Psa 83 | CopSahBible2 | STEP | ⲉⲡϫⲱⲕ ⲉⲃⲟⲗ ϩⲁ ⲛⲉϩⲣⲱⲧ ⲡⲉⲯⲁⲗⲙⲟⲥ ⲛⲛϣⲏⲣⲉ ⲛⲕⲟⲣⲉ

Psalms 83

1 ⲉⲡϫⲱⲕ ⲉⲃⲟⲗ ϩⲁ ⲛⲉϩⲣⲱⲧ ⲡⲉⲯⲁⲗⲙⲟⲥ ⲛⲛϣⲏⲣⲉ ⲛⲕⲟⲣⲉ 2 ⲉϣϫⲉ ϩⲉⲛⲙⲉⲣⲓⲧ ⲛⲉ ⲛⲉⲕⲙⲁ ⲛϣⲱⲡⲉ ⲡϫⲟⲉⲓⲥ ⲛⲛϭⲟⲙ 3 ⲁⲧⲁⲯⲩⲭⲏ ⲟⲩⲁϣⲟⲩ ⲁⲩⲱ ⲁⲥϣⲱⲥⲙ ⲛⲥⲁ ⲛⲉⲕⲁⲩⲗⲏ ⲡϫⲟⲉⲓⲥ ⲁⲡⲁϩⲏⲧ ⲙⲛ ⲧⲁⲥⲁⲣⲝ ⲧⲉⲗⲏⲗ ⲉϫⲙ ⲡⲛⲟⲩⲧⲉ ⲉⲧⲟⲛϩ 4 ⲕⲁⲓ ⲅⲁⲣ ⲁⲩϫⲁϫ ϭⲛⲟⲩⲏⲓ ⲛⲁϥ ⲁⲩⲱ ⲁⲩϭⲣⲙⲡϣⲁⲛ ϭⲛⲟⲩⲙⲁϩ ⲛⲁⲥ ⲡⲙⲁ ⲉⲧⲥⲛⲁⲕⲁⲛⲉⲥϣⲏⲣⲉ ⲛϩⲏⲧϥ 5 ⲛⲉⲕⲑⲩⲥⲓⲁⲥⲧⲏⲣⲓⲟⲛ ⲡϫⲟⲉⲓⲥ ⲛⲛϭⲟⲙ ⲡⲁⲣⲣⲟ ⲁⲩⲱ ⲡⲁⲛⲟⲩⲧⲉ 6 ⲛⲁⲓⲁⲧⲟⲩ ⲛⲟⲩⲟⲛ ⲛⲓⲙ ⲉⲧⲟⲩⲏϩ ϩⲙ ⲡⲉⲕⲏⲓ ⲥⲉⲛⲁⲥⲙⲟⲩ ⲉⲣⲟⲕ ϣⲁ ⲉⲛⲉϩ ⲛⲉⲛⲉϩ ⲇⲓⲁⲯⲁⲗⲙⲁ ⲛⲁⲓⲁⲧϥ ⲙⲡⲣⲱⲙⲉ ⲉⲧⲕⲛⲁϣⲟⲡϥ ⲉⲣⲟⲕ ⲡϫⲟⲉⲓⲥ 7 ⲁϥⲕⲱ ⲛϩⲉⲛⲙⲉⲉⲩⲉ ϩⲙ ⲡⲉϥϩⲏⲧ ⲉⲡⲉⲓⲁ ⲙⲡⲣⲓⲙⲉ ⲡⲙⲁ ⲉⲛⲧⲁϥⲥⲙⲛⲧϥ ⲕⲁⲓ ⲅⲁⲣ ⲡⲉⲧⲥⲙⲛⲛⲟⲙⲟⲥ ⲛⲁϯ ⲛϩⲉⲛⲥⲙⲟⲩ 8 ⲥⲉⲛⲁⲙⲟⲟϣⲉ ⲉⲃⲟⲗ ϩⲛ ⲟⲩϭⲟⲙ ⲉⲩϭⲟⲙ ⲡⲛⲟⲩⲧⲉ ⲛⲛⲛⲟⲩⲧⲉ ⲛⲁⲟⲩⲱⲛϩ ⲉⲃⲟⲗ ϩⲛ ⲥⲓⲱⲛ 9 ⲥⲱⲧⲙ ⲉⲡⲁϣⲗⲏⲗ ⲡϫⲟⲉⲓⲥ ⲡⲛⲟⲩⲧⲉ ⲛⲛϭⲟⲙ ϫⲓⲥⲙⲏ ⲉⲣⲟⲓ ⲡⲛⲟⲩⲧⲉ ⲛⲓⲁⲕⲱⲃ ⲇⲓⲁⲯⲁⲗⲙⲁ 10 ⲁⲛⲁⲩ ⲡⲛⲟⲩⲧⲉ ⲧⲉⲛⲛⲁϣⲧⲉ ⲛⲅϭⲱϣⲧ ⲉϫⲙ ⲡϩⲟ ⲙⲡⲉⲕⲭ︤ⲣ︦ⲥ︥ 11 ϫⲉ ⲛⲁⲛⲟⲩⲟⲩϩⲟⲟⲩ ⲛⲟⲩⲱⲧ ϩⲛ ⲛⲉⲕⲁⲩⲗⲏ ⲉϩⲟⲩⲉ ϣⲟ ⲙⲡⲉⲩⲃⲟⲗ ⲁⲓⲥⲟⲧⲡⲥ ⲛⲁⲓ ⲛϩⲟⲩⲟ ⲉⲧⲣⲉⲩⲛⲟϫⲧ ϩⲙ ⲡⲏⲓ ⲙⲡⲛⲟⲩⲧⲉ ⲉϩⲟⲩⲉ ⲟⲩⲱϩ ϩⲛ ⲙⲙⲁ ⲛϣⲱⲡⲉ ⲛⲛⲣⲉϥⲣⲛⲟⲃⲉ 12 ϫⲉ ⲡϫⲟⲉⲓⲥ ⲡⲛⲟⲩⲧⲉ ⲙⲉ ⲙⲡⲛⲁ ⲙⲛ ⲧⲙⲉ ⲁⲩⲱ ϥⲛⲁϯ ⲛⲟⲩⲭⲁⲣⲓⲥ ⲙⲛ ⲟⲩⲉⲟⲟⲩ ⲛⲉⲧⲙⲟⲟϣⲉ ϩⲛ ⲟⲩⲙⲛⲧⲃⲁⲗϩⲏⲧ ⲙⲡϫⲟⲉⲓⲥ ⲛⲁϥⲟϭⲟⲩ ⲁⲛ ⲛⲛⲁⲅⲁⲑⲟⲛ 13 ⲡϫⲟⲉⲓⲥ ⲡⲛⲟⲩⲧⲉ ⲛⲛϭⲟⲙ ⲛⲁⲓⲁⲧϥ ⲙⲡⲣⲱⲙⲉ ⲉⲧⲛⲁϩⲉⲗⲡⲓⲍⲉ ⲉⲣⲟⲕ