Jer 49 | ZomZIV | STEP | Ammon-te tawh kisai-in: TOPA gen hih ahi hi: “Israel in tapate nei lo hiam? Innluah ding nei lo ahi hiam? Tua ahileh bang hangin Molech in Gad neihsa laksak ahi hiam? Bang hangin a mite, a khuapi ah teng uh ahi hiam?

Jeremiah 49

Ammon Tawh Kisai Thupuak ^a

1 Ammon-te tawh kisai-in:

TOPA gen hih ahi hi:

“Israel in tapate nei lo hiam?
Innluah ding nei lo ahi hiam?
Tua ahileh bang hangin Molech ^{▼▼49.1 Ahikeh amau kumpipa; Hebrew in malcam; tg.3 ah zong} in Gad neihsa laksak ahi hiam?
Bang hangin a mite, a khuapi ah teng uh ahi hiam?
2 Ahi hangin TOPA in genkhia hi,
“Ammon-te tenna Rabbah a kisim nading ^c
aw ka ginsak hun hong tung dinga; ^d
na kisiasate mualvum suakin ^e
a kimkota khuaneute
mei-in kihal ding hi.
Tua ciangin Israel-te in
amau a hawlkhiate a hawlkhia ding uh hi,”

TOPA in ci hi.
3 “Ai kisia ta hi! Heshbon aw, kap in. ^f
Rabbah a tengte aw, kapkhia un!
Ippi puan silhin thum unla;
Molech, ama siampite le a ulainte tawh
salin kikaikhawm ding ahi manin
kulhte sung tengah taisuk taito un.
4 Bang hangin na mualkuam zangte uh,
an tampi pianna mualkuam zangte kisaktheihpih na hi uh hiam?
A muanhuai lo tanu aw, ^g
nang in na hauhnate muangin, ^h
‘Kua in hong sim ding hiam?’ na ci hi. ⁱ
5 Na kimkota omte tung panin
nang tungah launa kong tungsak ding hi,”

Topa, Thahatpen TOPA in cikhia hi.
“Note na vekun hong kinawhkhia mang dinga
kuamah in galtaite a kaikhawm kei ding hi.
6 “Tua hi napi tua khit mailam hunah
Ammon mite angei ka bangsak ding hi,” ^j

TOPA in cikhia hi.

Edom Tawh Kisai Thupuak

7 Edom tawh kisai-in: ^k

Hih in Thahatpen TOPA gen ahi hi:

“Teman ah pilna om nawn lo ahi hiam? ^l
Thudotte in a ngaihsut siamna uh mangsak ta uh ahi hiam?
A pilna uh muat ta ahi hiam?
8 Esau ka tuahsak hun ciangin ama tungah
gimna tungsak ding ka hi manin,
no Dedan a tengte aw,
lehtai unla suanghawm thukpi-ah bu un.
9 Lenggah lo mite no kiangah hong pai uh leh
lenggah tawmkha beek nusia lo ding uh ahi hiam?
Zanin gutate hong pai leh
amau deihzah bek gu ding uh hilo ahi hiam?
10 Ahi hangin Esau ka vunhawktol dinga,
amah le amah a kisel theihloh nadingin
a bukna munte ka lemkhia ding hi.
A tate, a kinaipihte le a vengte mangthang dinga,
amah zong a om nawn kei ding hi.
11 Na tagahte nusia-in amau nuntakna ka hu ding hi.
Na meigongte un zong kei hong muang thei uh hi,” a ci hi. ^m

12 Hih in TOPA gen ahi hi: “Dan thuakna hai a dawn lo dinga kilawmte nangawn in pello-a dawn ding ahileh bang hangin nang in dan tuak loin om thei ding na hi hiam? Dan thuak loin na om kei dinga na dawn pelmawh ding hi.” 13 TOPA in cikhia hi, “Kei le kei ka kiciama, Bozrah kisia dinga a kilipkhap, a kisimmawh le a kihamsiat suakin a khuapite a kisia den ding hi,” a ci hi.

14 TOPA tung pan thupuak ka za khina:
Minamte kiangah thupuak khat kisawlin,
“Gal do dingin no le no kikaikhawm un!
Gal sim dingin ding un!” kicisak hi.
15 “Tu-in minamte lakah kong neusek dinga,
mite lakah kong kisimmawhsak ding hi.
16 No suangpi henga tengte,
mualsangte tung a luahte aw,
a lauhuai na ngaihsut lianpi uh le
na lungsim kisaktheihna un no hong khem hi.
Muvanlai aa zah-a sangin
na bu na tom hangin tua lai panin nang kong kaikhiasuk ding hi,”

TOPA in cikhia hi.
17 “Edom, mite lipkhap khat suak ding uh a;
a tawnkha khempeuh in a liamnate khempeuh hangin
mullitin a selpho ding uh hi.
18 Sodom le Gomorrah
a khuaveng khuapite tawh a kilotthal bangin ⁿ
tua lai-ah kuamah teng loin
mihing ta a om kei ding hi”

TOPA in ci hi.
19 “Jordan gamphalak panin lono hoihna gamah ^o
humpinelkai a paikhiat toh bangin
thakhatin a gam pan Edom ka delhkhia ding hi.
Hih a ka sepsak ding kua ka teel ding hiam?
Kei tawh a kibang kua hi a, kua in kei hong to ngam ding hiam? ^p
Tuateh kei langkhatah bang tuucingpa pang thei ding ahi hiam?” a ci hi.
20 Tua ahi ciangin TOPA in Edom tungah tunsak dingin a ngimsa; ^q
le Teman a tengte tungah tunsak a sawmte za in: ^r
A ganhon no neute kituahmangsak dinga; ^s
amaute hangin amah in amaute lonona mun a susiamang ding hi. ^t
21 Amaute pukna awging hangin leitung kiling dinga;
amaute kah na in Tuipi San ^{▼▼49.21 Hebrew in Yam Suph tua pen Pumpeng Tuipi cihna} a thawn ding hi. ^v
22 En un! Muvanlai khat sanglen toin
Bozrah tungah a kha zalin a bawhsuk ding hi. ^w
Tua ni ciangin Edom galhangte lungsim, ^x
numei nausuak kuante lungsim bang ding hi. ^y

Damascus Tawh Kisai Thupuak

23 Damascus tawh kisai-in:

“Hamath le Arpad-te in
thusia za uh ahi manin a lungsi uh hi. ^z
Amaute khawl hun a nei lo tuipi bangin ^{▼▼49.23 Hebrew ah tungah ahikeh hangin}
a launa uh a kam thei kei hi. ^ab
24 Damascus-te thazaw uh a,
tai ding a sawm uh hangin
patauhna in gakcipa;
numei nausuak nat bangin
lunggimna le natna in amaute a man hi.
25 A minthang mahmahsa khuapi lian,
ka lungkimna khuapi bang hangin kisusiacip ahi hiam?
26 A tangvalnote lamdungah tuk taktak ding uh a;
a galkapte khempeuh sunin a kidaisak ding hi,”

Thahatpen TOPA in cikhia hi.
27 “Damascus kulhte mei-in ka hal dinga; ^ac
tua in Ben-Hadad kulh muanhuaite a hultum ding hi,” a ci hi. ^ad

Kedar le Hazor Tawh Kisai Thupuak

28 Babylon kumpipa Nebuchadnezzar in a sim Kedar le Hazor kumpi gamte tawh kisai-in: ^ae

TOPA gen hih ahi hi:

“Dingin Kedar sim unla,
nisuahna lam mite susia un. ^af
29 A puanbukte uh le a tuuhonte uh kilaksak khin dinga;
a niliimte uh a vante uh le
a kala-ohte uh tawh kipuakkhiatsak ding hi.
Mite in amaute otsan-in,
‘Na kim na pam uah launa!’ ci ding uh hi. ^ag
30 “Manlangin taimang un!
Hazor a tengte aw, suanghawm thukpi sungah om un,” ^ah

TOPA in cikhia hi.
“Babylon kumpipa Nebuchadnezzar in note langpan hong sawma; ^ai
nang tungah sep ding khat a geel hi.
31 “Ding unla
kimuangtaka teng hithiat minam - kongpi ahi a,
kalhna zawl ahi zongin a nei lo, ^aj
amau kia bek a teng minam khat sim in,”

TOPA in cikhia hi.
32 A kala-ohte uh kikaihsak dinga, ^ak
a bawnghon tampitakte uh a kiguk mangsak ding hi.
Gamlapi muna ^{▼▼49.32 Ahikeh taltanga samtumte} omte huih lakah ka thehthang dinga, ^am
akim apam panun amaute tungah gimna ka tungsak ding hi,”

TOPA in cikhia hi.
33 Hazor, kinusia denin
se-alte omna a suak ding hi. ^an
Tua lai-ah kuamah nungta lo dinga
mihing peuhmah a teng kei ding hi.

Elam Tawh Kisai Thupuak

34 Hih in Judah kumpipa Zedekiah kumpi a suah tunglama Elam tawh kisai kamsangpa Jeremiah tunga tung TOPA thu ahi hi.

35 Thahatpen TOPA gen hih ahi hi:

“En un, Elam-te thahat napi
a thalpeu uh ka kuaitan ding hi. ^ao
36 Keimah in Elam, van kiu lite panin ^ap
huih lite ka mutsak dinga; ^aq
huih lite in amaute thehthangin
a kihawlkhia Elam-te tun lohna mun a om kei ding hi.
37 Amaute a that nuam a galte uh mai-ah
Elam ka thehzak dinga;
ka hehluatna hanga gimna nangawn
amau tungah ka tungsak ding hi,”

TOPA in cikhia hi.
Amaute a bei siang matengun
namsau-in ka nungdelh ding hi. ^ar
38 Elam ah ka kumpi tokhom ka phut dinga,
a kumpipa le a uliante ka susia ding hi,”

TOPA in cikhia hi.
39 “Tua hi napi mailam hun ciangin
Elam a mailam hun angei ka bangsak ding hi,” ^as

TOPA in cikhia hi.