2Th 3 | ZomZIV | STEP | A nunung penin sanggamte aw, note laka ahi khinsa bang tektek in, Topa thupuak a manlangin kizel a, a kipahtawi theih nadingin kote ading thu na ngetsak un.

2 Thessalonians 3

Thungetsak ding Ngetna

1 A nunung penin sanggamte aw, note laka ahi khinsa bang tektek in, Topa thupuak a manlangin kizel a, a kipahtawi theih nadingin kote ading thu na ngetsak un. 2 Mi khempeuh in upna nei kim lo ahi manin, a gilo a tatkhelte pan hong kihut theih nadingin thu na ngetsak un. 3 Ahi hangin Topa a muanhuai hi, na tha uh hong khauhsak dinga, gilopa panin hong hu ding hi. 4 Kong thupiakte uh na zui uh a, a zui lai dingin Topa sungah kong muang uh hi. 5 Pasian itna sung le Christ thuakzawhna sungah a tung dingin Topa in lam hong lak ta hen. ^a

Thadah lo dinga Vauhilhna

6 Sanggamte aw, a thadahte le ko tung pana na ngah uh thuhilhna ^{▼▼3.6 Ahikeh tang-ngeina} tawh kituaka nungta lo sanggamte peuhmah tawh na kithuah kei un, ci-in Topa Jesu Christ minin thu kong pia uh hi. 7 Ahang in, kote etteh a nong neih ding uh ahi zia, no mahmah in na thei uh hi. No tawh ka om khawm lai-un ka thadah kei uh a, 8 a man piak lohin kuama an ka ne kei uh hi. Tua sangsikin, note khatpeuh adingin vangik ka suah loh nadingun gim pipi tawl pipi-in sun le zanin na ka sem uh hi. 9 Kote in hih banga ka hih uh ciangin, huhna ngah dinga thuneihna ka neih loh man uh hi loin ko le ko mahmah na zuih ding uh limlak ka suah nadingun ka sep uh hizaw hi. 10 Ahang in, no tawh ka omkhawm nangawnun zong: “Mi khat in na a sep kei leh an ne kei hen,” ci-in zuihtawm ngeina kong pia uh hi.

11 Note lakah pawlkhat thadah ci-in ka za uh hi. Amaute nasemin manlah lo uh a, midangte thu va kumin a manlah uh hi. 12 Tua bang mite in na khatpeuh semin amau nektawm ding beek a thalawh nadingun Topa Jesu Christ sungah thu pia-in ka kun uh hi. 13 Sanggamte aw, note na hi uh leh amaan note nasepna na cimtak ngei kei un.

14 Mi khatpeuh in hi lai sunga kong lah bangun a man nop kei leh amah na tuam ciamteh un. A maizum theih nadingin amah tawh na kikhawl kei un. 15 Ahi ta zongin na galbawl kei unla, sanggam bangin na vauhilh un. ^c

A Nunung Hopihnate

16 Lemna Topa mahmah in, hun khempeuh a, lam khempeuh ah lungmuanna hong pia ta hen. Note khempeuh tawh Topa hong om khawm ta hen.

17 Keimah Paul in, hih hopihnate ka khutin ka gelh hi-a, ka laikhak khempeuh sungah ciamtehna tuam a suak hi. Hih in ka gelhzia ahi hi.

18 Eite Topa Jesu Christ hehpihna note khempeuh tawh om ta hen.