1Sa 14 | ZomZIV | STEP | Ni khat Saul tapa Jonathan in a galhiam pua tangvalpa kiangah, “Hong pai in galkhata Philistia-te galvilna mun khatah va pai ni,” a ci hi. Ahi hangin a pa kiangah a gen kei hi.

1 Samuel 14

1 Ni khat Saul tapa Jonathan in a galhiam pua tangvalpa kiangah, “Hong pai in galkhata Philistia-te galvilna mun khatah va pai ni,” a ci hi. Ahi hangin a pa kiangah a gen kei hi.

2 Migron a om Gibeah khuataw a mangkawlsing nuai-ah Saul a om hi. Amah tawh mi zaguk khawng bek om a, 3 tuate lakah siampi puan a silh Ahijah bek a om hi. Amah, Shiloh a TOPA siampi Eli tapa, Phinehas tapa Ahitub sanggampa Ichabod tapa ahi hi. Jonathan a paikhiat lam kuamah in a thei kei hi.

4 Jonathan in Philistia-te galvilna muna pai a sawmna ciangka alang tuakah suangdawk om a, khat Bozez hi in, alang khata pen Seneh ahi hi. 5 Suangdawk khat Micmash lam manawh in leilu-lam ah dawkto a, a khat pen Geba lam manawhin leitaw-lam ah a dawk suk hi.

6 Jonathan in a galhiam pua tangvalpa kiangah, “Hong pai ou, vun-at loh mite galvilna ah pai ni ei; TOPA in ei tangin hong dosak kha thei ding hi. TOPA in hong hon peuh leh tawm le tam in bangmah sai lo hi,” a ci hi.

7 A galhiam puapa in, “Nang lungsima om bangbang hih in. Hih ou leh, ka lungsim le ka hinna nang tawh ka om hi,” a ci hi.

8 Jonathan in, “Tua ahileh hong pai ou; amau lamah galkah in amaute i va kimusak ding hi. 9 Amaute in, ‘No kianga kong pai mateng uh tua lai-ah na ngak un,’ hong cih uh leh i omna munah ngak pahin amau omna munah i paito kei ding hi. 10 Ahi hangin amaute in, ‘Ko omna ah hong paito un,’ hong cih uh leh tua pen TOPA in amaute ei khut sunga hong piakna lim hi ding hi,” a ci hi. ^a

11 Tua ciangin amaute gel Philistia-te galvilna ah a va kilak uh hi. Philistia-te in, “En dih un, Hebrew-te amau bukna kawhawm panin hong awmtal khia uh hi,” a kici uh hi. 12 Galvilna-a mite in Jonathan le galhiam puapa otsan uh a, “Ko kiangah hong paito uau, thu khat hong hilh nung ei,” a ci uh hi. ^b

Tua ciangin, Jonathan in galhiam puapa kiangah “Ka nungah hong kahto ou, TOPA in amaute Israel khut sungah hong pia khin ta hi,” a ci hi. ^c

13 A khut le a khe zangin Jonathan kahto-a a galhiam puapa in a nungah a pha cinten hi. Jonathan mai-ah Philistia-te puk uh a, a galhiam puapa in a nungah a that hi. 14 Tua a masa pen galsimna ah Jonathan le a galhiam puapa in leitang acre ^{▼▼14.14 Hebrew ah hakkol khat lang; ‘hakkol” khat pen bawngtal kap khat in ni khat a khawhna sungteng.} lang sungah mi sawmnih khawng ding a that uh hi.

Israel in Philistia-te Delhkek

15 Tua ciangin giahphual a om galkap buppite le lopaanga omte, galvilna-a omte le galguk pawlte patau uh a, - lei a ling hi. Tua patauhna Pasian ^{▼▼14.15 Ahikeh a lauhuai patauhna} tunsak ahi hi.

16 Benjamin-a om Gibeah a Saul galvilte in galkap honpi mun citenga kikhenthang a mu uh hi. 17 Tua ciangin Saul in a ompih mite kiangah, “I galkapte kaikhawm unla kua om lo hiam, thei dih un,” a ci hi. A cih banga a hih uh ciangin Jonathan le a galhiam puapa tua lai-ah a na om kei hi.

