Jer 41 | ZomZIV | STEP | A kha sagihna kha-in kumpi sisan ahi, kumpi ulian zong ahisa Elishama tapa Nethaniah tapa Ishmael, mi sawm tawh Mizpah a Ahikam tapa Gedaliah kiangah a pai uh hi. Tua lai-ah amaute in an a nek laitakun,

Jeremiah 41

1 A kha sagihna kha-in kumpi sisan ahi, kumpi ulian zong ahisa Elishama tapa Nethaniah tapa Ishmael, mi sawm tawh Mizpah a Ahikam tapa Gedaliah kiangah a pai uh hi. Tua lai-ah amaute in an a nek laitakun, 2 Nethaniah tapa Ishmael le amah tawh a om khawm mi sawmte dingto uh a, Shaphan tapa Ahikam tapa Gedaliah namsau in sattukin, Babylon kumpipa in tua gam uk dinga a koihpa a that uh hi. 3 Ishmael in Mizpah a Gedaliah ompih Jew-te le tua lai-a om Babylon ^{▼▼41.3 Ahikeh Chaldea-te} mi a galkapte khempeuh tawh a that khawm hi.

4 Gedaliah a kimuansuam khit kuama theih ma-in 5 Shechem, Shiloh le Samaria panin mi sawmgiat, khamul metsa, puan balkeksa le amau pumpi kikuikeksa in an-a biakna le gimnamtui kengin TOPA inn ah a pai uh hi. 6 Nethaniah tapa Ishmael zong amaute dawntuah dingin kap kawmin a paikhia hi. Amaute tawh a kituah ciangin, “Ahikam tapa Gedaliah kiangah hong pai un,” a ci hi. 7 Amaute khuapi sung a tun uh ciangin Nethaniah tapa Ishmael le ama ompihte in golum uh a, tuidum sungah a pai uh hi. 8 Ahi hangin amaute lakah mi sawm in Ishmael kiangah, “Kote hong that kei ve! Kote in mangbuh, mangbuh-ham, sathau le khuaizu, lo sung khata ka sel uh ka nei uh hi,” a ci uh hi. Tua ciangin amaute teng kia a lawmte uh tawh a that khawm kei uh hi. 9 Tu-in ama thahsa khempeuh le Gedaliah a paihkhawmna tuidum pen Kumpipa Asa in Israel kumpipa Baasha a nan nadingin a bawl ahi hi. Nethaniah tapa Ishmael in tua sung misiluang a dimsak hi. ^b

10 Mizpah a, a omlai mite - tua lai-a a kinusia kumpipa tanute le a dangte, kumpi cing galkap mangpa Nebuzaradan in Ahikam tapa Gedaliah uk dinga a piakte khempeuh tawh Ishmael in salin a kai hi. Nethaniah tapa Ishmael in amaute salin kai-a Ammon-te omna lamah a paikhiatpih hi.

11 Kareah tapa Johanan le a ompih galkap mangte khempeuh in Nethaniah tapa Ishmael bawlsa mawhna a zak uh ciangin 12 a mite khempeuh uh tonpih in Nethaniah tapa sim dingin a kuan uh hi. Amaute in Gibeon tuikhukpi gei-ah a pha uh hi. 13 Ishmael tonpih mite khempeuh in Kareah tapa Johanan le a galkap mangte a tonkhawm a muh uh ciangin a nuam uh hi. 14 Ismael in Mizpah pana sal-a a kaihte khempeuh kileh hei-in Kareah tapa Johanan lam a manawh uh hi. 15 Ahi hangin Nethaniah tapa Ishmael le a mite giat Johanan khut panin suakta uh a, Ammon mite lamah a tai uh hi. ^c

Egypt ah Taina

16 Tua ciangin Kareah tapa Johanan le a tonpih galkap mangte khempeuh Nethaniah tapa Ishmael in Mizpah a Ahikam tapa Gedaliah a muansuam khit cianga mana a paikhiatpih: galkapte, numeite, naupangte le zum nasem uliante khempeuh Gibeon pan a ciahpih kik hi. 17 Amaute Egypt zuanin pai uh a, Babylon mite ^{▼▼41.17 Ahikeh Chaldea-te} khut pan a suahtak nadingun Bethlehem gei Geruth Kimham ah a khawl uh hi. 18 Babylon kumpite in tua gam uk dinga a koih Ahikam tapa Gedaliah, Nathaniah tapa Ishmael in that ahi manin amaute in a kihta uh ahi hi.