Luke 20

Yesu 'ana loina weyahina

(Madiu 21:23-27; Maki 11:27-33)

1Caigeda tuta 'oina Yesu 'ihehe'ita Hada He'asisi 'oina, beno tetela bwebwe'ana 'ihehepwaila tomota 'oidiya, ma topwaoliyao ma loina 'ana tohe'itao ma wete babadao sinaoma ta Yesu sihesilaleya, 2sigwae, “Loheya, taiya 'ina loinega ta bewa gide 'upaipaihowa 'ese?”

3Ma Yesu 'ihegwaediya, 'igwaeya, “Nugeta yahesilala 'oimiya. 4Taiya 'ina loinega ta Yoni to'abihebabitaiso 'ipaihowa? Yehoba bo 'aigeda tomota?”

5Coinega taudimo 'oidiya sinuwanuwatuhu, ta sigwaeya, “Cina gwae togidega tahemaisa 'ese? Weyahina 'eguma tagwae, ‘Yehoba 'oinega’ nata 'ihegwae hilegita 'igwae, ‘Ma! To'aha hede weyahina ta Yoni geya wahemise?’ 6Ma 'eguma tagwae, ‘Tomota 'oinega,’ tabu ta boda da'uleyega si'ahu yamategita, weyahina tomota mabwaiyadi Yoni sihemisaeya 'abehega tauna 'aigeda palopita.”

7Coinega 'ina hesilalaina geya sihemaise bwaibwaini, ma hesi sigwaeya, “Geya 'asanapu.”

8Ma Yesu wete 'igwaeya, “Taugu wete sahena 'oimiya yahehepwaila latuwe 'abehega taiya 'ina loinega ta bewa gide yapaipaihowa 'esa.”

Bada 'ina tanoha 'ana topaihowao gwae hegehegedina

(Madiu 21:33-46; Maki 12:1-12)

9Coinega Yesu tomotaedi 'igwae hegehegediyediya 'igwaeya, “Caigeda loheya 'ina tanoha gileipa* daisinamo 'i'umeya, ma 'ina topaihowao 'ihegwaediya ma si'ita'itayahi, ma tauna 'itauya hali tupwa, ta nobwa 'imiyamiya.

10“Ma hedodona 'ana tuta badaina 'ina hewali 'aigeda 'ihesumane hileya ma 'abehega gileipa huwaina tanoha 'ana to'itayahinao 'oidiyega 'i'eweyama. Citautauya ta geya si'ebwae, ma hesi sisapiya ta manimenimenamo sihesumaneya ta 'ihila.

11“Coinega badaina 'ina hewali heluwena wete 'ihesumaneya 'oidiya, ta sihunuya, ta wete si'abihedeba mwadineya, ta sihesumaneya 'ihila.

12“Ma wete hetoina 'ihesumaneya 'oidiya, ta wete sihunu he'i'iwasiya, ma sipa'i latuweya.

13“Coinega toni tanohaina 'inuwanuwatuhu, 'igwaeya, ‘To 'eda wete yapaihowa? Tuwa taugu natuguina yahesumane ma 'oinega si'amayabe, weyahina tauna tuwa natugu.’

14“Ma saugaina topaihowaedi bada natuna si'iteya 'inaonaoma siboidimo 'oidiya sigwaegwae, ‘Ciyagwao, loheya nage 'inaonaoma, tauna badaina natuna 'aigeda tuwa, 'oinega nata tuwa talohe'amasi ma tauda tanoha taloinae.’

15“Coinega si'abiyahiya ta tanohega siula latuweya mulimuliya, ta nobwa silohe'amasiya.”

Ma Yesu 'ina he'ote'otetela 'igumwala pwaiya ta 'ihesilala 'oidiya, 'igwaeya, “To'aha nata badaina 'ina to'ita yahinaowedi 'oidiya 'ipaihowa? 16Moisa, badaina 'abwa 'ilatu ma topaihowaedi 'ilohe'amasidi, ma 'oinega tanohina hali to'itayahinao 'i'ebwaedi.”

Babadaedi Yesu 'ina gwae bewa gide sihesagoheya ta sigwaeya, “Tauda sahena wete gide!”

17Ma Yesu 'i'ebubudiya ta wete 'oidiya 'igwaeya, “Togidega 'ana sanapu Buki He'asisi 'ina hepwailaina, 'igwaeya,

‘Logidiina mwalo tohada'abi silogwahateya, ta tuta bewa sihetoholo nugeteya hada mata'ahwanina ma logidi mabwaiyadi 'iloinaedi.’
18“Ceguma taiya 'ibe'u logidi bewa 'oina, nata luluna 'ilasadi, ma logidiina 'eguma 'ibe'u 'aigeda taiya tabwanina nata wahina 'i'ahu piyapiyeyamo.”

19Bewa 'oina topwaoliyedi ta loina 'ana tohe'itao 'eda'eda si'ebeseya ta 'abehega Yesu si'abiyahi, weyahina sisanapuya 'abehega taudi tuwa weyahidi 'igwae hegehegediya, ma hesi geya si'abiyahi weyahina boda 'oidiya simatauta.

Takesi Sisa weyahina

(Madiu 22:15-22; Maki 12:13-17)

20Eeta tuta baibaiwana Yesu silolomatayahi ma 'abehega to'aha 'ina pui siloba, eema 'oinega sihepwaile toloina 'oina ma 'iheyatalae, 'oinega tomota tupwadi sihesumanediya Yesu 'oina ta hesilalega si'abowe ma 'abehega 'ina pui siloba. 21Ma tomotaiyedi sinaoma ta Yesu sihegwaeya, sigwae, “Bada, moisa 'owa 'ino gwaeyao ta 'ino he'itao mabwaiyana dumwaludi, ma wete 'asanapugowa 'abehega geya wete 'aigeda loheya 'uda matauteya, ma hesi Yehoba 'ina nuwatuhu 'ana tohe'ita moisa 'owa. 22Coinega togidega, sowasowahina ma Kini Sisa weyahina takesi talagu, bo geya?”

23Ma Yesu bo'i 'idi 'aboina 'isanapuya, 'oinega 'ihegwaediya, 24'igwaeya, “Hana maneina wa'eweyama ya'ita.” Coinega si'ebwaeya ta 'ihegwaediya, 'igwaeya, “Wahegwaegau taiya bewa ma'ama'ayauna ma sanina maneina 'oina?”

Ta taudi sigwaeya, “Kini Sisa.”

25Coinega Yesu 'igwaeya, “Cehe gide! Ceguma Kini 'ina ginaula wa'ebwaya Kini 'oina, ma 'eguma Yehoba 'ina ginaula Yehoba wa'ebwae.”

26Yesu 'ina gwae bewa boda matadiya mabwaiyana dumwaluna, ta geya 'aigeda wete 'ina gwae pui siloba, ta 'atedi 'iyohowa ma simiya henonowa.

To'amasa 'idi toholo hila

(Madiu 22:23-33; Maki 12:18-27)

27Coinega wete tupwana Sadusiyao, taudi geya sihemisa to'amasa 'idi toholo hila weyahina, sinaoma ta Yesu 'oina sihesilala, sigwaeya, 28“Bada, loina bewa gide Mosese 'ileleya weyahida, 'igwaeya, ‘Ceguma 'aigeda loheya 'ihai ma geya natunamo ma 'i'amasa, loheyaina tasina hiwapeina ba'idana sihai ta 'oinega 'eguma wahineina 'ihenatuna, natunaina to'amasina 'ana miyalaena.’”

29Coinega 'ebe'ita si'ebwaeya, sigwaeya, “Caigeda loheya matasinao simiyamiya 'adi baibaiwa site sebeni, ta 'adi tautuwaina 'ihaiya ta geya natunamo, ma muliyetega loheyaina 'i'amasa. 30Coinega tasina deinega hiwapeina 'i'eweya ta wete simiyamiyana ta geya natunamo, ta loheyaina 'i'amasa. 31Coinega tasina wete deinega hiwapeina 'ihaiya, ta wete gide geya natunamo, ta 'i'amasa. Ta gide tuwa tasinao mabwaiyadi hiwapeina sihaihaiya si'amasa, ma geya natudiyaomo, 32ta muliyetega wahine wete 'i'amasa.

