalo wahle wakhawula umopho wegazi lakhe. 45 UJesu wasesithi: Ngubani ongithintileyo? Kwathi lapho bephika bonke, uPetro wathi lababelaye: Nkosi ^w, ixuku likuminyanisile likucindezele, kodwa uthi: Ngubani ongithintileyo? 46 Kodwa uJesu wathi: Ukhona ongithintileyo; ngoba mina ngazile ukuthi amandla aphumile kimi. 47 Kwathi owesifazana ebona ukuthi kafihlakalanga, weza ethuthumela, wawa phambi kwakhe ^x, walandisa phambi kwabantu bonke ukuthi umthinte ngesizatho bani, lokuthi uhle wasila njani. 48 Wasesithi kuye: Mana isibindi, ndodakazi, ukholo lwakho lukusindisile ^y; hamba ngokuthula ^z. 49 Esakhuluma, kwafika umuntu evela endlini yomphathi wesinagoge, wathi kuye: Indodakazi yakho isifile; ungamhluphi uMfundisi. 50 Kodwa uJesu esizwa, wamphendula, wathi: Ungesabi; kholwa kuphela, njalo izasindiswa. 51 Futhi esengenile endlini, kavumanga ukuthi kungene muntu, ngaphandle kukaPetro loJakobe loJohane, loyise wendodakazi lonina. 52 Njalo bakhala bonke, beyililela ^aa. Kodwa wathi: Lingakhali; kayifanga, kodwa ilele. 53 Basebemhleka usulu, besazi ukuthi ifile. 54 Kodwa yena esebakhuphele phandle bonke, wabamba isandla sayo, wamemeza, esithi: Ndodakazi, vuka! 55 Wasubuya umoya wayo, yasivuka khona lapho; waselaya ukuthi kayiphiwe ukudla. 56 Abazali bayo basebemangala kakhulu ^ab; kodwa wabalaya ukuthi bangatsheli muntu okwenzakeleyo ^ac.