Judges 6

Gideon

1TOPA mit ah Israel-te a sia-in gamta leuleu uh a amah in kum sagih sung Midian-te khutah amaute a pia hi. 2Midian-te vang in amaute nuainet lua ahi manin Israel-te in a bukna dingun mualtung leihawm, suangheng le mun muanhuaite a bawl uh hi. 3Israel in khaici a tuh peuhpeuh uh ciangin Midian-te, Amalek-te, le nisuahna lama midangte in tua gam va sim zel uh hi. 4Amaute in gam sungah giahphual satin, Gaza tun dong lampi dunga ankungte susia in, Israel ading nuntakna nei khempeuh - tuuhon, bawnghon, le laate hawi a nei kei uh hi. 5A ganhonte uh tawh kuanto-in a puanbuk uh kauphe hon-om a bang hi. Amaute le a kala-oh-te uh kisim zo lo a; amaute in tua gamsimin na khempeuh a susiamang uh hi. 6Midian-te in Israel-te gentheisak lua uh a, amaute huh ding ngenin TOPA tungah a kiko uh hi. ^a

7 Midian hangin Israel-te TOPA tungah a kiko uh ciangin, 8amah in amaute kamsang khat puak a tuapa in, “Hih in TOPA Israel Pasian gen ahi hi: Note salsuahna gam Egypt panin kong paikhiatpih to hi. 9Egypt vangliatna pan le no hong nengniamte khempeuh khut sung panin note kong bawhkhia hi. Note mai-ah amaute hawlkhia-in a gam uh no kong pia hi. 10Keimah in no tungah, ‘Keimah TOPA note Pasian, ka hi hi; amaute gama na tenna uh Amor-te pasiante bia kei un,’ kong ci hi. Ahi hangin ka thu na ngai kei uh hi,” a ci hi. ^b

11 TOPA vansawltak va pai-a Abiezeri-te Joash neihsa Ophrah-a tawsaw nuai-ah a tu hi; Midian-te muh loh dingin tua lai-a lenggah-sukna ah a tapa Gideon in mangbuh a cil hi. 12Gideon tungah TOPA vansawltak kilanga, “A thahat galhangpa aw, TOPA in nang hong ompih hi,” a ci hi.

13 Gideon in, “Ahi zongin pu aw, TOPA in kote hong ompih ahileh bang hangin ko tungah hihte khempeuh hong tung ahi hiam? Ka pate un, ‘TOPA in Egypt panin hong paikhiatpih to hi lo ahi hiam?’ a cih uh ama nalamdang bawlte khempeuh koi-ah om khin ta hiam? Tu-in TOPA in ko hong nusia-a Midian-te khut sungah hong koih khin hi,” ci-in a dawng hi. ^c

14 Tua ciangin TOPA ama lamah kihei-a, “Tu-a na neih thahatna tawh pai-in Midian khut panin Israel honkhia in. Nang hong sawl lo ka hi hiam?” a ci hi.

15 Gideon in, “Ahi hangin Topa a, Israel bangci hotkhiat thei ding ka hi hiam? Ko bawng’ lah Manasseh ah a hat lo pen hi-a, ko innkuan sungah kei a neu pen ka hi hi,” a ci hi. ^d

16 TOPA in, “Nang kong ompih dinga, mihing khat bangin Midian-te na sattuk ding hi,” ci-in a dawng hi.

17 Gideon in, “Nong angvan taktak ka hileh kei nong hopih taktak lam limtakin hong lak in. 18Nong hehpihna-in, hong pai kika biakna hong puakin na mai-ah kong lui mateng na paikhia nai kei in,” ci-in a dawng kik hi. ^e

Tuateh TOPA in, “Nong kileh kik mateng kong ngak ding hi,” a ci hi.

19 Gideon sungtum-a, keelno khat go-in annel ephah b khat silngo sawh loh anlumin a bawl hi. Seng khatin sa koih-a, beel khatin satui koihin tawsaw nuai-a ama kiangah a va puak hi. ^f

20 Pasian vansawltak in, “Sa le silngo sawh loh anlum la inla, hih suangpi tungah koih-in satui buak in,” a ci hi. Tuateh Gideon in a cih bangin a hih hi. 21TOPA vansawltak in a khuta a tawi ciangkhut mukin sa le silngo sawhloh anlum a su hi. Suangtumpi panin mei pianga sa le anlum a haltum hi. Tua ciangin TOPA vansawltak a mang hi. 22Gideon in TOPA vansawltak ahilam a tel ciangin kigaih a, “Ah, Thuneipen TOPA! TOPA vansawltak tawh kimaituahin a mu khin lah ka hi a!” a ci hi.

