Nah 3 | ZomZIV | STEP | Zuauthu tawh a kidim, vansuh tawh a kidim, mithahna tawh a kitalawi lo nang sisan khuapi, nak thuak na nicia!

Nahum 3

Nineveh Kihamsiat

1 Zuauthu tawh a kidim, ^a
vansuh tawh a kidim,
mithahna tawh a kitalawi lo
nang sisan khuapi, nak thuak na nicia!
2 Siatna huging,
lengpei kigawi,
sakol koptai ging le
sakolleng ging luapluapte!
3 Sakol galkapte galsimna
namsau tee zalzal le
teipi kilek zualzual-te!
Misi tampi,
misisa kiciang venvan,
a kisim zo lo misiluang,
tua misiluang tungah mi kimuktu lai - ^b
4 hihte khempeuh ngaihsutna bei-a kizuak,
a ngaihbaang a uang mahmah numei, ^c
mibum siamin ama kizuakna tawh minamte sila-in khawi-a, ^d
ama bumna tawh mite sila-a a khawi nu hang ahi hi.
5 “Nang langah ka pang hi,” Thahatpen TOPA in cikhia hi
“Na maitang ah na nikte ka lemto ding hi. ^e
Na guaktanga na om lam minamte ka lak dinga, ^f
kumpi-gamte in na zumhuaina a mu ding uh hi.
6 Nin kihhuai kong theh dinga,
hong simmawhbawl gawpin ^g
kimawlna kong suaksak ding hi.
7 Nang hong mu khempeuh in hong taisan ding uh a, ^h
‘Nineveh kisia hi - tuanu kua in kah ding hiam?’ ci ding uh hi.
‘Nang hong hehnem ding mi koi-ah mu ding ka hi hiam?” a ci hi. ⁱ
8 Nile gun tungah om a, ^j
tui in a umcih,
a kidalna gun hi-in
a kulh tui ahi Thebes ^{▼▼3.8 Hebrew ah No Amon} sangin
nang hoihzaw na hi hiam?
9 Cush ^{▼▼3.9 Tua in Nile nak kuallam} le Egypt-te a hatna uh kiteh zo lo hi;
Put le Libya zong tuanu pawl ahi hi. ^m
10 Tua hi napi tuanu kimana
salin kikai hi. ⁿ
Kongzing bul tengah
a tate uh kisatpalh hi. ^o
A uliante uh ai sanin hawm uh a,
a miliante uh sikkhainiangin kikhih hi. ^p
11 Nang zong zukham na suak dinga,
na galte panin bu nuamin
mun muanhuai na zong ding hi. ^q
12 Na kulh muanhuaite khempeuh lah
theikung a gah minsa tawh kibang ding hi.
Tuate a kisin ciangin theipum kia-in
a ne dingte kam sung a tu ding hi. ^r
13 Na galkapte en in -
numei bek hi lo hiam? ^s
Na gam kongpite,
zapi-in na galte kihon hi; ^t
a kalhnate mei in kangtum khin hi. ^u
14 Hong ki-umcih sunga ding tui tawi in,
na kidalna khauhsak lai in!
Buan cilin leisan vui le
leikang helin
leisek seekna puah in!
15 Tua lai-ah nang, mei-in hong kihaltum ding hi; ^v
namsau-in hong kivattuk dinga ^w
kauphe bangin nang hong hultum ding hi.
A tuan kauphete bangin na khanga,
kauphete bangin na pung hi. ^x
16 Na sumbuk bawlte vana aksi zah sangin
a tamzawk dongin na khangsak zo hi;
ahi hangin gamsung teng a nektum khit cianga
a lengmang kauphete tawh kibang uh hi. ^y
17 Nang hong simte kauphe tawh kibang uh a,
na uliante khuadamin kulh tungah
bawm muamua in nisuah ciangin lengmang a,
kuamah in a omna mel a theih loh
kauphe honpi tawh kibang uh hi.
18 Assyria kumpipa aw, na tuucingte ^{▼▼3.18 Ahikeh gam-ukte} lusu uh hi.
Na uliante tawlnga uh hi. ^aa
Na mite mualtung ah kithehthang uh a, ^ab
a kaikhawm ding kuamah om lo hi.
19 Na liamma-te bangmah in damsak thei lo a, ^ac
na meimate adam zo lote ahi hi.
Na kheltat denna ^ad
a thuakkha lo kuamah om lo ahi manin
na guallelhna a za peuhpeuh in
a khut uh sialki in tum ding uh hi lo ahi hiam?