Dan 7:1-6 | ZomZIV | STEP | Babylon kumpipa Belshazzar a kum masapen kumin Daniel in mang khat mana, a lupna tungah a lup laitakin a lungsim sungah mangmuhnate a va suak hi. A mangmatnate lai-in a gelh hi.

Daniel 7:1-6

Daniel Manga Gamsa Lite

1 Babylon kumpipa Belshazzar a kum masapen kumin Daniel in mang khat mana, a lupna tungah a lup laitakin a lungsim sungah mangmuhnate a va suak hi. A mangmatnate lai-in a gelh hi.

2 Daniel in, “Zana ka mangmuh inah, ka khuadak leh ka mai ah vantung huih lite in tuipi lian a mutgawp uh hi. 3 A kibang lo gamsapi li, tuipi sung panin hong pusuakkhia to hi. ^a

4 “A khatna, humpinelkai tawh kibangin muvanlai kha a nei hi. Ka et laitakin a khate kibotkhia-a mihing bangin a khete gela a din nadingin leitung panin a kikhaang to hi; tua ciangin mihing lungsim kiguan hi.

5 “Tua ciangin a nihna gamsa ka mai-ah hong om a, vompi tawh kibang hi. A pang khatin kiphongto a, a hate in nakguh thum a kei kawm hi. Tua kiangah, ‘Ding inla sa na kham dong ne in!’ kici hi. ^b

6 “Tua khit ciangin ka et leh ka mai-ah gamsa dang khat na om a, gialbem tawh kibang hi. Vasa bangin a nungzangah kha li a nei hi. Hih gamsa in lutang li nei a, ukna za amah kipia hi.