Acts 9

Jisas kako Soulɨye hunomo yɨwolo'mokahonɨngki Soul kakoe inomokomoyo imo'nɨmentisofoho.

(Apousel 22:4-16, 26:9-18)

1Soul kako a'amu Jisasɨmo inomokommotofo somo wae weeo'mo lonto imentisoso hwe yofe engo'njo tajo ango syoho'njo sohumo ulɨmento, 2Iyoswo mtɨ'mokohoji ntape. Iyoswo hiloso nomotawe'mo, Ntomasɨkos a'amu tajo ango syoho'njo sohwamo utɨhwamo. Ose ulahonɨngki uyɨmentisofoho. Iyoswo ole lɨmentisofoho, Soul a'amu Jisasɨye honɨngkanomo inɨngkowalokwofo somo notɨpemahwosi hwe moya'mi sofamo impe intofɨhwosi Jelusalemne'no womotaweno. Ose mtɨ'mokumentisofoho. 3Soul Ntomasɨkosɨmne'no nowentanɨngki ango mofone sopo pomponaho engo ahwomo mta'ni uloho'mentisofoho. 4Ose ulohofahonɨngki Soul hwahopo wasyonto mampaho pomponaho homo somta'ni upa'nɨmento, Soul, Soul, kɨko ngkimo wonyo peho'no nɨmokantokuno. 5Ose upa'nonto ulɨmento, Hwe engo tɨhwosilo. Ose ulahonɨngki ulɨmento, Ngko Jisasɨ'nyoho. Kɨko ngkimo wonyo nɨmokantokuno. 6Kɨko nolɨkafohoji ango ne somo fusyo. Osopo hwe fihwo kɨko ihnne so'no wakilɨmontonoho. Ose ulɨmentisofoho.

7A'amu Soulɨ'nji umentohofo sohwa mampi'nyo nohumantɨfi mampaho ko upa'nontɨfi ne sohumo muhwonɨmentohofofoho. 8Soul nolɨkafonto tɨmo hononto tɨmpi'nyo imo'nɨmentisofoho. Ose yahonɨngki a'amu aho umpo'nɨmentohofofoho. Aho impo'nomotawentɨfi Ntomasɨkos i'mofamentohofofoho. 9Soul tɨmpi'nyo sohwo wopayo mijo manyo'njo nowentanɨngki sɨkuno hufa'u sɨhune memjao'mentisofoho.

10Hwe fihwo Jisasɨmo inomokommojo sohwo kakoe yofe Anonaiyas oso hwo humamentisofoho. Oso hwe huhwo sohwo wojo uhwonɨngkahonɨngki Anɨtu ulɨmento, Anonaiyas. Ose ulahonɨngki ulɨmento, Hwe Engofo, ngko olopo humaleno. 11Ose ulahonɨngki Anɨtu ulɨmento, Kɨko nolɨkafohoji oso honɨngkano Nto'nohinofo mulɨmentohofo somo mpano. Osopo Jutasɨye ango somo hwe fihwo ango Tasosnta'ango sohwo kakoe yofe Soulɨyoho. Osohumo uhwonae. 12Ngkine'no jomo ntonto wojo uhwonɨngkisoso ole uhwonɨngkoho hwe fihwo kakoe yofe Anonaiyas noponto kakoe mnokinopo aho kisusyahonɨngki tɨmo wopɨngo umokohoho.

13Ose ulahonɨngki Anonaiyas ulɨmento, U, Hwe Engofo. Oso hwe sohumne'no hungkuno pi'nɨngo upa'nɨmalefoho. Kako jɨje a'amu neso Jelusalem humalofo somo wonyo uloho'maso hweho. 14Hwe yofe engo'njo tojo ango syoho'njo sohwo iyoswo uyɨmasofoho. Iyoswo hiloso jɨje a'amu ne impe intofo'nefoho.

15Ose ulahonɨngki Anɨtu ulɨmento, Mpano. Olo hwe lohwo nje syoho ntohofiyo uhwosopo'mentohefoho. A'amu kengo so'nji hwe yofe engo'njo so'nji a'amu Isɨlael so'njimo olo hwe lohwo nje yofe wolutɨhwamte hweho. 16Olo hilo so'no kako tohino engo nomane so'no utɨhwomonnoho.

