1 Samuel 11
1ⲁⲥϣⲱⲡⲉ ⲇⲉ ⲙⲛⲛⲥⲁ ⲟⲩⲉⲃⲟⲧ ⲁϥⲉⲓ ⲉϩⲣⲁⲓ ⲛϭⲓ ⲛⲁⲁⲥ ⲡⲁⲙⲙⲁⲛⲓⲧⲏⲥ ⲁϥⲃⲱⲕ ⲉϩⲣⲁⲓ ⲉⲣⲛ ⲓⲁⲃⲓⲥ ⲛⲧⲉ ⲅⲁⲗⲁⲁⲇ ⲛⲣⲱⲙⲉ ⲇⲉ ⲧⲏⲣⲟⲩ ⲛⲓⲁⲃⲓⲥ ⲡⲉϫⲁⲩ ⲛⲛⲁⲁⲥ ⲡⲁⲙⲙⲁⲛⲓⲧⲏⲥ ϫⲉ ⲥⲙⲓⲛⲉ ⲛⲙⲙⲁⲛ ⲛⲟⲩⲇⲓⲁⲑⲏⲕⲏ ⲛⲧⲉⲛⲣϩⲙϩⲁⲗ ⲛⲁⲕ 2ⲡⲉϫⲉⲛⲁⲁⲥ ⲡⲁⲙⲙⲁⲛⲓⲧⲏⲥ ⲛⲁⲩ ϫⲉ ϯⲛⲁⲥⲙⲓⲛⲉ ⲛⲙⲙⲏⲧⲛ ⲛⲧⲇⲓⲁⲑⲏⲕⲏ ϩⲙ ⲡⲧⲣⲉⲡⲟⲩⲁ ⲡⲟⲩⲁ ⲙⲙⲱⲧⲛ ⲡⲱⲣⲕ ⲙⲡⲉϥⲃⲁⲗ ⲛⲟⲩⲛⲁⲙ ϫⲉⲕⲁⲥ ⲉⲓⲉⲕⲱ ⲛⲟⲩⲛⲟϭⲛⲉϭ ⲉϫⲙ ⲡⲓ︤ⲏ︦ⲗ︥ 3ⲡⲉϫⲉⲛⲣⲱⲙⲉ ⲛⲓⲁⲃⲓⲥ ⲛⲁϥ ϫⲉ ⲕⲁⲁⲛ ⲛⲥⲁϣϥ ⲛϩⲟⲟⲩ ⲁⲩⲱ ⲧⲉⲛⲛⲁϫⲟⲟⲩ ⲉⲃⲟⲗ ⲛϩⲉⲛⲃⲁⲓϣⲓⲛⲉ ⲉⲛⲧⲟϣ ⲧⲏⲣⲟⲩ ⲙⲡⲓ︤ⲏ︦ⲗ︥ ⲁⲩⲱ ⲉⲩⲧⲙⲛⲁϩⲙⲉⲛ ⲧⲛⲛⲏⲩ ⲉⲃⲟⲗ ⲛⲏⲧⲛ 4ⲁⲩⲱ ⲛⲃⲁⲓϣⲓⲛⲉ ⲛⲓⲁⲃⲓⲥ ⲁⲩⲉⲓ ⲉⲃⲟⲗ ⲉⲅⲁⲃⲁⲁ ⲉⲣⲁⲧϥ ⲛⲥⲁⲟⲩⲗ ⲁⲩⲧⲁⲩⲟ ⲛⲛⲉϣⲁϫⲉ ⲉϩⲣⲁⲓ ⲉⲙⲙⲁⲁϫⲉ ⲙⲡⲗⲁⲟⲥ ⲁⲩⲱ ⲡⲗⲁⲟⲥ ⲧⲏⲣϥ ⲁⲩϥⲓϩⲣⲁⲩ ⲉⲃⲟⲗ ⲁⲩⲣⲓⲙⲉ 5ⲥⲁⲟⲩⲗ ⲇⲉ ⲙⲛⲛⲥⲁ ⲡⲛⲁⲩ ⲛϩⲧⲟⲟⲩⲉ ⲁϥⲉⲓ ⲉⲃⲟⲗ ϩⲛ ⲧⲥⲱϣⲉ ⲡⲉϫⲉⲥⲁⲟⲩⲗ ϫⲉ ⲉⲧⲃⲉ ⲟⲩ ⲡⲗⲁⲟⲥ ⲣⲓⲙⲉ ⲁⲩⲧⲁⲩⲟ ⲉⲣⲟϥ ⲛⲛⲉϣⲁϫⲉ ⲧⲏⲣⲟⲩ ⲛⲛϣⲏⲣⲉ ⲛⲓⲁⲃⲓⲥ 6ⲁⲩⲱ ⲡⲉⲡ︤ⲛ︦ⲁ︥ ⲙⲡϫⲟⲉⲓⲥ ⲁϥⲃⲱϭⲉ ⲉϫⲛ ⲥⲁⲟⲩⲗ ⲛⲧⲉⲣⲉϥⲥⲱⲧⲙ ⲉⲛⲉⲓϣⲁϫⲉ ⲧⲉϥⲟⲣⲅⲏ ⲁⲥⲙⲟⲩϩ ⲉⲙⲁⲧⲉ 7ⲁⲩⲱ ⲁϥϫⲓ ⲛⲉϩⲉ ⲥⲛⲧⲉ ⲁϥⲁⲁⲩ ⲛϣⲁⲩ ϣⲁⲩ ⲁⲩϫⲟⲟⲩⲥⲟⲩ ⲉⲃⲟⲗ ⲛⲧⲟϣ ⲧⲏⲣⲟⲩ ⲙⲡⲓ︤ⲏ︦ⲗ︥ ⲛⲧⲟⲟⲧⲟⲩ ⲛⲛⲉⲃⲁⲓϣⲓⲛⲉ ⲉϥϫⲱ ⲙⲙⲟⲥ ϫⲉ ⲡⲉⲧⲛϥⲛⲁⲉⲓ ⲁⲛ ⲉⲃⲟⲗ ⲉⲟⲩⲁϩϥ ⲛⲥⲁ ⲥⲁⲟⲩⲗ ⲁⲩⲱ ⲛⲥⲁ ⲥⲁⲙⲟⲩⲏⲗ ⲉⲩⲉⲉⲓⲣⲉ ⲛⲧⲉⲓϩⲉ ϩⲱⲱϥ ⲛⲛⲉϥⲉⲟⲟⲩ ⲁⲩⲱ ⲑⲟⲧⲉ ⲙⲡϫⲟⲉⲓⲥ ⲁⲥⲉⲓ ⲉϩⲣⲁⲓ ⲉϫⲙ ⲡⲗⲁⲟⲥ ⲙⲡⲓ︤ⲏ︦ⲗ︥ ⲁⲩⲱ ⲁⲩⲱϣ ⲉⲃⲟⲗ ϩⲓ ⲟⲩⲥⲟⲡ ⲧⲏⲣⲟⲩ ⲛⲑⲉ ⲛⲟⲩⲣⲱⲙⲉ ⲛⲟⲩⲱⲧ 8ⲁⲩⲱ ⲁⲃⲓⲉⲍⲉⲕ ⲁϥϭⲙⲡⲉⲩϣⲓⲛⲉ ϩⲛ ⲃⲁⲙⲁ ⲛⲣⲱⲙⲉ ⲇⲉ ⲧⲏⲣⲟⲩ ⲙⲡⲓ︤ⲏ︦ⲗ︥ ⲉⲩⲛⲁⲣⲥⲉ ⲛⲧⲃⲁ ⲙⲙⲏⲏϣⲉ ⲁⲩⲱ ⲛⲣⲱⲙⲉ ⲛⲓⲟⲩⲇⲁ ⲉⲩⲛⲁⲣⲥⲁϣϥ ⲛⲧⲃⲁ ⲙⲙⲏⲏϣⲉ 9ⲡⲉϫⲁϥ ⲛⲛⲉⲃⲁⲓϣⲓⲛⲉ ⲛⲧⲁⲩⲉⲓ ϫⲉ ⲛⲁⲓ ⲛⲉⲧⲉⲧⲛⲁϫⲟⲟⲩ ⲛⲛⲣⲱⲙⲉ ⲛⲓⲁⲃⲓⲥ ϫⲉ ⲣⲁⲥⲧⲉ ⲡⲟⲩϫⲁⲓ ⲛⲁϣⲱⲡⲉ ⲛⲏⲧⲛ ϩⲙ ⲡⲧⲣⲉⲡⲣⲏ ϯ ⲛⲧⲉϥϩⲙⲙⲉ ⲁⲩⲱ ⲛⲃⲁⲓϣⲓⲛⲉ ⲁⲩⲉⲓ ⲉϩⲣⲁⲓ ⲉⲧⲉⲩⲡⲟⲗⲓⲥ ⲁⲩⲧⲁⲩⲉⲛϣⲁϫⲉ ⲉⲛⲉⲣⲱⲙⲉ ⲛⲓⲁⲃⲓⲥ ⲁⲩⲟⲩⲛⲟϥ 10ⲛⲣⲱⲙⲉ ⲇⲉ ⲛⲓⲁⲃⲓⲥ ⲡⲉϫⲁⲩ ⲛⲛⲁⲁⲥ ⲡⲁⲙⲙⲁⲛⲓⲧⲏⲥ ϫⲉ ⲣⲁⲥⲧⲉ ⲧⲛⲛⲏⲩ ⲉⲃⲟⲗ ⲛⲏⲧⲛ ⲛⲧⲛⲉⲓⲣⲉ ⲙⲡⲉⲧⲉⲣⲁⲛⲏⲧⲛ ⲙⲡⲉⲧⲛⲙⲧⲟ ⲉⲃⲟⲗ 11ⲁⲥϣⲱⲡⲉ ⲇⲉ ⲙⲛⲛⲥⲁ ⲛⲡⲉϥⲣⲁⲥⲧⲉ ⲥⲁⲟⲩⲗ ⲁϥⲕⲱ ⲙⲡⲗⲁⲟⲥ ⲛϣⲟⲙⲛⲧ ⲛⲧⲁⲅⲙⲁ ⲁⲩⲱ ⲁϥⲙⲟⲟϣⲉ ⲉϩⲟⲩⲛ ⲉⲧⲡⲁⲣⲉⲙⲃⲟⲗⲏ ⲛϣⲱⲣⲡ ⲙⲡⲛⲁⲩ ⲛϩⲧⲟⲟⲩⲉ ⲁⲩϩⲓⲟⲩⲉ ⲛⲥⲁ ⲛϣⲏⲣⲉ ⲛⲁⲙⲙⲱⲛ ϣⲁⲛⲧⲉⲡⲣⲏ ϯ ⲛⲧⲉϥϩⲙⲙⲉ ⲁⲩⲱ ⲛⲉⲛⲧⲁⲩⲥⲉⲉⲡⲉ ⲛϩⲏⲧⲟⲩ ⲁⲩϫⲱⲱⲣⲉ ⲉⲃⲟⲗ ⲙⲡⲉⲥⲛⲁⲩ ⲗⲁⲁⲩ ⲛϩⲏⲧⲟⲩ ϭⲱ ϩⲓ ⲛⲉⲩⲉⲣⲏⲩ 12ⲡⲉϫⲉⲡⲗⲁⲟⲥ ⲛⲥⲁⲙⲟⲩⲏⲗ ϫⲉ ⲛⲓⲙ ⲡⲉⲛⲧⲁϥϫⲟⲟⲥ ϫⲉ ⲛⲥⲁⲟⲩⲗ ⲛⲁⲣⲣⲣⲟ ⲁⲛ ⲉϩⲣⲁⲓ ⲉϫⲱⲛ ⲡⲁⲣⲁⲇⲓⲇⲟⲩ ⲛⲛⲣⲱⲙⲉ ⲉⲧⲟⲟⲧⲛ ⲛⲧⲛⲙⲟⲟⲩⲧⲟⲩ 13ⲡⲉϫⲉⲥⲁⲟⲩⲗ ϫⲉ ⲙⲛⲗⲁⲁⲩ ⲛⲁⲙⲟⲩ ⲙⲡⲟⲟⲩ ⲛϩⲟⲟⲩ ϫⲉ ⲡⲟⲟⲩ ⲡⲉⲛⲧⲁⲡϫⲟⲉⲓⲥ ⲉⲓⲣⲉ ⲙⲡⲓⲟⲩϫⲁⲓ ϩⲙ ⲡⲓ︤ⲏ︦ⲗ︥ 14ⲥⲁⲙⲟⲩⲏⲗ ⲇⲉ ⲡⲉϫⲁϥ ⲙⲡⲗⲁⲟⲥ ϫⲉ ⲙⲁⲣⲟⲛ ⲉϩⲣⲁⲓ ⲉⲅⲁⲗⲅⲁⲗⲁ ⲛⲧⲁⲧⲁϩⲟ ⲉⲣⲁⲧⲥ ⲛⲧⲙⲛⲧⲣⲣⲟ ϩⲙ ⲡⲙⲁ ⲉⲧⲙⲙⲁⲩ 15ⲡⲗⲁⲟⲥ ⲇⲉ ⲧⲏⲣϥ ⲁϥⲃⲱⲕ ⲉϩⲣⲁⲓ ⲉⲅⲁⲗⲅⲁⲗⲁ ⲁⲩⲱ ⲥⲁⲙⲟⲩⲏⲗ ⲁϥⲧⲱϩⲥ ⲙⲡⲙⲁ ⲉⲧⲙⲙⲁⲩ ⲛⲥⲁⲟⲩⲗ ⲉⲧⲣⲉϥⲣⲣⲣⲟ ⲙⲡⲙⲧⲟ ⲉⲃⲟⲗ ⲙⲡϫⲟⲉⲓⲥ ϩⲛ ⲅⲁⲗⲅⲁⲗⲁ ⲁⲩⲱ ⲁϥϣⲱⲱⲧ ϩⲙ ⲡⲙⲁ ⲉⲧⲙⲙⲁⲩ ⲛϩⲉⲛⲑⲩⲥⲓⲁ ⲛⲉⲓⲣⲏⲛⲓⲕⲟⲛ ⲙⲡⲙⲧⲟ ⲉⲃⲟⲗ ⲙⲡϫⲟⲉⲓⲥ ⲁⲩⲱ ⲥⲁⲙⲟⲩⲏⲗ ⲙⲛ ⲡⲓ︤ⲏ︦ⲗ︥ ⲧⲏⲣϥ ⲁⲩⲉⲩⲫⲣⲁⲛⲉ ⲉⲙⲁⲧⲉ
Copyright information for
CopSahBible2