1Sa 7 | ZomZIV | STEP | Tua ciangin Kiriath Jearim mite paisuk uh a, TOPA ’ singkuangpi a lato uh hi. Amaute in mualtunga Abinadab’ inn ah koih uh a, a tapa Eleazar siansuahin TOPA ’ singkuangpi a cingsak uh hi.

1 Samuel 7

1 Tua ciangin Kiriath Jearim mite paisuk uh a, TOPA’ singkuangpi a lato uh hi. Amaute in mualtunga Abinadab’ inn ah koih uh a, a tapa Eleazar siansuahin TOPA’ singkuangpi a cingsak uh hi. ^a

Mizpah ah Philistia-te Guallel

2 Kiriath Jearim ah singkuangpi a om sung sawtpi hi-a a om sungteng kum sawmnih cingin Israel mite khempeuh TOPA ngai-in thum ta uh hi. 3 Tua ciangin Samuel in Israel innkuan buppi tungah, “Na lungsim khempeuh un TOPA lamah kihei-a, na gamdang pasiante uh le Ashtoreth-te paikhia-un, TOPA tungah ki-apa ama na bek na sep uh leh, amah in note Philistia-te khut panin hong hukhia ding hi,” a ci hi. 4 Tua ciangin Israel-te in Baal-te le Ashtoreth-te paikhia uh a TOPA na bek a sem uh hi.

5 Tua ciangin Samuel in, “Israel khempeuh Mizpah ah hong kikhawm un; TOPA tungah note tangin kong thumsak ding hi,” a ci hi. 6 Mizpah ah amaute a kikhop khit uh ciangin tui tawi uh a TOPA mai-ah a sung uh hi. Tua ni-in amaute in an tang uh a, kipulaakin, “TOPA tungah ka mawh zo uh hi,” a ci uh hi. Tuateh Mizpah ah Israel makai-in ^{▼▼7.6 Tang ngeina-in thukhen} Samuel a om hi. ^c

7 Philistia-te in Mizpah ah Israel kikaikhawm hi, cih a zak uh ciangin amaute sim dingin Philistia gam-ukte a kuan to uh hi. Israel-te in tua thu a zak uh ciangin Philistia-te a kihta uh hi. 8 Amaute in Samuel kiangah, “TOPA eite Pasian in Philistia-te khut pan hong hutkhiat theih nadingin ama tungah tawlnga loin kiko in,” a ci uh hi. 9 Tua ciangin Samuel in nawi ne lai tuuno khat la a, meihal biakna-in TOPA tungah a buppi in a pia hi. Israel tangin amah TOPA tungah kiko-a, TOPA in a dawng hi. ^d

10 Samuel in meihal biakna a piak laitakin Israel sim dinga kuan Philistia-te nai mahmah ta hi. Ahi hangin tua ni-in TOPA in Philistia-te tungah vanging ngaih mahmah gingsaka, amaute patausakin Israel-te mai-ah a taikek uh hi. 11 Mizpah panin Israel mite diangkhia uh a, Philistia-te delhin Beth Car nuaisan dong lamdung tawntungah amaute a ngawng-at uh hi.

12 Tua ciangin Samuel in suang khat la a, Mizpah le Shen kikalah a phut hi. Amah in, “Tu ciang dong TOPA in hong huh khin hi,” a cihna-in a min Ebenezer ^{▼▼7.12 Ebenezar pen huhna suangtum cihna} a ci hi. 13 Tua ciangin Philistia-te guallel uh a, Israel gam a va sim ngam nawn kei uh hi. ^f

Samuel a nuntak sungteng Philistia-te langah TOPA khut a pang hi. 14 Israel tung pana Philistia-te in a laksa Ekron pan Gath donga khuapite ama tungah kipia kika, Philistia-te ukna nuai panin a gamvengte uh a honkhia uh hi. Tuateh Amor-te le Israel a kilem uh hi.

15 Samuel in a nuntak hun sungteng Israel tungah thukhen a sem den hi. 16 Kum simin Bethel pan Gilgal leh Mizpah ah kotpai-a, tua munte khempeuh a Israel tungah thu a khen hi. 17 Ahi hangin a inn omna Ramah ah ciah kik dena, tua lai-a Israel tungah zong thu a khen hi. Tuateh tua lai-ah TOPA tunga biakna-tau khat a dawh hi. ^g