2Ki 11-12 | ZomZIV | STEP | Ahaziah nu Athaliah in a tapa sih a muh ciangin kumpi innkuan bup thah a sawm hi.

2 Kings 11

Athaliah le Joash

1 Ahaziah nu Athaliah in a tapa sih a muh ciangin kumpi innkuan bup thah a sawm hi. 2 Ahi hangin Ahaziah sanggamnu, Kumpi Jehoram ^{▼▼11.2 Hebrew ah Joram; Jehoramtawh kilamdang lo} tanu Jehosheba in thah dinga kikoih kumpi tapate lak panin Ahaziah tapa Joash a gukhia hi. Tuanu in Athaliah muh loh dingin amah le a cingnu lupna inndei sungah a sel hi; tua hi a amah a kithat kei hi. 3 Athaliah in gam a uk kum guk sung amah le a cingnu TOPA biakinnpi sungah a om uh hi. ^b

4 A kum sagihna kum sungin Jehoiada in zakhat ukte, Cari-te le a cingte vaikhak a, tuate TOPA biakinnpi-a ama kiang ah a puaksak hi. Amah in amaute tawh thu khunga TOPA biakinnpi ah a kiciamsak hi. Tua ciangin amaute kumpipa tapa a lak hi. 5 Amah in amaute thu pia a, “Note in na hici hih ding uh hi: “No Sabbath ni-a kikhela a cing ding pawl thumte - sehthum suah seh khat in kumpi inn na cing ding uh a, 6 sehthum suah seh khat in Sur Kongpi cingin sehthum suah sehkhat in inn cingte nunga kongpi na cing ding uh hi; amaute biakinnpi cin kikhel ding uh hi - 7 tuateh no Sabbath ni-a a cing lo ding pawl nihte in kumpipa adingin biakinnpi na cing ding uh hi. 8 Na galhiam uh tawi ciatin kumpipa kimkot ah panmun la ciat un. No galkapte lakah ^{▼▼11.8 Ahikeh innkim tual manawh peuhpeuh} a lut peuhpeuh thah ding ahi hi. Kumpipa a pai nana a gei-ah om un,” a ci hi.

9 Zakhat ukte in siampi Jehoiada thupiak bang tektekin a hih uh hi, amau mi ciat sam uh a - Sabbath ni-a cing dingte le a cingsa a ciah dingte - siampi Jehoiada kiangah a pai uh hi. 10 Tua ciangin amah in TOPA biakinnpi sunga om Kumpi David neihsa teipite le lumte a ukte tungah a pia hi. 11 A cingte in a galhiam ciat uh tawisa-in kumpipa kimkot ah om uh a - biakna-tau le biakinnpi kiang leitaw-lam pang pan biakinnpi leilu-lam pang dong mun a la ciat uh hi. ^d

12 Jehoiada in kumpipa tapa paikhiatpih in kumpi lukhu khusak hi; a thukhun bu khat pia-in kumpipa ahina a tangko hi. Amaute in amah sathau nilh uh a, mipite in a khut uh bengin, “Kumpipa khansawt hen’” ci-in a kiko uh hi.

13 Athaliah in inncingte le mipite husa a zak ciangin TOPA biakinnpi-a mite kiangah amah a pai hi. 14 Tuanu in en-a a ngeina bangin khuampi kiangah kumpipa a ding hi. A uliante le kumpipa gei-a om pengkul mutte le gammi khempeuh kipakin pengkul a mut uh hi. Tua ciangin Athaliah in a puante balkeka, “Lehsawmna! Lehsawmna!” ci-in a awng hi.

15 Siampi Jehoiada in zakhat uk makaite kiangah, “Tuanu galkap kigualte kikal ^{▼▼11.15 Ahikeh innkim tual pualam} ah paikhiatpih unla, amah a zuite namsau in that un,” ci-in thu a pia hi. Ahang in, siampipa in, “Tuanu TOPA biakinnpi sungah a kithat kei ding hi,” a cihsa ahi hi. 16 Tua ciangin tuanu delh uh a, kumpi-inn sunga sakolte lutna leitual ah tuanu pha-in tua lai-ah a that uh hi.

17 Tua ciangin Jehoiada in TOPA le kumpipa le mite kikalah amaute TOPA’ mi a suah nadingin thukhun a bawl hi. Amah in kumpipa le mite kikal ah zong thukhun a bawl hi. 18 Gam sunga mi khempeuh Baal biakinn ah pai uh a, a phelkek uh hi. Amaute in biakna-taute le milimte dengzan uh a biakna-taute mai-ah Baal siampipa Mattan a that uh hi. ^f

Tua ciangin siampi Jehoiada in TOPA biakinnpi cing a koih hi. 19 Amah in zakhat ukte, Car-te, a cingte le gam sunga mi khempeuh tawh amah tonpih in TOPA biakinnpi panin kumpi-inn ah paipih uh a, a cingte kongpi panin a lut uh hi. Tua ciangin kumpipa in kumpi tokhom tunga a mun luah a, 20 gam mite khempeuh a nuam uh hi. Tuateh kumpi-inn ah namsau in Athaliah kithat khin ahi manin khuapi sung a dai hi. ^g

21 Joash ^{▼▼11.21 Hebrew ah Jehoash, Joash tawh kilamdang lo} in a uk a kipat in kum sagih a pha hi.

2 Kings 12

Joash in Biakinnpi Puah

1 Jehu a maan zawh kum sagihna kumin Joash ^{▼▼12.1 Hebrew ah Jehoash; Joash tawh kilamdang lo tg.2, 4, 6, 7 le 18 ah zong} kumpi suaka, Jerusalem ah kum sawmli sung a uk hi. A nu min Zibiah hi a; Beersheba pan ahi hi. 2 Siampi Jehoiada in a lamlah sungteng TOPA mit ah Joash thumaanin a gamta hi. 3 Ahi zongin munsangte kikhinkhia lo a; mite in tua lai-ah biakna pia-in gimnamtui a hal veve uh hi. ^j

4 Joash in siampite kiangah, “TOPA biakinnpi ah a siangthoin biakna-a kipia sumte - mi kisim huna kikhawm sumte, mimal kiciamna pana kingah sumte le utthu-a biakinn-a kipuak sumte khempeuh kaikhawm un. 5 Sumkemte khat tung panin siampite in sang unla biakinnpi siatna a kimu peuhpeuh puahna-in kizang hen,” a ci hi.

6 Ahi hangin Kumpipa Joash a kum sawmnih le thumna kum dong siampite in biakinnpi a puah nai kei uh hi. 7 Tua ahi ciangin Kumpipa Joash in siampi Jehoiada le siampi dangte sama, “Bang hangin biakinnpi kisiatnate puah lo na hi uh hiam? Na sumkemte uh tung panin sum lak beh nawn kei unla biakinnpi puah nadingin ap un,” a ci hi. 8 Siampite in mite tungah sum don nawn loh nading le biakinnpi amau le amau in a puah loh ding a thukim uh hi.

9 Siampi Jehoiada in singkuang khat la-in a sin a vangsak hi. Amah in biakna-tau gei TOPA biakinnpi sung lutna a taklam pangah tua a koih hi. TOPA biakinnpi-a kipuak khempeuh siampi kongcingte in singkuang sungah a koih uh hi. 10 Singkuang sungah sum tam omta cih a muh hunhun un kumpipa thuvanpipa le tulpipa in TOPA biakinnpi-a kipuaksa sumte sim uh a ip sungah a seng uh hi. 11 A sum phazah a ciatsak khit ciangin biakinn sepna vaan dinga kisehpa tungah a pia uh hi. Tua tawh biakinnpi semte - khutsiamte, biakinn lamte, 12 suang ciangte le suang atte a guai uh hi. Amaute in TOPA biakinnpi puah nadingin sing le suang zepsate lei uh a, TOPA biakinnpi a ngeina batsak nading khempeuh ah a zang uh hi. ^k

13 Biakinnpi sunga kipuak sumte, ngun tuikuangte, taitehte, tui thehna kuang-ukte, pengkulte le TOPA biakinnpi sunga ngun le kham a kibawl vanzatte leina in kizang lo hi; 14 nasemte tungah tua kipia-a, biakinnpi puahna-in a zang uh hi. 15 Amaute in thumaantakin na sem uh ahi manin nasemte tungah sum a piakna uh sum sazian a ngen nawn kei uh hi. 16 Mawhna hanga biaknate le khialhna hanga biakna sumte TOPA biakinnpi ah kipuak lo hi; tuate siampite aa ahi hi.

17 Hih hun laitakin Aram kumpipa Hazael kuanto-a Gath simin a la hi. Tua ciangin Jerusalem sim dingin a kihei hi. 18 Ahi hangin Judah kumpipa Joash in Judah kumpi sem a pate - Jehoshaphat, Jehoram le Ahaziah-te in a apsa uh a siangtho nate khempeuh - le amahmah in a apsa letsongte le TOPA biakinnpi sung le kumpi-inn sunga sumkholna-a om khamte khempeuh Aram kumpipa Hazael khak ahi manin Jerusalem panin a kileh kik hi. ^l

19 Joash in a uk sunga thupiang dangte le ama sepsate khempeuh Judah khangthu ciamtehna laibu sungah kigelh hi lo ahi hiam? 20 A uliante in amah sawmsim uh a, Silla zuatsukna lampi-a Beth Milloah ah a suam lum uh hi. 21 Amah a that uliante pen: Shimeath tapa Jozabad le Shomer tapa Jehozabad ahi hi. Amah si-a David Khuapi ah a pate tawh a kivui khawm hi. Tuateh a tapa Amaziah in luah a kumpi a suak hi.