Gen 22:1-10 | ZomZIV | STEP | Tua khit a sawt loin Pasian in Abraham a sin hi. Amah in, “Abraham,” ci-in sama, amah in, “Hiah ka om hi,” ci-in a dawng hi.

Genesis 22:1-10

Abraham Kizia-et

1 Tua khit a sawt loin Pasian in Abraham a sin hi. Amah in, “Abraham,” ci-in sama, amah in, ^a

“Hiah ka om hi,” ci-in a dawng hi.

2 Tua ciangin Pasian in, “Na it na tapa, na tapa neihsun Isaac tonpih inla, Moriah kualah pai un. Nang tunga kong gen ding mualte tung khatah meihal biakna-in hong pia in,” a ci hi. ^b

3 A zingciang zingsang tungin Abraham tho-a, a laa tutphah a vawh hi. Amah in a tapa Isaac le a nasemte nih tonpih hi. Meihal biakna-a kicing ding sing a tom khit ciangin Pasian gennasa munah pai dingin a kuankhia hi. 4 A nithum ni ciangin Abraham in ento-a, a mun ding a galmuh hi. 5 A nasemte kiangah, “Kei le naupang hua lai-ah ka pai kalun laa tawh hih lai-ah na om un. Ka va bia ding uh a, tua khit ciangin kong pai kik ding uh hi,” a ci hi.

6 Abraham in meihal biakna-a zat ding singte la-a, a tapa Isaac suanin, aman mei le temta bek a pua hi. Tua ci-in amau gel a pai kawmun 7 Isaac pau-a a pa Abraham kiangah, “Pa” a ci hi. ^c

Abraham in, “Hi hi, ka ta aw,” ci-in dawng hi.

Isaac in, “Mei le sing hiah om napi meihal biakna ding tuuno koi-ah om a hia?” a ci hi. ^d

8 Abraham in, “Ka ta aw, Pasian in meihal biakna ding tuuno hong sik ding hi,” ci-in dawng hi. Amaute a nih un ton khawm uh hi.

9 Pasian genna munah amaute a tun uh ciangin Abraham in tua lai-ah biakna-tau khat dawh-a, a tungah sing a ciang hi. Tua ciangin a tapa Isaac hena, biakna-tau tunga singvum tungah a koih hi. 10 Tua ciangin a khut zankhia-a, a tapa a gawh nading temta a la hi.