1Sa 17 | CopSahBible2 | STEP | ⲛⲁⲗⲗⲟⲫⲩⲗⲟⲥ ⲇⲉ ⲁⲩⲥⲱⲟⲩϩ ⲉϩⲟⲩⲛ ⲉⲛⲉⲩⲡⲁⲣⲉⲙⲃⲟⲗⲏ ⲏ ⲛⲉⲩⲙⲡⲗⲁϩ ϩⲙ ⲡⲡⲟⲗⲉⲙⲟⲥ ⲁⲩⲱ ⲁⲩⲉⲓ ⲉϩⲣⲁⲓ ⲉⲥⲟⲕⲭⲱⲑ ⲛⲧⲉ ϯⲇⲟⲩⲙⲁⲓⲁ ⲁⲩⲱ ϩⲛ ⲧⲙⲏⲧⲉ ⲛⲥⲟⲕⲭⲱⲑ ⲁⲩⲱ ϩⲛ ⲧⲙⲏⲧⲉ ⲛⲁⲍⲏⲅⲁ ϩⲛ ⲥⲉⲫⲁⲣⲙⲉⲛ

1 Samuel 17

1 ⲛⲁⲗⲗⲟⲫⲩⲗⲟⲥ ⲇⲉ ⲁⲩⲥⲱⲟⲩϩ ⲉϩⲟⲩⲛ ⲉⲛⲉⲩⲡⲁⲣⲉⲙⲃⲟⲗⲏ ⲏ ⲛⲉⲩⲙⲡⲗⲁϩ ϩⲙ ⲡⲡⲟⲗⲉⲙⲟⲥ ⲁⲩⲱ ⲁⲩⲉⲓ ⲉϩⲣⲁⲓ ⲉⲥⲟⲕⲭⲱⲑ ⲛⲧⲉ ϯⲇⲟⲩⲙⲁⲓⲁ ⲁⲩⲱ ϩⲛ ⲧⲙⲏⲧⲉ ⲛⲥⲟⲕⲭⲱⲑ ⲁⲩⲱ ϩⲛ ⲧⲙⲏⲧⲉ ⲛⲁⲍⲏⲅⲁ ϩⲛ ⲥⲉⲫⲁⲣⲙⲉⲛ 2 ⲥⲁⲟⲩⲗ ⲇⲉ ⲙⲛ ⲛⲣⲱⲙⲉ ⲙⲡⲓ︤ⲏ︦ⲗ︥ ⲁⲩⲥⲱⲟⲩϩ ⲉϩⲟⲩⲛ ⲉⲡⲉⲓⲁ ⲛⲧⲟⲟⲩ ⲁⲩⲁϩⲉⲣⲁⲧⲟⲩ ⲉⲡⲡⲟⲗⲉⲙⲟⲥ ⲙⲡϩⲟⲧ ⲉⲃⲟⲗ ⲛⲛⲁⲗⲗⲟⲫⲩⲗⲟⲥ 3 ⲛⲁⲗⲗⲟⲫⲩⲗⲟⲥ ⲇⲉ ⲁⲩⲁϩⲉⲣⲁⲧⲟⲩ ϩⲓ ⲡⲓⲥⲁ ⲙⲡⲧⲟⲟⲩ ⲡⲓⲥⲣⲁⲏⲗ ⲇⲉ ⲁϥⲁϩⲉⲣⲁⲧϥ ϩⲓ ⲡⲓⲥⲁ ⲙⲡⲧⲟⲟⲩ ⲁⲩⲱ ⲡⲁⲩⲗⲱⲛ ⲉⲧⲉⲡⲉⲓⲁ ⲡⲉ ⲛⲉϥϩⲛⲧⲉⲩⲙⲏⲧⲉ 4 ⲁϥⲓ ⲇⲉ ⲛϭⲓ ⲟⲩⲣⲱⲙⲉ ⲛⲁⲙⲉⲥⲁⲓⲟⲥ ⲉⲩϫⲱⲱⲣⲉ ⲡⲉ ⲉⲃⲟⲗ ϩⲛ ⲛⲉⲙⲗⲁϩ ⲛⲛⲁⲗⲗⲟⲫⲩⲗⲟⲥ ⲉⲡⲉϥⲣⲁⲛ ⲡⲉ ⲅⲟⲗⲓⲁⲑ ⲉⲩⲉ ⲉⲃⲟⲗ ⲡⲉ ϩⲛ ⲅⲉⲑ ⲉⲣⲉⲧⲉϥϣⲓⲏ ⲛⲁⲣϥⲧⲟⲟⲩ ⲙⲙⲁϩⲉ ⲙⲛ ⲟⲩⲉⲣⲧⲱ 5 ⲉⲣⲉⲟⲩⲡⲉⲣⲓⲕⲉⲫⲁⲗⲉⲁ ϩⲓϫⲛ ⲧⲉϥⲁⲡⲉ ⲉⲣⲉⲟⲩϩⲱⲕ ⲛⲣⲉ ⲛϭⲓⲛϭⲉ ⲧⲟ ⲉϩⲓⲱⲱϥ ⲉⲣⲉⲡϣⲓ ⲙⲡⲉϥϩⲱⲕ ⲛⲁⲣⲟⲩϭⲓⲥ ⲧⲃⲁ ⲛⲥⲁⲧⲉⲉⲣⲉ ⲛϩⲟⲙⲛⲧ ϩⲓ ⲡⲉⲛⲓⲡⲉ 6 ⲁⲩⲱ ϩⲛⲥⲏϥⲉ ⲛϩⲟⲙⲛⲧ ⲛⲉⲩⲟⲧϩ ⲉⲣⲁⲧϥ ⲉⲣⲉⲟⲩϩⲟⲡⲗⲟⲛ ⲛⲣⲛϩⲟϥ ⲕⲏ ⲉϩⲣⲁⲓ ⲟⲩⲧⲉ ⲛⲉϥⲛⲁϩⲃⲉ 7 ⲧⲉϩⲧⲏ ⲇⲉ ⲙⲡⲉϥⲙⲉⲣⲉϩ ⲛⲉⲥⲟ ⲛⲑⲉ ⲛⲟⲩϩⲟ ⲛⲥⲱϩⲉ ⲁⲩⲱ ⲧⲉϥⲗⲟⲅⲭⲏ ⲛⲉⲥⲛⲁⲣⲥⲟⲟⲩ ⲛϣⲉ ⲛⲥⲁⲧⲉⲉⲣⲉ ⲛϩⲣⲏϣⲉ ⲙⲡⲉⲛⲓⲡⲉ ⲡⲉⲧϥⲓ ⲇⲉ ⲛⲛⲉϥϩⲟⲡⲗⲟⲛ ⲛⲉϥⲙⲟⲟϣⲉ ϩⲓϩⲏ ⲙⲙⲟϥ 8 ⲁⲩⲱ ⲅⲟⲗⲓⲁⲑ ⲁϥⲁϩⲉⲣⲁⲧϥ ⲁϥⲱϣ ⲉⲃⲟⲗ ⲉⲡⲙⲏⲏϣⲉ ⲙⲡⲓ︤ⲏ︦ⲗ︥ ⲉϥϫⲱ ⲙⲙⲟⲥ ⲛⲁⲩ ϫⲉ ⲉⲧⲃⲉ ⲟⲩ ⲧⲉⲧⲛⲛⲏⲩ ⲉⲃⲟⲗ ⲉⲁϩⲉⲣⲁⲧⲧⲏⲩⲧⲛ ⲉⲡⲡⲟⲗⲉⲙⲟⲥ ⲉⲙⲓϣⲉ ⲛⲙⲙⲁⲛ ⲙⲏ ⲁⲛⲟⲕ ⲁⲛⲅ ⲟⲩⲁⲗⲗⲟⲫⲩⲗⲟⲥ ⲁⲛ ⲛⲧⲱⲧⲛ ⲇⲉ ⲛⲧⲉⲧⲛ ⲛⲉϩⲉⲃⲣⲁⲓⲟⲥ ⲛϩⲙϩⲁⲗ ⲛⲥⲁⲟⲩⲗ ⲥⲱⲧⲡ ϭⲉ ⲛⲟⲩⲣⲱⲙⲉ ⲉⲃⲟⲗ ⲛϩⲏⲧⲧⲏⲩⲧⲛ ⲛϥⲉⲓ ⲉⲃⲟⲗ ⲛⲁⲓ 9 ⲁⲩⲱ ⲉϥϣⲁⲛϭⲙϭⲟⲙ ⲉⲙⲓϣⲉ ⲛⲙⲙⲁⲓ ⲛϥⲡⲁⲧⲁⲥⲥⲉ ⲙⲙⲁⲓ ⲧⲛⲛⲁϣⲱⲡⲉ ⲛⲏⲧⲛ ⲛϩⲙϩⲁⲗ ⲁⲛⲟⲕ ⲇⲉ ⲉⲓϣⲁⲛϭⲙϭⲟⲙ ⲉⲣⲟϥ ⲛⲧⲁⲡⲁⲧⲁⲥⲥⲉ ⲙⲙⲟϥ ⲧⲉⲧⲛⲛⲁϣⲱⲡⲉ ⲛⲁⲛ ⲛϩⲙϩⲁⲗ 10 ⲁⲩⲱ ⲡⲁⲗⲗⲟⲫⲩⲗⲟⲥ ⲡⲉϫⲁϥ ⲛⲁⲩ ϫⲉ ⲉⲓⲥ ϩⲏⲏⲧⲉ ⲡⲗⲁⲟⲥ ⲙⲡⲓ︤ⲏ︦ⲗ︥ ⲁⲓⲛⲉϭⲛⲟⲩϭϥ ⲙⲡⲟⲟⲩ ⲛϩⲟⲟⲩ ϫⲉ ⲛⲉϩⲟⲩⲣⲱⲙⲉ ⲛⲁⲓ ⲉⲃⲟⲗ ⲛⲧⲉⲛⲙⲓϣⲉ ⲙⲡⲉⲥⲛⲁⲩ ϩⲓ ⲟⲩⲥⲟⲡ 11 ⲁⲩⲱ ⲥⲁⲟⲩⲗ ⲙⲛ ⲡⲓ︤ⲏ︦ⲗ︥ ⲧⲏⲣϥ ⲁⲩⲥⲱⲧⲙ ⲉⲛⲉⲓϣⲁϫⲉ ⲛⲧⲉ ⲡⲁⲗⲗⲟⲫⲩⲗⲟⲥ ⲁⲩϣⲧⲟⲣⲧⲣ ⲁⲩⲣϩⲟⲧⲉ ⲉⲙⲁⲧⲉ 12 ⲇⲁⲩⲉⲓⲇ ⲇⲉ ⲡϣⲏⲣⲉ ⲛⲟⲩⲣⲱⲙⲉ ⲛⲉⲫⲣⲁⲑⲁⲓⲟⲥ ⲛⲧⲉ ⲃⲏⲑⲗⲉⲉⲙ ⲛⲧⲉ ⲓⲟⲩⲇⲁ ⲉⲡⲉϥⲣⲁⲛ ⲡⲉ ⲓⲥⲥⲁⲓ ⲉⲟⲩⲛⲧⲁϥ ⲙⲙⲁⲩ ⲛϣⲙⲟⲩⲛ ⲛϣⲏⲣⲉ ⲡⲣⲱⲙⲉ ⲇⲉ ⲉⲧⲙⲙⲁⲩ ϩⲛ ⲛⲉϩⲟⲟⲩ ⲛⲥⲁⲟⲩⲗ ⲛⲉⲩϩⲗⲗⲟ ⲡⲉ ⲉϥϩⲉⲛ ⲛⲉⲣⲙϩⲣⲁⲩ 13 ⲁⲩⲱ ϣⲟⲙⲛⲧ ⲛⲛⲟϭ ⲛϣⲏⲣⲉ ⲛⲧⲉ ⲉⲓⲥⲥⲁⲓ ⲁⲩⲃⲱⲕ ⲁⲩⲟⲩⲁϩⲟⲩ ⲛⲥⲁ ⲥⲁⲟⲩⲗ ⲉⲡⲡⲟⲗⲉⲙⲟⲥ ⲡⲣⲁⲛ ⲇⲉ ⲙⲡⲉϥϣⲟⲙⲛⲧ ⲛϣⲏⲣⲉ ⲛⲧⲁⲩⲃⲱⲕ ⲉⲃⲟⲗ ⲉⲡⲡⲟⲗⲉⲙⲟⲥ ⲉⲗⲓⲁⲃ ⲡⲉ ⲡϣⲣⲡⲙⲓⲥⲉ ⲁⲩⲱ ⲡⲙⲉϩⲥⲛⲁⲩ ⲡⲉ ⲁⲙⲓⲛⲁⲇⲁⲃ ⲡⲙⲉϩϣⲟⲙⲛⲧ ⲡⲉ ⲥⲁⲙⲙⲁ 14 