Jer 48:29-36 | ZomZIV | STEP | “Kote in Moab kiphatsakna - ki-uatsakna le kihihsakna, a kisaktheihna le a kiliatsakna le a lungsim liatnate ka za khin uh hi.

Jeremiah 48:29-36

29 “Kote in Moab kiphatsakna - ^a
ki-uatsakna le kihihsakna,
a kisaktheihna le a kiliatsakna le
a lungsim liatnate ka za khin uh hi. ^b
30 Ama hiamgamhna a mawkna hi a,
a kisaktheihna bangmah lo ahilam ka thei hi,” ^c

TOPA in cikhia hi.
31 Tua ahi ciangin Moab ka kah a,
Moab-te khempeuh adingin kikokhia-in,
Kir Hareseth mite adingin ka thum hi. ^d
32 Sibmah lengguite aw, Jazer kah bangin ^e
nang adingin ka kap hi.
Na guite tuipi dongin zaama;
Jazer tuipi dong ban uh hi.
Na gah minzunte le na lenggahte tungah
a susiate kipuk uh hi.
33 Moab lote le singno leite panin
lungnopna le kipahna a om nawn kei hi.
Lenggah sukna panin zu ka kangsaka;
lenggah cilte, kuamah lungdamin a awng nawn kei uh hi. ^f
A awng uh zongin
lungdamna awging hi nawn lo hi.
34 Amaute kahna aw,
Heshbon panin Elealeh le Jazas dong, ^g
Zoar panin Horonaim le Eglath Shelishiyah ciang dongah a ging hi,
ahang in, Nimrim tuite nangawn kangcip hi.
35 Moab ah munsanga kithoihna piate le
amau pasiante tungah
gimnamtui halte ka beisak ding hi,” ^h

TOPA in cikhia hi.
36 “Tua ahi ciangin ka lungsim sungah tamngai mut bangin ka taamlo a; ⁱ
Kir Hareseth mite adingin tamngai bangin ka tamlo hi.
A khol uh, a neih a lamteng uh beita hi. ^j