Gen 12:10-20 | ZomZIV | STEP | Tua hun laitakin tua gamah kialpi tunga, kialpi nasia lua ahi manin Egypt ah tawlkhat sung a teng dingin Abram paisuk hi.

Genesis 12:10-20

Egypt ah Abram

10 Tua hun laitakin tua gamah kialpi tunga, kialpi nasia lua ahi manin Egypt ah tawlkhat sung a teng dingin Abram paisuk hi. 11 Egypt a lut kuan laitakin a zi Sarai kiangah, “Na mel a hoih mahmah lam ka thei hi. 12 Egypt-te in nang hong muh uh ciangin ‘Hih nu ama zi hi,’ ci-in kei hong thatin nang bel hong hingkhawi ding uh hi. 13 Nang hanga ka nuntakna bangmah a cih loh nadingin nang kei sanggamnu in kigen lecin kei hong limbawl ding uh hi,” ci hi. ^a

14 Egypt ah Abram a tun ciangin Egypt-te in tuanu numei melhoih mahmah khat ahilam a mu uh hi. Pharaoh’ uliante in tuanu a muh uh ciangin 15 Pharaoh kiangah amah phat uh a, ama kumpi innah a kipaipih hi. 16 Tuanu hangin amah in Abram limbawla, Abram tuuhon, bawnghon, laa a nu le a pa, nasem numei, nasem pasal le kala-oh-te ngah hi. ^b

17 Ahi hangin TOPA in Abram’ zi Sarai hangin, Pharaoh le a innkuanpihte tungah natna nasia mahmah tungsak hi. 18 Tua ciangin Pharaoh in Abram sama, “Kei bang hong cih na hi hiam? Bang hangin amah na zi ahilam hong gen lo na hi hiam? 19 Bang hanga amah ka zi dinga ka lak theih nadingin, ‘Amah ka sanggamnu hi,’ ci na hi hiam? Tua ahi ciangin tu-in hi lai-ah na zi om hi, la inla pai in!” ci hi. 20 Tua ciangin Pharaoh in Abram tawh kisai-in a mite thu pia a, a zi le a neihsa khempeuh tawh amah a khakhia uh hi. ^c