Isa 15 | AmhNASV | STEP | ስለ ሞዓብ የተነገረው ንግር ይህ ነው፤ የሞዓብ ዔር ፈራረሰች፤ በአንድ ሌሊትም ተደመሰሰች። የሞዓብ ቂር ፈራረሰች፣ በአንድ ሌሊት ተደመሰሰች።

Isaiah 15

በሞዓብ ላይ የተነገረ ትንቢት

1 ስለ ሞዓብ የተነገረው ንግር ይህ ነው፤

የሞዓብ ዔር ፈራረሰች፤
በአንድ ሌሊትም ተደመሰሰች።
የሞዓብ ቂር ፈራረሰች፣
በአንድ ሌሊት ተደመሰሰች።
2 ዲቦን ወደ መቅደሱ ወጣ፤
ሊያለቅስም ወደ ኰረብታው ሄደ፤
ሞዓብ ስለ ናባው፣ ስለ ሜድባም ዋይታ ያሰማል፤
ራስ ሁሉ ተመድምዷል፤
ጢምም ሁሉ ተላጭቷል።
3 በየመንገዱም ማቅ ይለብሳሉ፤
በየሰገነቱና በየአደባባዩ
ሁሉም ያለቅሳሉ፤
እንባም ይራጫሉ።
4 ሐሴቦንና ኤልያሊ ጮኹ፤
ድምፃቸው እስከ ያሀጽ ድረስ ተሰማ፤
ስለዚህ የሞዓብ ጦረኞች ጮኹ፤
ልባቸውም ራደ።

5 ልቤ ስለ ሞዓብ አለቀሰ፤
ስደተኞቿም እስከ ዞዓር፣
እስከ ዔግላት ሺሊሺያ ሸሹ፤
እንባቸውን እያፈሰሱ
ወደ ሉሒት ወጡ፤
በሖሮናይም መንገድም፣
ስለ ጥፋታቸው ዋይ እያሉ ነጐዱ።
6 የኔምሬ ውሆች ደርቀዋል፤
ሣሩ ጠውልጓል፤
ቡቃያውም ጠፍቷል፤
ለምለም ነገር አይታይም።
7 ስለዚህ ያገኙትን ሀብት፣
ያከማቹትን ንብረት ከአኻያ ወንዝ ማዶ ተሸክመው ያሻግሩታል።
8 ጩኸታቸው እስከ ሞዓብ ዳርቻ ድረስ ያስተጋባል፤
ዋይታቸው እስከ ኤግላይም፣
ሰቈቃቸውም እስከ ብኤርኢሊም ደረሰ።
9 የዲሞን ^{▼▼የማሶሪቱ ቅጅ ከዚህ ጋር ይስማማል፤ የሙት ባሕር ጥቅልል፣ የሰብዓ ሊቃናት ትርጕምና የቩልጌት ቅጅ ግን፣ ዲቦን ይላሉ።} ወንዞች በደም ተሞልተዋል፤
በዲሞን ላይ ግን ከዚያ ነገር የበለጠ አመጣለሁ፤
ከሞዓብ በሚሸሹት፣
በምድሪቱም ላይ በሚቀሩት አንበሳ እሰድዳለሁ።