aSp 8:3
bMs 3:12

Numbers 8:6-22

6“Israel dangte lak panin Levi-te lakhia inla amaute siangsak in. 7Amaute na siansak nadingin hicih hih in: Amaute tungah sianna tui theh in; tua ciangin a pum tungua mul khempeuh metsakin a puansilhte uh sawpsak inla amau le amau kisiansuahsak in. 8Bawngtalno khat tawh an-a biakna, annel limci sathau helsa amaute lasak in; tua khit ciangin mawhna hanga biakna dingin bawngtalno a nihna na lasak ding hi. 9Kikhopna Puanbuk mai-ah Levi-te paipih inla Israel mipi bup kikhawmsak in. 10TOPA mai-ah Levi-te na paipih dinga Israel-te in amaute tungah a khut uh a nga ding uh hi. 11Amaute in TOPA na a sep theih nadingun Aaron in Israel-te panin TOPA mai-ah Levi-te vei-a biakna bangin a pia ding hi. a

12 “Levi-te in bawngtalnote tungah a khut uh a ngak khit uh ciangin, Levi-te adingin thoihdamna bawlna-in TOPA tungah mawhna hanga biakna-in zang unla, a khat pen meihal biakna-in zang un. 13Aaron le a tapate mai-ah Levi-te dingsak un, tua ciangin amaute vei-a biakna bangin TOPA tungah pia un. 14Hih bangin Israel dangte panin Levi-te na tuam koih dinga, Levi-te kei aa ahi ding uh hi. b

15 “Levi-te na siansak khit vei-a biakna bangin na piak khit ciangin amaute Kikhopna Puanbuk ah amau nasep sem dingin a pai ding uh hi. 16Amaute Israel mi kei tunga hong kipiasate ahi uh hi. Keimah in tacil, Israel numei pana tapa upa pen tangin amaute ka sang hi. 17Israel tacil apa peuhmah mihing ahi a ganhing ahi zongin kei aa ahi hi. Egypt ah tacil khempeuh ka vatmai lai-in kei adingin amaute ka tuamkoih hi. 18Tua hi a, Israel tapa upa pen khempeuh tangin Levi-te ka la khin zo hi. 19Amaute adingin thoihdamna na bawl dinga a pai uh ciangin pulpi in Israel-te a vat loh nadingin Israel mite tanga Kikhopna Puanbuk a nasem dingin Israel mite khempeuh lak panin Levi-te Aaron le ama tapate tungah ka pia hi,” a ci hi.

20 TOPA in Moses a thupiak bang tektek in Moses, Aaron le Israel mipi bup in Levi-te tungah a hih uh hi. 21Levi-te in amau le amau kisiangtho sakin a puan uh a sawp uh hi. Tua ciangin Aaron in vei-a biakna bangin TOPA mai-ah amaute pia-a, amaute a siantho nadingun thoihdamna a bawlsak hi. 22Tua khit ciangin Kikhopna Puanbuk a Aaron le a tapate ukna nuai-ah amau nasep sem dingin Levi-te a pai uh hi. TOPA in Moses a thupiak bang tektekin amaute in Levi-te tungah a hih uh hi.

Copyright information for ZomZIV