18 Saul in Ahijah tungah, “Pasian singkuangpi hong paipih in,” a ci hi. (Tua hunin singkuangpi Israel-te tawh a omkhawm kei hi.) ^{▼▼14.18 Hebrew; Septuagint; “Siampi puan hong puak in “(Tua hunin amah in Israel-te mai-ah siampi puan a silh hi.} 19 Saul in siampipa a hopih laitakin Philistia-te giahphual-a buaina a nasia semsem hi. Tua ciangin Saul in siampipa kiangah, “Na khut dokkik in,” a ci hi. ^g

20 Tua ciangin Saul le a mite kikhawm uh a, galsim dingin a kuankhia uh hi. Amaute in Philistia-te buaigawp uh a, khat le khat namsau-in a kisat uh a mu uh hi. 21 A masa lai-in Philistia-te tawh omkhawm a, amau giahphual-a a paisa Hebrew-te Saul le Jonathan tawh a omkhawm Israel-te kiangah a paito uh hi. 22 Ephraim mualtung gama bu Israel-te khempeuh in Philistia-te taikekna a zak uh ciangin gal dopih uh a galte a nungdelh zakzak uh hi. 23 Tua ni-in TOPA in tua bangin Israel hukhia a, Beth Aven dongah gal a kido hi. ^h

Jonathan in Khuaizu Ne

24 Tu-in Saul in Israel tungah, “Ka galte tungah kei mahmah in phu ka lak khit nitak matengin an a ne peuhmah in hamsiatna thuak ta hen!” cih kiciamna khat omsak ahi manin Israel mite a lungdong uh hi. Tua hi-a galkapte khat beek in an a ciam kei uh hi. ⁱ

25 Leitunga khuaizu a omna gammang lakah galkap ^{▼▼14.25 Ahikeh Tu in gam sunga mi khempeuh} khempeuh a lut uh hi. 26 Sing lakah pai uh a khuaizu takkhia a muh uh hangin kiciamna kihta uh ahi manin kuamah in a khut a kamah a tun kei hi. 27 Ahi hangin a pa in mite thuciam tawh a khal lam thei lo ahi manin Jonathan in a khuta a tawi ciangkhut dawnin khuailu dawt hi. A khutin a kamah tunto-a a mit a vaktuam ^{▼▼14.27 Ahikeh a tha malh kik hi} hi. 28 Tua ciangin galkap khat in, “Na pa in galkapte khempeuh tungah kiciamna khat omsaka, ‘Tuni-a an a ne peuhpeuh in hamsiatna thuak ta hen!’ ci hi. Tua hanga mite a bah ahi hi,” a ci hi. ^l

29 Jonathan in, “Ka pa in gamsung a buaisak hi. En un, khuaizu tawmkha ka ciap ciangin ka mit a vaktuam ^{▼▼14.29 Ahikeh ka thamalh kik hi} hi. 30 Tuni-in mite in galte nusiat an pawlkhat la in ne le uh hoihzaw tham ding hi. Philistia-te zong tam kithat zozaw lai ding hi lo ahi hiam?” a ci hi. ⁿ

31 Tua ni-in Israel-te in Micmash panin Aijalon ciang dong Philistia-te a sattuk khit uh ciangin a thazaw gawp uh hi. 32 Amaute in van kinusiate kituh henhan uh a, tuuhon, bawnghon le bawngnote la-in lei lakah gogawp uh a, a sisan tawh a ne khawm uh hi. 33 Tua ciangin mi khat in Saul kiangah, “En in, mite in a sa lakah a sisan om laipi ne-in TOPA tungah a mawh uh hi,” ci-in a va ko hi. ^o

Amah in, “Note na muanhuai kei uh hi; hih lai-ah suangtumpi khat hong khuk meng un,” a ci hi. 34 Tua ciangin paikhia unla mite lakah pai-in, ‘A kuamahpeuh in na tuute uh le na bawngte uh hih lai-ah hong paipihin go unla ne un, a sa le a sisan nekkhawmna tawh TOPA tungah kuamah mawh kei uh hen,’ va ci un,” a ci hi.

Tua ciangin mite in bawngtal paipih uh a tua zanin tua lai-ah a go uh hi. 35 Tua ciangin Saul in TOPA adingin biakna-tau khat dawh a, hih banga a hih a masapen ahi hi. ^p

36 Saul in, “Philistia-te nungah zanin i paisuk dinga amaute khuavak dong lawkgawpin khat beek i hingkhawi kei ding hi,” a ci hi.

