1Ch 17 | ZomZIV | STEP | David ama kumpi inn ah a ten khit ciangin kamsangpa Nathan tungah, “Hih lai-ah tamtak sing kumpi-inn ah kei ka tenga, TOPA thukhun singkuangpi lah puanbuk nuai-ah a om hi,” a ci hi.

1 Chronicles 17

David tunga Pasian Thuciam

1 David ama kumpi inn ah a ten khit ciangin kamsangpa Nathan tungah, “Hih lai-ah tamtak sing kumpi-inn ah kei ka tenga, TOPA thukhun singkuangpi lah puanbuk nuai-ah a om hi,” a ci hi. ^a

2 Nathan in David kiangah, “Pasian in nang hong ompih ahi manin na lungsima om bangbang sem in,” ci-in a dawng hi. ^b

3 Tua ciangin Nathan tungah Pasian thu tunga:

4 “Pai inla ka nasempa David kiangah, ‘TOPA gen hih ahi hi: A sunga ka ten nading inn khat a lam ding nang na hi kei hi. 5 Egypt panin Israel ka paikhiatpih a kipan tuni dong inn sungah ka teng nai kei hi. Puanbuk mun khat pan mundang khatah, tenna mun khat pan adang khatah ka kikhin hi. 6 Israel-te khempeuh tawh ka kikhinna peuhpeuh ah ka mite a cing dinga thu ka piak amau makaite ^{▼▼17.6 Tang ngeina-in thukhente tg.10 ah zong} khatpeuh tungah, “Bang hangin tamtak sing, inn hong lamsak lo na hi hiam,” ci ngei ka hi hiam?’ ci hi.
7 “Tua ahi ciangin ka nasempa David tungah, ‘Thahatpen TOPA gen hih ahi hi: Ka mi Israel a uk dingin lonona pan le ganhonte na zuihna panin nang kong la hi. 8 Na painasa khempeuh ah nang kong ompih a, na mai-ah na galte ka nawhkhia hi. Tu-in nangma min, leitunga mi lianpente min kong bangsak ding hi. 9 Tuateh ka mi Israel in amau inn ding nei-in a kinawngkaisak nawn loh nadingin mun ka pia dinga amaute ka phut ding hi. Migilote in amaute a tung lai-a a nuainet uh bangin nuainet nawn lo ding uh a, 10 ka mi Israel-te makai ding ka seh khita kipan amaute tungah a hih nawn kei ding uh hi. Na galte khempeuh zong ka nuaisiah ding hi. ^d
“‘Nang tunga kong pulak inah TOPA in nang adingin inn khat hong lamsak dinga: 11 Na nuntak hun bei-a, na pate tawh om dinga na pai ciangin nang zaluah dingin nang sunga piang nangma tapate khat ka laamto dinga, ama kumpi-gam ka kipsak ding hi. 12 Amah in keima adingin inn khat lam dinga ama kumpi tokhom ka kipsak den ding hi. 13 Kei ama pa ka hi dinga, amah ka tapa ahi ding hi. Nangmah in a za na luahpa panin ka itna ka lakkhiat bangin ama tung panin ka itna ka lakhia ngei kei ding hi. 14 Ka innkuan le ka kumpi-gam a uk den dingin amah ka seh a; ama kumpi tokhom a kip tawntung ding hi,’ ci-in gen in,” a ci hi.

15 Nathan in David tungah hih kilaakna khempeuh a zasak hi.

David’ Thungetna

16 Tua ciangin Kumpipa David sungtumin TOPA mai-ah tu a:

“TOPA Pasian aw, hih tan nong tunpih dingin kei kua hi a, ka innkuanpihte bang ahi hiam? 17 Tua hi-a Pasian aw, nang muhna ah hihte bangmah tham ahi kei hi, na nasempa innkuan vai mailam ading zong nong gen khin hi. TOPA Pasian aw, mihing lakah a kitawisang pen bangin kei tungah nong en khin hi.
18 “Na nasempa pahtawi nadingin David in bang genthuah thei lai ding ahi hiam? Ahang in, na nasempa na theih khitsa ahi hi; 19 TOPA aw. Na nasempa na khualna le nangma deihna tawh kizui-in hih na lianpite na bawl khin a, hih thuciamtehna lianpite khempeuh na kitheisak khin hi.
20 “TOPA aw, nang tawh a kibang khat beek om lo-a, ka bilun ka zak uh bangin, nang longal Pasian dang a om kei hi. 21 Pasian mahmah paikhia-a, ama mi dinga a tatkhiatte ama min suaksak-a a lian a kihtakhuai nalamdang bawlin na mite mai panin minamte le a pasiante uh hawlkhia-in Egypt pana na tatkhiat - na mi Israel tawh a kibang kua om ahi hiam? 22 Na mi Israel, a tawntunga nang aituam ding na suaksak-a, nang amaute Pasian na hi hi, TOPA aw.
23 “Tua hi-a TOPA aw, na nasempa le a innkuante tawh kisai-a na bawlsa thuciamte kipsak den in. Na min a liat nading le a kip tawntung nadingin 24 na ciam bangbangin sem ta in. Tua ciangin mite in, ‘Thahatpen TOPA Israel Pasian ahi hi,” ci ding uh hi. Tuateh na nasempa David innkuan, nangma mai-ah kip ding hi. ^e
25 “Nang, ka Pasian in na nasempa adingin inn khat lamsak ding ama tungah na laak khin hi. Tua ahi ciangin na nasempa in nang tungah hih thungetna hong ngen ngam ahi hi. 26 TOPA aw, nangmah Pasian na hi hi! Na nasempa tungah hih thuciam hoih na ciam khin hi. 27 Nangma muhna-ah a kizopsuak nadingin na nasempa innkuan thupha piak ding na lungkim khina; TOPA aw, nangmah in thupha pia khin na hi manin thupha a kipia tawntung ding hi,” a ci hi.