Act 1 | BOJ | STEP | O Tiofilus, e nami anjam bei neŋgreŋyosim ni qa qariŋyem. Kumbra kalil Yesus na yoqnej qaji deqa ti anjam kalil a na tamo uŋgasari naŋgi minjroqnej qaji deqa ti utruq na neŋgreŋyem.

Acts 1

Yesus na aqa Mondor qariŋyim aqa aŋgro naŋgoq aiqas

1 O Tiofilus, e nami anjam bei neŋgreŋyosim ni qa qariŋyem. Kumbra kalil Yesus na yoqnej qaji deqa ti anjam kalil a na tamo uŋgasari naŋgi minjroqnej qaji deqa ti utruq na neŋgreŋyem. 2 Neŋgreŋyosim gilsimqa Qotei na Yesus osiq laŋ qureq oqej di patem. Yesus a laŋ qureq oqosaisosiqa aqa segi aŋgro giltnjrej qaji naŋgi koroinjrsiqa Qotei aqa Mondor na medabu siŋgilatetonaqa minjrej, “Niŋgi walweloqnsib ijo anjam mare mare laqniye.” Degsi minjrsiqa naŋgi uratnjrsiq laŋ qureq oqej. 3 Nami Yesus a jaqatiŋ koba osiq moiej. Osiqa olo subq na tigelosiqa aqa segi aŋgro naŋgoq di brantoqnsiqa maŋwa gargekoba yeqnaqa naŋgi unoqneb. Unoqnsib maroqneb, “Bole, Yesus a subq na tigelqo. A ŋambile unu.” Bati 40 qa Yesus a mandamq di sosiqa aqa aŋgro naŋgoq di brantoqnej. Brantoqnsiqa Qotei a tamo uŋgasari naŋgo Mandor Koba sosiqa naŋgi taqatnjrejunu anjam di minjroqnej. 4 Onaqa bati bei Yesus na aqa aŋgro naŋgi olo koroinjrsiqa minjrej, “Niŋgi Jerusalem urataib. Ijo Abu aqa Mondor niŋgi nami eŋgwa marej qaji deqa niŋgi tariŋoqnsib soqniye. E nami niŋgi deqa merŋgoqnem. 5 Jon a ya na tamo uŋgasari naŋgi laŋa yansnjroqnej. Ariya bati qudei koboamqa e Qotei aqa Mondor na niŋgi yansŋgwai.”

6 Onaqa bati bei Yesus na aqa aŋgro naŋgi olo koroinjrnaqa naŋgi na endegsib nenemyeb, “O Tamo Koba, bini bati endeqa kio ni na Rom naŋgo siŋgila kobotosim iga Israel tamo uŋgasari siŋgila egimqa iga na kamba mandam endi taqatqom?” 7 Onaqa Yesus na minjrej, “Niŋgi bati di qalieqa maraib. Di nuŋgo wau sai. Di ijo Abu aqa wau. A segi na bati di giltej unu. 8 Ariya Qotei aqa Mondor nuŋgoq bamqa niŋgi siŋgila osib e qa anjam mare mare laqniye. Niŋgi Jerusalem endia, Judia sawaq dia, Samaria sawaq dia, sawa sawa kalil keretosib e qa anjam mare mare laqniye.”

Yesus a laŋ qureq oqej

9 Yesus a na aqa aŋgro naŋgi anjam degsi minjrsiqa a mandam uratosiq laŋ goge oqeqnaq naŋgi a koqyesoqneb. Onaqa laŋbi na a kabutonaqa naŋgi a olo unosai. 10 Naŋgi laŋ goge tarosib ŋam ateqnabqa tamo aiyel gara qat jigeb qaji naŋgi bosib naŋgo areq di tigelosib minjreb, “O Galili qaji tamo, niŋgi kiyaqa laŋ goge tarosib ŋam ateqnub? Yesus a niŋgi uratŋgsiqa laŋ goge oqeqnaq niŋgi unonub mondoŋ a degsim olo bqas.”

Naŋgi na tamo bei giltonab a Judas aqa sawa ej

12 Mana naŋgi soqneb qaji aqa ñam Oliv mana. Mana di Jerusalem qure jojomq di unu. Deqa naŋgi mana dena olo puluosib Jerusalem aisib tal gogetosib naŋgo warum bei gogeqsi naŋgi gaigai soqneb qaji warum deq gileb. Yesus aqa aŋgro warum deq gileb qaji naŋgo ñam agiende. Pita na Jon na Jems na Andru na Filip na Tomas na Bartolomyu na Matyu na Alfius aqa ŋiri Jems na Saimon a nami Rom naŋgi winjrqajqa maroqnej qaji a na Jems bei aqa ŋiri Judas na. Yesus aqa aŋgro 11-pela naŋgi di warum deq gileb. 14 Naŋgi ti uŋgasari qudei ti Yesus aqa was naŋgi ti aqa aniqali Maria dego naŋgi koba na gaigai warum dia korooqnsibqa are qujaitoqnsib Qotei pailyoqneb.

15 Bati bei tamo uŋgasari 120 Yesus qa naŋgo areqalo siŋgilateb qaji naŋgi koroosib sonabqa Pita a naŋgo ambleq di tigelosiqa minjrej, 16 “O ijo was niŋgi quiye. Qotei aqa anjam bei nami neŋgreŋyeb qaji di aqa damu bini brantqo. Anjam di aqa damu Qotei a nami brantqa marej deqa bini brantqo. Anjam di Qotei aqa Mondor na Devit minjnaqa qusiqa neŋgreŋyonaq soqnej. A Judas qa neŋgreŋyej. Judas agi a na jeu tamo naŋgi gam osornjrnaqa Yesus ojeb. 17 A nami iga koba na sosimqa Yesus aqa wau ojoqnem.” Pita a na naŋgi anjam degsi minjrej.

18 O Tiofilus, e Judas qa kiñala saqai. Judas a nami Yesus osiqa jeu tamo naŋgo baŋq di atej. Judas aqa kumbra di tulaŋ uge. Aqa kumbra dena Juda tamo kokba naŋgi na silali yonabqa osiqa mandam taqal bei awaiyej. Awaiyosiqa bunuqna a mandam dia uloŋosiqa aqa mene paraonaqa bi bileŋej. 19 Bunuqna tamo uŋgasari kalil Jerusalem di soqneb qaji naŋgi anjam di qusibqa mandam di aqa ñam “Akeldama” waiyeb. Di naŋgo segi anjam na ñam waiyeb. Ñam di aqa damu, “Leŋ Aiqajqa Mandam.”

20 Ariya Yesus aqa tamo uŋgasari 120 naŋgi koroesonabqa Pita na olo minjrej, “Devit a nami Qotei louqa buk miligiq di Judas qa endegsi neŋgreŋyej, ‘Aqa tal laŋa sqas. Aqa tal tamo bei na olo oqasai.’ Osiqa olo Judas qa endegsi neŋgreŋyej, ‘A Kristus aqa wau ojoqnej. Ariya tamo bei na olo wau di ojqas.’ Devit a nami Judas qa degsi neŋgreŋyej.

21 “Deqa ijo was niŋgi quiye. Iga tamo bei giltonamqa a na Judas aqa sawa osim iga ti Yesus aqa wau ojqom. Bati iga Tamo Koba Yesus dauryosim laqnamqa tamo naŋgi iga koba na soqnem qaji deqaji bei oqom. 22 Jon yansnjro qaji aqa bati qa Yesus na aqa wau utru atej dena bosi bosiq Qotei na Yesus yaigosiqa laŋ qureq oqej bati deqa tamo naŋgi iga koba na soqnem qaji deqaji bei giltonamqa a iga ti Yesus aqa wau ojsim Yesus a moisiq olo subq na tigelej deqa mare mare laqnqom.”

23 Pita a naŋgi anjam degsi minjrnaqa naŋgi na tamo aiyel giltnjreb. Josep wo Matias wo giltnjreb. Josep aqa ñam bei Barsabas. Aqa ñam bei Jastas. 24 Naŋgi aiyel giltnjrsibqa endegsib Qotei pailyeb, “O Tamo Koba Qotei, ni tamo kalil naŋgo areqalo qalie. Deqa tamo aiyel endi ni yai giltqam di iga osorgimqa tamo dena Judas aqa sawa osim aqa wau ojqas. 25 Judas a wau di uratosiqa moisiq sawa uge ni nami a aiqajqa giltem qaji deq aiej.” 26 Naŋgi degsib Qotei pailyosib koboonaqa tamo yai na kamba Judas aqa wau ojqajqa deqa marsibqa meniŋ silali alaŋeb. Meniŋ silali alaŋonabqa Matias aqa meniŋ na buŋyej. Deqa naŋgi Matias giltonabqa a Yesus aqa aŋgro 11-pela Yesus aqa anjam mare mare laqajqa nami giltnjrej qaji naŋgi koba na sosib wauoqneb.