Amaute in, “Nangma hoihsak bangbangin hih ni,” ci-in a dawng uh hi.

Ahi hangin siampipa in, “Hih lai-ah Pasian dong phot dih ni,” a ci hi.

37 Tua ciangin Saul in Pasian kiangah, “Philistia-te nungah ka paisuk ding hiam? Amaute Israel khutah nong pia ding hiam?” ci-in a dong hi. Ahi hangin Pasian in tua ni-in a dawng kei hi. ^q

38 Tua ciangin Saul in, “No galkap makaite aw, hih lai-ah hong pai dih un, tuni-in bang mawhna kibawl ahi hiam, zongkhia dih ni. 39 Israel nuntakna a hukhia TOPA nuntakna ka lo hi, ka tapa Jonathan tung nangawn ah a tun leh a sih kul ding hi,” a ci hi. Ahi hangin mite khat beek a pau a om kei hi.

40 Tua ciangin Saul in Israel-te khempeuh tungah, “Note hua lai-ah va ding un; kei le ka tapa Jonathan hih lai-ah ka ding ding uh hi,” a ci hi.

Mite in, “Hoih na sak penpen hih in,” ci-in a dawng uh hi.

41 Tua ciangin Saul in TOPA, Israel Pasian tungah, “Amanin hong dawng in,” ^{▼▼14.41 Hebrew; Septuagint; Bang hangin na nasempa tuni-in dawng lo na hiam? Kei ka hikeh ka tapa Jonathan a khialh le Urim in hong dawng inla ahi hangin Israel mite a khial uh ahileh Thummim in hong dawng in”} ci-in thu a ngen hi. Tuateh Jonathan le Saul tungah ai tu-a mite a siang uh hi. 42 Saul in, “Kei le ka tapa Jonathan kikal ah ai lawn un,” ci hi. Tuateh Jonathan tung a tu hi. ^s

43 Tua ciangin Saul in Jonathan tungah, “Bang hih na hi hiam, hong gen in,” a ci hi.

Tua ciangin Jonathan in, “Ka ciangkhut dawnin khuaizu tawmkha ka ciam hi. Tua hangin ka sih kul ding ahi hiam?” ci-in a gen hi.

44 Saul in, “Jonathan aw, “Nang na sih kei leh Pasian in tua sanga nasiazaw in kei hong thuaksak ta hen,” a ci hi. ^t

45 Ahi hangin mite in Saul kiangah, “Hihzah ta-a Israel a hukhiapenpen - Jonathan bang sih laizang ding ahi hiam? Si buang lo e! TOPA nuntakna lo-in ka cih unah Pasian huhna tawh amah in tuni-in hizah ta sem ahi manin a samzang khat zong lei-ah a kia kei ding hi,” a ci uh hi. Tuaci-in mite in Jonathan hukhia uh a, amah a kithat kei hi. ^u

46 Tua ciangin Saul in Philistia-te a nungdelh khawl-a amau gamah a nungkin uh hi.

47 Saul in Israel tungah ukna a ngah khit ciangin akim apam-a a galte: Moab, Ammon-te, Edom, Zobah kumpite ^{▼▼14.47 Masoretic Bupi; San Tuipi Laizial le Septuagint ah kumpipa} le Philistia-te a do hi. A kiheina peuhpeuhah amaute gimna dan a thuaksak hi. ^{▼▼14.47 Hebrew; Septuagint ah amah gualzo mahmah hi.} 48 Amah in hangtakin do-a, Amalek zo in, amaute a mante khut panin Israel-te a hukhia hi. ^x

Saul Innkuante

49 Saul’ tapate Jonathan, Ishvii le Malki-Shua ahi uh hi. A tanu upa pen Merab hi a, tua sanga nauzawnu Michal ahi hi. 50 A zi min Ahinoam hi a, Ahimaaz’ tanu ahi hi. A galkap mangpa min Abner hi a, Ner’ tapa hi in, Ner pen Saul pano ahi hi. 51 Saul’ pa Kish le Abner pa Ner, Abiel tapate ahi uh hi. ^y

52 Saul a nuntak sung teng Philistia-te tawh nasiatakin kido den uh a, Saul in mi thahat le mi hangsan a muh nak leh a naseppih dingin a la hi. ^z