Mat 22 | BOJ | STEP | Onaqa Yesus a olo yawo anjam bei endegsi minjrej,

Matthew 22

Tamo kobaquja bei aqa ŋiri uŋa baŋ ojqa bationaqa maruro atej. Yesus a deqa yawo anjam marej

1 Onaqa Yesus a olo yawo anjam bei endegsi minjrej, 2 “Qotei laŋ qureq di unu qaji a tamo uŋgasari naŋgo Mandor Koba sosiq naŋgi taqatnjrejunu. Kumbra di mandor koba bei aqa ŋiri uŋa baŋ ojqa bationaqa maruro atej dego kere. 3 A maruro atsiqa aqa kaŋgal tamo qudei qariŋnjrnaqa naŋgi tigelosib tamo naŋgi nami aqa maruro unqajqa minjrej qaji naŋgi qa gilsib metnjreb, ‘Niŋgi boiye.’ Onaqa naŋgi bqa asginjrej. 4 Onaqa a di qusiqa aqa kaŋgal tamo qudei naŋgi olo qariŋnjrsiqa minjrej, ‘Niŋgi gilsib tamo naŋgi di endegsib minjriye, “Niŋgi quiye. Iŋgi iŋgi kalil gereiysim atonum unu. Bulmakau ti wagme namur bole bole ñumsimqa goinum. Deqa niŋgi asgiŋgaiq. Niŋgi bosib ijo maruro uniye.” Niŋgi gilsib naŋgi degsib minjriye.’

5 “Onaqa naŋgi gilsib tamo naŋgi di minjreb, ‘Niŋgi boiye.’ Minjrnabqa naŋgi kalil bqa asginjrej. Asginjrej deqa bei a ulaŋosiqa aqa iŋgi wauq gilej. Bei a ulaŋosiq aqa silali wauq gilej. 6 Onaqa naŋgi qudei na kaŋgal tamo naŋgi di ojeleŋosib ugeugeinjreb. Osib kaŋgal tamo qudei naŋgi ñumnab moreŋeb. 7 Onaqa mandor koba a di qusiqa minjiŋ oqetonaqa aqa qaja tamo qudei naŋgi qariŋnjrnaqa gilsib tamo naŋgi kaŋgal tamo ñumeb qaji naŋgi kamba ñumekriteb. Osib naŋgo tal iŋgi iŋgi kalil qatrentonab yuekriteb.

8 “Onaqa mandor koba a na olo aqa kaŋgal tamo qudei naŋgi qariŋnjrsiqa minjrej, ‘Ijo aŋgro aqa uŋa baŋ ojqa bati kereqo deqa e na maruro atonum unu. Ariya tamo naŋgi ijo maruro unqajqa nami minjrem qaji naŋgi bqa asginjrqo. Naŋgi tamo bolesai deqa naŋgi ijo maruro unqa keresai. 9 Deqa niŋgi olo gilsib gamq dia tamo laŋa laŋaj naŋgi turosib metnjrib ijo maruro unqa beb.’ 10 Onaqa naŋgi gilsib gamq dia tamo bole ti tamo uge ti naŋgi turosib metnjrnabqa naŋgi kalil maruro unqajqa bosib koroonabqa tal tamo na maqej.

11 “Onaqa mandor koba a na tamo uŋgasari naŋgi unjrqa marsiqa tal miligiq gilej. Gilsiq ŋam atej tamo bei a maruro qa gara wala jugosai di unsiqa minjej, 12 ‘O was, ni kiyaqa maruro qa gara wala jugosai? Ni degsim maruro unqa baim.’ Degsi minjnaqa tamo di a na kamba olo anjam bei minjqa keresaiiyonaqa laŋa kiriesoqnej. 13 Onaqa mandor koba a na aqa kaŋgal tamo naŋgi minjrej, ‘Tamo di siŋga ti baŋ ti tontetosib oqeq waiyibqa sawa ambruq di soqnem. Sawa dia tamo naŋgi akamkobayoqnsib pailoqnsib naŋgo jaqatiŋ qa qalagei anjam ateqnu.’