33“Ma to'aha 'unuwatuhuya tomotaedi weyahidi, to loheya wahineina mwanena moisa, tutaina 'eguma 'amasega sitoholo hila? Weyahina site sebeniyedi sihaiya.”

34Ta Yesu 'idi gwae 'ihemaiseya, 'igwaeya, “Wanuwatuhuyahi 'abehega tuta bewa 'oina wahine ma loheya sihaihai, 35ma hesi tuta 'inaonaoma 'oina 'eguma wahine ma loheya sowasowahidi ma 'amasega sitoholo hila nata geya'abwa wete sihaihai. 36Weyahina nata taudi gide aneloseyao, ta geya'abwa wete si'ama'amasa hila, ma hesi Yehoba 'i'ahwa natunedi weyahina 'amasega sitoholo hila.

37“Ma Mosese mwalohene 'ihe'ita bwaibwainigita to'amasa 'idi toholo hila weyahina. Saugaina Mosese pwatula 'alona 'itautauya ta Yehoba 'aiwe sabelulu 'oinega 'ihegwaeya, 'igwaeya, “Taugu Ebalahamo ta Aisake ta Yakobo 'idi Yehoba.’ 38Bewa 'ana nuwasabwalena 'abehega geya to'amasa 'idi Yehoba, ma hesi taudi mayawasidi 'idi Yehoba, weyahina babadaedi Yehoba 'ina tupwa tuta bewa mayawasidi simiyamiya.”

39Nage 'oina loina 'ana tohe'itao simatauta ta tupwadi sigwaeya, “Tohe'ita, 'ino maisa bwebwe'ana hedade,” 'oinega geya 'aigeda wete hesilala si'ebwa'ebwae.

To'abihetenaina tauna Debida 'ina susu

(Madiu 22:41-46; Maki 12:35-37)

41Coinega Yesu wete 'ihesilala 'oidiya 'igwaeya, “Togidega ta 'oinega tomota tupwadi sigwaeya, 'abehega Debida 'ina susuwega To'abihetenaina Keliso 'ilatu, 42weyahina buki wali Same 'oina Debida 'ina gwae 'igwaeya,

‘Yehoba 'igwaeya 'igu Bada 'oina 'igwaeya: Cigu 'ebeulega 'umiyatoi, 43ta 'ana siga 'a 'alehao yalagu suluhedi 'aheu 'adi 'ebelagu gabulena.’
44“Debidaina 'ina Bada Keliso, ma togidega hede Debida 'ina susuwega muliyetega Keliso 'ilatuma?”

Loina 'ana tohe'itao 'idi mumuga

(Madiu 23:1-36; Maki 12:38-40)

45Coinega boda mabwaiyadi sihehenono, ma Yesu 'ana tomuliyao 'ihegwaediya, 'igwaeya, 46“Tasigwao, sahena loina 'ana tohe'itao 'idi mumuga wamulimuliye. Weyahina taudi mumugadi tuwa gide tuta baibaiwana nuwanuwadi ma 'adi 'ale'owao duduledi si'otedi ma tomota gamwagamwanidiya sisakosakowasi ma 'abehega sihe'asisiyedi. Ta wete nuwanuwadi 'idi 'ebemiya bwebwe'adi Hada Tapwalolo 'oidiya, ta wete guyai 'adi tuta nuwanuwadi ma wagahata simiyatoi. 47Ta wete tuta baibaiwana tomota matadiya Yehoba 'oina si'ahwa'ahwanoi dudulena, ma hesi 'idi 'ahwanoiina geya bwebwe'ana, weyahina 'atediya sinuwanuwatuhu togidega nata hiwahiwape si'abo 'esedi ma 'idi tobwatobwao si'ewadi. Coinega 'abwa Yehoba maisa galana 'i'ebwaedi.”