17Ose ulahonɨngki Anonaiyas nowento ango so'mo noswonto Soulɨmo aho kisusyonto ulɨmento, Nje nɨngkwahwo Soul, Hwe engo Jisas honɨngkanopo uhwonɨmahnno sohwo jɨje tɨmo wopɨngo kumokiyo so'no lonɨhwaji so'no pohe hwo'nyoho. Anɨtuye Towahuno Wopɨngo sɨmehomo wokuhulo'ma'mtonoho. 18Ose ulahonɨngki Soulɨye tɨmo mta'ango fefo pa'nɨngo hu'mewasi lohofahonɨngki tɨmo wopɨngo imo'nɨmentisofoho. Wopɨngo imo'nonto nolɨkofahonɨngki Anonaiyas kakimo mijo kiyoma'mentisofoho. 19Kiyoma'mentisoso Soul wopayo nononto a'apaho yokumpohn'nyo imo'nɨmentisofoho. Sɨkuno memjaofontanɨngki Soul a'amu Ntomasɨkos Jisasɨmo inomokommotofo so'nji humamentohofofoho.

Ntomasɨkos ango sopo Soul Anɨtuye hungkuno lutɨhwamentisofoho.

20Soul komo'no Anɨtuye syoho emanto a'amu Juta uhu'mokiyo ho'mo so'mo nowento Jisasɨmne'no ole lutɨhwamento, Jisas Anɨtuye Hwomu hweho. 21Ose ulahonɨngki a'amuso nupa'nontɨfi yomo yomo yontɨfi ole hnnɨmentohofi, Olo hwe lohwo Jelusalemno a'amu Jisasɨmo jomo ulɨwo'nɨngkohofo somo wonyo umokumaso hweho. Oso'no olopo pmmasofoho. A'amu somo impe intofɨhwosi hwe yofe engo'njo tajo ango syoho'njo sohumne'no womotawomtonoho. Oso hwe oso huhweho. Ose hnnɨmentohofofoho.

22Soul hwe engo pa'nyo imo'nonto kako Jisasɨmne'no hungkuno lutɨhwamentisofoho. Ole lutɨhwamento, Hwe Anɨtu nakwoe hwahopo uhwatɨmentiso sohwo Jisasɨyoho. Oso hungkuno nehopi ko lutɨhwahonɨngki a'amu Juta ango Ntomasɨkos sopo humamentohofoso nupa'nontɨfi honohono'no imentohofofoho.

Soul hiyaso lɨma'mentisofoho.

23Sɨkuno pi'nɨngo memjaofahonɨngki a'amu Jutaso nuhu'mokontɨfi Soulɨmo fonjane'entɨfi hungkuno kotɨku'mentohofofoho. 24Soul oso hungkuno hiso upa'nɨmentisofoho. A'amu Jutaso kuso homohomo Soulɨmne'no ne'no uhwontohumamotofofoho. 25Oseso sɨkuno fihumo Soul kakoe inomokommotofo sohwanji sokilojopo kotasontɨfi Soulɨmo sohwo ho'yo engomo kamentɨfi mempo hohnta'ni intofuyoho'mokumentohofofoho.

Soul Jelusalem humamentisofosho.

26Hohosohonta Soul Jelusalemne'no nowento a'amu Jisasɨmo inomokommotofo sohwaji ufohi'nɨmo lonto ko yahonɨngki hofɨko Soulɨmne'no iyoho unɨmentisofoho. Soul Jisasɨye inomokomoyo ne sohune'no sɨmeho hi'ntnnono muyofoho. 27I oso'no Mponopas Soulɨmo utɨmantoapousel sohwafepono motawomentisofoho. Mponopas ole ulɨmento, Soul honɨngkanopo nakwoe Hwe Engo Jisasɨmo uhwonɨngkahonɨngki hungkuno ulɨmasofoho. Soul Ntomasɨkos a'amu somo Jisasɨmne'no hungkuno lutɨhwanto iyoho munɨmmaso hweho. 28Ose ulahonɨngki Soul hofɨko'nji nohumanto Jelusalem emoyonto Jisasɨne'no hungkuno lutɨhwanto iyoho munɨmmentisofoho. 29A'amu Juta Ngkɨlik hungkuno'njo so'nji Soulɨ'nji hungkuno hnnontɨfi Jisasɨmne'no yoka hnnɨmentohofofoho. Hofɨko Soulɨmo wofonjaofano lontɨfi imentohofofoho. 30A'amu Jisasɨmne'no inomokommotofoso oso hunoso uyahonɨngki Soulɨmo hwaho Sisaliyamne'no motawentɨfi ango Tasosɨmne'no uhwojamentohofofoho.

