1Ch 15 | ZomZIV | STEP | David Khuapi sungah David in ama adingin inn a lam khit ciangin Pasian Singkuangpi koih nading mun khat bawla, tua koih nadingin puanbuk khat a zal hi.

1 Chronicles 15

Jerusalem ah Singkuangpi Kipuak

1 David Khuapi sungah David in ama adingin inn a lam khit ciangin Pasian Singkuangpi koih nading mun khat bawla, tua koih nadingin puanbuk khat a zal hi. 2 Tua ciangin David in, “Levi-te longal kuamah in Pasian singkuangpi a pua kei ding hi, bang hang hiam cih leh TOPA singkuangpi pua ding le a tawntungin ama mai-ah biakna nasem dingin TOPA in amaute a teelsa ahi hi,” a ci hi. ^a

3 David in TOPA singkuangpi koih nadingin a bawlsa muna a puato dingin Israel khempeuh Jerusalem ah a kikhawmsak hi. 4 Amah in Aaron suante le Levi-te samkhawm a: ^b

5 Kohath suante panin a makai
Uriel le a tanaute 120;
6 Merai suante panin a makai
Asaiah le a tanaute 220;
7 Gershon ^{▼▼15.7 Hebrew in Gershom, Gershon tawh kilamdang lo} suante panin a makai
Joel le a tanaute 130;
8 Elizaphan suante panin a makai ^d
Shemaiah le a tanaute 200;
9 Hebron suante panin a makai ^e
Eliel le a tanaute 80;
10 Uzziel suante panin a makai
Amminnadab le a tanaute 112 - ahi hi.

11 Tua ciangin David in siampi Zadok le Abiathar, le Uriel, Asaiah, Joel, Shemaiah, Eliel le Levi-te Amminadab a sam hi. 12 Amah in amaute kiangah, “Note, Levi innkuan lutangte na hi uh hi; no le na kithuahpih uh Levi-te no le no ki-apin TOPA Israel Pasian singkuangpi koih nadinga ka bawlsa munah na puato ding uh hi. 13 Tua pen bang hang hiam cih leh a masa hunin no Levi-te in na puak toh loh manun TOPA eite Pasian hehna ei tungah a suakkhia hi. Eite in ama hong lamlah banga hih dingin amah i dong kha kei hi,” a ci hi. 14 Tua ciangin TOPA Israel Pasian singkuangpi puato dingin siampite le Levi-te amau a ki-ap tawm uh hi. 15 Tuateh TOPA thu tawh kituakin Moses thupiaksa bangin Levi-te in Pasian singkuangpi a zawlte in a liangko uah a pua uh hi. ^f

16 David in Levi makaite kiangah amau sanggamte, lungnopna la sa ding lasiamte le tuate tawh kithuah dingin tumtheih: lyre-te, harp-te le daltuah tum siamte a seh dingun a gen hi.

17 Tua ciangin Levi-te in Joel tapa Heman; ama sanggamte panin Berekiah tapa Asaph; amaute sanggampate Merari-te panin Kushaiah tapa Ethan; 18 le amaute tawh amau zoma a lian amau sanggamte: Zechariah, ^{▼▼15.18 Hebrew khutgelh thum le Septuagint khutgelh a tampen ah (tg.20 le 1Kh. 16:5 zong en in) Hebrew khutgelh a tampen ah Zechariah tapa ahikeh Zechariah, Ben le} Jaaziel, Shemiramoth, Jehiel. Unni, Eliab, Benaiah, Maaseiah, Mattithiah, Eliphelehu, Mikneiah, Obed-Edom le Jeiel, ^{▼▼15.18 Hebrew; Septuagint (tg.21 zong en in) Jeiel le Azaziah} kongpi cing te ahi uh hi. ⁱ

19 Tumtheih siamte: Heman, Asaph le Ethan, sumngo daltuah tum ding; 20 Zechariah, Aziel, Shemiramoth, Jehiel, Unni, Eliab, Maaseiah le Benaiah-te alamoth ^{▼▼15.20 tumtheih bi hi kha ding} tawh kizui-a lyre-te a tum ding; 21 Mattithiah, Eliphelehu, Mikneiah, Obed-Edom, Jeiel le Azaziah-te Sheminith ^{▼▼15.21 tumtheih bi hi kha ding} tawh kizui-a ki-uk harp-te tum ding ahi hi. 22 Levi-te lutangpa Kenaniah in la kisate uk ding hi; ama kivakna ahi manin ama tavuan ahi hi. ^l

23 Singkuangpi kongkhakpi cing ding Berekiah le Elkanah-te ahi uh hi. 24 Shebaniah, Joshaphat, Nethanel, Amasai, Zechariah, Benaiah le Eliezer hih siampite in Pasian singkuangpi mai-ah pengkul a mut ding uh hi. ^m

25 Tua ciangin David le Israel upate le tulkhat ukte, Obed-Edom inn panin TOPA thukhun singkuangpi puato dingin lungnuamtakin a kuankhia uh hi. 26 Pasian in TOPA thukhun singkuangpi pua Levi-te huh ahi manin bawngtal sagih le tuutal sagih biakna-in kipia hi. 27 Tu-in David in saihadial hoih puantualpi silh a, tua mah bangin singkuangpi pua Levi-te khempeuh le lasate le lapawl kisate a ukpa Kenaniah-te in zong a silh uh hi. David in zong saihadial siampi puan a silh hi. 28 Tua ciangin Israel khempeuh awng uh a, tuutal kite le pengkulte mutin, daltuahte le lyre-te le harp-te tumsa-in TOPA thukhun singkuangpi a puato uh hi. ⁿ

29 David Khuapi sungah TOPA thukhun singkuangpi a lut laitakin Saul tanu Michal in tawhlet panin a vil hi. Tuanu in Kumpipa David lamsa-a gualnuam a muh ciangin a lungsim sungah a musit hi.