14 “Niŋgi quiye. Qotei a na tamo tulaŋ gargekoba naŋgi metnjroqnsiqa ariya a na tamo quja quja segi giltnjroqnsiqa eleŋeqnu.”

“Iga Sisar takis yqom e?” Farisi naŋgi degsib Yesus nenemyeb.

15 Onaqa Farisi naŋgi jaraiosib naŋgi anjam kie Yesus nenemyibqa a anjam grotimqa qusib naŋgi a ojqajqa deqa qairoqneb. 16 Qairosib anjam kereonaq naŋgo aŋgro qudei Herot aqa wau tamo qudei ti qariŋnjrnab Yesus aqa areq bosib gisaŋyosib minjeb, “O Qalie Tamo Koba, iga qalie, ni anjam bole maro qaji tamo. Ni anjam bole segi tamo uŋgasari naŋgi minjroqnsim Qotei aqa kumbra osornjreqnum. Ni tamo bei ulaiyosaieqnum. Ni tamo ñam ti naŋgi anjam bei minjroqnsim olo tamo ñam saiqoji naŋgi anjam bei minjrosaieqnum. Ni anjam qujai tamo kalil naŋgi minjreqnum. 17 Deqa ni iga merge. Iga Sisar takis yqom e? Yqasai e? Ni kiersi are qalonum?”

18 Onaqa Yesus a naŋgo areqalo uge di poiyonaqa minjrej, “Niŋgi gisaŋ tamo. Kiyaqa niŋgi e anjam bei grotitqa qusib niŋgi e ojqajqa deqa gisaŋbeqnub? 19 Meniŋ silali bei osi boiye. Osbab e unqai.” Degsi minjrnaqa naŋgi meniŋ silali bei osi bosib osoryonab unsiqa minjrej, 20 “Meniŋ silali quraq di tamo yai aqa ulatamu ti ñam ti unu? Niŋgi merbiye.” 21 Onaqa naŋgi na minjeb, “Di Sisar aqa ulatamu.” Onaqa a na minjrej, “Deqa Sisar aqa iŋgi iŋgi a qa olo yiye. Ariya Qotei aqa iŋgi iŋgi a qa olo yiye.”

22 Onaqa naŋgi Yesus aqa anjam di qusibqa naŋgi tulaŋ prugeleŋeb. Osib naŋgi Yesus uratosib jaraieb.

Sadyusi tamo qudei naŋgi bosib tamo moreŋo qaji olo subq na tigelqajqa deqa Yesus nenemyeb

23 Onaqa bati qujai deqa Sadyusi tamo qudei naŋgi Yesus a nenemyqa beb. Sadyusi naŋgi mareqnub, “Tamo moreŋo qaji naŋgi olo subq na tigelqasai.” Deqa naŋgi bosib Yesus endegsib nenemyeb, 24 “O Qalie Tamo Koba, ni que. Moses a nami endegsi marej, ‘Tamo bei a moiimqa aqa ŋauqali aŋgro saiqoji soqnimqa aqa was bei na olo uŋa qobul di osimqa aqa was moiej qaji aqa aŋgro ŋambabtetqas.’ Moses a nami degsi marej. 25 Deqa ni que. Was 7-pela naŋgi soqneb. Naŋgo was matu a uŋa osiqa moiej. A aŋgro saiqoji. Onaqa aqa aube yala na olo uŋa qujai di ej. 26 Osiqa a dego moiej. A aŋgro saiqoji. Onaqa aqa aube yala na olo uŋa di ej. Osiqa a dego moiej. A aŋgro saiqoji. Degsib gilsib was 7-pela kalil naŋgi uŋa qujai di osib moreŋeb. Naŋgi aŋgro saiqoji. 27 Naŋgi kalil moreŋonabqa ariya bunuqna uŋa di a dego moiej. 28 Ni iga merge. Mondoŋ subq na tigelo batiamqa tamo kalil naŋgi subq na tigelabqa uŋa di a yai aqa ŋauŋ tiŋtiŋ sqas? Ni qalie, naŋgi kalil uŋa qujai di eb.”

