Joel
1ϫⲉ ⲉⲓⲥϩⲏⲏⲧⲉ ⲁⲛⲟⲕ ϩⲛ ⲛⲉϩⲟⲟⲩ ⲉⲧⲙⲙⲁⲩ ⲁⲩⲱ ϩⲙ ⲡⲉⲟⲩⲟⲉⲓϣ ⲉⲧⲙⲙⲁⲩ ⲉⲓϣⲁⲛⲕⲧⲟ ⲛⲧⲁⲓⲭⲙⲁⲗⲱⲥⲓⲁ ⲛⲓⲟⲩⲇⲁ ⲙⲛ ⲑⲓⲉⲣⲟⲩⲥⲁⲗⲏⲙ 2ϯⲛⲁⲥⲱⲟⲩϩ ⲉϩⲟⲩⲛ ⲛⲛϩⲉⲑⲛⲟⲥ ⲧⲏⲣⲟⲩ ⲛⲧⲁⲛⲧⲟⲩ ⲉϩⲣⲁⲓ ⲉⲡⲉⲓⲁ ⲛⲓⲱⲥⲁⲫⲁⲧ ⲛⲧⲁϫⲓ ϩⲁⲡ ⲛⲙⲙⲁⲩ ϩⲙ ⲡⲙⲁ ⲉⲧⲙⲙⲁⲩ ⲉⲧⲃⲉ ⲡⲁⲗⲁⲟⲥ ⲙⲛ ⲧⲁⲕⲗⲏⲣⲟⲛⲟⲙⲓⲁ ⲡⲓ︤ⲏ︦ⲗ︥ ⲛⲁⲓ ⲉⲛⲧⲁⲩϫⲟⲟⲣⲟⲩ ⲉⲃⲟⲗ ϩⲛ ⲛϩⲉⲑⲛⲟⲥ ⲁⲩⲱ ⲡⲁⲕⲁϩ ⲁⲩⲡⲟϣϥ ⲉϩⲣⲁⲩ 3ⲁⲩⲛⲉϫ ⲕⲗⲏⲣⲟⲥ ⲉϫⲙ ⲡⲁⲗⲁⲟⲥ ⲁⲩⲱ ⲁⲩϯ ⲛⲛϣⲏⲣⲉ ϣⲏⲙ ⲉⲩⲡⲣⲟⲛⲉⲓⲁ ⲁⲩⲱ ⲛϣⲉⲉⲣⲉ ϣⲏⲙ ⲁⲩⲧⲧⲁⲩ ⲉⲃⲟⲗ ϩⲁ ⲟⲩⲏⲣⲡ ⲁⲩⲥⲟⲟϥ 4ⲟⲩ ⲡⲉ ⲡⲉⲧⲛϩⲱⲃ ⲛⲧⲱⲧⲛ ⲛⲙⲙⲁⲓ ⲧⲩⲣⲟⲥ ⲙⲛ ⲥⲓⲇⲱⲛ ⲁⲩⲱ ⲧⲅⲁⲗⲓⲗⲁⲓⲁ ⲧⲏⲣⲥ ⲛⲛⲁⲗⲗⲟⲫⲩⲗⲟⲥ ⲙⲏ ⲛⲧⲱⲧⲛ ⲉⲧⲉⲧⲛⲁⲧⲱⲱⲃⲉ ⲛⲁⲓ ⲛⲟⲩⲧⲱⲱⲃⲉ ⲏ ⲛⲧⲱⲧⲛ ⲉⲧⲉⲧⲛⲛⲁⲙⲉⲉⲩⲉ ⲉⲩⲕⲁⲕⲓⲁ ⲉⲣⲟⲓ ϩⲛ ⲟⲩϭⲉⲡⲏ ⲉⲙⲛ ⲱⲥⲕ ϯⲛⲁϯ ⲙⲡⲉⲧⲛⲧⲱⲱⲃⲉ ⲉϫⲛ ⲛⲉⲧⲛⲁⲡⲏⲩⲉ 5ⲉⲃⲟⲗ ϫⲉ ⲡⲁϩⲁⲧ ⲙⲛ ⲡⲁⲛⲟⲩⲃ ⲁⲧⲉⲧⲛϫⲓⲧⲟⲩ ⲁⲩⲱ ⲛⲁⲥⲱⲧⲡ ⲉⲧⲧⲙⲁⲉⲓⲏⲩ ⲁⲧⲉⲧⲛϫⲓⲧⲟⲩ ⲉϩⲟⲩⲛ ⲉⲛⲉⲧⲛⲣⲡⲏⲩⲉ 6ⲁⲩⲱ ⲛϣⲏⲣⲉ ⲛⲓⲟⲇⲁ ⲙⲛ ⲛϣⲏⲣⲉ ⲛⲑⲓ︤ⲗ︦ⲏ︦ⲙ︥ ⲁⲧⲉⲧⲛⲧⲁⲁⲩ ⲉⲃⲟⲗ ⲛⲛϣⲏⲣⲉ ⲛⲛⲟⲩⲉⲓⲉⲛⲓⲛ ϫⲉⲕⲁⲥ ⲉⲧⲉⲧⲛⲁⲛⲟϫⲟⲩ ⲉⲃⲟⲗ ϩⲛ ⲛⲉⲩⲧⲟϣ 7ⲉⲓⲥϩⲏⲏⲧⲉ ⲁⲛⲟⲕ ϯⲛⲁⲧⲟⲩⲛⲟⲥⲟⲩ ⲉⲃⲟⲗ ϩⲙ ⲡⲙⲁ ⲉⲛⲧⲁⲧⲉⲧⲛⲧⲁⲁⲩ ⲉϩⲣⲁⲓ ⲉⲣⲟϥ ⲁⲩⲱ ϯⲛⲁϯ ⲙⲡⲉⲧⲛⲧⲱⲱⲃⲉ ⲉϫⲛ ⲛⲉⲧⲛⲁⲡⲏⲩⲉ 8ⲁⲩⲱ ϯⲛⲁϯ ⲛⲛⲉⲧⲛϣⲏⲣⲉ ⲙⲛ ⲛⲉⲧⲛϣⲉⲉⲣⲉ ⲉϩⲣⲁⲓ ⲉⲧⲟⲟⲧⲟⲩ ⲛⲛϣⲏⲣⲉ ⲛⲓⲟⲩⲇⲁ ⲛⲥⲉⲧⲁⲁⲩ ⲉⲩⲁⲓⲙⲁⲗⲱⲥⲓⲁ ⲉⲩϩⲉⲑⲛⲟⲥ ⲉϥⲟⲩⲏϩ ⲉⲃⲟⲗ ϫⲉ ⲁⲡϫⲟⲉⲓⲥ ϣⲁϫⲉ 9ⲧⲁϣⲉⲟⲉⲓϣ ⲛⲛⲁⲓ ϩⲛ ⲛϩⲉⲑⲛⲟⲥ ⲧⲃⲃⲟ ⲛⲟⲩⲡⲟⲗⲉⲙⲟⲥ ⲧⲟⲩⲛⲟⲥ ⲛⲛⲣⲉϥⲙⲓϣⲉ ϯⲡⲉⲧⲛⲟⲩⲟⲉⲓ ⲉϩⲟⲩⲛ ⲛⲧⲉⲧⲛⲃⲱⲕ ⲉϩⲣⲁⲓ ⲛⲣⲱⲙⲉ ⲧⲏⲣⲟⲩ ⲛⲣⲱⲙⲉ ⲧⲏⲣⲟⲩ ⲛⲣⲉϥⲙⲓϣⲉ 10ⲟⲩⲱⲧϩ ⲛⲛⲉⲧⲛⲥⲓⲛⲉ ⲛⲥⲕⲁⲓ ⲉϩⲉⲛⲥⲏϥⲉ ⲁⲩⲱ ⲛⲉⲧⲛⲟϩⲥ ⲉϩⲉⲛⲙⲉⲣⲉϩ ⲡⲉⲧⲉⲙⲛϭⲟⲙ ⲙⲙⲟϥ ⲙⲁⲣⲉϥϫⲟⲟⲥ ϫⲉ ϯϭⲙϭⲟⲙ ⲁⲛⲟⲕ 11ⲥⲉⲩϩⲧⲏⲩⲧⲛ ⲉϩⲟⲩⲛ ⲛⲧⲉⲧⲛⲃⲱⲕ ⲉϩⲟⲩⲛ ⲛϩⲉⲑⲛⲟⲥ ⲧⲏⲣⲟⲩ ⲉⲧ ϩⲓ ⲛⲉⲩⲉⲣⲏⲩⲩ ⲛⲧⲉⲧⲛⲥⲉⲩϩⲧⲏⲩⲧⲛ ⲉⲡⲙⲁ ⲉⲧⲙⲙⲁⲩ ⲡⲣⲙⲣⲁϣ ⲙⲁⲣⲉϥϣⲱⲡⲉ ⲛⲣⲉϥⲙⲓϣⲉ 12ⲙⲁⲣⲟⲩⲧⲱⲟⲩⲛ ⲛϭⲉⲃⲱⲕ ⲉϩⲣⲁⲓ ⲛϭⲓ ⲛϩⲉⲑⲛⲟⲥ ⲧⲏⲣⲟⲩ ⲉⲧ ϩⲓ ⲛⲉⲩⲉⲣⲏⲩ ⲛⲧⲉⲧⲛⲥⲉⲩϩⲧⲏⲩⲧⲛ ⲉⲡⲙⲁ ⲉⲧⲙⲙⲁⲩ ⲡⲣⲙⲣⲁϣ ⲙⲁⲣⲉϥϣⲱⲡⲉ ⲛⲣⲉϥⲙⲓϣⲉ 13ⲧⲛⲛⲟⲟⲩ ⲛⲛⲉⲧⲛⲟϩⲥ ϫⲉ ⲁⲡϫⲱⲱⲗⲉ ϩⲱⲛ ⲉϩⲟⲩⲛ ⲃⲱⲕ ⲉϩⲟⲩⲛ ⲛⲧⲉⲧⲛϩⲱⲙ ϫⲉ ⲁⲧⲉϩⲣⲱⲧ ⲙⲟⲩϩ ⲁⲩⲱ ⲛⲉⲓⲟⲙ ⲁⲩⲣ ϩⲟⲩⲉ ⲡⲱⲱⲛ ⲉⲃⲟⲗ ϫⲉ ⲁⲥⲁϣⲁⲓ ⲛϭⲓ ⲧⲉⲩⲕⲁⲕⲓⲁ 14ϩⲉⲛⲣⲟⲟⲩ ⲁⲩⲱϣ ⲉⲃⲟⲗ ϩⲙ ⲡⲓⲁ ⲙⲡϩⲁⲡ ⲁⲩⲱ ϥϩⲏⲛ ⲉϩⲟⲩⲛ ⲛϭⲓ ⲡϩⲟⲟⲩ ⲙⲡϫⲟⲉⲓⲥ ϩⲙ ⲡⲓⲁ ⲙⲡϩⲁⲡ 15ⲡⲣⲏ ⲙⲛ ⲡⲟⲟϩ ⲥⲛⲁⲣ ⲉⲃⲏ ⲁⲩⲱ ⲛⲥⲓⲟⲩ ⲛⲥⲉⲛⲁϯ ⲁⲛ ⲙⲡⲉⲩⲟⲩⲟⲉⲓⲛ 16ⲡϫⲟⲉⲓⲥ ⲇⲉ ϥⲛⲁⲱϣ ⲉⲃⲟⲗ ϩⲛ ⲥⲓⲱⲛ ⲁⲩⲱ ϥⲛⲁϯ ⲙⲡⲉϥϩⲣⲟⲟⲩ ⲉⲃⲟⲗ ϩⲛ ⲑⲓ︤ⲗ︦ⲏ︦ⲙ︥ ⲧⲡⲉ ⲙⲛ ⲡⲕⲁϩ ⲛⲁⲛⲟⲉⲓⲛ ⲡϫⲟⲉⲓⲥ ⲇⲉ ⲛⲁϯⲥⲟ ⲉⲡⲉϥⲗⲁⲟⲥ ⲁⲩⲱ ϥⲛⲁϯϭⲟⲙ ⲛⲛϣⲏⲣⲉ ⲙⲡⲓ︤ⲏ︦ⲗ︥ 17ⲛⲧⲉⲧⲛⲉⲓⲙⲉ ϫⲉ ⲁⲛⲟⲕ ⲡⲉ ⲡϫⲟⲉⲓⲥ ⲡⲉⲧⲛⲛⲟⲩⲧⲉ ⲉⲓⲟⲩⲏϩ ϩⲛ ⲥⲓⲱⲛ ⲡⲁⲧⲟⲟⲩ ⲉⲧⲟⲩⲁⲁⲃ ⲁⲩⲱ ⲑⲓ︤ⲗ︦ⲏ︦ⲙ︥ ⲛⲁϣⲱⲡⲉ ⲛⲟⲩⲡⲟⲗⲓⲥ ⲉⲥⲟⲩⲁⲁⲃ ⲛⲧⲉⲧⲙϣⲙⲙⲟ ϭⲉ ⲙⲟⲟϣⲉ ⲉϩⲣⲁⲓ ⲛϩⲏⲧⲥ 18ⲁⲩⲱ ⲥⲛⲁϣⲱⲡⲉ ϩⲙ ⲡⲉϩⲟⲟⲩ ⲉⲧⲙⲙⲁⲩ ⲛⲧⲟⲩⲉⲓⲏ ⲛⲁϣⲟⲩⲟ ⲉⲃⲟⲗ ⲛⲟⲩⲗⲟϭ ⲁⲩⲱ ⲛⲃⲟⲩⲛⲟⲥ ⲥⲉⲛⲁϣⲟⲩⲉ ⲉⲣⲱⲧⲉ ⲉⲃⲟⲗ ⲁⲩⲱ ⲙⲙⲁ ⲛϯⲙⲟⲟⲩ ⲧⲏⲣⲟⲩ ⲛⲓⲟⲩⲇⲁ ⲥⲉⲛⲁⲧⲁⲩⲉ ⲛⲉⲩⲙⲟⲟⲩ ⲉⲃⲟⲗ ⲁⲩⲱ ⲟⲩⲛ ⲟⲩⲡⲏⲅⲏ ⲛⲁⲉⲓ ⲉⲃⲟⲗ ϩⲙ ⲡⲏⲓ ⲙⲡϫⲟⲉⲓⲥ ⲛⲥⲧⲟ ⲙⲡⲉⲭⲉⲓⲙⲁⲣⲣⲟⲥ ⲛⲛϣⲟⲛⲧⲉ 19ⲕⲏⲙⲉ ⲛⲁϣⲱⲡⲉ ⲉⲩⲧⲁⲕⲟ ⲁⲩⲱ ϯⲇⲟⲩⲙⲁⲓⲁ ⲉⲩⲙⲁ ⲛϫⲁⲓⲉ ⲛⲧⲁⲕⲟ ⲉⲃⲟⲗ ⲙⲡϫⲓⲛϭⲟⲛⲥ ⲛⲛϣⲏⲣⲉ ⲛⲓⲟⲩⲇⲁ ⲉⲧⲃⲉ ϫⲉ ⲁⲩⲡⲉϩⲧ ⲟⲩⲥⲛⲟϥ ⲛⲇⲓⲕⲁⲓⲟⲓ ⲉⲃⲟⲗ ϩⲙ ⲡⲉⲩⲕⲁϩ 20ϯⲇⲟⲩⲙⲁⲓⲁ ⲇⲉ ⲥⲛⲁϭⲱⲣϭ ϣⲁ ⲉⲛⲉϩ ⲁⲩⲱ ⲑⲓ︤ⲗ︦ⲏ︦ⲙ︥ ⲉϩⲉⲛϫⲱⲙ ⲛϫⲱⲙ 21ⲁⲩⲱ ϯⲛⲁⲉⲓⲣⲉ ⲙⲡⲉⲕⲃⲁ ⲙⲡⲉⲩⲥⲛⲟϥ ⲛⲧⲁⲧⲙⲕⲱ ⲉⲃⲟⲗ ⲉⲩⲱ ⲡϫⲟⲉⲓⲥ ϥⲛⲁⲟⲩⲱϩ ϩⲛ ⲥⲓⲱⲛ
Copyright information for
CopSahBible2