Rev 22 | ATA | STEP | Ioxe angelo ne muavuti la mulosielixu lexa sou mauli ia anu ulamilami loxo latitilo mo luuxu no laaxu puloulou noxi'a Lataua ilou Sipsip 'Olu la musiali muuatu.

a 22:1Ese 47:1

b 22:2Tav 2:9; Ese 47:12; Ioe 3:18; Sek 14:8

c 22:4Mat 5:8; Pal 3:12

d 22:5Tan 7:18, 27; Pal 5:10, 20:6, 21:23, 25

e 22:6Pal 1:1

f 22:7Pal 1:3

g 22:8-9Pal 19:10

h 22:11Tan 12:10

i 22:12Ais 40:10; Iel 17:10; Pal 2:23

j 22:13Ais 44:6; Pal 1:8, 17, 21:6

k 22:14Tav 2:9, 3:22

l 22:16Iti 24:17; Ais 11:1, 10; Rom 1:3; Pal 2:28, 5:5

m 22:17Ais 55:1; Pal 21:6

n 22:18-19Lap 4:2, 12:32

o 22:20Mat 24:30-31; 1Ko 16:22

Revelation of John 22

Lexa sou Mauli

1 ^aIoxe angelo ne muavuti la mulosielixu lexa sou mauli ia anu ulamilami loxo latitilo mo luuxu no laaxu puloulou noxi'a Lataua ilou Sipsip 'Olu la musiali muuatu. 2 ^bLa muiave mulai nonixi no vote'i toxoxa'a sou tuala tatila ne, xe no pa'umolu xalee vile xe xalee vile la ovu sou mauli mutulutulu. Ovu ne ulavusou unene'a alaxu mavulovexa mo mulu'e no lia tamei no anu tauu ie vile momoxu so'iso'io xe voloxu ne sou u'oxone'i ta mitema no xalexaleenu lia ukalusi 'o ino'u mauli no anu. 3 Mo mimii e Lataua umasaxau uasi manina mo ulevetesou lexe uxexee umomomo sou uxolu no nano ne la uasi. Mo puloulou noxou Lataua mo Sipsip 'Olu uxolu no nano no tuala tatila ne la ta mitema sou xaixai noxou ixaxai noxou. 4 ^cLa ane'i imaisou iou xe ikaukavunu ualasou no 'alaie'i. 5 ^dLa 'olovoxo uasi. Xo anu tila Lataua ulosi'a lamana, la sou ane'i imomomo sou ixolu no anu lamanaxu telu mo lamanaxu aso uasi. Ane'i ixali ta tatanaanu tuala no voxovoxo mo kaluxu uasi. 6 ^eMo angelo ne muvikalaleli aloxo 'o, “Vaivaikala ane 'o ne manina misevile umomomo sou ta mitema imuxaxu tane'i no anu. Tila anu Lataua no anu Uleenu la muavutilixa'a ta mitema sou palomatana la mia'alo no anu vaivaikala noxou. Anu mupalusi'a ta angelo noxou sou ine'e ilosie'i ta mitema sou xaixai noxou no anu mimii e 'ala'alai sou uxali.”