ⲇ︤ⲁ︦ⲇ︥ ⲇⲉ ⲡⲕⲟⲩⲓ ⲉⲣⲟⲟⲩ ⲡϣⲟⲙⲛⲧ ⲇⲉ ⲛⲛⲟϭ ⲛⲥⲟⲛ ⲁⲩⲃⲱⲕ ⲇⲉ ⲁⲩⲟⲩⲁϩⲟⲩ ⲛⲥⲁ ⲥⲁⲟⲩⲗ 15 ⲇⲁⲩⲉⲓⲇ ⲇⲉ ⲁϥⲓ ⲉⲃⲟⲗ ϩⲓⲧⲟⲟⲧϥ ⲛⲥⲁⲟⲩⲗ ⲁϥⲃⲱⲕ ⲁϥⲙⲟⲟⲛⲉ ⲛⲛⲉⲥⲟⲟⲩ ⲙⲡⲉϥⲉⲓⲱⲧ ϩⲣⲁⲓ ϩⲛ ⲃⲏⲑⲗⲉⲉⲙ 16 ⲡⲁⲗⲗⲟⲫⲩⲗⲟⲥ ⲇⲉ ⲛⲉϥⲃⲏⲕ ⲉⲣⲱⲟⲩ ⲙⲙⲏⲛⲉ ⲉϩⲧⲟⲟⲩⲉ ⲁⲩⲱ ⲉⲣⲟⲩϩⲉ ⲉⲁϥⲣϩⲙⲉ ⲛϩⲟⲟⲩ ϩⲓⲣⲱⲟⲩ 17 ⲁⲩⲱ ⲡⲉϫⲉⲓⲉⲥⲥⲁⲓ ⲛⲇⲁⲩⲉⲓⲇ ⲡⲉϥϣⲏⲣⲉ ϫⲉ ϫⲓ ⲙⲡⲉⲓϣⲓ ⲛⲛⲟⲉⲓⲧ ⲛⲛⲉⲕⲥⲛⲏⲩ ⲁⲩⲱ ⲡⲉⲓⲙⲏⲧ ⲛⲟⲉⲓⲕ ⲛⲅⲧⲱⲟⲩⲛ ⲛⲅⲡⲱⲧ ⲉϩⲣⲁⲓ ⲉⲧⲡⲁⲣⲉⲙⲃⲟⲗⲏ ⲉⲣⲁⲧⲟⲩ ⲛⲛⲉⲕⲥⲛⲏⲩ 18 ⲡⲉⲓⲙⲏⲧ ϩⲱⲱϥ ⲛⲟⲉⲓⲕ ⲛⲥⲁⲉⲓⲣ ⲛⲅϫⲓⲧⲟⲩ ⲉϩⲟⲩⲛ ⲙⲡⲭⲓⲗⲓⲁⲣⲭⲟⲥ ⲛⲅⲉⲛ ⲡⲟⲩⲱ ⲛⲛⲉⲕⲥⲛⲏⲩ ϩⲛ ⲟⲩⲉⲓⲣⲏⲛⲏ ⲛⲅⲛⲁⲩ ϫⲉ ⲉⲩϣⲁⲁⲧ ⲛⲟⲩ ⲛⲅⲉⲛ ⲡⲉⲩⲟⲩⲱ ⲛⲁⲓ 19 ⲁⲩⲱ ⲥⲁⲟⲩⲗ ⲛⲙⲙⲁⲩ ⲙⲛ ⲡⲓ︤ⲏ︦ⲗ︥ ⲧⲏⲣϥ ⲛⲉⲩϩⲛⲡⲉⲓⲁ ⲙⲡϣⲏⲛ ⲉⲧϫⲟⲥⲉ ⲉⲩⲙⲓϣⲉ ⲙⲛ ⲛⲁⲗⲗⲟⲫⲩⲗⲟⲥ 20 ⲇ︤ⲁ︦ⲇ︥ ⲇⲉ ⲁϥϣⲟⲣⲡϥ ⲉϩⲧⲟⲟⲩⲉ ⲁϥⲕⲁⲛⲉⲥⲟⲟⲩ ⲛⲧⲟⲟⲧⲟⲩ ⲛⲛⲉⲣⲉϥⲣⲟⲉⲓⲥ ⲁϥϫⲓ ⲛⲛⲉⲛⲕⲁ ⲁϥⲃⲱⲕ ⲕⲁⲧⲁ ⲑⲉ ⲛⲧⲁⲓⲉⲥⲥⲁⲓ ϩⲱⲛ ⲉⲧⲟⲟⲧϥ ⲁϥⲓ ⲉϩⲣⲁⲓ ⲉⲧⲉⲥⲧⲣⲟⲅⲅⲩⲗⲱⲥⲓⲥ ⲉⲧⲉⲡⲙⲁ ⲡⲉ ⲉⲧⲟⲩⲉⲛϩⲏⲧϥ ⲁⲩⲱ ⲉⲣⲁⲧϥ ⲙⲡⲉⲙⲗⲁϩ ⲛⲉⲧⲃⲏⲕ ⲉⲃⲟⲗ ϩⲙ ⲡⲡⲟⲗⲉⲙⲟⲥ ⲁⲩⲧⲉⲕⲗⲟⲩⲗⲁⲓ ⲉⲃⲟⲗ ϩⲙ ⲡⲡⲟⲗⲉⲙⲟⲥ 21 ⲡⲓ︤ⲏ︦ⲗ︥ ⲙⲛ ⲛⲁⲗⲗⲟⲫⲩⲗⲟⲥ ⲁⲩⲁϩⲉⲣⲁⲧⲟⲩ ⲉⲙⲓϣⲉ ⲙⲛ ⲛⲉⲩⲉⲣⲏⲩ 22 ⲇ︤ⲁ︦ⲇ︥ ⲇⲉ ⲁϥⲕⲁⲛⲉϥⲥⲕⲉⲩⲏ ϩⲁⲧⲙ ⲡⲉⲧϩⲁⲣⲉϩ ⲉⲛⲉⲥⲕⲉⲩⲏ ⲁϥⲡⲱⲧ ⲉⲃⲟⲗ ⲉⲧⲡⲁⲣⲉⲙⲃⲟⲗⲏ ⲁϥⲡⲱϩ ⲉⲛⲉϥⲥⲛⲏⲩ ⲁϥϫⲛⲟⲩⲟⲩ ⲉⲡⲉⲩⲟⲩⲱ ϩⲛ ⲟⲩⲉⲓⲣⲏⲛⲏ 23 ⲛⲧⲟϥ ⲇⲉ ⲉϥϣⲁϫⲉ ⲛⲙⲙⲁⲩ ⲉⲓⲥ ⲡⲣⲱⲙⲉ ⲛⲁⲙⲉⲥⲥⲁⲓⲟⲥ ⲁϥⲓ ⲉⲃⲟⲗ ⲡⲉⲫⲓⲗⲓⲥⲧⲓⲁⲓⲟⲥ ⲉⲡⲉϥⲣⲁⲛ ⲡⲉ ⲅⲟⲗⲓⲁⲑ ⲉⲃⲟⲗ ϩⲛ ⲅⲉⲑ ⲉϥⲡⲏ ⲉⲛⲉⲙⲗⲁϩ ⲛⲛⲁⲗⲗⲟⲫⲩⲗⲟⲥ ⲁϥϣⲁϫⲉ ⲉϩⲟⲩⲛ ⲉⲣⲟⲟⲩ ⲕⲁⲧⲁ ⲛⲉⲓϣⲁϫⲉ ⲁⲩⲱ ⲁϥⲥⲱⲧⲙ ⲛϭⲓ ⲥⲁⲟⲩⲗ 24 ⲙⲛ ⲛⲉⲣⲱⲙⲉ ⲧⲏⲣⲟⲩ ⲙⲡⲓ︤ⲏ︦ⲗ︥ ⲁⲩⲱ ⲛⲧⲉⲣⲟⲩⲛⲁⲩ ⲉⲡⲣⲱⲙⲉ ⲁⲩⲡⲱⲧ ϩⲁ ⲡⲉϥϩⲟ ⲁⲩⲣϩⲟⲧⲉ ⲉⲙⲁⲧⲉ 25 ⲡⲉϫⲉⲛⲉⲣⲱⲙⲉ ⲙⲡⲓ︤ⲏ︦ⲗ︥ ⲛⲛⲉⲩⲉⲣⲏⲩ ϫⲉ ⲉⲛⲉⲁⲧⲉⲧⲛⲛⲁⲩ ⲉⲡⲣⲱⲙⲉ ⲡⲁⲓ ⲛⲧⲁϥⲉⲓ ⲉϩⲣⲁⲓ ⲉⲣⲱⲛ ϫⲉ ⲛⲧⲁϥⲉⲓ ⲉϩⲣⲁⲓ ⲉϫⲙ ⲡⲓ︤ⲏ︦ⲗ︥ ⲡⲣⲱⲙⲉ ϭⲉ ⲉⲧⲛⲁⲃⲱⲕ ⲉⲃⲟⲗ ⲛϥⲡⲁⲧⲁⲥⲥⲉ ⲙⲙⲟϥ ⲡⲣⲣⲟ ⲛⲁⲁⲁϥ ⲛⲣⲙⲙⲁⲟ ϩⲛ ⲟⲩⲛⲟϭ ⲙⲙⲛⲧⲣⲙⲙⲁⲟ ⲁⲩⲱ ⲧⲉϥϣⲉⲉⲣⲉ ⲉϥⲛⲁⲧⲁⲁⲥ ⲛⲁϥ ⲛⲥϩⲓⲙⲉ ⲁⲩⲱ ⲡⲏⲓ ⲧⲏⲣϥ ⲙⲡⲉϥⲉⲓⲱⲧ ϥⲛⲁⲕⲁⲁϥ ⲉⲃⲟⲗ ⲛⲣⲉⲙϩⲉ ϩⲙ ⲡⲓ︤ⲏ︦ⲗ︥ 26 ⲡⲉϫⲉⲇⲁⲩⲉⲓⲇ ⲛⲛⲣⲱⲙⲉ ⲉⲧⲁϩⲉⲣⲁⲧⲟⲩ ⲛⲙⲙⲁϥ ⲉϥϫⲱ ⲙⲙⲟⲥ ⲛⲁⲩ ϫⲉ ⲟⲩ ⲡⲉ ⲡϩⲱⲃ ⲉⲧⲟⲩⲛⲁⲁⲁϥ ⲙⲡⲣⲱⲙⲉ ⲡⲉⲧⲛⲁⲡⲁⲧⲁⲥⲥⲉ ⲙⲡⲁⲗⲗⲟⲫⲩⲗⲟⲥ ⲉⲧⲙⲙⲁⲩ ⲛϥϥⲓ ⲙⲙⲁⲩ ⲛⲟⲩⲛⲟϭⲛⲉϭ ⲉⲃⲟⲗ ϩⲙ ⲡⲓ︤ⲏ︦ⲗ︥ ϫⲉ ⲟⲩⲣⲱⲙⲉ ⲡⲉ ⲡⲉⲓⲁⲗⲗⲟⲫⲩⲗⲟⲥ ⲛⲁⲧⲥⲃⲃⲉ ⲡⲁⲓ ⲛⲧⲁϥⲛⲟϭⲛⲉϭ ⲙⲡⲙⲏⲏϣⲉ ⲙⲡⲛⲟⲩⲧⲉ ⲉⲧⲟⲛϩ 27 ⲁⲩⲱ ⲡⲗⲁⲟⲥ ⲁϥϣⲁϫⲉ ⲛⲙⲙⲁϥ ⲕⲁⲧⲁ ⲡⲉⲓϣⲁϫⲉ ⲉϥϫⲱ ⲙⲙⲟⲥ ϫⲉ ⲧⲁⲓ ⲧⲉ ⲑⲉ ⲉⲧⲟⲩⲛⲁⲁⲁⲥ ⲙⲡⲣⲱⲙⲉ ⲡⲉⲧⲛⲁⲡⲁⲧⲁⲥⲥⲉ ⲙⲡⲉⲓⲁⲗⲗⲟⲫⲩⲗⲟⲥ 28 ⲁⲩⲱ ⲉⲗⲓⲁⲃ ⲡⲉϥⲛⲟϭ ⲛⲥⲟⲛ ⲁϥⲥⲱⲧⲙ ⲉⲣⲟϥ ⲉϥϣⲁϫⲉ ⲙⲛ ⲛⲉⲣⲱⲙⲉ ⲉⲗⲓⲁⲃ ⲁϥⲛⲟⲩϭⲥ ϩⲛ ⲟⲩϭⲱⲛⲧ ⲉⲇⲁⲩⲉⲓⲇ ⲡⲉϫⲁϥ ⲉϩⲟⲩⲛ ⲉϩⲣⲁϥ ϫⲉ ⲉⲧⲃⲉ ⲟⲩ ⲁⲕⲉⲓ ⲉϩⲣⲁⲓ ⲉⲡⲉⲓⲙⲁ ⲁⲩⲱ ⲛⲧⲁⲕⲕⲁⲛⲉⲥⲟⲟⲩ ⲕⲟⲩⲓ ⲛⲧⲉ ⲛⲓⲙ ϩⲛ ⲧⲉⲣⲏⲙⲟⲥ ⲁⲛⲟⲕ ϯⲥⲟⲟⲩⲛ ⲛⲧⲉⲕⲙⲛⲧϫⲁⲥⲓϩⲏⲧ ⲁⲩⲱ ⲧⲕⲁⲕⲓⲁ ⲙⲡⲉⲕϩⲏⲧ ϫⲉ ⲛⲧⲁⲕⲉⲓ ⲉⲡⲡⲟⲗⲉⲙⲟⲥ ⲉⲛⲁⲩ ⲉⲣⲟϥ 29 ⲇ︤ⲁ︦ⲇ︥ ⲇⲉ ⲡⲉϫⲁϥ ⲛⲁϥ ϫⲉ ⲛⲧⲁⲓⲣⲣⲟⲩ ⲛⲛⲟⲃⲉ ⲙⲏ ⲛⲟⲩϣⲁϫⲉ ⲁⲛ ⲡⲉ ⲛⲧⲁⲓϫⲟⲟϥ 30 ⲁϥⲕⲧⲟϥ ⲇⲉ ⲉⲃⲟⲗ ⲙⲙⲟϥ ⲁⲩⲱ ⲁϥⲉⲓ ⲉⲣⲁⲧϥ ⲛⲕⲉⲣⲱⲙⲉ ⲁϥϣⲁϫⲉ ⲕⲁⲧⲁ ⲡⲉⲓϣⲁϫⲉ ⲁⲩⲱ ⲡⲗⲁⲟⲥ ⲁϥⲣⲟⲩⲱ ϩⲁⲣⲱϥ ⲕⲁⲧⲁ ⲧⲙⲓⲛⲉ ⲙⲡϣⲟⲣⲡ ⲛϣⲁϫⲉ 31 ⲛϣⲁϫⲉ ⲇⲉ ⲛⲧⲁⲇⲁⲩⲉⲓⲇ ϫⲟⲟⲩ ⲁⲩϯⲥⲟⲉⲓⲧ ⲁⲩⲱ ⲁⲩⲧⲁⲩⲟⲟⲩ ⲙⲡⲙⲧⲟ ⲉⲃⲟⲗ ⲛⲥⲁⲟⲩⲗ ⲥⲁⲟⲩⲗ ⲇⲉ ⲁϥϫⲓⲧϥ ⲉϩⲟⲩⲛ ⲛⲁϥ 32 ⲁⲩⲱ ⲇⲁⲩⲉⲓⲇ ⲡⲉϫⲁϥ ϩⲓⲑⲏ ⲛⲥⲁⲟⲩⲗ ϫⲉ ⲙⲡⲉⲣⲧⲣⲉⲡϩⲏⲧ ⲙⲡⲁϫⲟⲉⲓⲥ ⲟⲩⲱⲗⲥ ⲉⲣⲟϥ ⲡⲉⲕϩⲙϩⲁⲗ ⲉⲧⲉⲁⲛⲟⲕ ⲡⲉ ϥⲛⲁⲃⲱⲕ ⲛϥⲡⲟⲗⲉⲙⲉⲓ ⲙⲛ ⲡⲉⲓⲁⲗⲗⲟⲫⲩⲗⲟⲥ 33 ⲡⲉϫⲉⲥⲁⲟⲩⲗ ⲉϩⲟⲩⲛ ϩⲛ ⲇⲁⲩⲉⲓⲇ ϫⲉ ⲛⲅⲛⲁϣϭⲙϭⲟⲙ ⲁⲛ ⲉⲃⲱⲕ ⲉⲙⲓϣⲉ ⲙⲛ ⲡⲉⲓⲁⲗⲗⲟⲫⲩⲗⲟⲥ ϫⲉ ⲛⲧⲕ ⲟⲩϣⲏⲣⲉ ϣⲏⲙ ⲛⲧⲟⲕ ⲡⲁⲓ ⲇⲉ ⲟⲩⲣⲱⲙⲉ ⲡⲉ ⲛⲣⲉϥⲙⲓϣⲉ ⲛϫⲓⲛ ⲧⲉϥⲙⲛⲧⲕⲟⲩⲓ 34 ⲇ︤ⲁ︦ⲇ︥ ⲇⲉ ⲡⲉϫⲁϥ ⲛⲥⲁⲟⲩⲗ ϫⲉ ⲁⲛⲟⲕ ⲡⲉⲕϩⲙϩⲁⲗ ⲛⲉⲓⲙⲟⲟⲛⲉ ⲛⲛⲉⲥⲟⲟⲩ ⲙⲡⲁⲉⲓⲱⲧ ⲁⲩⲱ ⲉⲣϣⲁⲛⲡⲙⲟⲩⲓ ⲙⲛ ⲧⲁⲣⲝ ⲉⲓ ⲛⲧⲉⲣⲱϥ ϫⲓⲟⲩⲉⲥⲟⲟⲩ ⲛϩⲏⲧⲟⲩ 35 ϣⲁⲓⲁⲛⲅⲧ ⲉⲃⲟⲗ ⲉⲡⲁϩⲟⲩ ⲙⲙⲟϥ ⲛⲧⲁⲣⲁϩⲧⲡⲙⲟⲩⲓ ⲛⲧⲁϥⲉⲓ ⲉⲃⲟⲗ ϩⲛ ⲧⲉϥⲧⲁⲡⲣⲟ ⲙⲡⲉⲛⲧⲁⲡⲙⲟⲩⲓ ⲧⲟⲣⲡϥ ⲉϥϣⲁⲛⲕⲧⲟϥ ⲇⲉ ⲉⲣⲟⲓ ϣⲁⲓⲙⲉϩⲧⲟⲟⲧ ϩⲛ ⲧⲉϥϣⲟⲩⲱⲃⲉ ⲛⲧⲁⲁⲁϥ ⲛϭⲱⲃ ⲛⲧⲁⲙⲟⲟⲩⲧϥ 36 ⲡⲙⲟⲩⲓ ϭⲉ ⲙⲛ ⲧⲁⲣⲝ ⲡⲉⲕϩⲙϩⲁⲗ ⲁϥⲡⲁⲧⲁⲥⲥⲉ ⲙⲙⲟⲟⲩ ⲡⲉⲓⲁⲗⲗⲟⲫⲩⲗⲟⲥ ⲇⲉ ϩⲱⲱϥ ⲛⲁⲧⲥⲃⲃⲉ ⲛⲁⲣⲑⲉ ⲛⲟⲩⲁ ⲛⲛⲁⲓ ϯⲛⲁⲃⲱⲕ ϭⲉ ⲟⲛ ⲉⲃⲟⲗ ⲉⲣⲟϥ ⲛⲧⲁⲡⲁⲧⲁⲥⲥⲉ ⲙⲙⲟϥ ⲛⲧⲁϥⲉⲓ ⲛⲧⲉϥⲁⲡⲉ ⲛⲧⲁϥⲉⲓ ⲙⲡⲟⲟⲩ ⲛⲟⲩⲛⲟϭⲛⲉϭ ⲉⲃⲟⲗ ϩⲙ ⲡⲓ︤ⲏ︦ⲗ︥ ϫⲉ ⲟⲩ ϩⲱⲱϥ ⲡⲉ ⲡⲉⲓⲁⲧⲥⲃⲃⲉ ⲉⲁϥⲛⲟϭⲛⲉϭ ⲙⲡⲙⲏⲏϣⲉ ⲙⲡⲛⲟⲩⲧⲉ ⲉⲧⲟⲛϩ 37 ⲁⲩⲱ ⲇⲁⲩⲉⲓⲇ ⲡⲉϫⲁϥ ϩⲓⲛⲁⲓ ϫⲉ ⲡϫⲟⲉⲓⲥ ⲡⲉ ⲛⲧⲁϥⲛⲁϩⲙⲉⲧ ⲉⲧⲧⲁⲡⲣⲟ ⲙⲡⲙⲟⲩⲓ ⲁⲩⲱ ⲛⲧⲟⲟⲧϥ ⲛⲧⲁⲣⲝ ⲛⲧⲟϥ ⲟⲛ ⲡⲉⲧⲛⲁⲛⲁϩⲙⲉⲧ ⲛⲧⲟⲟⲧϥ ⲙⲡⲉⲓⲁⲗⲗⲟⲫⲩⲗⲟⲥ ⲛⲁⲧⲥⲃⲃⲉ ⲁⲩⲱ ⲥⲁⲟⲩⲗ ⲡⲉϫⲁϥ ⲛⲇⲁⲩⲉⲓⲇ ϫⲉ ⲃⲱⲕ ⲉⲃⲟⲗ ⲉⲣⲟϥ ⲁⲩⲱ ⲉⲣⲉⲡϫⲟⲉⲓⲥ ϣⲱⲡⲉ ⲛⲙⲙⲁⲕ 38 ⲥⲁⲟⲩⲗ ⲇⲉ ⲁϥϯϩⲓⲱⲱϥ ⲛⲇ︤ⲁ︦ⲇ︥ ⲛⲟⲩϣⲧⲏⲛ ⲛⲣⲃⲧ ⲁⲩⲱ ⲟⲩⲡⲉⲣⲓⲕⲉⲫⲁⲗⲁⲓⲁ ⲛϩⲟⲙⲛⲧ ⲁϥⲧⲁⲁⲥ ⲉϫⲛ ⲧⲉϥⲁⲡⲉ 39 ⲁⲩⲱ ⲁϥϯϩⲓⲱⲱϥ ⲛⲟⲩϩⲱⲕ ⲁⲩⲱ ⲧⲉϥⲥⲏϥⲉ ⲁϥⲙⲟⲣⲥ ⲉϫⲛ ⲡϩⲱⲕ ⲛⲇⲁⲩⲉⲓⲇ ⲁϥϫⲱⲣⲁϩ ⲇⲉ ⲛϭⲓ ⲇⲁⲩⲉⲓⲇ ⲛⲧⲉⲣⲉϥϫⲱⲛⲧ ⲉⲙⲟⲟϣⲉ ⲛϩⲏⲧⲟⲩ ϫⲉ ⲛⲉϥϫⲟⲛⲧ ⲁⲛ ⲙⲙⲟⲟⲩ ⲁⲩⲱ ⲛⲧⲉⲣⲉϥⲙⲟⲟϣⲉ ⲛϩⲏⲧⲟⲩ ⲛⲟⲩⲥⲟⲡ ⲁⲩⲱ ⲥⲛⲁⲩ ⲁϥϩⲓⲥⲉ ⲡⲉϫⲉⲇⲁⲩⲉⲓⲇ ⲛⲥⲁⲟⲩⲗ ϫⲉ ⲛϯⲛⲁⲉϣⲙⲟⲟϣⲉ ⲁⲛ ⲉⲣⲉⲛⲁⲓ ϩⲓⲱⲱⲧ ϫⲉ ⲛϯⲧⲏⲏⲡ ⲁⲛ ⲉⲣⲟⲟⲩ ⲇⲁⲩⲉⲓⲇ ⲇⲉ ⲁϥⲕⲁⲁϥ ⲕⲁϩⲏⲩ ⲙⲙⲟⲟⲩ 40 ⲁϥϫⲓ ⲙⲡⲉϥϭⲉⲣⲱϥ ⲉϩⲣⲁⲓ ⲉⲛⲉϥϭⲓϫ ⲁⲩⲱ ⲁϥⲥⲱⲧⲡ ⲛⲁϥ ⲛϯⲟⲩ ⲛⲱⲛⲉ ϩⲙ ⲡⲉⲓⲁ ⲉⲩⲟⲩⲟϫ ⲁϥⲕⲁⲁⲩ ⲉϩⲣⲁⲓ ϩⲙ ⲡⲉϥϫⲓⲗⲗⲏⲥ ⲉϣⲁϥⲙⲟⲟⲛⲉ ⲛϩⲏⲧϥ ⲉϥϣⲟⲟⲡ ⲛⲁϥ ⲉⲣⲉⲧⲉϥⲥⲫⲉⲛⲧⲱⲛⲉ ϩⲛ ⲧⲉϥϭⲓϫ ⲁϥⲙⲟⲟϣⲉ ⲉⲃⲟⲗ ⲉⲡⲁⲗⲗⲟⲫⲩⲗⲟⲥ 41 ⲡⲁⲗⲗⲟⲫⲩⲗⲟⲥ ϩⲱⲱϥ ⲁϥⲙⲟⲟϣⲉ ⲉϩⲟⲩⲛ ⲉⲇⲁⲩⲉⲓⲇ ⲉϥϣⲟⲩϣⲟⲩ ⲙⲙⲟϥ ⲉⲣⲉⲡⲉⲧϥⲓ ⲙⲡⲉϥⲑⲩⲣⲱⲛ ϩⲓϩⲏ ⲙⲙⲟϥ 42 