Eze 28:1-19 | ZomZIV | STEP | TOPA thu kei tungah hong tunga:

Ezekiel 28:1-19

Tyre kumpite Siat ding Genkholhna

1 TOPA thu kei tungah hong tunga: 2 “Mihing tapa aw, Tyre ukpa tungah gen in, Hih in Thupipen TOPA gen ahi hi: ^a

“‘Na lungsim sungah kiphasakin,
“Kei pasian khat ka hi hi;
tuipi laizang
a pasian tokhom tungah ka tu hi,” na ci hi.
Nang pasian khat zaha pilin na kingaihsut hangin ^b
pasian na hi kei a, mihing lel khat na hi hi.
3 Nang Daniel ^{▼▼28.3 Ahikeh Danel; Hebrew laimal ah kamsang Daniel lo adang khat kingawh thei hi.} sangin pilzaw na hi hiam?
Na theih loh om lo ahi hiam?
4 Na pilna le na theihna hangin
neihsa na hau mahmah a,
na sumkholna ah
ngun le kham tampi na khol hi. ^d
5 Sumbawl na siamna hangin
na hauhna kibehlap toto a, ^e
na hauhna
na kisaktheihpih hi. ^f

6 “‘Tua ahi ciangin hih in Thupipen TOPA gen ahi hi:

“‘Pasian khat bangin ka pil hi,
ci-in kingaihsun na hi manin,
7 a cikzia het lo gamdang mite kong simsak ding hi; ^g
amaute in na melhoihna na pilna do dingin
a namsaute uh dok ding uh a, ^h
a tee zaizai na thupina a sunlet ding uh hi. ⁱ
8 Amaute in leihawm sungah hong khia ding uh a, ^j
tuipite laizangah
sihsia-in na si ding hi. ^k
9 Tua hun ciangin hong thatte omlai mahin,
“Kei pasian khat ka hi hi,” ci ngam lai ding na hi hiam?
Nang hong thatte khut sungah ^l
pasian hi nawn loin mihing khat mah na hi lel hi. ^m
10 Gamdang mite khut sungah
vun-at lote sih bangin na si ding hi. ⁿ

Ka gensa ahi hi, Thupipen TOPA in cikhia hi,’” hong ci hi.

11 TOPA thu kei tungah hong tunga: 12 “Mihing tapa aw, Tyre kumpipa tawh kisai-in taamlo inla, ama kiangah ‘Hih in Thupipen TOPA gen ahi hi:

“‘Nang pen pilna le melhoihna kim tawh a kidim, ^o
kicinna ettehna na hi hi.
13 Pasian huan sung
Eden ah na om a;
suangmanpha citeng:
ruby, topaz, le emerald,
chrysolite, onyx, le Jasper,
sapphire, ^{▼▼28.13 Ahikeh lapis lazuli} turquoise le beryl ^{▼▼28.13 Hih suangmanphate a kiciamtehna lian kician taktak lo hi.}-te in na kizem hi.
Na dinna le na kawmhekte ^{▼▼28.13 Hih laigual Hebrew in a cihnopna kician lo hi.} khama kibawl hi-a,
tuate nang hong kipiansak ni-in kibulh hi. ^s
14 Cherub khat bangin nang sathau hong kinilh a, ^t
tua hangin nang kong kipsak hi.
Pasian mual siangtho tungah na om a,
meisuangte lakah na vak hi.
15 Nang hong kipiansak a kipan
na tungah gitlohna a kimuh dong
na gamtatna ah mawhsakna a om kei hi.
16 A zai mahmah na sumbawlna hangin
ngongtat-in ^u
na mawh hi.
Tua ciangin hong hehpih loin Pasian mual panin kong hawlkhia a,
a kem cherub aw, ^v
meisuang lak panin nang kong hawlkhia hi.
17 Na mel hoihna
na kisaktheihpih a,
na thupina hangin
na pilna na siasak hi.
Tua ciangin leitung kong denna-a,
kumpite mai-ah pawi-et-a et kong suaksak hi. ^w
18 Aman lo-a na sumbawlna le na mawhnate tawh
na munsiangthote na ninsak zo hi.
Tua ciangin nang panin mei ka kuangkhiasak a, ^x
tua in nang hong kangtumin
nang hong vilgige-te muhna ^y
leilakah vut kong suaksak hi. ^z
19 Nang hong theisa minamte khempeuh in
hong lipkhap uh hi; ^aa
na beina a lauhuaipi hi-a,
na om kik nawn kei ding hi,’ ci in,” hong ci hi. ^ab