2 Samuel 3

1ⲡⲡⲟⲗⲉⲙⲟⲥ ⲇⲉ ⲁϥϣⲱⲡⲉ ⲉⲡⲉϩⲟⲩⲟ ⲟⲩⲧⲉ ⲡⲏⲓ ⲛⲥⲁⲟⲩⲗ ⲁⲩⲱ ⲟⲩⲧⲉ ⲡⲏⲓ ⲛⲇ︤ⲁ︦ⲇ︥ ⲡⲏⲓ ⲇⲉ ⲛⲇⲁⲩⲉⲓⲇ ⲛⲉϥⲛⲏⲩ ⲉⲑⲉ ⲁⲩⲱ ⲛⲉϥⲛⲏⲩ ⲛⲧⲁϫⲣⲟ ⲡⲏⲓ ⲇⲉ ⲛⲥⲁⲟⲩⲗ ⲛⲉϥⲛⲏⲩ ⲛϩⲏⲃⲉ ⲁⲩⲱ ⲛⲉϥⲛⲏⲩ ⲛⲣϭⲱⲃ 2ⲁⲩϫⲡⲟ ⲇⲉ ⲛϩⲉⲛϣⲏⲣⲉ ⲛⲇⲁⲩⲉⲓⲇ ϩⲛ ⲭⲉⲃⲣⲱⲛ ⲁⲩⲱ ⲡⲉϥϣⲣⲡⲙⲓⲥⲉ ⲡⲉ ⲁⲙⲛⲱⲛ ⲡϣⲏⲣⲉ ⲛⲁⲭⲓⲛⲁⲁⲃ ⲧⲓⲥⲣⲁⲏⲗⲓⲧⲏⲥ 3ⲁⲩⲱ ⲡⲙⲉϩⲥⲛⲁⲩ ⲛϣⲏⲣⲉ ⲡⲉ ⲭⲁⲗⲏⲃ ⲧⲁⲗⲟⲩⲓⲁ ⲡϣⲏⲣⲉ ⲛⲁⲃⲓⲕⲓⲁ ⲧⲉⲥϩⲓⲙⲉ ⲛⲁⲃⲁⲗ ⲡⲕⲁⲣⲙⲏⲗⲟⲥ ⲡⲙⲉϩϣⲟⲙⲛⲧ ⲇⲉ ⲛϣⲏⲣⲉ ⲡⲉ ⲁⲃⲉⲥⲥⲁⲗⲱⲙ ⲡϣⲏⲣⲉ ⲙⲙⲁⲁⲭⲁ ⲧϣⲉⲉⲣⲉ ⲛⲑⲟⲗⲙⲓ ⲡⲣⲣⲟ ⲛⲅⲉⲥⲓⲣ 4ⲁⲩⲱ ⲡⲉϥⲙⲉϩϥⲧⲟⲟⲩ ⲛϣⲏⲣⲉ ⲡⲉ ⲟⲣⲛⲓⲁ ⲡϣⲏⲣⲉ ⲙⲫⲉⲅⲉⲑ ⲡⲙⲉϩϯⲟⲩ ⲇⲉ ⲡⲉ ⲫⲁⲗⲓⲁⲥ ⲡϣⲏⲣⲉ ⲛⲁⲃⲓⲧⲁⲗ 5ⲁⲩⲱ ⲡⲙⲉϩⲥⲟⲟⲩ ⲡⲉ ⲉⲓⲑⲉⲣⲁⲁⲛ ⲡϣⲏⲣⲉ ⲛⲁⲓⲅⲗⲁ ⲧⲉⲥϩⲓⲙⲉ ⲛⲇ︤ⲁ︦ⲇ︥ ⲛⲁⲓ ⲁⲩϫⲡⲟⲟⲩ ⲛⲇ︤ⲁ︦ⲇ︥ ϩⲛ ⲭⲉⲃⲣⲱⲛ 6ⲛⲧⲉⲣⲉⲡⲡⲟⲗⲉⲙⲟⲥ ⲇⲉ ⲧⲱⲟⲩⲛ ϩⲛ ⲧⲙⲏⲧⲉ ⲙⲡⲏⲓ ⲛⲥⲁⲟⲩⲗ ⲁⲩⲱ ϩⲛ ⲧⲙⲏⲧⲉ ⲙⲡⲏⲓ ⲛⲇⲁⲩⲉⲓⲇ ⲁⲃⲉⲛⲛⲏⲣ ⲛⲉϥⲁⲙⲁϩⲧⲉ ⲉϫⲙ ⲡⲏⲓ ⲛⲥⲁⲟⲩⲗ 7ⲥⲁⲟⲩⲗ ⲇⲉ ⲛⲉⲟⲩⲛⲧⲁϥ ⲙⲙⲁⲩ ⲛⲟⲩⲡⲁⲗⲗⲁⲕⲏ ⲉⲡⲉⲥⲣⲁⲛ ⲡⲉ ϩⲣⲉⲥⲫⲁ ⲧϣⲉⲉⲣⲉ ⲛⲓⲟⲗ ⲁⲩⲱ ⲓⲉⲃⲟⲥⲑⲉ ⲡϣⲏⲣⲉ ⲛⲥⲁⲟⲩⲗ ⲡⲉϫⲁϥ ⲉϩⲟⲩⲛ ϩⲉⲛ ⲁⲃⲉⲛⲛⲏⲣ ϫⲉ ⲉⲧⲃⲉ ⲟⲩ ⲁⲕⲃⲱⲕ ⲉϩⲟⲩⲛ ϣⲁ ⲧⲡⲁⲗⲗⲁⲕⲏ ⲙⲡⲁⲉⲓⲱⲧ 8ⲁⲩⲱ ⲁⲃⲉⲛⲛⲏⲣ ⲁϥϭⲱⲛⲧ ⲉⲙⲁⲧⲉ ⲉⲧⲃⲉ ⲡϣⲁϫⲉ ⲛⲓⲉⲃⲟⲥⲑⲉ ⲡϣⲏⲣⲉ ⲛⲥⲁⲟⲩⲗ ⲡⲉϫⲉⲁⲃⲉⲛⲛⲏⲣ ⲉϩⲟⲩⲛ ⲉϩⲣⲁϥ ϫⲉ ⲙⲏ ⲁⲛⲅ ⲟⲩⲁⲡⲉ ⲁⲛⲟⲕ ⲛⲟⲩϩⲟⲣ ⲉⲁⲓⲉⲓⲣⲉ ⲛⲟⲩⲛⲁ ⲙⲡⲟⲟⲩ ⲙⲛ ⲡⲏⲓ ⲛⲥⲁⲟⲩⲗ ⲡⲉⲕⲉⲓⲱⲧ ⲁⲩⲱ ⲉⲧⲃⲉ ⲛⲉⲕⲥⲛⲏⲩ ⲙⲛ ⲛⲉⲣⲉⲙⲛⲥⲟⲟⲩⲛ ⲉⲙⲡⲓⲃⲱⲕ ⲉⲣⲁⲧϥ ⲙⲡⲏⲓ ⲛⲇ︤ⲁ︦ⲇ︥ ⲁⲩⲱ ⲛⲧⲟⲕ ⲕⲕⲱⲧⲉ ⲛⲥⲁ ⲟⲩⲡⲉⲑⲟⲟⲩ ⲉϩⲟⲩⲛ ⲉⲣⲟⲓ ⲉⲧⲃⲉ ⲟⲩⲥϩⲓⲙⲉ ⲙⲡⲟⲟⲩ 9ⲛⲁⲓ ⲉⲣⲉⲡⲛⲟⲩⲧⲉ ⲁⲁⲩ ⲛⲁⲃⲉⲛⲛⲏⲣ ⲁⲩⲱ ⲛⲉⲓⲕⲟⲟⲩⲉ ⲉϥⲉⲟⲩⲁϩⲟⲩ ⲉϫⲱϥ ϫⲉ ⲕⲁⲧⲁ ⲑⲉ ⲛⲧⲁ ⲡϫⲟⲉⲓⲥ ⲱⲣⲕ ⲛⲇⲁⲩⲉⲓⲇ ⲧⲁⲓ ⲧⲉ ⲑⲉ ⲉϯⲛⲁⲁⲁⲥ ⲛⲁϥ ϩⲙ ⲡⲟⲟⲩ ⲛϩⲟⲟⲩ 10ⲉⲧⲣⲁϥⲓ ⲛⲧⲙⲛⲧⲣⲣⲟ ⲉⲃⲟⲗ ϩⲙ ⲡⲏⲓ ⲛⲥⲁⲟⲩⲗ ⲁⲩⲱ ⲉⲧⲁϩⲟ ⲉⲣⲁⲧϥ ⲙⲡⲉⲑⲣⲟⲛⲟⲥ ⲛⲇ︤ⲁ︦ⲇ︥ ⲉϫⲙ ⲡⲓ︤ⲏ︦ⲗ︥ ⲁⲩⲱ ⲉϫⲛ ⲓⲟⲩⲇⲁ ϫⲓⲛ ⲇⲁⲛ ϣⲁ ⲃⲏⲣⲥⲁⲃⲉⲉ 11ⲁⲩⲱ ⲓⲉⲃⲟⲥⲑⲉ ⲙⲡⲉϥϣⲁϫⲉ ⲗⲁⲁⲩ ϩⲁⲣⲱϥ ⲛⲁⲃⲉⲛⲛⲏⲣ ϫⲉ ⲛⲉⲁϥⲣϩⲟⲧⲉ ⲛϩⲏⲧϥ 12ⲁⲩⲱ ⲁⲃⲉⲛⲛⲏⲣ ⲁϥϫⲟⲟⲩ ⲛϩⲉⲛⲃⲁⲓϣⲓⲛⲉ ⲉⲣⲁⲧϥ ⲛⲇ︤ⲁ︦ⲇ︥ ⲛⲧⲉⲩⲛⲟⲩ ⲉϩⲣⲁⲓ ⲉⲑⲓ︤ⲗ︦ⲏ︦ⲙ︥ ⲡⲙⲁ ⲉⲛⲉϥⲉⲛϩⲏⲧϥ ⲉϥϫⲱ ⲙⲙⲟⲥ ⲛⲁϥ ϫⲉ ⲥⲙⲓⲛⲉ ⲛⲧⲉⲕⲇⲓⲁⲑⲩⲕⲏ ⲛⲙⲙⲁⲓ ⲁⲩⲱ ⲉⲓⲥ ⲧⲟⲟⲧ ⲛⲁϣⲱⲡⲉ ⲛⲙⲙⲁⲕ ⲉⲕⲧⲟ ⲉⲣⲟⲕ ⲙⲡⲏⲓ ⲧⲏⲣϥ ⲙⲡⲓ︤ⲏ︦ⲗ︥ 13ⲡⲉϫⲉⲇ︤ⲁ︦ⲇ︥ ⲛⲁϥ ϫⲉ ⲕⲁⲗⲱⲥ ⲁⲛⲟⲕ ϯⲛⲁⲥⲙⲓⲛⲉ ⲛⲙⲙⲁⲕ ⲛⲟⲩⲇⲓⲁⲑⲏⲕⲏ ⲡⲗⲏⲛ ⲟⲩϣⲁϫⲉ ⲛⲟⲩⲱⲧ ⲛⲧⲟⲕ ϯⲛⲁⲉⲧⲓ ⲙⲙⲟϥ ⲛⲧⲟⲟⲧⲕ ⲉⲓϫⲱ ⲙⲙⲟⲥ ϫⲉ ⲛⲅⲛⲁϣⲉⲓ ⲁⲛ ⲉϩⲟⲩⲛ ⲉϩⲣⲁⲓ ⲉⲕⲧⲙⲉⲓⲛⲉ ⲙⲙⲉⲗⲭⲱⲗ ⲧϣⲉⲉⲣⲉ ⲛⲥⲁⲟⲩⲗ ⲉⲕⲛⲁⲉⲓ ⲉⲧⲱⲙⲛⲧ ⲉⲣⲟⲓ 14ⲁⲩⲱ ⲇ︤ⲁ︦ⲇ︥ ⲁϥϫⲟⲟⲩ ⲛϩⲉⲛⲃⲁⲓϣⲓⲛⲉ ⲉⲣⲁⲧϥ ⲛⲓⲉⲃⲟⲥⲑⲉ ⲡϣⲏⲣⲉ ⲛⲥⲁⲟⲩⲗ ⲉϥϫⲱ ⲙⲙⲟⲥ ⲛⲁϥ ϫⲉ ⲙⲁ ⲛⲁⲓ ⲛⲧⲁⲥϩⲓⲙⲉ ⲙⲉⲗⲭⲱⲗ ⲧⲁⲓ ⲛⲧⲁⲓϫⲓⲧⲥ ϩⲁ ϣⲉ ⲙⲙⲛⲧⲁⲧⲥⲃⲃⲉ ⲛⲧⲉ ⲛⲁⲗⲗⲟⲫⲩⲗⲟⲥ 15ⲁⲩⲱ ⲁϥϫⲟⲟⲩ ⲛϭⲓ ⲓⲉⲃⲟⲥⲑⲉ ⲁϥϫⲓⲧⲥ ⲛⲧⲟⲟⲧϥ ⲙⲡⲉⲥϩⲁⲓ ⲫⲁⲗⲧⲓⲏⲗ ⲡϣⲏⲣⲉ ⲛⲥⲉⲗⲗⲏⲥ 16ⲡⲉⲥϩⲁⲓ ⲇⲉ ⲛⲉϥⲙⲟⲟϣⲉ ⲛⲙⲙⲁⲥ ⲉϥⲣⲓⲙⲉ ⲉϥⲟⲩⲏϩ ⲛⲥⲱⲥ ϣⲁ ⲉϩⲣⲁⲓ ⲉⲃⲁⲣⲁⲕⲓ ⲁⲩⲱ ⲁⲃⲉⲛⲛⲏⲣ ⲡⲉϫⲁϥ ϫⲉ ⲕⲟⲧⲕ ⲛⲅⲃⲱⲕ ⲁϥⲕⲧⲟϥ ⲇⲉ ⲁϥⲙⲟⲟϣⲉ 17ⲡⲉϫⲉⲁⲃⲉⲛⲛⲏⲣ ⲉϩⲟⲩⲛ ϩⲛ ⲛⲉⲡⲣⲉⲥⲃⲩⲧⲉⲣⲟⲥ ⲙⲡⲓ︤ⲏ︦ⲗ︥ ⲉϥϫⲱ ⲙⲙⲟⲥ ⲛⲁⲩ ϫⲉ ⲛⲥⲁϥ ⲁⲩⲱ ⲛϣⲙⲛⲧ ⲙⲡⲟⲟⲩ ⲛⲉⲧⲉⲧⲛⲕⲱⲧⲉ ⲛⲥⲁ ⲇ︤ⲁ︦ⲇ︥ ⲉⲧⲣⲉϥⲣⲣⲣⲟ ⲉϫⲛⲧⲏⲩⲧⲛ 18ⲧⲉⲛⲟⲩ ϭⲉ ⲁⲣⲓⲡⲁⲓ ϫⲉ ⲡϫⲟⲉⲓⲥ ⲁϥϣⲁϫⲉ ⲉⲧⲃⲉ ⲇ︤ⲁ︦ⲇ︥ ⲉϥϫⲱ ⲙⲙⲟⲥ ϫⲉ ⲉⲃⲟⲗ ϩⲓⲧⲟⲟⲧϥ ⲛⲇ︤ⲁ︦ⲇ︥ ⲡⲁϩⲙϩⲁⲗ ϯⲛⲁⲧⲟⲩϫⲉ ⲡⲓ︤ⲏ︦ⲗ︥ ⲛⲧⲟⲟⲧⲟⲩ ⲛⲛⲁⲗⲗⲟⲫⲩⲗⲟⲥ ⲁⲩⲱ ⲛⲧⲟⲟⲧⲟⲩ ⲛⲛⲉⲩϫⲁϫⲉ ⲧⲏⲣⲟⲩ 19ⲁⲃⲉⲛⲛⲏⲣ ⲇⲉ ⲁϥϣⲁϫⲉ ⲉⲛⲉⲙⲁⲁϫⲉ ⲙⲡⲕⲉⲃⲉⲛⲓⲁⲙⲓⲛ ⲁⲩⲱ ⲁϥⲃⲱⲕ ⲛϭⲓ ⲁⲃⲉⲛⲛⲏⲣ ⲁϥⲧⲁⲩⲟ ⲉϩⲣⲁⲓ ⲉⲙⲙⲁⲁϫⲉ ⲛⲇⲁⲩⲉⲓⲇ ϩⲛ ⲭⲉⲃⲣⲱⲛ ⲛϣⲁϫⲉ ⲛⲓⲙ ⲛⲧⲁⲩⲣⲁⲛⲁϥ ⲙⲡⲓ︤ⲏ︦ⲗ︥ ⲁⲩⲱ ⲛⲉⲛⲧⲁⲩⲣⲁⲛⲁϥ ⲙⲡⲏⲓ ⲧⲏⲣϥ ⲛⲃⲉⲛⲓⲁⲙⲓⲛ 20ⲁⲃⲉⲛⲛⲏⲣ ⲁϥⲓ ⲉⲣⲁⲧϥ ⲛⲇⲁⲩⲉⲓⲇ ⲉϩⲣⲁⲓ ⲉⲭⲉⲃⲣⲱⲛ ⲉⲣⲉϫⲟⲩⲱⲧ ⲛⲣⲱⲙⲉ ⲛⲙⲙⲁϥ ⲇ︤ⲁ︦ⲇ︥ ⲇⲉ ⲁϥⲉⲓⲣⲉ ⲛⲟⲩϩⲟⲟⲩ ⲛⲥⲱ ⲉⲁⲃⲉⲛⲛⲏⲣ ⲙⲛ ⲛⲣⲱⲙⲉ ⲉⲧⲛⲙⲙⲁϥ 21ⲡⲉϫⲉⲁⲃⲉⲛⲛⲏⲣ ⲛⲇ︤ⲁ︦ⲇ︥ ϫⲉ ϯⲛⲁⲧⲱⲟⲩⲛ ⲛⲧⲁⲃⲱⲕ ⲛⲧⲁⲥⲱⲟⲩϩ ⲉⲣⲁⲧϥ ⲙⲡⲁϫⲟⲉⲓⲥ ⲡⲣⲣⲟ ⲙⲡⲓ︤ⲏ︦ⲗ︥ ⲛⲧⲁⲥⲙⲓⲛⲉ ⲛⲙⲙⲁϥ ⲛⲟⲩⲇⲓⲁⲑⲏⲕⲏ ⲛⲅⲉⲣⲣⲣⲟ ⲉϩⲣⲁⲓ ⲉϫⲱⲟⲩ ⲧⲏⲣⲟⲩ ϩⲛ ⲛⲉⲧⲉⲣⲉⲧⲉⲕⲯⲩⲭⲏ ⲟⲩⲁϣⲟⲩ ⲁⲩⲱ ⲇ︤ⲁ︦ⲇ︥ ⲁϥⲕⲱ ⲉⲃⲟⲗ ⲛⲁⲃⲉⲛⲛⲏⲣ ⲙⲛ ⲛⲣⲱⲙⲉ ⲧⲏⲣⲟⲩ ⲉⲧⲛⲙⲙⲁϥ ϩⲛ ⲟⲩⲉⲓⲣⲏⲛⲏ 22ⲛϩⲙϩⲁⲗ ⲇⲉ ⲛⲇⲁⲩⲉⲓⲇ ⲙⲛ ⲓⲱⲁⲃ ⲁⲩⲉⲓ ⲉⲃⲟⲗ ϩⲙ ⲡⲕⲉⲇⲇⲟⲩⲣ ⲉⲣⲉⲟⲩⲁϣⲏ ⲛϣⲟⲗⲥ ⲛⲙⲙⲁⲩ ⲁⲃⲉⲛⲛⲏⲣ ⲇⲉ ⲛⲉϥϩⲁⲧⲛⲇⲁⲩⲉⲓⲇ ⲁⲛ ϩⲛ ⲭⲉⲃⲣⲱⲛ ϫⲉ ⲛⲉⲁϥϫⲟⲟⲩϥ ⲉⲃⲟⲗ ⲡⲉ ⲁϥⲃⲱⲕ ϩⲛ ⲟⲩⲉⲓⲣⲏⲛⲏ 23ⲓⲱⲁⲃ ⲇⲉ ⲙⲛ ⲡⲉϥⲙⲏⲏϣⲉ ⲧⲏⲣϥ ⲁϥⲉⲓ ⲁⲩⲱ ⲁⲩⲧⲁⲙⲉⲓⲱⲁⲃ ⲉⲩϫⲱ ⲙⲙⲟⲥ ϫⲉ ⲁⲃⲉⲛⲛⲏⲣ ⲡϣⲏⲣⲉ ⲛⲛⲏⲣ ⲁϥⲓ ⲉⲣⲁⲧϥ ⲛⲇⲁⲩⲉⲓⲇ ⲁⲩⲱ ⲁϥⲕⲁⲁϥ ⲉⲃⲟⲗ ⲁϥⲃⲱⲕ ϩⲛ ⲟⲩⲉⲓⲣⲏⲛⲏ 24ⲛⲧⲉⲩⲛⲟⲩ ⲇⲉ ⲓⲱⲁⲃ ⲁϥⲃⲱⲕ ⲉϩⲟⲩⲛ ϣⲁ ⲇ︤ⲁ︦ⲇ︥ ⲡⲣⲣⲟ ⲡⲉϫⲁϥ ⲛⲁϥ ϫⲉ ⲟⲩ ⲡⲉ ⲡⲉⲓϩⲱⲃ ⲛⲧⲁⲕⲁⲁϥ ⲉⲓⲥ ⲁⲃⲉⲛⲛⲏⲣ ⲁϥⲓ ⲉⲣⲁⲧⲕ ⲁⲩⲱ ⲉⲧⲃⲉ ⲟⲩ ⲁⲕⲕⲁⲁϥ ⲉⲃⲟⲗ ⲉⲃⲱⲕ ϩⲛ ⲟⲩⲉⲓⲣⲏⲛⲏ 25ⲛⲅⲥⲟⲟⲩⲛ ⲁⲛ ⲛⲧⲕⲁⲕⲓⲁ ⲛⲁⲃⲉⲛⲛⲏⲣ ⲡϣⲏⲣⲉ ⲛⲛⲏⲣ ϫⲉ ⲛⲧⲁϥⲉⲓ ⲉⲣϩⲁⲗ ⲙⲙⲟⲕ ⲁⲩⲱ ⲉⲉⲓⲙⲉ ⲉⲧⲉⲕϭⲓⲛⲃⲱⲕ ⲉⲃⲟⲗ ⲙⲛ ⲧⲉⲕϭⲓⲛⲉⲓ ⲉϩⲟⲩⲛ ⲁⲩⲱ ⲉⲉⲓⲙⲉ ⲉϩⲱⲃ ⲛⲓⲙ ⲉⲧⲉⲕⲛⲁⲁⲩ 26ⲓⲱⲁⲃ ⲇⲉ ⲁϥⲉⲓ ⲉⲃⲟⲗ ϩⲓⲧⲟⲟⲧϥ ⲙⲡⲣⲣⲟ ⲇ︤ⲁ︦ⲇ︥ ⲁⲩⲱ ⲁϥϫⲟⲟⲩ ⲛϩⲉⲛⲃⲁⲓϣⲓⲛⲉ ϩⲓⲡⲁϩⲟⲩ ⲛⲁⲃⲉⲛⲛⲏⲣ ⲁϥⲕⲧⲟϥ ⲉⲡⲁϩⲟⲩ ⲉⲃⲟⲗ ϩⲛ ⲧϣⲱⲧⲉ ⲛⲥⲉⲉⲓⲣⲁⲙ ⲁⲩⲱ ⲇ︤ⲁ︦ⲇ︥ ⲛⲉϥⲥⲟⲟⲩⲛ ⲁⲛ 27ⲁϥⲕⲧⲉⲁⲃⲉⲛⲛⲏⲣ ⲉϩⲣⲁⲓ ⲉⲭⲉⲃⲣⲱⲛ ⲓⲱⲁⲃ ⲇⲉ ⲁϥⲥⲟⲕϥ ⲛⲥⲁⲥⲡⲓⲣ ⲛⲧⲡⲩⲗⲏ ⲉϣⲁϫⲉ ⲛⲙⲙⲁϥ ⲉϥⲟ ⲛⲕⲣⲟϥ ⲉⲣⲟϥ ⲁϥⲡⲁⲧⲁⲥⲥⲉ ⲙⲙⲟϥ ⲙⲡⲙⲁ ⲉⲧⲙⲙⲁⲩ ⲉϫⲛ ⲛⲉϥϭⲗⲟⲟⲧⲉ ⲁϥⲙⲟⲩ ⲉⲧⲃⲉ ⲡⲉⲥⲛⲟϥ ⲛⲁⲍⲁⲏⲗ ⲡⲥⲟⲛ ⲛⲓⲱⲁⲃ 28ⲇ︤ⲁ︦ⲇ︥ ⲇⲉ ⲁϥⲥⲱⲧⲙ ⲙⲛⲛⲥⲁ ⲛⲁⲓ ⲡⲉϫⲁϥ ϫⲉ ϯⲟⲩⲁⲁⲃ ⲁⲛⲟⲕ ⲁⲩⲱ ⲧⲁⲙⲛⲧⲣⲣⲟ ⲛⲁϩⲣⲁϥ ⲙⲡϫⲟⲉⲓⲥ ϣⲁ ⲉⲛⲉϩ ⲉⲡⲉⲥⲛⲟϥ ⲛⲁⲃⲉⲛⲛⲏⲣ ⲡϣⲏⲣⲉ ⲛⲛⲏⲣ 29ⲁⲩⲱ ⲉⲣⲉⲛⲁⲓ ⲛⲁⲉⲓ ⲉϩⲣⲁⲓ ⲉϫⲛ ⲧⲁⲡⲉ ⲛⲓⲱⲁⲃ ⲁⲩⲱ ⲉϫⲙ ⲡⲏⲓ ⲧⲏⲣϥ ⲙⲡⲉϥⲉⲓⲱⲧ ⲛϥⲧⲉⲙⲱϫⲛ ⲉⲃⲟⲗ ϩⲙ ⲡⲏⲓ ⲛⲓⲱⲁⲃ ⲉϥϫⲁϩⲙ ⲁⲩⲱ ⲉϥⲥⲟⲃϩ ⲉϥⲁⲙⲁϩⲧⲉ ⲛⲟⲩⲟⲩⲣⲁⲥ ⲁⲩⲱ ⲉϥϩⲏⲩ ϩⲛ ⲧⲥⲏϥⲉ ⲁⲩⲱ ⲉϥⲣϭⲣⲱϩ ⲛⲟⲉⲓⲕ 30ⲓⲱⲁⲃ ⲇⲉ ⲙⲛ ⲁⲃⲓⲥⲁ ⲡⲉϥⲥⲟⲛ ⲛⲉⲩϭⲟⲣϭ ⲉⲁⲃⲉⲛⲛⲏⲣ ⲉⲧⲃⲉ ⲡⲁⲓ ⲁⲩⲙⲟⲟⲩⲧϥ ⲉⲃⲟⲗ ϫⲉ ⲁϥⲙⲟⲩⲟⲩⲧ ⲛⲁⲍⲁⲏⲗ ⲡⲉⲩⲥⲟⲛ ϩⲙ ⲡⲡⲟⲗⲉⲙⲟⲥ ⲛⲧⲁϥϣⲱⲡⲉ ϩⲛ ⲅⲁⲃⲁⲱⲛ 31ⲁⲩⲱ ⲇⲁⲩⲉⲓⲇ ⲡⲉϫⲁϥ ⲉϩⲟⲩⲛ ϩⲛ ⲓⲱⲁⲃ ⲁⲩⲱ ⲉϩⲟⲩⲛ ϩⲙ ⲡⲗⲁⲟⲥ ⲧⲏⲣϥ ⲉⲧⲛⲙⲙⲁϥ ϫⲉ ⲡⲱϩ ⲛⲛⲉⲧⲛϩⲟⲉⲓⲧⲉ ⲛⲧⲉⲧⲛⲙⲉⲣⲧⲏⲩⲧⲛ ⲛϩⲉⲛϭⲟⲟⲩⲛⲉ ⲛⲧⲉⲧⲛⲛⲏϩⲡⲉ ϩⲓⲑⲏ ⲛⲁⲃⲉⲛⲛⲏⲣ ⲡⲣⲣⲟ ⲇⲉ ⲇⲁⲩⲉⲓⲇ ⲁϥⲙⲟⲟϣⲉ ⲉϥⲟⲩⲏϩ ⲛⲥⲁ ⲡⲉϥϭⲗⲟϭ ⲉⲩϥⲓ ⲙⲙⲟϥ ⲉⲃⲟⲗ 32ⲁⲩⲱ ⲁⲩⲧⲱⲙⲥ ⲛⲁⲃⲉⲛⲛⲏⲣ ϩⲛ ⲭⲉⲃⲣⲱⲛ ⲡⲣⲣⲟ ⲇⲉ ⲁϥϥⲓ ϩⲣⲁϥ ⲉⲃⲟⲗ ⲁϥⲣⲓⲙⲉ ⲉϫⲙ ⲡⲉϥⲧⲁⲫⲟⲥ ⲡⲕⲉⲗⲁⲟⲥ ⲧⲏⲣϥ ⲁϥⲣⲓⲙⲉ ⲉⲁⲃⲉⲛⲛⲏⲣ 33ⲁⲩⲱ ⲡⲣⲣⲟ ⲁϥⲧⲟⲉⲓⲧ ⲛⲟⲩⲧⲟⲉⲓⲧ ⲉϥϫⲱ ⲙⲙⲟⲥ ⲉϫⲛ ⲁⲃⲉⲛⲛⲏⲣ ϫⲉ ⲉⲛⲉⲕⲁⲧⲁ ⲡⲙⲟⲩ ⲛⲛⲁⲃⲁⲗ ⲉⲣⲉⲁⲃⲉⲛⲛⲏⲣ ⲛⲁⲙⲟⲩ 34ⲛⲉⲕϭⲓϫ ⲙⲡⲟⲩⲥⲁⲛϩⲟⲩ ⲛⲉⲕⲟⲩⲉⲣⲏⲧⲉ ⲙⲡⲟⲩⲧⲁⲁⲩ ⲉϩⲉⲛⲡⲁⲓⲇⲏⲥ ⲏ ⲙⲡⲟⲩⲟⲃⲟⲩ ⲁⲩⲥⲁⲗⲡⲓⲍⲉ ⲛⲁⲕ ⲛⲑⲉ ⲛⲟⲩϭⲟⲡⲧⲥ ⲁϥϩⲉ ⲙⲡⲙⲧⲟ ⲉⲃⲟⲗ ⲛⲛⲉϣⲏⲣⲉ ⲛⲧⲁⲛⲟⲙⲓⲁ ⲡⲗⲁⲟⲥ ⲇⲉ ⲧⲏⲣϥ ⲁϥⲟⲩⲱϩ ⲉⲧⲟⲟⲧϥ ⲉⲣⲓⲙⲉ ⲉⲣⲟϥ 35ⲁⲩⲱ ⲁϥⲉⲓ ⲛϭⲓ ⲡⲗⲁⲟⲥ ⲧⲏⲣϥ ⲙⲡⲛⲁⲩ ⲙⲡⲉⲕⲃⲁ ⲉⲧⲙⲟ ⲛⲇⲁⲩⲉⲓⲇ ⲛⲟⲉⲓⲕ ⲉⲛϩⲟⲥⲟⲛ ⲉⲟⲩⲛ ⲛⲁⲩ ⲛⲃⲟⲗ ⲁⲩⲱ ⲇ︤ⲁ︦ⲇ︥ ⲁϥⲱⲣⲕ ⲉϥϫⲱ ⲙⲙⲟⲥ ϫⲉ ⲛⲁⲓ ⲉⲣⲉⲡⲛⲟⲩⲧⲉ ⲁⲁⲩ ⲛⲁⲓ ⲁⲩⲱ ⲛⲉⲓⲕⲟⲟⲩⲉ ⲉϥⲉⲟⲩⲁϩⲟⲩ ⲉⲣⲟⲓ ϫⲉ ⲉⲣⲉⲧⲙⲡⲣⲏ ϩⲱⲧⲡ ⲛϯⲛⲁⲟⲩⲉⲙⲟⲉⲓⲕ ⲁⲛ ⲟⲩⲇⲉ ⲛϯⲛⲁⲧⲉⲡⲗⲁⲁⲩ ⲁⲛ 36ⲁⲩⲱ ⲡⲗⲁⲟⲥ ⲧⲏⲣϥ ⲁϥⲉⲓⲙⲉ ⲁϥⲣⲁⲛⲁⲩ ⲙⲡⲉⲩⲙⲧⲟ ⲉⲃⲟⲗ ⲛϭⲓ ϩⲱⲃ ⲛⲓⲙ ⲛⲧⲁⲡⲣⲣⲟ ⲁⲁⲩ 37ⲡⲓ︤ⲏ︦ⲗ︥ ⲇⲉ ⲧⲏⲣϥ ⲁⲩⲉⲓⲙⲉ ⲙⲡⲉϩⲟⲟⲩ ⲉⲧⲙⲙⲁⲩ ϫⲉ ⲛⲧⲁⲡⲉⲓⲧⲱϣ ϣⲱⲡⲉ ⲁⲛ ϩⲓⲧⲛ ⲡⲣⲣⲟ ⲉⲙⲟⲩⲟⲩⲧ ⲛⲁⲃⲉⲛⲛⲏⲣ 38ⲁⲩⲱ ⲡⲣⲣⲟ ⲡⲉϫⲁϥ ⲛⲛⲉϥϩⲙϩⲁⲗ ϫⲉ ⲛⲧⲉⲧⲛⲥⲟⲟⲩⲛ ⲁⲛ ϫⲉ ⲟⲩⲛⲟϭ ⲛⲁⲣⲭⲱⲛ ⲁϥⲙⲟⲩ ⲙⲡⲟⲟⲩ ϩⲙ ⲡⲓ︤ⲏ︦ⲗ︥ 39ⲁⲩⲱ ϫⲉ ⲁⲛⲅ ⲡⲉϥⲥⲩⲅⲅⲉⲛⲏⲥ ⲙⲡⲟⲟⲩ ⲉⲡⲣⲣⲟ ⲡⲉⲛⲧⲁϥⲧⲁϩⲟϥ ⲉⲣⲁⲧϥ ⲛⲉⲓⲣⲱⲙⲉ ⲇⲉ ⲉⲧⲉⲛϣⲏⲣⲉ ⲛⲥⲁⲣⲟⲩⲉⲓⲁⲥ ⲛⲉ ⲥⲉⲛⲁϣⲧ ⲉⲙⲁⲧⲉ ⲛⲁϩⲣⲁⲓ ⲉⲣⲉⲡϫⲟⲉⲓⲥ ⲇⲉ ⲧⲱⲱⲃⲉ ⲙⲡⲉⲧⲉⲓⲣⲉ ⲙⲡⲡⲟⲛⲏⲣⲟⲛ ⲕⲁⲧⲁ ⲧⲉϥⲕⲁⲕⲓⲁ