2Ch 9:1-12 | ZomZIV | STEP | Sheba kumpinu in Solomon minliatna a zak ciangin thudot-na haksa kengin amah zia-et dingin Jerusalem ah a pai hi. Khualzin mi tampitak - gimnamtuite, kham tampi le suangmanpha a pua kala-ohte tawh Solomon kiangah pai-a a lungsim sunga a ngaihsut khempeuh tawh Solomon a hopih hi.

2 Chronicles 9:1-12

Sheba Kumpinu Solomon kiangah Hawh

1 Sheba kumpinu in Solomon minliatna a zak ciangin thudot-na haksa kengin amah zia-et dingin Jerusalem ah a pai hi. Khualzin mi tampitak - gimnamtuite, kham tampi le suangmanpha a pua kala-ohte tawh Solomon kiangah pai-a a lungsim sunga a ngaihsut khempeuh tawh Solomon a hopih hi. 2 A dot khempeuh Solomon in dawnga; tuanu tungah a gentel ding a haksa lua khat beek a om kei hi. 3 Sheba kumpinu in Solomon pilna, a lamsa a kumpi inn 4 a sabuai tunga a annek, uliante tutna, nasemte puansilh, a haitawite puansilh le TOPA biakinnpi sunga meihal biakna-a a piakte ^{▼▼9.4 Ahikeh ama a sangkahtohna} a muh ciangin a cih nading a thei kei hi. ^b

5 Tuanu in kumpipa kiangah, “Ka gam pana ka zak na nasepte le na pilna in thumaan ahi hi. 6 Ahi hangin hong pai-a ka mit mahmah tawh ka muh matengin amaute gen ka um kei hi. Maan takpi hi, na pilna a liatzia a lang zong hong kigen nai lo hi a; ka zakzah sangin na pilzaw tham hi. 7 Na mite nak lungdam na’n cia! Na mai-a ding den na pilna a za na uliante nak lungdam si un cia! 8 Nang tungah lungkim-a, TOPA na Pasian adingin a uk dinga kumpi in hong koih a, ama kumpi tokhom tunga hong tusak TOPA na Pasian kiphat hen. Na Pasian in Israel a it man le a kip den ding a deih manin thumaan le thutangin vaihawma, amaute a uk dingin nang kumpi a hong koih ahi hi,” a ci hi. ^c

9 Tua ciangin amah in kham talent ^{▼▼9.9 Tua in 4 ½ bang (metric ton 4 bang)} 120, gimnamtui tampitak le suangmanphate kumpipa a pia hi. Sheba kumpinu in Kumpi Solomon a piakzah gimnamtui a om ngei kei hi. ^e

10 (Hiram mite le Solomon mite in Ophir panin kham a pua uh hi; amaute in cingsing ^{▼▼9.10 Cingsing luang tawh kilamdang lo kha ding hi.} le suang manpha zong a pua uh hi. 11 Kumpipa in cingsingte TOPA biakinnpi le kumpi inn kahlei ding le lasate ading harp-te le lyre-te bawl nadingin a zang hi. (Judah gamah tuate tawh a kibang khatbeek a mu ngei kei hi.) ^g

12 Kumpi Solomon in Sheba kumpinu a deih khempeuh le a nget khempeuh pia a; amah a puak zah sanga tamzaw a pia hi. Tua ciangin amah nusia-in a nungzuite tawh ama gamah a ciah hi. ^h