Jeremiah 51

1ⲡϣⲁϫⲉ ⲙⲡϫⲟⲉⲓⲥ ⲉⲛⲧⲁϥϣⲱⲡⲉ ϣⲁ ⲓⲉⲣⲉⲙⲓⲁⲥ ⲉⲧⲁⲩⲟϥ ⲉϫⲛ ⲛⲓⲟⲩⲇⲁⲓ ⲧⲏⲣⲟⲩ ⲉⲧϣⲟⲟⲡ ϩⲙ ⲡⲕⲁϩ ⲛⲕⲏⲙⲉ ⲙⲛ ⲛⲉⲧϩⲙⲟⲟⲥ ϩⲛ ⲙⲉϭⲧⲱⲗ ⲙⲛ ⲧⲁⲫⲛⲁⲥ ⲙⲛ ⲡⲕⲁϩ ⲙⲡⲁⲑⲟⲩⲣⲏⲥ ⲉϥϫⲱ ⲙⲙⲟⲥ ⲛⲁⲩ 2ⲧⲁⲓ ⲧⲉ ⲑⲉ ⲉⲛⲧⲁϥϫⲟⲟⲥ ⲛϭⲓ ⲡϫⲟⲉⲓⲥ ⲡⲛⲟⲩⲧⲉ ⲙⲡⲓ︤ⲏ︦ⲗ︥ ϫⲉ ⲛⲧⲱⲧⲛ ⲁⲧⲉⲧⲛⲛⲁⲩ ⲉⲛⲡⲉⲑⲟⲟⲩ ⲧⲏⲣⲟⲩ ⲉⲛⲧⲁⲓⲛⲧⲟⲩ ⲉϫⲛ ⲑⲓⲏⲙ ⲙⲛ ⲙⲡⲟⲗⲓⲥ ⲛⲓⲟⲩⲇⲁ ⲁⲩⲱ ⲉⲓⲥ ϩⲏⲏⲛⲉ ⲥⲉϣⲏϥ ⲙⲡⲟⲟⲩ ϫⲉ ⲙⲛ ⲡⲉⲧϣⲟⲟⲡ ⲛϩⲏⲧⲟⲩ 3ⲉⲧⲃⲉ ⲛⲉⲩⲡⲟⲛⲏⲣⲓⲁ ⲉⲛⲧⲁⲩⲁⲁⲩ ϫⲉ ⲉⲩⲉϯϭⲱⲛⲧ ⲛⲁⲓ ⲉⲩⲃⲏⲕ ⲉⲩⲧⲁⲗⲁⲓ ϣⲟⲩϩⲏⲛⲉ ⲉϩⲣⲁⲓ ⲛϩⲉⲛⲕⲉⲛⲟⲩⲧⲉ ⲛⲁⲓ ⲉⲧⲉ ⲙⲡⲉⲧⲛⲥⲟⲩⲱⲛⲟⲩ 4ⲁⲩⲱ ⲁⲉⲓⲧⲛⲛⲟⲟⲩ ϣⲁⲣⲱⲧⲛ ⲛⲛⲁϩⲙϩⲁⲗ ⲛⲉⲡⲣⲟⲫⲏⲧⲏⲥ ⲛϣⲟⲣⲡ ⲁⲉⲓⲧⲛⲛⲟⲟⲩⲥⲉ ⲉⲉⲓϫⲱ ⲙⲙⲟⲥ ϫⲉ ⲙⲡⲣⲉⲓⲣⲉ ⲙⲡϩⲱⲃ ⲙⲡⲉⲓⲧⲱⲗⲙ ⲡⲁⲓ ⲉⲛⲧⲁⲓⲙⲉⲥⲧⲱϥ 5ⲁⲩⲱ ⲙⲡⲟⲩⲥⲱⲧⲙ ⲛⲥⲱⲓ ⲟⲩⲇⲉ ⲙⲡⲟⲩⲣⲓⲕⲉ ⲙⲡⲉⲩⲙⲁⲁϫⲉ ⲉⲧⲣⲉⲩⲕⲧⲟⲟⲩ ⲉⲃⲟⲗ ϩⲛ ⲛⲉⲩⲡⲟⲛⲏⲣⲓⲁ ⲉⲧⲙⲧⲣⲉⲩⲧⲁⲗⲉ ϣⲟⲩϩⲏⲛⲉ ⲉϩⲣⲁⲓ ⲛϩⲉⲛⲕⲉⲛⲟⲩⲧⲉ 6ⲁϥⲉⲓ ⲉⲡⲉⲥⲏⲧ ⲛϭⲓ ⲡⲁϭⲱⲛⲧ ⲁⲩⲱ ⲧⲁⲟⲣⲅⲏ ⲁⲥⲙⲟⲩϩ ϩⲛ ⲙⲡⲩⲗⲏ ⲛⲓⲟⲩⲇⲁ ⲙⲛ ⲡⲃⲟⲗ ⲛⲑⲓⲏⲙ ⲁⲩⲱ ⲁⲩϣⲱⲡⲉ ⲉⲩϫⲁⲉⲓⲉ ϩⲛ ⲟⲩⲙⲁ ⲉⲙⲉⲩⲙⲟⲟϣⲉ ϩⲓϫⲱϥ ⲛⲑⲉ ⲙⲡⲟⲟⲩ ⲛϩⲟⲟⲩ 7ⲧⲉⲛⲟⲩ ϭⲉ ⲧⲁⲓ ⲧⲉ ⲑⲉ ⲉⲛⲧⲁϥϫⲟⲟⲥ ⲛϭⲓ ⲡϫⲟⲉⲓⲥ ⲡⲡⲁⲛⲧⲟⲕⲣⲁⲧⲱⲣ ϫⲉ ⲉⲧⲃⲉ ⲟⲩ ⲛⲧⲱⲧⲛ ⲧⲉⲧⲛⲉⲓⲣⲉ ⲛⲛⲉⲓⲛⲟϭ ⲙⲡⲉⲑⲟⲟⲩ ϩⲛ ⲛⲉⲧⲙⲯⲩⲭⲏ ϫⲉ ⲉⲩⲉϩⲱⲧⲃ ⲛⲟⲩⲣⲱⲙⲉ ⲙⲛ ⲟⲩⲥϩⲓⲙⲉ ⲟⲩϣⲏⲣⲉ ⲕⲟⲩⲓ ⲙⲛ ⲡⲉⲧϫⲓⲉⲕⲓⲃⲉ ⲉⲃⲟⲗ ϩⲛ ⲧⲙⲏⲧⲉ ⲛⲓⲟⲩⲇⲁ ⲉⲧⲙⲧⲣⲉⲗⲁⲁⲩ ϣⲱϫⲡ ⲛϩⲏⲧ ⲧⲏⲩⲧⲛ 8ⲉⲧⲣⲁϭⲱⲛⲧ ϩⲛ ⲛⲉϩⲃⲏⲩⲉ ⲛⲛⲉⲧⲛϭⲓϫ ⲉⲧⲉⲧⲛⲧⲁⲗⲉ ϣⲟⲩϩⲏⲛⲉ ⲉϩⲣⲁⲓ ⲛϩⲉⲛⲕⲉⲛⲟⲩⲧⲉ ϩⲙ ⲡⲕⲁϩ ⲛⲕⲏⲙⲉ ⲡⲁⲓ ⲉⲛⲧⲁⲧⲉⲧⲛⲃⲱⲕ ⲉϩⲟⲩⲛ ⲉⲣⲟϥ ⲉϣⲱⲡⲉ ⲛϩⲏⲧϥ ϫⲉⲕⲁⲥ ⲉⲩⲉϩⲉⲧⲃ ⲧⲏⲩⲧⲛ ⲁⲩⲱ ⲛⲧⲉⲧⲛϣⲱⲡⲉ ⲉⲩⲥⲁϩⲟⲩ ⲙⲛ ⲟⲩⲛⲟϭⲛⲉϭ ϩⲛ ⲛϩⲉⲑⲛⲟⲥ ⲙⲡⲕⲁϩ 9ⲙⲏ ⲁⲧⲉⲧⲛⲣⲡⲱⲃϣ ⲛⲧⲱⲧⲛ ⲛⲙⲡⲉⲑⲟⲟⲩ ⲛⲛⲉⲧⲛⲉⲓⲟⲧⲉ ⲙⲛ ⲙⲡⲉⲑⲟⲟⲩ ⲛⲛⲉⲣⲱⲟⲩ ⲛⲓⲟⲩⲇⲁ ⲙⲛ ⲙⲡⲉⲑⲟⲟⲩ ⲛⲛⲉⲧⲛⲁⲣⲭⲱⲛ ⲙⲛ ⲙⲡⲉⲑⲟⲟⲩ ⲛⲛⲉⲧⲛϩⲓⲟⲙⲉ ⲛⲉⲛⲧⲁⲩⲁⲁⲩ ϩⲙ ⲡⲕⲁϩ ⲛⲓⲟⲩⲇⲁ ⲙⲛ ⲡⲃⲟⲗ ⲛⲑⲓⲏⲙ 10ⲁⲩⲱ ⲙⲡⲟⲩⲗⲟ ϩⲛ ⲛⲁⲓ ϣⲁ ϩⲟⲩⲛ ⲉⲡⲟⲟⲩ ⲛϩⲟⲟⲩ ⲟⲩⲇⲉ ⲙⲡⲟⲩⲁⲙⲁϩⲧⲉ ⲛⲛⲁⲟⲩⲁϩ ⲥⲁϩⲛⲉ ⲙⲛ ⲛⲁⲛⲟⲙⲟⲥ ⲛⲁⲓ ⲉⲛⲧⲁⲓⲧⲁⲁⲩ ⲙⲡⲉⲧⲛⲙⲧⲟ ⲉⲃⲟⲗ ⲁⲩⲱ ⲙⲡⲉⲙⲧⲟ ⲉⲃⲟⲗ ⲛⲛⲉⲧⲛⲉⲓⲟⲧⲉ 11ⲉⲧⲃⲉ ⲡⲁⲓ ⲧⲁⲓ ⲧⲉ ⲑⲉ ⲉⲛⲧⲁⲡϫⲟⲉⲓⲥ ϫⲟⲟⲥ ϫⲉ ⲉⲓⲥ ϩⲏⲏⲧⲉ ⲁⲛⲟⲕ ϯⲛⲁⲕⲱ ⲙⲡⲁϩⲟ 12ⲉⲧⲣⲁⲧⲁⲕⲉ ⲡϣⲱϫⲡ ⲧⲏⲣϥ ⲉⲧϩⲛⲕⲏⲙⲉ ⲛⲥⲉϩⲉ ϩⲛ ⲧⲥⲏϥⲉ ⲛⲥⲉⲱϫⲛ ϩⲙ ⲡⲉϩⲕⲟ ϫⲓⲛ ⲡⲉⲩⲕⲟⲩⲓ ϣⲁ ⲡⲉⲩⲛⲟϭ ⲛⲥⲉϣⲱⲡⲉ ⲉⲩⲛⲟϭⲛⲉϭ ⲙⲛ ⲟⲩⲧⲁⲕⲟ ⲙⲛ ⲟⲩⲥⲁϩⲟⲩ 13ⲁⲩⲱ ϯⲛⲁϭⲙ ⲡϣⲓⲛⲉ ⲛⲛⲉⲧϩⲙⲟⲟⲥ ϩⲙ ⲡⲕⲁϩ ⲛⲕⲏⲙⲉ ⲛⲑⲉ ⲉⲛⲧⲁⲓϭⲙ ⲡϣⲓⲛⲉ ⲛⲑⲓⲏⲙ ϩⲛ ⲟⲩⲥⲏϥⲉ ⲙⲛ ⲟⲩϩⲕⲟ ⲙⲛ ⲡⲙⲟⲩ 14ⲁⲩⲱ ⲛⲛⲉⲗⲁⲁⲩ ⲟⲩϫⲁⲉⲓ ⲉⲃⲟⲗ ϩⲙ ⲡϣⲱϫⲡ ⲛⲓⲟⲩⲇⲁ ⲛⲁⲓ ⲉⲧⲟ ⲛⲣⲙⲛϭⲟⲉⲓⲗⲉ ϩⲙ ⲡⲕⲁϩ ⲛⲕⲏⲙⲉ ⲉⲧⲣⲉⲩⲕⲧⲟⲟⲩ ⲉⲡⲕⲁϩ ⲛⲓⲟⲩⲇⲁ ⲡⲁⲓ ⲉⲧⲟⲩϩⲉⲗⲡⲓⲍⲉ ⲉⲣⲟϥ ϩⲛ ⲛⲉⲩⲯⲩⲭⲏ ⲉⲧⲣⲉⲩⲕⲧⲟⲟⲩ ⲉⲙⲁⲩ ⲛⲛⲉⲩⲕⲧⲟⲟⲩ ϭⲉ ⲉⲙⲁⲩ ⲉⲓⲙⲏⲧⲓ ⲛⲉⲧⲛⲁⲟⲩϫⲁⲓ 15ⲁⲩⲱ ⲁⲩⲟⲩⲱϣⲃ ⲛⲓⲉⲣⲉⲙⲓⲁⲥ ⲛϭⲓ ⲛⲣⲱⲙⲉ ⲧⲏⲣⲟⲩ ⲉⲛⲧⲁⲩⲉⲓⲙⲉ ϫⲉ ⲛⲉⲩϩⲓⲟⲙⲉ ⲧⲁⲗⲉ ϣⲟⲩϩⲏⲛⲉ ⲉϩⲣⲁⲓ ⲛϩⲉⲛⲕⲉⲛⲟⲩⲧⲉ ⲙⲛ ⲛⲕⲉϩⲓⲟⲙⲉ ⲧⲏⲣⲟⲩ ⲟⲩⲥⲩⲛⲁⲅⲱⲅⲏ ⲉⲛⲁϣⲱⲥ ⲙⲛ ⲡⲗⲁⲟⲥ ⲧⲏⲣϥ ⲉⲧϩⲙⲟⲟⲥ ϩⲙ ⲡⲕⲁϩ ⲛⲕⲏⲙⲉ ϩⲣⲁⲓ ϩⲙ ⲡⲁⲑⲟⲩⲣⲏⲥ ⲉⲩϫⲱ ⲙⲙⲟⲥ ⲛⲁϥ ϫⲉ 16ⲡϣⲁϫⲉ ⲉⲛⲧⲁⲕϫⲟⲟϥ ⲛⲁⲛ ϩⲙ ⲡⲣⲁⲛ ⲙⲡϫⲟⲉⲓⲥ ⲛⲧⲛⲛⲁⲥⲱⲧⲙ ⲛⲥⲱⲕ ⲁⲛ ⲛϩⲏⲧϥ 17ϫⲉ ϩⲛ ⲟⲩⲉⲓⲣⲉ ⲧⲛⲛⲁⲉⲓⲣⲉ ⲛϣⲁϫⲉ ⲛⲓⲙ ⲉⲧⲛⲏⲩ ⲉⲃⲟⲗ ϩⲛ ⲣⲱⲛ ⲉⲧⲣⲉⲛⲣⲑⲩⲥⲓⲁ ⲛⲧⲉⲣⲱ ⲛⲧⲡⲉ ⲁⲩⲱ ⲛⲧⲛⲟⲩⲱⲧⲛ ⲛⲁⲥ ⲉⲃⲟⲗ ⲛϩⲉⲛⲟⲩⲱⲧⲛ ⲕⲁⲧⲁ ⲑⲉ ⲉⲧⲛⲉⲓⲣⲉ ⲙⲙⲟⲥ ⲁⲛⲟⲛ ⲙⲛ ⲛⲉⲛⲉⲓⲟⲧⲉ ⲙⲛ ⲛⲉⲛⲉⲣⲱⲟⲩ ⲙⲛ ⲛⲉⲛⲁⲣⲭⲱⲛ ϩⲛ ⲙⲡⲟⲗⲓⲥ ⲛⲓⲟⲩⲇⲁ ⲙⲛ ⲡⲃⲟⲗ ⲛⲑⲓⲏⲙ ⲁⲩⲱ ⲛⲉⲁⲛⲥⲓ ⲛⲟⲉⲓⲕ ⲡⲉ ⲁⲛ ϣⲱⲡⲉ ⲉⲛⲥⲙⲟⲛⲧ ⲁⲩⲱ ⲙⲡⲛⲛⲁⲩ ⲉⲡⲉⲑⲟⲟⲩ 18ⲛⲧⲉⲣⲛⲗⲟ ⲇⲉ ⲉⲛⲣⲑⲩⲥⲓⲁ ⲛⲧⲉⲣⲱ ⲛⲧⲡⲉ ⲁⲛⲥⲃⲟⲕ ⲧⲏⲣⲛ ⲁⲩⲱ ⲁⲛⲱϫⲛ ϩⲛ ⲧⲥⲏϥⲉ ⲙⲛ ⲡϩⲉⲃⲱⲱⲛ 19ⲁⲛⲟⲛ ϭⲉ ⲧⲛⲛⲁⲧⲁⲗⲉ ϣⲟⲩϩⲏⲛⲉ ⲉϩⲣⲁⲓ ⲛⲧⲉⲣⲱ ⲛⲧⲡⲉ ⲁⲩⲱ ⲧⲛⲛⲁⲟⲩⲱⲧⲛ ⲛⲁⲥ ⲉⲃⲟⲗ ⲛϩⲉⲛⲟⲩⲱⲧⲛ ⲙⲏ ⲁⲧϫⲛ ⲛⲉⲛϩⲟⲟⲩⲧ ⲛⲧⲁⲛⲧⲁⲙⲓⲟ ⲛⲁⲥ ⲛϩⲉⲛⲭⲁⲃⲱⲛⲏ ⲁⲩⲱ ⲁⲛⲟⲩⲱⲧⲛ ⲛⲁⲥ ⲉⲃⲟⲗ ⲛⲟⲩⲏⲣⲡ 20ⲡⲉϫⲉⲓⲉⲣⲉⲙⲓⲁⲥ ⲙⲡⲗⲁⲟⲥ ⲧⲏⲣϥ ⲛⲇⲩⲛⲁⲧⲟⲥ ⲙⲛ ⲛⲉϩⲓⲟⲙⲉ ⲙⲡⲗⲁⲟⲥ ⲧⲏⲣϥ ⲛⲉⲛⲧⲁⲩⲟⲩⲱϣⲃ ⲛⲁϥ ⲛϩⲉⲛϣⲁϫⲉ ⲉϥϫⲱ ⲙⲙⲟⲥ ⲛⲁⲩ 21ϫⲉ ⲙⲏ ⲛⲧⲉⲑⲩⲥⲓⲁ ⲁⲛ ⲉⲛⲧⲁⲧⲉⲧⲛⲁⲁⲥ ϩⲛ ⲙⲡⲟⲗⲓⲥ ⲛⲓⲟⲩⲇⲁ ⲙⲛ ⲡⲃⲟⲗ ⲛⲑⲓⲏⲙ ⲛⲧⲱⲧⲛ ⲙⲛ ⲛⲉⲧⲛⲉⲓⲟⲧⲉ ⲙⲛ ⲛⲉⲧⲛⲣⲣⲱⲟⲩ ⲙⲛ ⲛⲉⲧⲛⲁⲣⲭⲱⲛ ⲙⲛ ⲡⲗⲁⲟⲥ ⲙⲡⲕⲁϩ ⲧⲉⲛⲧⲁϥⲣⲡⲉⲥⲙⲉⲉⲩⲉ ⲛϭⲓ ⲡϫⲟⲉⲓⲥ ⲉⲁⲥⲉⲓ ⲉϩⲣⲁⲓ ⲉϫⲙ ⲡⲉϥϩⲏⲧ 22ⲙⲡϥⲉϣϥⲓ ϭⲉ ⲉⲣⲟϥ ⲛϭⲓ ⲡϫⲟⲉⲓⲥ ⲙⲡⲉⲙⲧⲟ ⲉⲃⲟⲗ ⲛⲙⲡⲟⲛⲏⲣⲓⲁ ⲛⲛⲉⲧⲛϩⲃⲏⲩⲉ ⲁⲩⲱ ⲉⲃⲟⲗ ϩⲛ ⲛⲃⲟⲧⲉ ⲉⲛⲧⲁⲧⲉⲧⲛⲁⲁⲩ ⲁⲡⲉⲧⲛⲕⲁϩ ϣⲱⲡⲉ ⲉⲩϫⲁⲉⲓⲉ ⲙⲛ ⲟⲩⲙⲁ ⲉⲙⲉⲩⲙⲟⲟϣⲉ ϩⲓϫⲱϥ ⲁⲩⲱ ⲉⲩⲥⲁϩⲟⲩ ⲛⲑⲉ ⲙⲡⲟⲟⲩ ⲛϩⲟⲟⲩ 23ⲙⲡⲉⲙⲧⲟ ⲉⲃⲟⲗ ⲛⲛⲉⲧⲉⲧⲛⲧⲁⲗⲉ ϣⲟⲩϩⲏⲛⲉ ⲛⲁⲩ ⲉϩⲣⲁⲓ ⲙⲛ ⲛⲉⲛⲧⲁⲧⲉⲧⲛⲣⲛⲟⲃⲉ ⲉⲡϫⲟⲉⲓⲥ ⲛϩⲏⲧⲟⲩ ⲁⲩⲱ ⲙⲡⲉⲧⲛⲥⲱⲧⲙ ⲛⲥⲁ ⲡϫⲟⲉⲓⲥ ⲟⲩⲇⲉ ⲙⲡⲉⲧⲛⲙⲟⲟϣⲉ ϩⲛ ⲛⲉϥⲟⲩⲁϩ ⲥⲁϩⲛⲉ ⲙⲛ ⲡⲉϥⲛⲟⲙⲟⲥ ⲙⲛ ⲛⲉϥⲙⲛⲧⲙⲛⲧⲣⲉ ⲁⲛⲉⲓⲡⲉⲑⲟⲟⲩ ⲧⲏⲣⲟⲩ ⲉⲓ ⲉϩⲣⲁⲓ ⲉϫⲱⲧⲛ 