29 Onaqa Yesus na minjrej, “Qotei aqa anjam nami neŋgreŋyeb qaji di aqa damu niŋgi poiŋgosai. Qotei aqa siŋgila dego niŋgi poiŋgosai. Deqa niŋgi anjam grotonub. Grotosib agi nenembonub. 30 Mondoŋ tamo naŋgi subq na tigelosibqa naŋgi uŋatqasai. Naŋgi tamotqasai. Naŋgi laŋ aŋgro bul laŋa sqab.

31 “Ariya tamo naŋgi moisib olo subq na tigelqab deqa e niŋgi endegsi nenemŋgwai. Qotei a nami niŋgi anjam bei merŋgej di niŋgi sisiyosai kio? Agi Qotei a endegsi marej, 32 ‘E Abraham aqa Qotei. E Aisak aqa Qotei. E Jekop aqa Qotei.’ Qotei a degsi marej. Qotei a tamo moreŋo qaji naŋgo Qotei sai. A tamo ŋambile so qaji naŋgo Qotei.” 33 Onaqa tamo uŋgasari kalil naŋgi Yesus aqa anjam di qusibqa naŋgi tulaŋ prugeleŋeb.

Qotei aqa dal anjam kie a segi qujai tulaŋ bolequja?

34 Yesus a Sadyusi naŋgi anjam degsi minjrnaqa naŋgi na kamba olo anjam bei minjqa keresaiinjrnaqa Farisi naŋgi di qusib olo Yesus aqa areq beb. 35 Bosib naŋgo ambleq dena dal anjam qalie tamo bei a tigelosiq Yesus gisaŋyosiq nenemyej, 36 “O Qalie Tamo Koba, ni mare. Qotei aqa dal anjam kie a segi qujai tulaŋ bolequja? Dal anjam kie na dal anjam kalil buŋnjrejunu?”

37 Onaqa Yesus na minjej, “Dal anjam tulaŋ bolequja agi merŋgwai. ‘Niŋgi gago Tamo Koba Qotei tulaŋ qalaqalaiyiye. Qalaqalaiyosib nuŋgo are miligi ti nuŋgo qunuŋ ti nuŋgo areqalo ti kalil Qotei yekritiye.’ 38 Dal anjam di a segi qujai tulaŋ bolequja. A na dal anjam kalil buŋnjrejunu. 39 Ariya dal anjam deqaji bei dego mermqai. ‘Ni ino segi jejamu gereiyeqnum dego kere ino was naŋgi dego degsim geregereinjroqnime.’ Dal anjam boledamu aiyel agi mermonum. 40 Ni dal anjam aiyel di dauryqam di ni Moses aqa dal anjam ti Qotei aqa medabu o qaji tamo naŋgo anjam ti kalil keretsim dauryqam.”

Yesus a kamba Farisi naŋgi anjam bei nenemnjrej

41 Ariya Farisi naŋgi olo Yesus aqa areq di koroesonabqa a na nenemnjrej, 42 “Niŋgi Kristus qa kiersib are qalonub? A yai aqa ŋiri?” Onaqa naŋgi na kamba minjeb, “Kristus a Devit aqa ŋiri.”

43 Onaqa Yesus na olo minjrej, “Devit a segi nami marej, ‘Kristus a ijo Tamo Koba.’ Agi Qotei aqa Mondor na Devit areqalo yonaqa endegsi marej,

44 ‘Tamo Koba Qotei a na ijo Tamo Koba minjej,
“Ni ijo baŋ woq endi awo.
Awesoqnimqa e na ino jeu tamo kalil naŋgi eleŋosiy ino sorgomq di atitqa ni na naŋgi taqatnjroqnqam.” ’
45 Niŋgi uniye. Devit a segi marej, ‘Kristus a ijo Tamo Koba.’ Deqa Kristus a kiersi Devit aqa ŋiri dego sqas?”

46 Yesus a naŋgi anjam degsi minjrnaqa naŋgi na kamba olo anjam bei minjqa keresaiinjrej. Deqa naŋgi olo bunuqna anjam bei Yesus nenemyqajqa ulaeb.