31Hohosohonta a'amu Jisasɨmne'no inomokommotofoso Jutiyanta'ango so'nji Ngkalilinta'ango so'nji Someliyanta'ango so'nji hofɨko wopɨngo humamentohofofoho. A'amu kengoso wonyo mulohofe'njo imentohofofoho. O'o sɨmeho pompenjiyo'nji nohumantɨfi Jisasɨmo aho yokumpohn'nyo kemokosyohumamotofofoho. Anɨtuye hungkuno haloho upeehonɨngkofi Anɨtuye Towahuno Wopɨngo ufo'ma'mentisofoho. Hwe moya'mi pi'nɨngo engo nohotoswontɨfi a'amu ne imo'nɨmentohofofoho.

Pita kako ango Lita sopo a'amumo wopɨngo umokumentisofoho.

32Pita ango ho'mo ho'mo emoyonto ango fipo Lita osopo nowento Anɨtuye a'amu ne sonji humamentohofofoho. 33Oso ango hopo sopo hwe fihwo kakoe yofe Ainiyas humamentisofoho. Oso hwe huhwo sohwo kakoe a'apaho songo songo inyohwo'maho. Kako ijempohopo wentanɨngki soswo aho hopi'nono nom'ne nta'ni hufa'u sɨhune uyakolo'mojofoho. 34Pita osohumo nuhwononto ulɨmento, Ainiyas olohonta Jisas Kɨlais wopɨngo wakumokono. Filɨkaho. Jɨje ijempoho ito'no fesɨjwasyo. Ose ulahonɨngki Ainiyas komo'no lɨka'mentisofoho. 35A'amu ango Lita'nji Seloun'nji humamentohofoso hwe sohumo uhwonontɨfi Jisasɨmne'no sɨmeho yɨwolo'mokumentohofofoho.

Ango Joupa sopo Pita a'amu poyo pe'nɨmentiso somo songo ulɨka'mentisofoho.

36Ango nom'nepo Joupa Jisas a'mu fisi inomokammojosi kakoe yofe Tapita. A'amu Ngkɨlikɨso ole lɨmotofo Ntoukas. Sɨkuno huhwo huhwi yahino wonyoangkafo imojosi a'amu umofonyo iyo somo ufo'ma'mojiyoho. 37Oso hohosohonta mnokino tɨpemanto pe'nɨmentisofoho. Kakoe pijafo mijo yajɨjwontɨfi ango tokilonjwa'mjo yokintahopo ho'nahumentohofofoho. 38Oso ango Joupa Lita'njopo mafoneponoho. Jisasɨye inomokomoyo imotofo Joupa ango humamotofoso Pita ango Lita sopo humaho upa'nontɨfi hwe hufa'u sohwa'umo lɨhwojahonɨngkofi Pitamo ulɨmentisiyo. Kɨko nakwo'nji fɨpe. Kɨko nohontohumahotoho. 39Ose ulahonɨngki Pita nupa'nonto nolɨkafonto umentisofoho. I'mofawentɨfi oso ango yokintaho sopo kotasɨmentohofofoho. Apɨwojo sofa Pita'njopo nolohofontɨfi humotaho lontɨfi manji'mofo, he, yo'mayo Ntoukas mtɨ'mokumentisoso Pitamo utɨhwamentohofofoho. 40Pita ulɨmento, Sekwo mempo fohotohumno. Ose ulonto hwomtame yonto Anɨtumo jomo ulɨmentisofoho. Pita kakoe sɨmo'mango ikinji ehumanto a'musiye pijafo wentanjo sohohnta'ni ole ulɨmento, Tapita, filɨkaho. Ose ulahonɨngki a'musi tɨmo hononto, Pitamo uhwononto lɨkofohumamentisofoho. 41Pita kakoe aho nomanto ulɨka'mentisofoho. Nulɨkafonto Anɨtuye a'amu ne'nji apɨwojo ntnne'no joho ulonto a'mu songo hisimo utɨhwamentisofoho. 42Olo hiloso Joupa sopo ho'nɨngkahonɨngki hwe moya'mi upa'nɨmentohofofoho. Oseso a'amu pi'nɨngo engo Jisasɨmo sɨmeho hi'ntnnono uyɨmentohofofoho. 43Oso ango hopo sopo hwe fihwo kakoe yofe Saimoun, yahwopaho mtɨ'mokiyo syoho'njo hweho. Oso hwe huhwo sohwo'nji Pita nohumentanɨngki sɨkuno pi'nɨngo memjao'mentisofoho.