24ⲁⲩⲱ ⲡⲉϫⲉⲓⲉⲣⲉⲙⲓⲁⲥ ⲙⲡⲗⲁⲟⲥ ⲧⲏⲣϥ ⲙⲛ ⲛⲉϩⲓⲟⲙⲉ ϫⲉ ⲥⲱⲧⲙ ⲉⲡϣⲁϫⲉ ⲙⲡϫⲟⲉⲓⲥ 25ⲧⲁⲓ ⲧⲉ ⲑⲉ ⲉⲛⲧⲁϥϫⲟⲟⲥ ⲛϭⲓ ⲡϫⲟⲉⲓⲥ ⲡⲛⲟⲩⲧⲉ ⲙⲡⲓ︤ⲏ︦ⲗ︥ ϫⲉ ⲛⲧⲱⲧⲛ ⲙⲛ ⲛⲉⲧⲛϩⲓⲟⲙⲉ ⲁⲧⲉⲧⲛϣⲁϫⲉ ϩⲛ ⲧⲉⲧⲛⲧⲁⲡⲣⲟ ⲁⲩⲱ ⲁⲧⲉⲧⲛϫⲱⲕ ⲉⲃⲟⲗ ϩⲛ ⲛⲉⲧⲛϭⲓϫ ⲉⲧⲉⲧⲛϫⲱ ⲙⲙⲟⲥ ϫⲉ ϩⲛ ⲟⲩⲉⲓⲣⲉ ⲧⲛⲛⲁⲉⲓⲣⲉ ⲛϩⲉⲛϩⲟⲙⲟⲗⲟⲅⲓⲁ ⲛⲉⲛⲧⲁⲛϫⲟⲟⲩ ⲉⲧⲣⲉⲛⲧⲁⲗⲉ ⲑⲩⲥⲓⲁ ⲉϩⲣⲁⲓ ⲛⲧⲉⲣⲱ ⲛⲧⲡⲉ ⲁⲩⲱ ⲉⲩⲱⲧⲛ ⲛⲁⲥ ⲉⲃⲟⲗ ⲛϩⲉⲛⲏⲣⲡ ϩⲛ ⲟⲩⲙⲟⲩⲛ ⲉⲃⲟⲗ ⲁⲧⲉⲧⲛⲙⲟⲩⲛ ⲉⲃⲟⲗ ϩⲛ ⲛⲉⲧⲛϩⲟⲙⲟⲗⲟⲅⲓⲁ ⲁⲩⲱ ϩⲛ ⲟⲩⲉⲓⲣⲉ ⲁⲧⲉⲧⲛⲁⲁⲩ 26ⲉⲧⲃⲉ ⲡⲁⲓ ⲥⲱⲧⲙ ⲉⲡϣⲁϫⲉ ⲙⲡϫⲟⲉⲓⲥ ⲛⲁ ⲓⲟⲩⲇⲁ ⲧⲏⲣⲟⲩ ⲛⲉⲧϩⲙⲟⲟⲥ ϩⲙ ⲡⲕⲁϩ ⲛⲕⲏⲙⲉ ⲉⲓⲥ ϩⲏⲏⲧⲉ ⲁⲉⲓⲱⲣⲕ ϩⲙ ⲡⲁⲛⲟϭ ⲛⲣⲁⲛ ⲡⲉϫⲉⲡϫⲟⲉⲓⲥ ϫⲉ ⲉϣⲱⲡⲉ ⲉⲣⲉⲡⲁⲣⲁⲛ ϫⲓⲛ ⲧⲉⲛⲟⲩ ⲛⲁϭⲱ ϩⲛ ⲧⲧⲁⲡⲣⲟ ⲛⲛⲁ ⲓⲟⲩⲇⲁ ⲧⲏⲣⲟⲩ ⲉⲧⲣⲉⲩϫⲟⲟⲥ ϫⲉ ϥⲟⲛϩ ⲛϭⲓ ⲡϫⲟⲉⲓⲥ ⲡϫⲟⲉⲓⲥ ⲉϫⲙ ⲡⲕⲁϩ ⲧⲏⲣϥ ⲛⲕⲏⲙⲉ 27ϫⲉ ⲉⲓⲥ ϩⲏⲏⲧⲉ ⲁⲛⲟⲕ ⲁⲉⲓⲣⲟⲉⲓⲥ ⲉϩⲣⲁⲓ ⲉϫⲱⲟⲩ ⲉⲧϩⲙⲕⲟⲟⲩ ⲁⲩⲱ ⲉⲧⲙⲣⲡⲉⲧⲛⲁⲛⲟⲩϥ ⲛⲁⲩ ⲛⲥⲉⲱϫⲛ ⲛϭⲓ ⲛⲁ ⲓⲟⲩⲇⲁ ⲧⲏⲣⲟⲩ ⲛⲉⲧⲟⲩⲏϩ ϩⲙ ⲡⲕⲁϩ ⲛⲕⲏⲙⲉ ϩⲛ ⲧⲥⲏϥⲉ ⲙⲛ ⲡⲉϩⲕⲟ ϣⲁⲛⲧⲟⲩⲱϫⲛ 28ⲁⲩⲱ ⲡⲉⲧⲛⲁⲛⲟⲩϩⲙ ϩⲛ ⲧⲥⲏϥⲉ ⲥⲉⲛⲁⲕⲧⲟⲟⲩ ⲉⲃⲟⲗ ϩⲙ ⲡⲕⲁϩ ⲛⲕⲏⲙⲉ ⲉⲡⲕⲁϩ ⲛⲓⲟⲩⲇⲁ ⲉⲩⲥⲟⲃⲕ ϩⲛ ⲧⲉⲩⲏⲡⲉ ⲁⲩⲱ ⲥⲉⲛⲁⲉⲓⲙⲉ ⲧⲏⲣⲟⲩ ⲛϭⲓ ⲛϣⲱϫⲡ ⲛⲓⲟⲩⲇⲁ ⲛⲁⲓ ⲉⲛⲧⲁⲩⲣⲣⲙⲛϭⲟⲉⲓⲗⲉ ϩⲙ ⲡⲕⲁϩ ⲛⲕⲏⲙⲉ ϫⲉ ϣⲁϫⲉ ⲛⲛⲓⲙ ⲡⲉⲧⲥⲙⲟⲛⲧ ⲡⲱⲓ ⲡⲉ ⲡⲉ ϫⲛ ⲡⲱⲟⲩ ⲡⲉ 29ⲁⲩⲱ ⲡⲁⲓ ⲟⲩⲙⲁⲉⲓⲛ ⲛⲏⲧⲛ ⲡⲉ ϫⲉ ϯⲛⲁϭⲙ ⲡⲉⲧⲛϣⲓⲛⲉ ⲁⲛⲟⲕ ⲉϩⲉⲛⲡⲉⲑⲟⲟⲩ ⲡⲉϫⲉⲡϫⲟⲉⲓⲥ 30ⲧⲁⲓ ⲧⲉ ⲑⲉ ⲉⲛⲧⲁⲡϫⲟⲉⲓⲥ ϫⲟⲟⲥ ϫⲉ ⲉⲓⲥ ϩⲏⲏⲧⲉ ⲁⲛⲟⲕ ϯⲛⲁϯ ⲛⲟⲩⲁⲫⲣⲏ ⲡⲣⲣⲟ ⲛⲕⲏⲙⲉ ⲉϩⲣⲁⲓ ⲉⲛϭⲓϫ ⲙⲡⲉϥϫⲁϫⲉ ⲁⲩⲱ ⲉϩⲣⲁⲓ ⲉⲛϭⲓϫ ⲛⲛⲉⲧⲕⲱⲧⲉ ⲛⲥⲁ ⲧⲉϥⲯⲩⲭⲏ ⲛⲑⲉ ⲉⲛⲧⲁⲓϯ ⲛⲥⲉⲇⲉⲕⲓⲁⲥ ⲡⲣⲣⲟ ⲛⲓⲟⲩⲇⲁ ⲉϩⲣⲁⲓ ⲉⲛϭⲓϫ ⲛⲛⲁⲃⲟⲩⲭⲟⲇⲟⲛⲟⲥⲟⲣ ⲡⲣⲣⲟ ⲛⲧⲃⲁⲃⲩⲗⲱⲛ ⲡⲉϥϫⲁϫⲉ ⲁⲩⲱ ⲡⲉⲧϣⲓⲛⲉ ⲛⲥⲁ ⲧⲉϥⲯⲩⲭⲏ 31ⲡϣⲁϫⲉ ⲉⲛⲧⲁⲓⲉⲣⲉⲙⲓⲁⲥ ⲡⲉⲡⲣⲟⲫⲏⲧⲏⲥ ϫⲟⲟϥ ⲃⲃⲁⲣⲟⲩⲭ ⲡϣⲏⲣⲉ ⲛⲛⲏⲣⲉⲓⲁⲥ ⲛⲧⲉⲣⲉϥⲥϩⲁⲓ ⲛⲛⲉⲓϣⲁϫⲉ ⲉⲩϫⲱⲱⲙⲉ ⲉⲃⲟⲗ ϩⲛ ⲧⲧⲁⲡⲣⲟ ⲛⲓⲉⲣⲉⲙⲓⲁⲥ ϩⲛ ⲧⲙⲉϩϥⲧⲟ ⲛⲣⲟⲙⲡⲉ ⲛⲓⲱⲁⲕⲉⲓⲙ ⲡϣⲏⲣⲉ ⲛⲓⲱⲥⲓⲁⲥ ⲡⲣⲣⲟ ⲛⲓⲟⲩⲇⲁ 32ⲧⲁⲓ ⲧⲉ ⲑⲉ ⲉⲛⲧⲁϥϫⲟⲟⲥ ⲛϭⲓ ⲡϫⲟⲉⲓⲥ ⲡⲛⲟⲩⲧⲉ ⲙⲡⲓ︤ⲏ︦ⲗ︥ ⲉϩⲣⲁⲓ ⲉϫⲱⲕ ⲃⲁⲣⲟⲩⲭ 33ϫⲉ ⲁⲕϫⲟⲟⲥ ϫⲉ ⲟⲩⲟⲉⲓ ⲛⲁⲓ ⲟⲩⲟⲉⲓ ⲛⲁⲓ ϫⲉ ⲁⲡϫⲟⲉⲓⲥ ⲟⲩⲉϩ ⲟⲩϩⲓⲥⲉ ⲉϫⲙ ⲡⲁⲙⲕⲁϩ ⲁⲓⲛⲕⲟⲧⲕ ϩⲛ ϩⲉⲛⲁϣ ⲁϩⲟⲙ ⲁⲩⲱ ⲙⲡⲓϭⲓⲛⲉ ⲛⲟⲩⲁⲛⲁⲡⲁⲩⲥⲓⲥ 34ⲁϫⲓⲥ ⲛⲁϥ ⲛⲧⲉⲉⲓϩⲉ ϫⲉ ⲧⲁⲓ ⲧⲉ ⲑⲉ ⲉⲛⲧⲁϥϫⲟⲟⲥ ⲛϭⲓ ⲡϫⲟⲉⲓⲥ ϫⲉ ⲉⲓⲥ ϩⲏⲏⲧⲉ ⲁⲛⲟⲕ ⲛⲉⲛⲧⲁⲓⲕⲟⲧⲟⲩ ϯⲛⲁϣⲣϣⲱⲣⲟⲩ ⲁⲩⲱ ⲛⲉⲛⲧⲁⲓⲧⲟϭⲟⲩ ϯⲛⲁⲡⲟⲣⲕⲟⲩ 35ⲛⲧⲟⲕ ϩⲱⲱⲕ ⲕϣⲓⲛⲉ ⲛⲁⲕ ⲛⲥⲁ ϩⲉⲛⲛⲟϭ ⲙⲡⲣϣⲓⲛⲉ ϭⲉ ⲛⲥⲱⲟⲩ ϫⲉ ⲉⲓⲥ ϩⲏⲏⲧⲉ ⲁⲛⲟⲕ ϯⲛⲁⲉⲓⲛⲉ ⲛϩⲉⲛⲡⲉⲑⲟⲟⲩ ⲉϫⲛ ⲥⲁⲣⲝ ⲛⲓⲙ ⲡⲉϫⲉⲡϫⲟⲉⲓⲥ ⲁⲩⲱ ϯⲛⲁϯ ⲛⲧⲉⲕⲯⲩⲭⲏ ⲉⲧⲣⲉⲥⲟⲩϫⲁⲓ ϩⲛ ⲙⲁ ⲛⲓⲙ ⲉⲧⲕⲛⲁⲃⲱⲕ ⲉⲣⲟⲟⲩ ⲉⲙⲁⲩ. 36 37 38 39 40 41 42 43 44 45 46 47 48 49 50 51 52 53 54 55 56 57 58 59 60 61 62 63