Psa 91 | ZomZIV | STEP | Sang Penpa liahna sunga tengte Thahatpenpa liim ah a khawl ding hi.

Psalms 91

1 Sang Penpa liahna sunga tengte ^a
Thahatpenpa ^{▼▼ 1 Hebrew ah Shaddai} liim ah a khawl ding hi. ^c
2 TOPA tungah, “Amah ka bukna le ka kulhpi, ^d
ka muanpa ka Pasian ahi hi,” ka ^{▼▼ 2 Ahikeh a ci hi.} ci ding hi.
3 Amah in vasa siahpa thang pan le ^f
sih theihna natna lauhuai panin hong honkhia taktak ding hi. ^g
4 Amah in a khate in nang hong khuh dinga,
ama khate nuai-ah bu-in; ^h
ama muanhuaina in na lumpi le na lumta hi ding hi. ⁱ
5 Zana lauhuaina ahi a, ^j
suna leng thaltang ahi zongin
6 mial laka leng natna lauhuaite ahi a,
suntangpi-a a siasak gimnate ahi zongin na kihta kei ding hi.
7 Na gei ah tulkhat pukin,
na taklam ah tulsawm a puk zongin
nang hong neh kha kei ding hi.
8 Na mitin na en lel dinga,
migilote dan thuakna na mu ding hi. ^k
9 Nangmah in Sang Penpa -
keima bukna TOPA mah - na tenna na hisak leh
10 tua ciangin na tungah siatna hong tung lo dinga,
na puanbuk gei-ah vangsiatna hong tung kei ding hi.
11 Ahang in nang adingin ama vansawltakte thu pia dinga
na lampi tengah hong cingsak ding hi; ^l
12 na khe suang tungah na tah khak loh nadingin ^m
amaute in a khutun hong dom ding uh hi.
13 Humpinelkai le mualtan na tuan dinga;
humpinelkai lianpi le gulpi na tuancil ding hi.
14 TOPA in, “Amah in kei hong it ahi manin amah ka hu ding hi;
amah in ka min thei ahi manin amah ka dal ding hi.
15 Amah in kei hong sam dinga, ka dawng ding hi;
lungkham hunin amah ka ompih dinga
amah hu-in ka pahtawi ding hi. ⁿ
16 Nuntak sawtna-in amah ka lungtaisak dinga
ka hotkhiatna amah ka lak ding hi,” a ci hi. ^o