Exo 28:31-43 | ZomZIV | STEP | “Adum bekbek tawh siampi puan-ak tualpi bawl inla,

Exodus 28:31-43

Siampi Puan dangte

31 “Adum bekbek tawh siampi puan-ak tualpi bawl inla, 32 a laizangah lu khum nading vangsak in. A kikek loh nadingin a vang kimkotah gawl-an ^{▼▼28.32 Hebrew kamin hih kammal a khiatna kician lo hi.} bangin a gei zimna kigan ding hi. 33 Puantualpi mong kimkotah adum, adupsan le a ausan khau tawh mangkawlsing gahte bawl inla, tuate kikalah kham longte khai in. 34 Kham longte le mangkawlsing gahte puantualpi mong kimkotah kikalhelh dimdiam ding hi. 35 Aaron in biakna na a sep ciangin tua silh tektek ding hi. Amah a sih loh nadingin Siangtho Mun TOPA mai-ah a sungtum ciang le a pusuah ciangin tua longte gin kiza ding hi.

36 “Kham citak pek khat bawlin seal tunga a kuaka kigelh bangin: TOPA TUNGAH SIANGTHO ci-in a tungah a kuakin gelh in. 37 Dialkhip tunga khih nadingin khaudum a tungah khih in; tua pen a dialkhip mailamah om ding hi. 38 Tua pen Aaron taltangah om dinga, Israel-te in bang khatpeuh letsongin a piak uh a, amau ap letsong siangthote a paubanna khat a om leh aman khu ding hi. TOPA in tuate a san theih nadingin Aaron taltang tungah tuate om gige ding hi. ^b

39 “Khau hoih tawh puantungsilh gan inla, hoihtaka kigan puan tawh dialkhip bawl in. Puan kawnggak pen khutkhuisiamte bawl hi ding hi. Amaute a zahtak baangsak ding le a pahtawihuaisak dingin 40 Aaron tapate ading puantungsilhte, puan-kawnggakte le dialkhipte bawlsak in. 41 Hih puansilhte na sanggampa Aaron le a tapate na silhsak khit ciangin amaute sathau nilh inla siansuah in. Kei ading siampi na a sep theih nadingun siangthosak in. ^c

42 “Pumpi tuam nadingin kawng pan a phei ciang a ban puan hoih kigan pheituam sungten khat bawl in. 43 Aaron le a tapate kimawhsak-a a sih loh nadingun, Kikhopna Puanbuk-a a pai ciang uh ahi a, Mun Siangtho-a biakna nasem dinga biakna-tau a naih ciang uh ahi zongin amaute in teng pelmawh ding uh hi.

“Hih in Aaron le a suan-le-khakte adingin a tawntunga khang kivai-khakna thuzek hi ding hi.