Lailivuxu Iesu

7 ^fMo angelo ne musolonu vaivaikala noxou la aloxo 'o, “Ngalomu, eni 'ala'alai sou alivu ane'e. La sou 'ena'ei ane'i umulinu vaivaikala palopalomatana uai no nano no anu uoli voloxu e misakii 'o, anu u'osa xo Lataua ualusou.” 8 ^gEni Ioanesi, enisisi ane emaisou mimii ne xe elomusou vaivaikala ne. Ia no mine eni elomusou xe elomusou mukalu la elapau mulu'e no tava'u angelo e ulolosielixu mimii ne sou lexe alotu noxou. 9 Ia anu muavuti la muvikalaleli aloxo 'o, “Mamu, nalotu noxilo uasi, nalotu noxou Lataua anusisi. Xo eni amitema sou xaixai noxou Lataua aloxo nininesi mo ta vivine ta mitema sou palomatana xe ane'i ane imulinu vaivaikala no anu uoli voloxu e misakii 'o. Nalotu Lataua!” 10 Mo muavuti la muvikalaleli la aloxo 'o, “Mamu sou natatusou vaivaikala palopalomatana muai no nano no anu uoli voloxu e misakii 'o xo voxo a 'ala'alai ukalu. 11 ^hLa sou 'ena'ei u'oxo'oxonu susu la anu laixe lexe anu ulai mo usolonu u'oxo'oxonu susu mo 'ena'ei ane u'oxo'oxonu 'ili'ilixo e iou maemaela no anu la anu laixe lexe ulai mo usolonu u'oxo'oxonu 'ili'ilixo ane ne. Mo 'ena'ei ane umulimulinu 'ili'ilixo mulapu la laixe lexe anu usolonu u'oxonu 'ilixo mulapu xe 'ena'ei ane umasaxa lexe uxolu va'axu no anu 'ili'ilixo masumasua la anu laixe lexe anu usolonu sou uxolu va'axu no anu 'ili'ilixo masumasua ne.” 12 ⁱ “Ngalomu, eni 'ala'alai sou alivu ane'e la alosi'a ta mitema latala lakolisou 'ili'ilixo ma'ia ane'i vilevilesi mi'oxonu. 13 ^jEni tei xe eni kaluxu mo eni soko'u mimii xe eni kaluxusou mimii.” 14 ^kAne'i ane mi'uinu tokolomoi'a la i'osa xo Lataua ualusi'a la ane'i umomomo sou i'ani no anu ovu sou mauli mo u'unalai no aitenga no tuala tatila ne. 15 Ia ane'i ane umomomo sou i'una no tuala tatila ne uasi ane ta a'aa mo ane'i ane i'oxo'oxonu sasaa kalakalavoi mo 'ili'ilixo sou vote'i mo ane'i mive'a ta mitema misoisoli mo ilotu no anu mimii vulaulau xe ane'i latala e imasaxa i'oxo'oxonu vaikala kalakalavoisi. Ane'i ta mitema ne ixolu no ale no tuala tatila noxou Lataua ne. 16 ^l “Eni Iesu epalusou angelo noxilo sou mulu'e mua'aloxu vaivaikala manina noxilo mulai nixi'a ta mitema sou lalotu. Xo eni 'ilusuleli ane Deviti mo eni Deviti uli'u vile ane mo eni loxo xuae sou lamana ukea.” 17 ^mUleenu Tavuna ilee Sipsip 'Olu semau ivikala lexe, “Nane'e.” Mo anu ane ulomusou la anu uvikala lexe, “Nane'e.” 'Ena'ei ane usoliu lexa la anu une'e mo 'ena'ei ane umasaxa manina lexe uie no anu lexa sou mauli ne la anu laixe lexe anu une'e mo uie vitanisi ia ulotonu uasi.

Vaikala Peletoto Pekia'u Noxou Ioanesi

18 ⁿLa sou eni apeletoto aloxo 'o lexe 'ena'ei ane mulomusou vaikala palomatana muai no nano no lavuku 'o ia umuxaxu vaikala se'i utelo no latanu la, la Lataua umuxaxu tu'utu'umaxu utelo no lataanu noxou. 19 Xe anu ane uxexeenu vaivaikala palomatana e muai no nano no lavuku 'o, la anu umomomo sou u'ani no anu ovu sou mauli uasi, mo umomomo sou u'unalai no anu Tuala Tavuna Tatila noxou Lataua e mulemolu no anu lavuku noxou uasi. Lataua uxexeenu mimii ane ne noxou. 20 ^oMo itema e mua'alo lamana no anu mimii ane ne uvikala lexe, “Ani, Eni 'ala'alai sou alivu ane'e.” Manina. Tila Iesu, nane'e. 21 Eni alinga lexe alauna noxou Tila Iesu uxolu noxi'a ta mitema noxou Lataua. Manina.