23 Ahi hangin TOPA in ama kiangah, “Lungnuam in! Kihta kei in. Na si kei ding hi,” a ci hi. ^g

24 Tua ciangin Gideon in tua lai-ah TOPA biakna-tau khat dawh-a, a min “TOPA in lemna hi” a ci hi. Tuni dong Abiezri-te gam Ophrah ah a om lai hi. ^h

25 Tua zan mah in TOPA in ama kiangah, “Na pa bawnghon panin kum sagih a pha c bawngtal a nihna go in. Na pate in Baal a biakna uh biakna-tau phelkhia inla a kianga Asherah khuam d - milim phuktan in. 26Tua ciangin hih asanna dawnah TOPA na Pasian adingin biakna-tau kician e khat dawh in. Na phuktan Asherah khuam-milim sing zangin meihal biakna-in bawngtal nihna f hal in,” a ci hi. ⁱ

27 Tua ciangin Gideon in a nasemte lakah sawm tawh TOPA in ama tunga a gensa bangin a hih hi. Ahi hangin a innkuanpihte le khuasung mite kihta a, sunin sem loin zanin a semzaw hi.

28 Tua khua mite zingsang a thawh uh ciangin Baal biakna-tau na kiphiatmai-in a kianga Asherah khuam na kiphukpai-a, biakna-tau kibawl thak tungah bawngtal-nihna-a biakna a na om hi! ^j

29 Amaute in, “Kua hih hiam?” ci-in khat le khat a kidong uh hi.

A thu limtaka a kantel uh ciangin, “Joash’ tapa Gideon hih ahi hi,” ci-in amaute tungah kigen hi.

30 Khua sung mite in Joash kiangah, “Na tapa hong pusuaksak in. Amah in Baal-te biakna-tau phelkhia-in a kianga Asherah khuam phuktan ahi manin a sih pelmawh kul hi,” ci-in a kal uh hi.

31 Ahi hangin Joash in ama kimkota a lungso mihonpite tungah, “Note in Baal thu panpih ding na hi uh hiam? Amah hot sawm na hi uh hiam? Amah a dopih peuhpeuh zingsang ciangin kithat ding hi! Baal pen pasian taktak hileh amah biakna-tau a kiphelkeksakin amah-mah in dal thei ding hi,” ci-in a dawng hi. 32Gideon in Baal-te biak-na-tau phelkek ahi manin, “Baal in amah mawhsiat hen,” a cihna un, tua ni-in amaute in Gideon min “Jerub Baal” g a ci uh hi. ^k

33 Tu-in Midian-te Amalek-te le nisuahna-lam a om mite khempeuh in a galhiam uh gawmin Jordan galkah uh a Jezreel Kuam ah giahphual a sat uh hi. 34Tua ciangin Gideon tungah TOPA Kha tunga, amah a zui ding Abiezri-te a sapna-in pengkul khat a mut hi. 35Amah in Manasseh buppi ah kamtai sawlin kigalgingsa-in amaute samsak-a, Asher, Zebulun le Naphtali-te in zong gal do dingin amaute a zuih toh theih nadingun a gensak hi. ^l

36 Gideon in Pasian kiangah, “Nong ciamsa bangin kei khutin Israel na hotkhiat takpi ding leh - en in, 37ancilna sual tungah tuumul ka koih ding hi. A tuumul tung bekah daitui kai-a, a leitual a keu leh tua ciangin na gensa bangin kei khutin Israel na hotkhiat ding lam ka thei ding hi,” a ci hi. 38A cih bangin a na piang hi. A zing ciangin Gideon thobaih a, amah in tuumul sukin a hekkang ciangin - tui kuang-uk dim khat a pha hi.

39 Tua ciangin Gideon in Pasian kiangah, “Kei tungah heh kei in. Na khat hong ngensak lai in. Tuumulin khatvei hong zia-etsak lai in. Tu-a pen a tuumul keusak inla a leilak khempeuh daitui tuamsak in,” a ci hi. 40Tua zanin Pasian in tua bangin a hisak hi. Tuumul bek keu-a; a leilak khempeuh daitui in a tuam hi. ^m

Judges 7

Gideon in Midian-te Zo

1Zingsang tungin Jerub-Baal (tua pen Gideon) le a mite khempeuh in Harod tuinak ah giahphual a sat uh hi. Amau omna leilu-lam Moreh mual kianga kuam sungah Midian-te’ giahphual a om hi. 2TOPA in Gideon kiangah, “Amaute khut sungah Midian-te ka piak nadingin na mite tam lua hi. Israel in ama hatna tawh a kihonkhia zo kisa in kei tungah a kisaktheih khak loh nadingin 3mite tungah zasak inla, ‘Lau-a, ling peuhmah ciahin Gilead Vum nusia thei hi,’ ci in,” a ci hi. Tuaci-in mi tul sawmnih le tulnih ciah uh a, tul sawm a om lai hi. ⁿ

4 Ahi hangin TOPA in Gideon kiangah, “Mi tam lua lai hi. Tui omna ah paipihsuk inla, tua lai-ah keima’n kong sittelsak ding hi. Keimah in, ‘Hihpa kuanpih in,’ ka cih leh amah pai dinga, ‘Hihpa kuanpih kei in,’ ka cih leh a pai kei ding hi,” a ci hi.

5 Tua ciangin Gideon in mite tui phualah a paipih suk hi. Tua lai-ah TOPA in, “Tui dawn dingin a khukdinsukte le ui bangin a leii-a a liakte khen in,” a ci hi. 6Mi zathum in a khutkuak pan a kamin a hup uh hi. Adangte khempeuh tui dawn dingin a khukdin suk uh hi.

7 TOPA in Gideon kiangah, “A khuta dawn mi zathum-te in note hong honkhia-in Midian-te no khutah kong pia ding hi. Adangte khempeuh amau omna mun ciatah ciahsak in,” a ci hi. 8Tua ciangin Gideon in Israel dangte amau puanbuk ah ciahsak-a, zathumte omsakin amaute in adangte lam-ante pengkulte a la uh hi. ^o

Tua hunin Midian-te giahphual ama khanglam kuam sungah a om hi. 9Tua zanin TOPA in Gideon kiangah, “Tho un, kuansukin giahphual sim un, no khut sungah kong pia ta ding hi. 10Na sim ding na kihtakpian leh, na nasempa Purah tawh giah phualah paisuk-in 11a thugen uh va ngai in. Tua khit ciangin thakhauhin giahphual na simngam ding hi,” a ci hi. Tua ciangin amah le a nasempa Purah giahphual-a galvilte omna ah a paisuk uh hi. 12Tua lai-ah Midian-te, Amalek-te le nisuahna-lam mite khempeuh kuam sungah giahphual sat uh a, kauphe honpi a bang uh hi. A kala-oh-te uh tuipi gei-a sehnel bangin sim zawh ding hi lo hi. ^p

13 Gideon a tunsuk phetin mi khatin a lawmpa kiangah a mang a gen hi. Amah in, “Mang khat ka man hi, ka mangin Midian-te giahphual sungah mangbuh-ham anlum pum khat hong tuksuk hi. Tua in nakpi-in puanbuk kha-a, a puanbuk kilumletin a kisiagawp hi,” ci-in a mang a gen hi.

14 A lawmpa in, “Israel-te Joash’ tapa Gideon’ namsau lo adang hi lo ding hi. Pasian in Midian-te le giahphual buppi ama khutah pia khin ahi ve,” ci-in a dawng kik hi.

15 Gideon in mang le a khiatna a zak ciangin Pasian a bia hi. Amah Israel giahphual ah ciah kika, “Tho un! TOPA in Midian-te giahphual note khut sungah hong pia khin hi,” ci-in a genkhia hi. 16Mi zathumte pawl thumin khena a vekun a khut-uah pengkulte le beelhawmte tawisakin a sungah meilah a kengsak hi.

17 Amah in amaute kiangah, “Kei hong en gige unla kong makaihna bangbang zui un. Giahphual mong ka tun ciangin kei hih bang tektekin hih un. 18Kei le kei tawh a omte in ka pengkul uh ka mut uh ciangin no zong giahphual kimkot pan no aa ciat na mut unla, ‘TOPA le Gideon ading,’ ci-in awng un,” a ci hi. ^q

19 Gideon le mi zakhat, vil laita galvil a kilaih khit phetin giahphual mongah a tung uh hi. Amaute in pengkul mut uh a, a khut ua a tawi uh beelte a sukham uh hi. 20Pawl thumte in zong pengkul mutin leibeelte a sukham uh hi. A veilam khutun meilah a taklam khutun penkul tawi-in mut uha, “TOPA ading le Gideon ading namsau!” ci-in a awng uh hi. 21Giahphual kimkot amau panmun ciat panin a tua cih uh ciangin Midian-te khempeuh tai-in a tai kawmun a kiko uh hi. ^r

22 Pengkul zathum a gin ciangin TOPA in giahphual sunga om mite khempeuh khat le khat a namsau un a kisat tuahsak hi. Galkapte in Beth Shittah ah Zererah lam manawh uh a, Tabbath kianga Abel Meholah gamgi dong a tai uh hi. 23Naphtali, Asher le Manasseh pana Israel-te khempeuh kisamkhia uh a, Midiante a delh huan uh hi. 24Gideon in Ephraim mualtung gam khempeuh ah kamtai paisak-a, “Midian-te do dingin hong kuansuk unla a manawh lam ua Jordan tuite Beth Barah dong hong lasuk un,” a cisak hi.

Tua ciangin Ephraim-a mi khempeuh kisamkhia-in Beth Barah dong Jordan tuite a la khin uh hi. 25Amaute in Midian-te makai Oreb le Zeeb zong a man uh hi. Amaute in Oreb suang ah Oreb that uh a, Zeeb lenggah sukna ah Zeeb a that uh hi. Midian-te delh uh a, Jordan gei-a om Gideon kiangah Oreb le Zeeb lutang a puak uh hi. ^s