ⲡⲁⲗⲗⲟⲫⲩⲗⲟⲥ ⲇⲉ ⲁϥϭⲱϣⲧ ⲁϥⲛⲁⲩ ⲉⲇⲁⲩⲉⲓⲇ ⲁϥⲕⲱⲙϣ ⲛⲥⲱϥ ϫⲉ ⲛⲉⲩϣⲏⲣⲉ ϣⲏⲙ ⲡⲉ ⲉϥⲟ ⲙⲙⲣϣ ⲛⲥⲁⲉⲓⲉⲃⲁⲗ ⲉⲣⲟϥ 43 ⲁⲩⲱ ⲡⲁⲗⲗⲟⲫⲩⲗⲟⲥ ⲡⲉϫⲁϥ ⲉϩⲟⲩⲛ ϩⲛ ⲇⲁⲩⲉⲓⲇ ϫⲉ ⲉⲓⲟ ⲁⲛⲟⲕ ⲛⲑⲉ ⲛⲟⲩⲟⲩϩⲟⲣ ϫⲉ ⲛⲧⲟⲕ ⲉⲕⲛⲏⲩ ⲉⲃⲟⲗ ⲉⲣⲟϥ ϩⲛ ⲟⲩϭⲉⲣⲱⲃ ⲙⲛ ϩⲉⲛⲱⲛⲉ ⲡⲉϫⲉⲇⲁⲩⲉⲓⲇ ⲛⲁϥ ϫⲉ ⲁⲣⲏⲩ ⲕϩⲟⲟⲩ ⲉⲡⲉⲩϩⲟⲣ ⲁⲩⲱ ⲡⲁⲗⲗⲟⲫⲩⲗⲟⲥ ⲁϥⲥⲁϩⲟⲩ ⲛⲇⲁⲩⲉⲓⲇ ϩⲛ ⲛⲉϥⲛⲟⲩⲧⲉ 44 ⲉⲣⲉⲡⲁⲗⲗⲟⲫⲩⲗⲟⲥ ϫⲱ ⲙⲙⲟⲥ ⲉⲣⲟϥ ϫⲉ ⲁⲙⲟⲩ ⲛⲁⲓ ⲛⲧⲁϯ ⲛⲛⲉⲕⲁⲃⲟⲩⲓ ⲛⲛⲉϩⲁⲗⲁⲧⲉ ⲛⲧⲡⲉ ⲁⲩⲱ ⲛⲛⲉⲑⲏⲣⲓⲟⲛ ⲙⲡⲕⲁϩ 45 ⲇⲁⲩⲉⲓⲇ ⲇⲉ ⲡⲉϫⲁϥ ⲉϩⲟⲩⲛ ϩⲙ ⲡⲁⲗⲗⲟⲫⲩⲗⲟⲥ ϫⲉ ⲛⲧⲟⲕ ⲉⲕⲛⲁⲉⲓ ⲛⲁⲓ ϩⲛ ⲟⲩⲥⲏϥⲉ ⲙⲛ ⲟⲩⲙⲉⲣⲉϩ ⲙⲛ ⲟⲩϩⲟⲡⲗⲟⲛ ⲁⲛⲟⲕ ⲇⲉ ⲉⲓⲛⲏⲩ ⲉϩⲟⲩⲛ ⲉⲣⲟⲕ ϩⲙ ⲡⲣⲁⲛ ⲙⲡϫⲟⲉⲓⲥ ⲥⲁⲃⲁⲱⲑ ⲡⲛⲟⲩⲧⲉ ⲙⲡⲙⲏⲏϣⲉ ⲙⲡⲓ︤ⲏ︦ⲗ︥ ⲡⲁⲓ ⲛⲧⲁⲕⲛⲉϭⲛⲟⲩϭϥ ⲙⲡⲟⲟⲩ 46 ⲁⲩⲱ ⲡϫⲟⲉⲓⲥ ⲛⲁⲧⲁⲁⲕ ⲙⲡⲟⲟⲩ ⲉϩⲣⲁⲓ ⲉⲛⲁϭⲓϫ ⲛϥⲧⲣⲁϩⲟⲧⲃⲉⲕ ⲛⲧⲁϥⲓ ⲙⲙⲁⲩ ⲛⲧⲉⲕⲁⲡⲉ ⲛⲧⲁϯ ⲛⲛⲉⲕϣⲁⲩ ⲁⲩⲱ ⲛϣⲁⲩ ⲛⲧⲡⲁⲣⲉⲙⲃⲟⲗⲏ ⲛⲛⲁⲗⲗⲟⲫⲩⲗⲟⲥ ϩⲙ ⲡⲟⲟⲩ ⲛϩⲟⲟⲩ ⲛⲛⲉϩⲁⲗⲁⲧⲉ ⲛⲧⲡⲉ ⲙⲛ ⲛⲉⲑⲏⲣⲓⲟⲛ ⲙⲡⲕⲁϩ ⲛⲧⲉ ⲡⲕⲁϩ ⲧⲏⲣϥ ⲉⲓⲙⲉ ϫⲉ ⲡⲛⲟⲩⲧⲉ ϣⲟⲟⲡ ϩⲙ ⲡⲓ︤ⲏ︦ⲗ︥ 47 ⲁⲩⲱ ⲧⲉⲓⲥⲟⲟⲩϩⲥ ⲧⲏⲣⲥ ⲛⲁⲉⲓⲙⲉ ϫⲉ ⲛⲉⲣⲉⲡϫⲟⲉⲓⲥ ⲛⲁⲧⲟⲩϫⲉⲡⲣⲱⲙⲉ ⲁⲛ ϩⲛ ⲟⲩⲥⲏϥⲉ ⲟⲩⲇⲉ ϩⲛ ⲟⲩⲙⲉⲣⲉϩ ϫⲉ ⲡⲡⲟⲗⲉⲙⲟⲥ ⲣⲱ ⲡⲁⲡϫⲟⲉⲓⲥ ⲡⲉ ⲁⲩⲱ ϥⲛⲁⲡⲁⲣⲁⲇⲓⲇⲟⲩ ⲙⲙⲱⲧⲛ ⲉϩⲣⲁⲓ ⲉⲧⲟⲟⲧⲛ 48 ⲡⲁⲗⲗⲟⲫⲩⲗⲟⲥ ⲇⲉ ⲁϥⲧⲱⲟⲩⲛ ⲁϥⲙⲟⲟϣⲉ ⲉϩⲟⲩⲛ ⲉⲇⲁⲩⲉⲓⲇ ⲁⲩⲱ ⲇⲁⲩⲉⲓⲇ ⲁϥⲁⲛⲅϥ ⲉϩⲣⲁⲓ ⲁϥⲓ ⲉⲧⲙⲏⲧⲉ ⲙⲡⲉⲙⲗⲁϩ ⲁϥⲙⲟⲟϣⲉ ⲉϩⲟⲩⲛ ⲉⲡⲁⲗⲗⲟⲫⲩⲗⲟⲥ 49 ⲇ︤ⲁ︦ⲇ︥ ⲇⲉ ⲁϥⲥⲟⲩⲧⲛⲧⲟⲟⲧϥ ⲉⲃⲟⲗ ⲉϩⲣⲁⲓ ⲉⲡⲉϥϫⲓⲗⲗⲏⲥ ⲁϥϥⲓ ⲛϩⲏⲧϥ ⲛⲟⲩⲱⲛⲉ ⲛⲟⲩⲱⲧ ⲁϥⲕⲁⲁϥ ϩⲛ ⲧⲉϥⲥⲫⲉⲛⲇⲟⲛⲏ ⲁϥϩⲣⲟⲩⲱⲣϥ ⲉⲃⲟⲗ ⲉⲡⲁⲗⲗⲟⲫⲩⲗⲟⲥ ⲁϥⲣⲁϩⲧϥ ⲉϩⲟⲩⲛ ⲉⲧⲉϥⲧⲉϩⲛⲉ ⲡⲱⲛⲉ ⲇⲉ ⲁϥϫⲉⲧⲧⲡⲉⲣⲓⲕⲉⲫⲁⲗⲉⲁ ⲉϩⲟⲩⲛ ϩⲛ ⲧⲉϥⲧⲉϩⲛⲉ ⲁϥϩⲉ ⲉⲡⲉⲥⲏⲧ ϩⲓϫⲙ ⲡⲉϥϩⲟ 50 ⲇⲁⲩⲉⲓⲇ ⲇⲉ ⲁϥϫⲣⲟ ⲉⲡⲁⲗⲗⲟⲫⲩⲗⲟⲥ ϩⲛ ⲧⲉϥⲥⲫⲉⲛⲧⲱⲛⲓ ⲁⲩⲱ ϩⲙ ⲡⲉϥⲱⲛⲉ ⲁϥⲣⲡⲁⲗⲗⲟⲫⲩⲗⲟⲥ ⲛϭⲱⲃ ⲁϥⲙⲟⲟⲩⲧϥ ⲛⲉⲙⲛⲥⲏϥⲉ ⲇⲉ ⲛⲧⲟⲟⲧϥ ⲛⲇⲁⲩⲉⲓⲇ 51 ⲁϥϯ ⲙⲡⲉϥⲟⲩⲟⲓ ⲁϥⲁϩⲉⲣⲁⲧϥ ⲉϫⲙ ⲡⲁⲗⲗⲟⲫⲩⲗⲟⲥ ⲁϥⲁⲙⲁϩⲧⲉ ⲛⲧⲉϥⲥⲏϥⲉ ⲁϥⲧⲟⲕⲙⲉⲥ ⲉⲃⲟⲗ ϩⲙ ⲡⲉⲥⲕⲟⲉⲓϩ ⲁϥⲙⲟⲟⲩⲧϥ ⲁϥⲥⲉⲗⲉⲡⲧⲉϥⲁⲡⲉ ⲛϩⲏⲧⲥ ⲛⲁⲗⲗⲟⲫⲩⲗⲟⲥ ⲇⲉ ⲛⲧⲉⲣⲟⲩⲛⲁⲩ ϫⲉ ⲁⲡⲉⲩⲗⲉⲙⲏⲏϣⲉ ⲙⲟⲩ ⲁⲩϯϩⲣⲟⲟⲩ ⲉⲃⲟⲗ ⲁⲩⲡⲱⲧ 52 ⲛⲣⲱⲙⲉ ⲇⲉ ⲙⲡⲓ︤ⲏ︦ⲗ︥ ⲁⲩⲧⲱⲟⲩⲛ ⲙⲛ ⲛⲣⲱⲙⲉ ⲛⲓⲟⲩⲇⲁ ⲁⲩⲛⲉϫⲗⲟⲩⲗⲁⲓ ⲉⲃⲟⲗ ⲁⲩⲡⲱⲧ ⲛⲥⲁ ⲛⲁⲗⲗⲟⲫⲩⲗⲟⲥ ϣⲁ ⲧⲉϩⲓⲏ ⲛⲃⲱⲕ ⲉϩⲟⲩⲛ ⲉⲅⲉⲑ ⲉⲩⲛⲁⲧⲁⲁⲩ ⲉϩⲟⲩⲛ ⲉⲣⲟⲥ ⲁⲩⲱ ϣⲁ ⲙⲡⲩⲗⲏ ⲛⲁⲥⲕⲁⲗⲱⲛ ⲁⲩϩⲉ ⲛϭⲓ ⲛϩⲁⲧⲃⲉⲥ ⲛⲛⲁⲗⲗⲟⲫⲩⲗⲟⲥ ϩⲛ ⲧⲉϩⲓⲏ ⲛⲛⲉⲡⲩⲗⲏ ϣⲁ ⲉϩⲣⲁⲓ ⲉⲅⲉⲑ ⲁⲩⲱ ϣⲁ ⲉϩⲣⲁⲓ ⲉⲁⲕⲕⲁⲣⲱⲛ 53 ⲛⲣⲱⲙⲉ ⲇⲉ ⲙⲡⲓ︤ⲏ︦ⲗ︥ ⲁⲩⲕⲧⲟⲟⲩ ⲉⲃⲟⲗ ϩⲛ ⲛⲁⲗⲗⲟⲫⲩⲗⲟⲥ ⲁⲩⲧⲁⲁⲩ ⲉϩⲣⲁⲓ ⲉⲛⲉⲩⲡⲁⲣⲉⲙⲃⲟⲗⲏ ⲁⲩϣⲱⲗ ⲙⲙⲟⲟⲩ 54 ⲁⲩⲱ ⲇⲁⲩⲉⲓⲇ ⲁϥϫⲓ ⲛⲧⲁⲡⲉ ⲙⲡⲁⲗⲗⲟⲫⲩⲗⲟⲥ ⲁϥⲛⲧⲥ ⲉϩⲣⲁⲓ ⲉⲑⲓ︤ⲗ︦ⲏ︦ⲙ︥ ⲁⲩⲱ ⲛⲉϥⲥⲕⲏⲩⲉ ⲁϥⲕⲁⲁⲩ ⲉϩⲣⲁⲓ ϩⲛ ⲧⲉⲥⲕⲩⲛⲏ 55