Jer 21 | ZomZIV | STEP | Kumpipa Zedekiah in Jeremiah kiangah Malkijah’ tapa Pashhur le Maaseiah’ tapa siampi Zephaniah a sawl ciangin ama tungah TOPA thu a tung hi:

Jeremiah 21

Pasian in Zedekiah Ngetna Nial

1 Kumpipa Zedekiah in Jeremiah kiangah Malkijah’ tapa Pashhur le Maaseiah’ tapa siampi Zephaniah a sawl ciangin ama tungah TOPA thu a tung hi: 2 “Babylon kumpi Nebuchadnezzar ^{▼▼21.2 Hebrew ah Nebuchadrezzar, Nebuchadnezzar tawh kilamdang lo; hih lai le Jeremaih le Ezekial ah om den hi.} in kote hong sim ahi manin ko adingin TOPA thu hong dotsak in. Ko kiang pan amah a nung kik nadingin TOPA in a beisa huna a hih bangin nalamdang khat hong bawlsak kha ding hi,” a ci hi

3 Ahi hangin Jeremiah in amaute kiangah, “Zedekiah kiangah gen in, 4 ‘Hih in Israel Pasian TOPA gen ahi hi: Kulh pua a no hong umcih Babylon kumpipa le Babylon mite ^{▼▼21.4 Ahikeh Chaldea-te tg.9 ah zong} na dona uh - na khut sungua galhiamte, no lehdona-in ka zangsak ding hi. Tua ciangin amaute khuapi sungah ka khawm ding hi. 5 Kei mahmah in hehsa lungsosa thangpai mahmah kawmin a thahat ka khut ka zankhia dinga note kong do ding hi. 6 Hih khuapi sunga teng - a mihing a ganhingin ka sattukkhawm dinga - amaute a lauhuai pulpi-in a si ding uh hi. 7 Tua khit ciangin TOPA in, ‘Judah kumpipa Zedekiah, a uliante le hih khuapi mi - pulpi, namsau le kialpi pana suakta lai sun teng tawh amaute a that nuam Babylon kumpipa Nebuchadnezzar le a galte uh tungah ka pia ding hi. Amah in hehpih lo, lainat lo, khuatuah loin namsau in a that ding hi,’ ci hi.

8 “Tua banah mipite tungah, ‘Hih in TOPA gen ahi hi: Keimah in note mai-ah sihna lampi le nuntakna lampi ka koihkhawm hi. 9 Hih khuapi sunga a om peuhmah namsau, kialpi le pulpi-in a si ding uh hi. Ahi hangin paikhia-a a umcih Babylon mite tungah a lut peuhmah nungta dinga; a nuntakna a suahtak ding hi. 10 Hih khuapi hoih nading hilo a nat nadingin ka khentat khin hi,’ TOPA in cikhia hi. Babylon kumpipa khutah ka pia dinga amah in mei-in a susia ding hi. ^c

11 “Tua tham loin Judah kumpipa innkuante tungah gen inla, ‘TOPA thugen za un, 12 David innkuante aw, hih in TOPA gen ahi hi: ^d

“‘Zingsang simin thutangin thu khen unla, ^e
a nengniampa khut panin ^f
a kisutgawppa hukhia un;
tua hi kei leh na bawlsa uh gitlohna hangin ^g
ka thangpaihna mei bangin kuang dinga ^h
kuamah in a sumit zo kei ding hi. ⁱ
13 Mualkuam zang panin sangtuam a,
suangmual zangtam-a om Jerusalem aw, ^j
nang kong langpan hi,

TOPA in cikhia hi -
nang in, “Eite langkhatah kua pang zo ding hiam,
bukna ah kua lut thei ding hiam?” a cipa na hi hi.
14 Nangma sepsa tawh kituakin dan kong tuaksak ding hi, ^k

TOPA in cikhia hi.
Na tulak uh mei in ka hal dinga, ^l
tua in note kimkota khempeuh a kangtummang ding hi,’ ci hi,” a ci hi.